Osighẹ Avidio Kụ Ophamhạm Ituughạ

Ibadị agomẹt oomo isiẹn aḅirinhi phọ moḅẹm mọ awe kuu/tumaghan mun iboom ḅilhẹ mọ awe kuu/kpomhoghan ghan mun riisi ogbo. Abugbaanhaạn AZihova osopha ni odaphạn iromoghiom mọ iphẹn phọ, kuolọ okiọm ni ghisigh ropạm ghan ituughạ eten dị iiḅaghamhị ke/tọl. Oḍighi iduọn phọ, arookpomhoghan phọ rosighẹ ghan ni app oḍighinhom avidio dị oghol mọ Zoom, kophamhạm ituughạ.

Oḍighi idị yira kogbor ghan opạm ituughạ eten dị iiḅaghamhị ke/tọl, Aloor Phọ Repogh Bọ memheeraam mọ osighẹ iisogh phọ rosogh ghan bọ oghoonhaan rookpomhoghan phọ Zoom. Iphẹn phọ melhoghonhaạn ḍighaạgh inhiin arookpomhoghan dị mu/tue umoọgh aani ikpoki oghoom app osighẹ avidio kụ ophamhạm ituughạ phọ, emhạn bọ ni $15-$20 (₦5832.60-₦7776.80) obobọ dị epel li siphẹ. Arookpomhoghan phọ iphẹn phọ ibadị amem usighẹ ghan oḍighinhom si-app dị ro/ko ghan kụ i/meera ghan mọ ibadị awe kụ osighẹ oḍighinhom ḅilhẹ engooghị ghan iiḅaghamhị. Oomo arookpomhoghan phọ rosighẹ ghan bọ koḍighinhom Zoom oḍighom mọ romooghọm ni suọ, loor esi iduọn iiḅaghamhị re/tọl ghan bọ ḅilhẹ remeera ghan bọ mọ ibadị awe kụ osighẹ oḍighinhom mem lọ ophạm ituughạ. K’arodon ni, arookpomhoghan dị epel li 65,000 dị odi reelhe dị epel li 170 osighẹ ni roḍighinhom app phọ ophọn phọ ookpomhoghan phọ ogho bọ.

Ookpomhoghan aKairagi, odi bọ Manado, epẹ North Sulawesi, Indonesia, uwilhẹ ni ạpp dị bidị oḍighinhom ghan omhiigh osighẹ oḍighinhom aZoom oḍighom mọ. Umor phọ Hadi Santoso aḅẹm mọ: “Ghalhamọ abumor r’abumaranhi dị u/kạr umaạr ilọ osighẹ oḍighinhom bịn rokelhọm ghan ni ituughạ phọ iboom, loor esi dị i/moghi dị bidị kozuughị iboom kụ ogbi oḍigh aani ituughạ phọ.”

Lester Jijón, Jr., okumor oye dị odi Ookpomhoghan aGuayacanes Oeste epẹ Guayaquil, Ecuador, aḅẹm mọ: “Loor esi iduọn ibadị abumor r’abumaranhi u/mhoọgh bọ ikpoki, mikparanhaạn ni iniin arookpomhoghan ogho aani aZoom mọ dị keḍighi idị oomo ookpomhoghan phọ kopạm ghan ituughạ. Iduọn kụ iḍighi kụ yoor rosẹph ni oḍighom mọ ogho aZoom mọ ophọn rameera ghan bọ mọ ibadị awe osighẹ oḍighinhom, yoor romạgh aani ghan ni bunhọn awe oru aani ituughạ phọ oopho, dị oghiilhaan mọ awe phọ kopughạn u/lo.”

Johnson Mwanza, okumor oye ookpomhoghan Ngwerere North epẹ Lusaka, Zambia, agẹ mọ: “Ibadị abumor r’abumaranhi moḅẹm kụ oḅilhẹ oḅẹm mọ, ‘iikolhobian aZoom mọ ookpomhoghan phọ omhiteom bọ re/ḍighi ghan idị yoor koḍuuraan otuman bumor r’abumaranhi phọ ayoor bịn, kuolọ reḍighi ghan idị yoor kologhoma mọ aZihova uphomhoghiạn ni iyoor aḅilhẹ ruphogh ghan iyoor.’”

Usighẹ ikpoki dị oseere oḍighinhom mem dị ekperenhom iyaạr emite kụ oghoom bọ Zoom oḍighom mọ. Roteẹny ghan ikpoki phọ iphẹn phọ dị eego esi iisogh phọ rosogh ghan bọ oomo isiẹn aḅirinhi phọ. rosogh ghan iisogh phọ iphẹn phọ dị eego esi oghị isiphẹ donate.jw.org. Reḍighi iisogh phọ anyinha eḍuạ bọ k’ekpom kụ emite, epẹ reloghonhaạn bọ kẹn ḍighaạgh inhọn odọ iiḍighi oomo isiẹn aḅirinhi phọ.—2 Korịnt 8:14.