Iiḍighi Abutelhedom Mọ
7 Kụ ogbogh ọpinyon rịkia phọ apuru Stivin mọ: “Ịphen bịdi ọghaaph bọ ịne ni?” 2 Kụ a Stivin ạphagharanhaan mọ: “We phọ, bumor r’ạburude, ịnaghan. Kụ Ebrạhạm ọde phọ ayira agbi bọ ọghi orugh ẹpe Herạn, Ẹnhaan eghuan phọ amitenhaan ni nyọdi mem mọ ọdi odi bọ Mẹsopotemia, 3 kụ ạḅenhi mọ: ‘Ḍụa sịen eelhe phọ ạna ạḅilhe ạwilhe siya phọ ạna kụ ạghi ẹpe ade phọ mị kaḍeenhaan bọ nyịnha.’ 4 Kụ ọdi ạḅua eelhe phọ ạ Kạldiạ ạghi arugh ẹpe Herạn. Kụ ọde phọ ọdi romhugh ẹpe phọ, kụ Ẹnhaan ạḅenhi nyọdi mọ ọdi ạḍua ẹpe phọ aru sịen ade phọ ạḍien nyinha edi bọ nyịidipho. 5 Kụolo mem mọ ọpo phọ, Ẹnhaan ọ́ngo nyọdi pạkiri ade phọ, ghạlhamo r’esi dị ẹmhan eniin ẹda ịdipho erua, aguan ghụn ọngo ọdi r’ạnmuny* phọ ọdi de phọ ghạlhamo r’ịduon ọdi mọony kọ̋mhoogh bọ mem mọ ọpo phọ. 6 Ọḅaram ịsien, Ẹnhaan ạḅenhi nyọdi mọ ạnmuny* phọ ọdi koḍighi ruuruen de dị íḍighi ḍịo ạbidi kụ awe ade phọ oḍighi bịdi rẹbenhe ọḅilhe ọmiinhe bịdi esi 400 ạsia. 7 Ẹnhaan ạḅem mọ, ‘Mị kasoph ni ọoruen ạngo eelhe phọ koḍighi bọ bịdi rẹbenhe. Ịpe phọ reten kụ bịdi ọḍua de phọ ạḍiphe phọ kụ otu sịen ade phọ ạḍien phọ okumuan ghan rukumuan iigbia ụngo ịmhi.’
8 “Ẹnhaan aghiran ni kẹn nyọdi ịyo iḍun, kụ ọdi aḍighi ọde Ạịzik kụ aḍun nyọdi omhunhenhiom ọphaanya aḍughul otu phọ, kụ Ạịzik aḍighi ọde a Jekọb, kụ a Jekọb aḍighi ọde a 12 aruwo ẹmhu arughun otu phọ. 9 Kụ aruwo ẹmhu arughun otu phọ ụlhogh ni ḍien* Josẹf kụ aalha nyọdi we Ijipt. Kụolo Ẹnhaan ạrol li r’ọdi, 10 kụ ạphel nyọdi ạsighe esi oomo ịiḅaghamhi phọ ọdi, ạḅilhe ạngo nyọdi ọsu olhoghi kụ aḍighi ịdi ọdi ạḅeraan Fẹro uwo ẹmha phọ Ijipt. Kụ ạ Fẹro ạma nyọdi ophogh Ijipt r’oomo otu phọ ọdi. 11 Kụolo ịgbakuro isoor ri oomo Ijipt ra Kenạn, kụ ẹkom igbogh ịmhinhimhiin dị tụtu ạburude ạburude phọ ayira ụ́miin ịyaar olhe. 12 Kụ a Jekọb ạnhaghan mọ eḍien edi Ijipt, kụ arom bụrude ạburude phọ ayira mọ ọghi ẹpe phọ. 13 Bịdi rọḅilhe rọghi omhunhenhiom ịyal amem kụ a Josẹf aganhanhamhi loor ọdi aḍeenhaan bumor phọ ọdi kụ ạ Fẹro alhegheri eghun otu phọ a Josẹf. 14 Kụ a Josẹf arom mọ ọghi ọḅenhi Jekọb ọde phọ ọdi r’oomo asiya phọ ọdi mọ ọḍua Kenạn oru Ijipt. Kụ oomo ạbidi uḍighi 75 awe. 15 Kụ a Jekọb ạghi Ijipt, kụ ẹpe phọ kụ ịdi ọdi r’ạburude ạburude phọ ayira ọrol omhuughu. 16 Kụ ọpham bịdi ọghimhom Sikẹm kụ oḍi olhoghi oḍi phọ Ebrạhạm aghoom bọ ikpoki a silva ḍịghaagh ạnmuny phọ a Hemọ ẹpe Sikẹm.
17 “Kụ ịduon rẹteeny bọ mem mọ Ẹnhaan kamunhenhi bọ ịpe ọdi aguan bọ Ebrạhạm, awe phọ ụbugh ghan bịn ẹpe Ijipt, 18 kụ ọnhon uwo ẹmha amite sịphe Ijipt dị Josẹf úlegheri. 19 Uwo ẹmha phọ ọpo phọ ạzoom ni we phọ ayira eten ikeḍi kụ ạkpaariom bụrude phọ mọ ọwilhe ịbam ạnmuny ạbidi dị pụruku ọmhar pịdi omuughu. 20 Mem mọ ọpo phọ kụ ẹdi ọmhar Mozis, kụ ọdi ạkar kụ ạnhighe ghạlhamo r’aghisigh Ẹnhaan. Kụ ụpham ni nyọdi ịraar ụnwanyu sịphe otu ọde phọ ọdi. 21 Kụolo mem mọ ọwilhe bọ nyọdi, ọnyanhi ạ Fẹro ạsighe ni nyọdi aakonhom ịdipho ọony ọdi. 22 Esi ịduon phọ ụtughemhi ni Mozis ịlo oomo olhegheri ịyaar* ạbuo Ijipt phọ. Kụ ạraraar phọ ọdi ạghaaph ghan bọ ạḅilhe aḍighi iḍeenhaan ni mọ ọdi ạmoogh ịikpo.
23 “Kụ mem dị ọdi ạmhan bọ 40 ạsia, iru ni olhoghi ọdi ọghi ophogh abumor phọ ọdi, we phọ Izrẹl. 24 Kụ ọdi ạmhiin ọlo Ijipt dị rạkpuuroghom oniin ọnyo ạbidi, kụ ạgur aghiigh ọlhoghonhaan ạḍighaagh umor phọ ọdi oḍighi oḅulhemhian. 25 Ọdi ạsighe mọ abumor phọ ọno kọnaghanhan ni mọ Ẹnhaan kạsighe nyịnho kụ ạpelhom bịdi, kụolo bịdi ụ́naghanhan ịdipho. 26 Kụ ḍio phọ etum bọ pạ ọdi aazuanhaan ni ịyal awe Izrẹl dị robeeghi, kụ ạkparagha oḍighi ịdi bịdi kọkaaphogh r’ẹepho, esi ọḅem mọ: ‘We phọ, nyinha abumor. Uḍighi ika kụ nyinha rebeeghi bọ?’ 27 Kụolo ọpo rakuphogh bọ matuman phọ ọdi anyu ni Mozis kụ ạḅem mọ: ‘Ạnhian kụ aḍighi nyịnha ọtooghia r’oogboom ịiruen ayoor? 28 Nạ rạwa oghiigh aani ạmhi ịdipho nạ aghiigh bọ ọlo Ijipt phọ iḅue phọ ḍụghum?’ 29 A Mozis rọnhaghan ịphen phọ kụ asuma ạghi Midian ạrol ịdipho ooruen, kụ ạmhoogh ịyal ịbam ạnmuny ẹpe phọ.
30 “Kụ 40 ạsia reten kụ ọokpaany amitenhaan nyọdi ẹpe ẹdala phọ etuman bọ Ẹeḅaraph ạ Sạịnạị esi ekpu eḍum dị ạnian reemor. 31 A Mozis ạmhiin bọ ịphen phọ, iḍighi ni iikia esi ọdi. Kụ ọdi atelhe rạki ophogh, kụ ạnhaghan ẹḍogh a Jehova* dị ẹḅem mọ: 32 ‘Mị Ẹnhaan ạburude ạburude phọ ạna, Ẹnhaan Ebrạhạm rạ Ạịzik ra Jekọb.’ Kụ a Mozis amhiigh ophiigha r’oghiilhaan, bịn ómhighiron mụn ọghi ophogh. 33 Kụ a Jehova* ạḅenhi nyọdi mọ: ‘Kpọronhaan rokoro phọ ạna, ịdi eḍighi bọ esi phọ nạ ạmheera bọ ade iigbia. 34 Mị mạkar ạmiin ịpe rọkpuuroghom bọ we phọ ạmhi odi bọ ẹpe Ijipt, mị ạḅilhe ạnaghan ịkuph phọ ạbidi, kụ mị maru ọphel ạbidi. Esi ịduon phọ, mị karom nyịnha ọghi Ijipt.’ 35 A Mozis phọ bịdi oghel bọ, esi ọḅem mọ: ‘Ạnhian kụ aḍighi nyịnha ọtooghia r’oogboom ịiruen ayoor?’ kụ ẹdi Ẹnhaan arom mọ aḍighi ọtooghia r’ọpelia ạbidi dị eego esi ọokpaany phọ amitenhaan bọ nyọdi sịphe ekpu eḍum mọ. 36 Oye phọ ọpo phọ aḍiemhiom bịdi amiteom Ijipt, ạḅilhe aḍighi ịiḍaany ẹpe Ijipt r’ẹpe Ọphiiny Igbilha phọ r’ẹpe ẹdala phọ esi 40 ạsia.
37 “Ọphon kụ a Mozis phọ ạḅenhi bọ we phọ Izrẹl mọ: ‘Ẹnhaan kimiteomonhaan inyinha oyil ịduon ạmhi sịphe igbo phọ anyinha.’ 38 Ọdi r’ọokpaany phọ ạḅaanhaan bọ nyọdi ẹpe Ẹeḅaraph ạ Sạịnạị ụrol li r’awe phọ r’ạburude ạburude phọ ayira ẹpe ẹdala phọ, kụ ụngo ni nyọdi dom dị eḍighi ḍịo iigbia ẹḅilhe edi eye ọngo ayira. 39 Kụolo ạburude ạburude phọ ayira úmeera ụnaghanhan nyọdi, bịdi ughel ghụn nyọdi kụ oḅula ẹpe Ijipt sịphe ilhoghi phọ ạbidi, 40 esi ọḅenhi Erọn mọ: ‘Ụkaanhaan iyoor rụmhugh dị kiḍiemhiom iyoor. Loor esi dị yoor úlegheri ịyaar lọ memitenhaan Mozis phọ uḍiemhiom bọ iyoor amiteom de phọ Ijipt.’ 41 Kụ bịdi ọka nạm riiḍio phọ ịpe phọ kụ ọphighiron ẹkia ọngo ẹkaanheen ịyaar phọ ọḅilhe omhiigh ọghelhom asiloor ghisigh ịyaar phọ bịdi ọka bọ. 42 Kụ Ẹnhaan ạwilhe bịdi mọ ooseeny rạraar phọ edi bọ ẹpe k’ạke phọ, ịdipho ọge bọ ni sịphe ịge Ariil phọ mọ: ‘We Izrẹl, esi 40 ạsia phọ nyinha ẹrol bọ ẹpe ẹdala phọ, mị kụ kóye phọ nyinha ẹphinyon ghan bọ kịrokiro ạrikia phọ ẹngo, mị phọ ni? 43 Nyinha ịpham ghan ghụn ogbogo ẹmhugh phọ oghol bọ mọ a Molọk r’ẹenhaan ẹmhugh phọ oghol bọ mọ a Rifạn kụ erelheom. Ạrumhugh phọ ịphen phọ kụ ịdi nyinha ẹka ọoḅereghi. Esi ịduon phọ mị kaḍighi ịdi kịsighe inyinha okeelhom rikpisi dị ẹkel epu Bạbịlọn.’
44 “Ẹpe ẹdala phọ ạburude ạburude phọ ayira ụmhoogh ni ogbogo phọ aḍeenhaan bọ mọ Ẹnhaan odi ni r’ạbidi, ụlhogh ọghighemhi ọpo Ẹnhaan aḍeenhaan bọ Mozis. 45 Kụ ụḅogh ni ogbogo phọ ọngo ọnhon oghiil ạburude ạburude ayira kụ bịdi ọpham ọdapham Jọsụạ oḍigh de phọ awe areelhe phọ kụ ọmhoogh bọ, bụphe Ẹnhaan ạtuan bọ bụrude ạburude phọ ayira aphorogh. Kụ ogbogo phọ ạrol li sịen phọ tụtu ẹteeny mem mọ a Devid. 46 Ọdi ạḅeraan ni Ẹnhaan kụ ạlhom mọ ọngo nyịnho eepoogh ọlhoghonhaan Ẹnhaan phọ a Jekọb esi ọrol. 47 Kụolo ạ Sọlọmọn kụ ạlhogh ghụn otu phọ. 48 Tọrobo ịpe ẹrol bọ, Ọpo Apelheghiom Bọ rátugh ghan esi dị ọlhoghom rạghaagh, ịdipho oniin oyil ạḅem bọ mọ: 49 “A Jehova* ạḅem mọ: ‘Ạke phọ ạgada ịtooghi ạmhi, kụ ade phọ ịkasi ọkpasaghiom aruwol ạmhi. Ọghen ọdo otu kụ ịdi nyinha kẹtue ịlhoghonhaan ịmhi, kụ iḍighen kụ amarugh ạmhi? 50 Mị ḍịen kụ ụ́lem bọ oomo ạraraar phọ ịphen phọ?’”
51 “We ọḅaar ẹmhu r’ịgbagara arokpom r’areḅeri dị eḍuan,* nyinha edi ghan bịn okikima uwaloor iigbia phọ; nyinha reḍighi ghan ịpe ạburude ạburude phọ anyinha oḍighi ghan bọ. 52 Ọghen oyil kụ ẹdi ạburude ạburude phọ anyinha ụ́gbiphoghom? Ii, bịdi ụze ni bụphe ọghaaph bọ k’ẹpe ọmhan ịlo eruanhaan oye elhiom eḍighinhom ịyaar phọ, ọpo pụruku nyinha aal bọ ẹḅilhe eghiigh, 53 nyinha phọ Ẹnhaan ạngo bọ Olhogh phọ dị eego esi ạruukpaany kụolo rẹ́daph ghan bo.”
54 Bịdi ọnhaghan bọ ịphen phọ, ụghagh ni ilhoghi kụ omhiigh ọghirigha ạralhaal ạbidi. 55 Kụolo uwaloor iigbia phọ amuza ni loor ọdi, kụ ọdi aphogh ẹpe k’ạke kụ ạmhiin eghuan phọ Ẹnhaan ra Jizọs dị ạmheera ḍịghaagh elhiom Ẹnhaan, 56 kụ ọdi ạḅem mọ: “Mị ạmiin sịke phọ dị eghunyonhu ra Ọony phọ oye dị ạmheera ḍịghaagh elhiom Ẹnhaan.” 57 Kụ bịdi ọlo kụ ọsighe rạghaagh ạbidi opua yogh reḅeri ạbidi kụ oogborion ọghi ọteeny nyọdi. 58 Bịdi rọpham nyọdi ẹpe ẹmha phọ romiteom, kụ omhiigh oroḅol ọdi ikpo. Kụ bụphe ọgba bọ ọkpe ọḅam ẹmhu ọdi osereghi rụsuoma ạnyu ạbidi ghisigh ọnyo ugheel ọony dị oghol mọ ạ Sọl. 59 Ịduon rotoḅol bọ Stivin ikpo phọ, kụ ọdi ạlo mọ: “Jizọs Uwo Ẹmhoogh, mị ạḅogh ghuḍum* mọ ạmhi ạlogh ḍịghaagh ạna.” 60 Kụ ọdi akpuḍian, kụ ạlo mọ: “Jehova,* kásoph ọoruen apumhe bịdi loor ẹmhu ịkaraph phọ ịphen phọ.” Kụ ọdi rọḅem ịduon phọ bịn ạnhaanhi rạlha aḍuugh.*