ESI ITUUGHẠ PHỌ 56
Ḍighi Bin Anạ Obughẹ Amuḅọph Phọ Odi Bọ Siphẹ Ookpomhoghan Phọ
Mem dị yira odi igbo abumor phọ ayira, yira rologhoma aani ghan ni idiphọ Uw-emhạ phọ Devid, opọ aḅẹm bọ mọ: “P’eeghe idị enhighẹ eḅilhẹ edụgh dị abumor odimom r’amuḅọph!” (Psalm 133:1) Amuḅọph phọ ayira o/gạ bịn omite. Torobọ onyọ ayira raḍighi aani ghan ni iyaạr pidị amuḅọph atọl siphẹ ookpomhoghan phọ.
1. Eeghe iyaạr kụ iḍighan elhegh igbo awe phọ Enhaạn?
Eḍighi maạr dị nạ aghị ituughạ ookpomhoghan phọ enhọn ekpisi, ghalhamọ onhụ phọ nạ o/naghạn ni, oḅio anạ kapọ ni. Eeghe kụ iḍighi? Loor esi dị yira osighẹ iniin arinyạ phọ kụ rotuughaạm Baibul phọ oomo arikpisi. Ḅilhẹ kẹn yira rokparaghạ ghan oḍeenhaan ephomoghiạn bunhọn. Etigheri ekpisi phọ yira odi bọ, yira ‘romạgh ghan ni ḍien aZihova, pidị yira ooḅereghị nyodị r’amuḅọph.’—Zephaniah 3:9.
2. Nạ kaḍighi ika kụ abughẹ muḅọph phọ?
“Oniin aphomoghiạn nyoniin r’oomo ologhi odị amadạn.” (1 Pita 1:22) Nạ kaḍighinhom ika oromha phọ ophọn phọ? Kparipẹ rogbon e/munhughan abunhọn, gbon ghan ghụn imạ araagharạ phọ abidị. Kparipẹ rogbor ghan ooḍikuan r’awe dị r’anạ eḅọph eḍighinhom araraạr, lọgh mem ghụn olhegheri abumor r’abumaranhi dị eḍighinhom araraạr phọ abidị egbatanhaạn r’ipẹ anạ. Yira kotue kẹn ni olọgh ikuph oruphuron osighẹ torobọ eegharạ ophogh ghan awe osooromhi.—Ibạl 1 Pita 2:17.a
3. Nạ kaḍighi ika eḍighi maạr dị nạ amhoọgh iiḅaghamhị r’onhọn onyọ umor?
Ghalhamọ r’iduọn amuḅọph odi bọ ni igbo ayira, yira awe dị u/munhughan. Eeni amem, oniin raḍighi ghan ni iyaạr dị kepin olhoghi ophoriphọ. Pọ kụ iyaạr phọ Ekpo-onhụ phọ Enhaạn iḅenhị bọ iyira mọ “isạr ghan ewilenaạn bunọn, idiphọ [aZihova rasạr ghan bọ kiwilhenhaạn] inyina.” (Ibạl Kolosị 3:13.) Yira ropiomạn ghan ni aZihova ibadị amem, kuolọ rasạr ghan ni kuwilhenhaạn iyira. Kụ iḍighi kụ, odị ragon ni dị yira kosạr obilhenhaạn aani bumor phọ ayira. Eḍighi maạr dị nạ amhiịn mọ nạ mapiomạn oye, kiạ eghaaphọgh iiḅaghamhị phọ.—Ibạl Matiu 5:23, 24.b
OLHEGHERI OBUGHẸ
Ooḅeghiọn raraạr dị nạ katue aḍighi kụ keloghonhaạn ḍighaạgh obughẹ amuḅọph r’eephọ siphẹ ookpomhoghan phọ.
Nạ kaḍighi eeghe owạ eephọ?
4. Kpạr apu eegharạ ophogh ghan awe osooromhi
Yira rowạ ni ophomhoghiạn oomo abumor phọ ayira. Kuolọ eeni etue ni ikparanhaạn iyira ooḍikuan oye dị agbatanhaạn r’ayira. Eeghe kụ ketue eloghonhaạn ḍighaạgh? Ibạl Iiḍighi 10:34, 35, kụ eeḅeghiọn sipuru phọ iphẹn:
AZihova ameera ni mọ kirokirọ odọ awe oḍighi Bugbaanhaạn odị. Ika kụ idị nạ katuughaạny aani nyodị?
Eeghe iyaạr kụ edị awe ekpisi anyinha rokol ghan kophogh we osooromhi?
Ibạl 2 Korịnt 6:11-13, kụ eeḅeghiọn ḍipuru phọ aḍiẹn:
Nạ kaḍighi ika kụ akuamhị apomhoghiạn bumor r’abumaranhi dị eḍighinhom araraạr phọ egbatanhaạn r’ipẹ anạ?
5. Sạr ghan awilhenhaạn oopho aḅilhẹ awạ eephọ
AZihova rasạr ghan ni kuwilhenhaạn iyira oopho ghalhamọ r’iduọn odị ra/piomạn ghan bọ oye dị kewạ mọ osạr owilhenhaạn nyodị. Ibạl Psalm 86:5, kụ eeḅeghiọn sipuru phọ iphẹn:
Esi aBaibul phọ etughemhị nyinhạ eeghe ilọ osạr owilhenhaạn phọ aZihova?
Olhoghi anạ raḅaạl ghan ni loor esi eegharạ osạr owilhenhaạn phọ odị ḍughụm? Eeghe kụ iḍighi?
Ighẹn asidọl kụ ketue eḍighi idị kikparanhaạn iyira orolhọm eephọ r’abunhọn?
Yira kotuughaạny ika aZihova kụ amuḅọph atọl siẹn igbo phọ ayira? Ibạl Proverbs 19:11, kụ eeḅeghiọn ḍipuru phọ aḍiẹn:
Mem dị oye aḍighi iyaạr dị repin esi anạ, nạ kaḍighi eeghe kụ aalemhi iiḅaghamhị phọ?
Eeni amem yira roḍighi ghan ni idị kepin esi abunhọn. Mem dị ipẹ phọ emite, yira koḍighi eeghe? Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Siphẹ avidio phọ, umaranhi phọ aḍighi eeghe owạ eephọ?
6. Wạ ghan imạ araagharạ abumor r’abumaranhi phọ anạ
Mem dị yira otuman bumor r’abumaranhi phọ ayira, yira rolegheri ghan ni imạ araagharạ r’asidugh abidị. Yira koḍighi ika kụ ogbon imạ araagharạ phọ abidị? Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Eeghe kụ kilhoghonhaạn iyira ḍighaạgh omhiịn imạ araagharạ abumor r’abumaranhi phọ ayira?
AZihova ragbon ghan imạ araagharạ ayira. Ibạl 2 Chronicles 16:9a, kụ eeḅeghiọn ḍipuru phọ aḍiẹn:
Etọl ika esi anạ olhegheri mọ aZihova ragbon ghan imạ araagharạ phọ anạ?
Agulu dị olhemhọm iyaạr dị emhạn iboom ikpoki ghalhamọ agonyiạn ni ramạn ghan ni maạr. Iduọn kẹn kụ edị abumor r’abumaranhi phọ ayira omhạn maạr esi aZihova etigheri e/munhughan phọ abidị
ABUNIIN AWE OOTUGHIẠN MỌ: “Bunọ osạr owilhenhaạn oye mem mem mọ, ka/legheri mọ ipẹ odị aḍighi bọ ebeeph ni iboom.”
Uḍighi ika kụ yira konyaaghiạn bọ ni osạr ghan owilhenhaạn abunhọn?
OGHAẠPH OOKARAGH
Nạ katue ni aloghonhaạn ḍighaạgh oḍighi idị amuḅọph katọl siẹn ookpomhoghan phọ mem dị nạ asạr ghan awilhenhaạn kụ aḅilhẹ aḍeenhaan ephomhoghiạn bumor r’abumaranhi phọ anạ.
Ooḅula
Ika kụ idị nạ katue akpạr apu eegharạ ophogh ghan awe osooromhi?
Nạ kaḍighi eeghe eḍighi maạr dị nạ amhoọgh iiḅaghamhị r’onyọ umor obobọ umaranhi?
Nạ rawạ ni otuughaạny eegharạ osạr ghan owilhenhaạn phọ aZihova? Eeghe kụ iḍighi?
WAAGHỊ AMHIỊN
Miịn idị oniin oghaạph omaaniọm aZizọs kulhoghonhaạn iyira ḍighaạgh oghel osoph ghan ooruẹn ongọ abunhọn.
Ewạ ni dị yira kolọm osạr owilhenhaạn mem dị yira olhoghoma mọ iyaạr yira u/piọm?
“Olhọm Osạr Owilhenhaạn—Isabị Owạ Eephọ” (The Watchtower, November 1, 2002)
Miịn idị abuniin awe motuughạ ozoọm ghan abunhọn eten dị eḅeraạn Enhaạn.
Miịn reten dị nạ katue aalemhi iiḅaghamhị dị nạ amhoọgh r’oye kụ egbi ooḅaghamhị eephọ ookpomhoghan phọ.
“Sighẹ Ephomhoghiạn Kụ Aalemhiom Iiḅaghamhị Dị Nạ Amhoọgh r’Oye” (The Watchtower, May 2016)
a Igẹ Dị Opumhom 6 ekaạph idị ephomhoghiạn renyu ghan onyọ Kristẹn oḍighi idị abunhọn awe ko/moọgh aani ezẹgh dị reetenheghian ghan.
b Igẹ Dị Opumhom 7 ekaạph ilọ ophạm araghaạph dị egbolhomaam ikpoki r’iilhogh agomẹt.