Jennésis

16 Bon, Lébann té ni dé «2» fi. Non pli gwan fi-a sété Liya èk pli jenn-lan sété Rétjèl. 17 Liya pa té bèl pyès, mé Rétjèl sété an bèl fanm èk moun té enmen wè’y. 18 Pas Jakòb té vin enmen Rétjèl, i di: “Mwen pawé pou twavay sèt «7» lanné ba ou, pou Rétjèl, pli jenn fi’w-la.” 19 Lè sala Lébann wéponn èk i di: “Mwen simyé mayé fi mwen épi’w, pito mwen mayé’y épi an lòt nonm. Kontiné wèsté lakay mwen.” 20 Alò Jakòb twavay sèt «7» lanné pou’y té sa ni Rétjèl kon madanm li; mé sa té menm kon déotwa jou pou li, pas i té vwéman enmen Rétjèl. 21 Kon sa Jakòb di Lébann: “Ban mwen madanm mwen pou mwen ni wilasyon épi’y paski tan-an mwen té ni pou twavay ba ou ja fini.” 22 Lè sala Lébann sanblé tout sé nonm plas-la, èk i fè an gwo fèsten. 23 Mé lè swè tonbé, i pwan pli gwan fi’y-la, Liya, èk i mennen’y bay Jakòb pou’y dòmi épi’y. 24 Lébann osi bay Liya, Zilpa, pou i ni kon an sèvant. 25 Li maten, lè Jakòb lévé, i wè sé Liya yo ba li! Kon sa i di Lébann: “Ki sa’w fè mwen la-an? Ès sé pa pou Rétjèl mwen twavay ba ou? Pouki’w kwennen mwen kon sa?” 26 Lè sala Lébann di’y: “Sé pa labitid nou isi-a pou bay pli jenn fi-a avan pwèmyé fi-a. 27 Pasé simenn-lan épi madanm sala. Èk apwé sa, mwen kay ba ou pli jenn fi-a, mé, ou kay ni pou twavay an lòt sèt «7» lanné ban mwen.” 28 Jakòb fè sa i di-a, èk i fin pasé simenn-lan épi Liya. Apwé sa Lébann ba li Rétjèl, pli jenn fi’y-la, kon an madanm. 29 Apa di sa, Lébann bay Rétjèl, Bilha, pou’y ni kon on sèvant.