Jennésis

6 Konsa lè latè-a koumansé twapé an pil moun, èk sé moun-lan koumansé fè fi. 2 Sé gason Dyé vwé-a koumansé wè sé fi sala té bèl. Alò yo koumansé chwazi tout fi yo té vlé pou sèvi yo kon madanm. 3 Épi Jéhova di: “Mwen pa kay pwan sa pou tout tan, lézòm ka fè bagay paski sé lachè yo yé. Pou lapéti sa yo kay viv pou yon san ven «120» lanné.” 4 Sé Nèfilinm-lan té asou latè-a an sé jou sala èk apwé sa. Diwan tan sala sé gason Dyé vwé-a té kontiné pou ni wilasyon sèksyouwal épi sé fi lézòm-lan, èk se fi lézòm-lan fè ti gason ba yo. An tan lontan sé gason sala té byen fò èvèk tout moun té konnèt yo. 5 Konsa, Jéhova wè lézòm té ka fè an pil movèsté asou latè-a. Èk tout sa ki té an tjè yo èk an lidé yo sété pou fè sa ki mové tout tan. 6 Jéhova té wigwété i té fè lézòm pou mété yo asou latè-a, èk i té twis. 7 Konsa Jéhova di: “Mwen kay détwi sé moun-lan mwen kwéyé-a ki asou latè-a. Mwen kay détwi ni nonm, ni bèt ki ka wèsté pwé moun, ni zannimo ki ka twennen atè-a, ni sé bèt-la ki ka volé an syèl-la. Paski mwen wigwété mwen té fè yo.” 8 Mé Nowa té ni favè Jéhova. 9 Sa sé listwa Nowa: Nowa sété on bon nonm. I té yon nonm ki té san fòt anpami tout sé moun-lan ki té ka viv an jennéwasyon’y. Nowa maché épi Dyé vwé-a. 10 Apwé an tan Nowa fè twa gason, Shenm, Hanm, èk Jéfèf. 11 Mé Dyé vwé-a wè tout bagay moun té ka fè asou latè-a té mové, èk latè-a té plen vyolans. 12 Wi, Bondyé gadé latè-a èk i wè tout bagay moun té ka fè té mové toubonnman. Tout moun ki té ka viv asou latè-a té ka fè bagay ki té mové. 13 Apwé sa Bondyé di Nowa: “Mwen désidé pou détwi tout moun, paski yo plen latè-a épi vyolans. Konsa mwen kay détwi yo ansanm épi tè-a. 14 Fè yon batiman épi bon bwa. Èk mété plizyè chanm adidan batiman-an, èk kouvè ni déwò’y ni andidan’y épi goudon. 15 Mi sé kon sa ou ni pou bati’y: Batiman-an sipozé twa san «300» kubit an londjè, senkant «50» kubit an ladjè, èk twant «30» kubit an hòtè. 16 Mété yon finèt yon kubit hòd tèt batiman-an, pou ba’y klèté. Mété an lapòt asou koté batiman-an pou moun èk bèt antwé. Osi fè batiman-an épi yon étaj anba, yon étaj anmitan-an èk yon étaj anho. 17 Mwen menm kay voyé yon délij dlò pou détwi tout lachè ki ka pwan lisouf anba syèl-la. Tout sa ki asou latè-a kay péwi. 18 Mwen ka fè an agwéman épi’w. Sé pou ou, sé gason’w-lan, madanm ou, èk madanm sé gason’w-lan antwé an batiman-an. 19 Osi, mennen dé an tout diféwan kalité bèt andidan batiman-an, yon mal èk yon fimèl, pou ni ou ni yo pa péwi. 20 Mennen bèt ki ka volé silon kalité yo, bèt ki ka wèsté pwé moun silon kalité yo, bèt ki ka twennen atè-a silon kalité yo. Mennen dé an chak sé bèt sala pou yo pa péwi. 21 Anmasé tout diféwan kalité manjé èk mennen’y andidan batiman-an, pou ou èk sé bèt-la manjé.” 22 Nowa fè tout sa Jéhova té koumandé’y pou fè. Wi, I fè ègzaktiman sa Bondyé té di’y pou fè.