Ẹphomhoghian Phọ A Jehova Edi Ghan Bịn

1-2. Eeghe ịpaanhaan kụ ẹdi ịbadi ạ Krịstẹn osoman?

GBIOM olhoghi oghuugh dị odi ogbo ọphiiny. Dị ogbogh oolhogh amite kụ rapoophe ghan oghuugh phọ ạnyu kạḅilhe atebeeny. Oghuugh phọ ọpo phọ kanyeenhe tọrobo ekpisi dị oolhogh phọ anyu ạghimom, ipel dị oye kụ ạsighe ịluma ạkpo oghuugh phọ. Ịluma phọ keḍighi ịyaar dị oghuugh phọ kạ́daph oolhogh phọ ạḅua etigheri ịlo oolhogh phọ ạbugh.

² Mem dị nạ asoman igbogh ịiḅaghamhi kụ nạ rạkparam, nạ ạkigh oghuugh phọ ọpo phọ. Ịitughian phọ ạna kémiigh. Esi ọmaam, rodon nạ atue ni akuphom owol mọ a Jehova ạphomhoghian ni nyịnha ạḅilhe ạbaki nyịnha; iḅuenheen nạ raakia mụghumo a Jehova rạmiin ni ịphen remitenhaan bọ nyịnha. (Ps. 10:1; 13:1) Eeni ọyaghiri ạna atue ni ạḅenhi nyịnha ikpo ọnhu ọkparamhi bịn nạ aamhanham. (Prov. 17:17; 25:11) Mọony amem nạ mạḅilhe amiigh ookia. Eeni kẹn nạ kạatughian mọ a Jehova ọ́mhoogh mạar oḍighinhom ạna. Eeghe kụ keḍighi ịluma ạna mem dị nạ asoman ịiḅaghamhi? Ịduon phọ pọ, ika kụ ịdi nạ kakuphom owol mọ a Jehova ạphomhoghian ni nyịnha?

3. Ẹphomhoghian ọḅar phọ ọghaaph bọ oghol sịphe Psalm 31:7 rạ 136:1, rẹma ghan eeghe, kụ uḍighi ika kụ kotue bọ ni ọḅem mọ a Jehova kụ eḍeenhaan ẹphomhoghian ọḅar dị epelheghiom? (Mịin kẹn afoto phọ.)

³ Eniin ịyaar dị ketue emhiighemhi nyịnha mem ịiḅaghamhi pọ ọotughian ẹphomhoghian ọḅar phọ a Jehova. (Bạl Psalm 31:7; 136:1.) Ekpo ọnhu phọ “ẹphomhoghian ọḅar” rẹma ghan ẹphomhoghian dị eḍiinyan ḅịlhe rémunheen ghan, dị oye ạmhoogh ạghi esi ọnhon oye. A Jehova kụ ạmhoogh ẹphomhoghian ọḅar dị epelheghiom. Ọkar ọghaaph, ạ Bạịbul phọ ạḅem ni mọ a Jehova ạmoogh “ẹphomhoghian ọḅar dị ẹphughan.” (Ex. 34:6, 7) Ạ Bạịbul phọ ạḅem kẹn mọ: “ẹphomhoghian ọḅar phọ a Jehova eepaany ni esi ạbuphe rọmagh bọ nyọdi.” (Ps. 86:5) Tụutughian ịdi ịphen phọ rẹma ghan: R’amem r’amem a Jehova rạ́ḅitonhaan ghan rẹbenhe phọ ọdi ọkpe bọ oḍuom olhoghi! Ọotughian ghan ịphen phọ kemhiighemhi nyịnha mem dị nạ asoman ịiḅaghamhi.—Ps. 23:4.

LEGHERI MỌ ẸPHOMHOGHIAN PHỌ A JEHOVA EḌIGHI ẸKPANHA ỊTUGHEMHI Ạ BẠỊBUL

4. Ngọ reḍeenhaan ịkpanha ịtughemhi ạ Bạịbul, kụ ạghaaph ịyaar phọ eḍighi bọ kụ yira olhom bọ ogheelhom.

⁴ Olhegheri mọ ẹphomhoghian phọ a Jehova eḍighi ẹkpanha ịtughemhi ạ Bạịbul kịlhoghonhaan iyira ḍịghaagh omhiigh mem dị yira osoman ịiḅaghamhi. Eeghe kụ retu ghan olhoghi ạna mem dị nạ ạnhaghan ikpo ọnhu phọ “ịkpanha ịtughemhi ạ Bạịbul”? Eeni nạ kạatughian igey phọ ịpe nạ ạtuugha bọ sịphe ạ Bạịbul phọ. Esi ọmaam, nạ mạtuugha alegheri mọ ḍien Ẹnhaan okol mọ Jehova, ḅịlhe mọ a Jizọs kụ ogina Ọony Ẹnhaan, ḅịlhe kẹn mọ ạbuphe momhuughu bọ ụ́moogh mụn ịitughian ḅịlhe mọ Ọmhar awe kọtol li dọl ạpạrạdạịs sịen ade phọ k’agee-pọ. (Ps. 83:18; Eccl. 9:5; Jọn 3:16; Ogan. 21:3, 4) Mem mọ nạ amheeraam bọ mọ igey phọ ịphen phọ, nạ ulhom ni agheelhom. Eeghe kụ iḍighi? Loor esi dị nạ ụmhiin mọ igey phọ ẹkpasi ni esi ariphigh. Ọoḅeghion ịdi ọmhiin ghan ẹphomhoghan phọ a Jehova ịdipho ẹkpanha ịtughemhi ạ Bạịbul keḍighi ịdi yira kóokia ghan mụghumo a Jehova ạkar ri ạmoogh ogbolhomaam ayira ọbobo rạmiin ni ịiḅaghamhi dị yira osoman.

5. Kạaph ịpe oye rạkpar ghan bọ kapu ịtughemhi ọkpe.

⁵ Mem mọ nạ amhiigh bọ ọtuugha ạ Bạịbul phọ, eeghe kụ ịlhoghonhaan bọ nyịnha ḍighaagh ọwilhe ịtughemhi ọkpe? Eeni nạ ụsighe ịpe nạ ạtuugha bọ sịphe ạ Bạịbul phọ kụ aphoghom ịpe ẹku ịiḅereghi phọ ạna ọtughemhi ghan bọ. Esi ọmaam: Eeni nạ umheeraam ghan mọ a Jizọs kụ Ẹnhaan Oomo Ịikpo phọ. Kụ ịduon nạ amhiigh bọ ọtuugha ạ Bạịbul phọ, nạ upuruan ni loor mọ, ‘Ịtughemhi phọ ịphen phọ etu ni ịne?’ Nạ rọoḅeghion ịpe ạ Bạịbul phọ ạghaaph bọ, kụ nạ aru ạmhiin mọ a Jizọs kụ kạ́ Ẹnhaan oomo ịikpo phọ. Bịn nạ ạwilhe ịtughemhi ọkpe phọ ọpo phọ kụ amheeraam ịpe ạ Bạịbul phọ ạtughemhi bọ mọ: A Jizọs “kụ ọkpana dị arọl li kụ ogbi bọ olẹm aḅirini phọ,” “ogina Oọny phọ Ẹnaan.” (Kọl. 1:15; Jọn 3:18) Ii, ẹkpar ri ọwilhe ịtughemhi ọkpe. (2 Kọr. 10:4, 5) Kụolo mem mọ nạ aru bọ amheeraam ịtughemhi ạ Bạịbul phọ, nạ ụwilhe ni.—Fil. 3:13.

6. Eeghe kụ iḍighi kụ nạ katue bọ ni akuphom owol mọ ẹphomhoghian ọḅar phọ a Jehova edi ghan bịn k’agee-pọ?

⁶ Nạ katue kẹn ni ameeraam ịpe ạ Bạịbul phọ ạtughemhi bọ ịlo ẹphomhoghian phọ a Jehova ịdipho nạ amheeraam bọ ịḅel ạraraar phọ nạ ạtuugha bọ. Mem dị nạ asoman ịiḅaghamhi kụ nạ amhiigh ookia mụghumo a Jehova ạphomhoghian ni nyịnha, puruan loor ạna mọ, ‘Ịitughian phọ ạmhi eeleeny ni?’ Sịghe iikia phọ nạ ạmhoogh bọ kụ aphoghom ịpe a Psalm 136:1 ẹghaaph bọ, eḍighi bọ esi ạ Bạịbul phọ ọsighe bọ ẹmhuoghaaph phọ ẹphen phọ. Eeghe kụ iḍighi kụ a Jehova ạghaaph bọ m’ọno ạmoogh ẹphomhoghian “ọḅar”? Eeghe kụ iḍighi kụ ekpo ọnhu phọ ẹphomhoghian ọḅar phọ a Jehova edi ghan bịn k’agee-pọ emite bọ 26 amem sịphe ạḍuor phọ ạḍiphe phọ? Ịduon yira mọoḅeghion bọ, ẹphomhoghian ọḅar phọ a Jehova esi awe phọ ọdi eḍighi aani ẹkpanha ịtughemhi ạ Bạịbul ịdipho ịpheri phọ nạ mạtuugha bọ. Esi ịduon phọ, ạḍiitughian ọḅem mọ a Jehova ạmhiin nyịnha ịdipho oye dị ụ́moogh mạar oḍighinhom ḅịlhe nyịnha ụ́pomoghian eḍighi ịtughemhi ọkpe. Kel ọkpe phọ ọpo phọ ịduon nạ maghel bọ ịnhon ịtughemhi ọkpe!

7. Ngọ reḍeenhaan ariisi ạ Bạịbul dị eḍeenhaan mọ a Jehova ụphomhoghian ni iyira.

⁷ Ịnhon ariisi ạ Bạịbul edi ni dị eḍeenhaan mọ a Jehova ụphomhoghian ni iyira. Esi ọmaam, a Jizọs ạḅenhi bụmatuan phọ ọdi mọ: “Nyinha ẹman ni mạar epu ịbadi ạsimighor.” (Mạt. 10:31) A Jehova r’aloor ạḅenhi ni we phọ ọdi mọ: “Mị kạnyaami ni nyịnha, ii, mị kạkar ạlhoghonhaan nyịnha ḍịghaagh, mị kạkar ạpham nyịnha r’ạḍighaagh elhiom mọ ạmhi eḍighi bọ ẹlo elhiom eḍighinhom ịyaar.” (Isa. 41:10) Ikpo ọnhu phọ ịphen eegholhaan ni. Sịen phọ a Jizọs ọ́ḅem mọ ‘Eeni nyinha ẹman ni mạar epu,’ kụ a Jehova ọ́ḅem kẹn mọ ‘Mị atue ni ạloghonhaan nyịnha ḍịghaagh.’ Kpạripe ghụn bịdi ụḅem mọ: “Nyinha ẹman ni mạar epu” ḅịlhe mọ “Mị kạlhoghonhaan ni nyịnha ḍịghaagh.” Mem dị nạ asoman ịiḅaghamhi kụ raakia mụghumo a Jehova ạphomhoghian ni nyịnha, ariisi ạ Bạịbul phọ ịphen phọ kẹlhoghonhaan ni nyịnha ḍịghaagh ọphoomhi aloor kụ ọḅilhe okuphom owol mọ a Jehova ạphomhoghian ni nyịnha. Ariphigh ọtuan omheeraam ịphen phọ edi ni. Ọoḅereghi r’ogbirma ghan ịlo ariisi ạ Bạịbul phọ ịphen phọ kenyu nyịnha ọghaaph aani ịpe edi bọ 1 Jọn 4:16, ẹḅem bọ mọ: “Yira olegheri ni ọḅile omeeraam ẹphomoghian phọ Ẹnaan ịphomoghian bọ iyira.”a

8. Nạ kaḍighi eeghe eḍighi mạar dị eeni amem nạ raakia ghan mụghumo a Jehova ạphomhoghian ni nyịnha?

⁸ Kọkaaph ika eḍighi mạar dị na kọ́wilhe ni ookia ghan mụghumo a Jehova ạphomhoghian ni nyịnha? Sịghe ịpe nạ alhoghoma bọ aphoghom ịpe nạ alhegheri bọ ịlo a Jehova. Ịpe oye raloghoma ghan bọ renmia ghan ni kụolo ariphigh dị oye alhegheri rénmia ghan. Ẹphomhoghian phọ a Jehova ạ Bạịbul phọ ụtughemhi bọ iyira eḍighi ephigh dị kétue enmia. Eḍighi mạar dị yira úmeeraam ịphen phọ, pọ yira opogh ọgunhom ẹkpanha ẹeghara phọ a Jehova—eḍighi bọ ẹphomhoghian.—1 Jọn 4:8.

LEGHERI MỌ A JEHOVA ẠPHOMHOGHIAN NI NYỊNHA

9-10. Ọdaphan ịpe edi bọ Jọn 16:26, 27, a Jizọs ạtu eeghe kụ ạghaaph bọ mọ “Ọde phọ r’aloor ọdi ịphomhoghian ni inyina”? (Mịin kẹn afoto phọ.)

⁹ Yira kotue ni ọtuugha ọbughe ịlo ẹphomhoghian phọ a Jehova esi ọoḅeghion ikpo ọnhu phọ a Jizọs ạḅenhi bọ bụmatuan phọ ọdi mọ: “Ọde phọ r’aloor ọdi ịphomhoghian ni inyina.” (Bạl Jọn 16:26, 27.) A Jizọs ọ́ḅa ikpo ọnhu phọ ịphen phọ oḍighi ịdi olhoghi ạbumatuan phọ ọdi kạḅaal. Ọkar ọghaaph, ariisi ạ Bạịbul phọ eeghironhom bọ sịikpigh phọ ịphen phọ eḍeenhaan mọ a Jizọs ógbon oolemhi ịitughian ạbumatuan phọ ọdi bịn, ọdi ạghaaph ghan ịlo ịiḅereghi.

¹⁰ A Jizọs ạḅenhi ni bụmatuan phọ ọdi mọ bịdi oghol ghan ḍien phọ ọdi kụ ọoḅereghi, kụolo kụ́uḅereghi ụngo nyọdi. (Jọn 16:23, 24) Ịkar ri ẹwa mọ ạbumatuan phọ ọdi olhegheri ịphen phọ. Loor esi dị mem mọ oḅeton bọ nyọdi, eeni ạbumatuan phọ ụwa ghan ni omhiigh ọoḅereghi ọngo ọdi. A Jizọs ọyaghiri ạbidi, esi ịduon phọ bịdi otue ni ọotughian mọ ẹphomoghian phọ a Jizọs ạmhoogh bọ esi ạbidi etue ni enyu nyọdi ọnhaghan ịlom mọ ạbidi kụ ọsighe ịlom mọ ạbidi ọḅenhi ọde phọ ọdi. Kụolo a Jizọs ạḅem mọ bịdi kụ́utughian eten phọ ẹpe phọ. Eeghe kụ iḍighi? Loor esi dị ọdi ạḅenhi bịdi mọ: “Ọde phọ r’aloor ọdi ịphomhoghian ni inyina.” Ịphen a Jizọs ạghaaph bọ eḍighi aani pạkiri ịkpanha ịtughemhi ạ Bạịbul ịlo ịiḅereghi. Ịphen phọ egbolhomaam aani ni nyịnha: Dị eego esi ịtuugha ạ Bạịbul phọ ạna, nạ marue alegheri ạḅilhe ạpomoghian Jizọs. (Jọn 14:21) Kụolo ịdipho ạbumatuan phọ a Jizọs, nạ katue ni ạaḅereghi ạngo Ẹnhaan kụ akuphom owol mọ ọdi kạnaghan ni loor ịduon nạ alhegheri bọ mọ “ọdi r’aloor ạphomhoghian ni nyịna.” Tọrobo amem dị nạ ạaḅereghi ạngo a Jehova, pọ nạ raḍeenhaan ghan mọ nạ ameeraam ni ikpo ọnhu phọ a Jizọs ịphen phọ.—1 Jọn 5:14.

LEGHERI ỊYAAR PHỌ RẸKOM BỌ IIKIA KẸNGO NYỊNHA

11. Eeghe kụ iḍighi kụ a Setạn rạwa bọ dị yira kookia ẹphomhoghian phọ a Jehova esi ayira?

¹¹ Iikia ịlo ẹphomhoghian phọ a Jehova rẹḅua ghan ẹghen kụ keru? Nạ atue ni ạḅem mọ a Setạn, kụ ọkpe ólho. Eru phọ rẹwa ghan “oye lọ ọdi kạba” kụ rạwa ghan dị yira kookia ghan mụghumo a Jehova ụphomhoghian ni iyira. (1 Pit. 5:8) Ẹphomhoghian kụ inyu bọ a Jehova omiteom ẹkia ẹtagharan phọ, kụ a Setạn rạwa ghan dị yira kologhoma mọ yira ụ́kpeanhaan inmo phọ ịphen phọ. (Hib. 2:9) Olhoghi ọdi kạḅaal agey eḍighi mạar dị yira ookia mụghumo a Jehova ụphomhoghian ni iyira. Olhoghi ọdi kạḅaal kẹn agey eḍighi mạar dị yira ọtuan ịiḅaghamhi dị yira osoman ọwilhe okumu a Jehova. A Setạn rạwa mọ ọotughian ghan mọ a Jehova iyira ụ́phomhoghian. Kụolo ọdi kụ ịdi a Jehova ụ́pomoghian. Esi ịduon phọ, iniin ikeḍi dị ọdi raḍighinhom ghan pọ ọkparagha oḍighi ịdi yira kologhoma mọ a Jehova iyira ụ́phomhoghian ḅịlhe mọ ọdi mugheel iyira. (Ẹfẹ. 6:11) Mem dị yira ọlhogh elhegh ikeḍi phọ ọdi ịphen phọ, yira kọnyaaghian ni “ọmerenyan Eru phọ.”—Jems 4:7.

12-13. Ika kụ ịdi ịkaraph phọ ụmharam bọ iyira ketue ni ẹkom ịdi yira kookia ẹphomhoghian phọ a Jehova?

¹² Ẹnhon ịyaar edi ni dị ketue ni ẹḅilhe ẹkom ịdi yira kookia ẹphomhoghian phọ a Jehova. Eeghe kụ ịyaar phọ? Ịkaraph phọ ụmharam bọ iyira. (Ps. 51:5; Rom 5:12) Ịkaraph mẹphue siya phọ ayira rạ Jehova. Ẹḅilhe ẹpue ilhoghi phọ ayira, ekpom mọ ayira r’aloor phọ ayira.

¹³ Ịkaraph retir ghan ni ilhoghi phọ ayira ẹkaraph eten. Reḍighi ghan ịdi yira rologhoma ghan apum, ọoḅaghamhian aloor, loor dị ị́po, r’umugholoor. Yira rologhoma ghan eten phọ ẹphen phọ mem dị yira oḍighi ịkaraph. Yira rologhoma ghan kẹn eten phọ ẹphen phọ mem dị yira ọotughian mọ ụmharam iyira ịkaraph. (Rom 8:20, 21) Ịdipho ạtaya amoto dị ookuugh úlo kátue bo aḍighi ịpe ọtu bọ ọlhem, kụ ịdi yira phọ kẹn kótue oḍighi osiemhi ịpe ọtu bọ ụlhem iyira loor émunughan phọ ayira. Pọ kụ ịyaar phọ eeni amem yira rookia ghan bọ mụghumo a Jehova ụphomhoghian ni iyira. Mem dị ịphen phọ emite, ọotughian ghan mọ a Jehova aḍighi Ẹnhaan dị ‘ạbugh ạḅilhe aḍigh ḍiigu dị raḍeenhaan ghan ẹphomhoghian ọḅar bụphe ọphomhoghian bọ nyọdi kụ rooko bọ iilhogh phọ ọdi.’—Neh. 1:5.

14. Ika kụ ịdi ogbirima ghan ịlo ẹkia phọ keḍighi ịdi yira kokpor ọgbolhe ḍịitughian ọḅem ghan mọ a Jehova iyira ụ́phomhoghian? (Rom 5:8) (Mịin kẹn igbe phọ “Kúmeera Ịkaraph ‘Iikeleghi Iyira’.)

¹⁴ Ii, eeni amem yira otue ni ologhoma mọ yira ụ́kpeanhaan ẹphomhoghian phọ a Jehova. Kụ ọkar ọghaaph, yira ụ́kpeanhaan ni, pọ kụ ịyaar phọ ẹphomhoghian phọ ọdi ẹkar bọ ẹgbatanhaan. Yira úḍighinhaan ịyaar a Jehova kụ ọdi ạtu bọ ruḍeenhaan iyira ẹphomhoghian. Ghạlhamo r’ịduon phọ ni, a Jehova amiteom ni ẹkia ẹtagharan phọ ookpereghi ịkaraph phọ ayira loor esi dị ọdi ụphomhoghian iyira. (1 Jọn 4:10) Legheri kẹn mọ a Jizọs aru ọphel abuḍighinhom ịkaraph, káwe dị omhunhughan. (Bạl Rom 5:8.) Yira kótue oḍighi rạraar eten dị emhunughan, kụ a Jehova rágon mọ oḍighi ịduon phọ. Mem dị yira ọnhaghanhan mọ ịkaraph phọ ụmharam bọ iyira ketue ni eḍighi ịdi yira kookia ẹphomhoghian phọ a Jehova, pọ yira kọnyaaghian ni eenhan ạḍiitughian phọ ạḍiphe phọ.—Rom 7:24, 25.

KỊOM GHISIGH ẠḄAR A JEHOVA

15-16. Eḍighi mạar dị yira ọghiom ghisigh ọḅar a Jehova, yira kokuphom owol eeghe, kụ eeghe kụ iḍighi? (2 Samuel 22:26)

¹⁵ A Jehova rạwa mọ ọghiom ghisigh ọḅar nyọdi. (Deut. 30:19, 20) Yira oḍighi ịduon phọ, pọ ọdi kụḅar aani ni iyira. (Bạl 2 Samuel 22:26.) Eḍighi mạar dị yira ọghiom ghisigh ọḅar a Jehova, pọ okuphom owol mọ ọdi kụlhoghonhaan ni iyira ḍịghaagh okaran ạtorobo ạdol dị yira osoman.

¹⁶ Ịduon yira mọoḅeghion bọ, yira ọmoogh ni riphigh omhiigh mem dị yira osoman ịiḅaghamhi. Yira olegheri ni mọ a Jehova ụphomhoghian ni iyira ḅịlhe mọ kụbaki ni iyira. Ịpe kụ ịdi ạ Bạịbul phọ ạtughemhi. Eḍighi mạar dị yira ookia ẹphomhoghian phọ a Jehova, pọ ọotughian ịpe yira olhegheri bọ ịlo ẹphomhoghian phọ ọdi kpạripe r’ịpe yira olhoghoma bọ. Ọghiom ghisigh oḍuom olhoghi ẹkpanha ịtughemhi ạ Bạịbul phọ ẹḅem bọ mọ ẹphomhoghian ọḅar phọ a Jehova, edi ghan bịn k’agee-pọ.