Jennésis
7 Apwé sa, Jéhova di Nowa: “Ou èk tout jan kay ou, antwé andidan batiman-an, paski sé ou sèlman mwen wè ki bon an jennéwasyon sala. 2 Pwan pa sèt an tout kalité bèt ki nèt, mal èk fimèl. Èk annèk pwan pa dé adan tout sé bet-la ki pa nèt-la, mal èk fimèl. 3 Osi pwan pa sèt an sé bèt-la ki ka volé an syèl-la, mal èk fimèl. Pou yo sa kontiné viv èk pou piti yo kontiné fè piti asou latè-a. 4 Paski an sèt jou, mwen kay fè lapli tonbé asou latè-a pou kawant «40» jou èk kawant «40» nwit. Èk mwen kay détwi tout sa mwen té kwéyé ki ka viv asou latè-a.” 5 Konsa Nowa fè tout sa Jéhova té di’y pou fè. 6 Nowa té ni sis san «600» lanné lè délij-la tonbé asou latè-a. 7 Alò, Nowa ansanm épi sé gason’y-lan, madanm-li, épi madanm sé gason’y-lan, antwé andidan batiman-an. 8 Osi tout kalité bèt ki nèt, tout kalité bèt ki pa nèt, tout kalité bèt ki ka volé, épi tout kalité bèt ki ka maché asou tè-a, 9 antwé batiman-an pa dé «2», mal épi fimèl, menm kon Bondyé té di Nowa. 10 Èk sèt «7» jou apwé, délij-la tonbé asou latè-a. 11 Lè Nowa té sis san lanné, an dézyenm «2yenm» mwa-a, li disèt «17» jou-a an mwa sala, tout sous dlo an syèl-la pété èk sé bayè dlo-a ouvè an syèl-la. 12 Lapli tonbé asou latè-a pou kawant «40» jou épi kawant «40» nwit. 13 Menm jou sala, Nowa antwé andidan batiman-an épi sé twa «3» gason’y-lan, Shenm, Hanm, épi Jéfèf, madanm-li, épi madanm sé twa gason’y-lan. 14 Yo antwé batiman-an ansanm épi tout bèt sovay silon kalité yo, tout bèt ki ka wèsté pwé moun silon kalité yo, tout bèt ki ka twennen a tè-a silon kalité yo, tout bèt ki ka volé silon kalité yo, tout kalité jibyé, épi tout kalité bèt ki ni zèl. 15 Tout sé bèt sala ki ni lisouf kontiné antwé batiman-an dé «2» pa dé «2» pou alé jwenn Nowa. 16 Sé konsa yo antwé batiman-an, ni mal ni fimèl an tout kalité bèt, menm kon Bondyé té di Nowa. Apwé sa Jéhova fèmen lapòt-la. 17 Gwo dlo-a kontiné tonbé pou kawant «40» jou asou latè-a. Épi dlo-a kontiné mouté èk i koumansé chayé batiman-an, èvèk batiman-an té ka floté ho asou dlo-a ki té asou latè-a. 18 Épi latè-a té plen dlò èk dlo-a kontiné mouté plis toujou asou latè-a. Mé batiman-an té ka floté asou dlò-a. 19 Dlo-a kouvè latè-a si tèlman ki, tout sé gwo montany-lan ki asou latè-a té kouvè épi dlò. 20 Dlo-a mouté pou wivé kenz «15» kubit pli ho pasé sé montany-lan. 21 Konsa tout sa ki té vivan asou latè-a péwi: bèt ki té ka volé, bèt ki té ka wèsté pwé moun, bèt sovay, bèt ki té ka twennen atè-a, èvèk tout lézòm. 22 Tout sa ki té asou latè-a ki té ni lisouf mò. 23 Konsa Bondyé détwi tout sa ki té vivan asou latè-a. Sa vlé di, lézòm, zannimo, bèt ki ka twennen atè-a èk bèt ki ka volé an syèl-la. Yo tout péwi. Sé annèk Nowa èk sa ki té épi’y-la andidan batiman-an ki sové. 24 Dlo-a kontiné kouvè latè-a pou yon san senkant «150» jou.