Jennésis
8 Mé Bondyé chonjé Nowa épi tout sé bèt-la ki té andidan batiman-an épi’y. Èk Bondyé fè on van vanté asou latè-a, épi dlo-a koumansé bésé. 2 Sé sous dlo-a ki an syèl-la doubout èk sé bayè dlo-a fèmen, konsa lapli-a doubout osi. 3 Lè sala dlo-a koumansé chéché piti an piti asou latè-a. Apwé yon san senkant «150» jou, dlo-a bésé. 4 An sètyenm «7yenm» mwa-a, li disèt «17» jou-a an mwa-a, batiman-an pozé asou montany Ararat. 5 Épi dlo-a kontiné bésé jis li dizyenm «10yenm» mwa-a. An dizyenm «10yenm» mwa-a, li pwèmyé jou-a an mwa-a, tèt sé montany-lan pawèt. 6 Apwé sé kawant «40» jou-a, Nowa ouvè finèt-la i té mété an batiman-an. 7 Épi i voyé an réven déwò. Réven-lan té ka volé déwò èk i té ka viwé antwé batiman-an, jistan dlo-a ki té asou latè-a chéché. 8 Pli ta, i voyé an toutwèl déwò pou’y sa wè si dlo-a té bésé asou tè-a. 9 Mé toutwèl-la pa té twapé pyès koté pou’y pozé. Konsa i viwé jwenn Nowa andidan batiman-an, paski dlo-a té ka kouvè latè-a toujou. Alò, Nowa lonjé lanmen’y épi i pwan toutwèl-la pou mennen’y andidan batiman-an. 10 I èspéyé pou sèt jou, èk i voyé toutwèl-la dèwò ankò. 11 Lè toutwèl-la viwé li swè-a, i té ni an fèy doliv ki té tou fwè an bèk li! Sa fè Nowa wéyalizé dlo-a té bésé asou latè-a. 12 I èspéyé pou sèt jou ankò. Èk apwé sa i voyé toutwèl-la déwò, mé kou sala toutwèl-la pa viwé jwenn li. 13 Lè Nowa té ni sis san èk yon «601» lanné, an pwèmyé mwa-a, li pwèmyé jou-a an mwa sala, dlo-a té bésé asou latè-a. Nowa dékouvè yon pa an batiman-an, épi lè’y gadé i wè tè-a té ka chéché. 14 An dézyenm «2yenm» mwa-a, li venn sèt «27» jou-a an mwa-a, latè-a té vini sèk. 15 Lè sala Bondyé di Nowa: 16 “Sòti déwò batiman-an, ou, madanm-ou, sé gason’w-lan, épi madanm sé gason’w-lan. 17 Mennen déwò épi’w tout kalité bèt vivan, sa ki ka volé, épi tout sa ki ka twennen atè-a. Pou yo sa pléplé épi miltipliyé asou latè-a.” 18 Konsa Nowa sòti dèwò, ansanm épi sé gason’y-lan, madanm-li, èk madanm sé gason’y-lan. 19 Tout bèt ki vivan, tout bèt ki ka twennen atè-a, tout bèt ki ka volé, èk tout bèt ki ka fè mouvman asou latè-a, sòti andidan batiman-an silon kalité bèt-la yo yé-a. 20 Apwé sa, Nowa bati yon lotèl pou Jéhova èk i pwan adan sé bèt-la ki té nèt-la, èk adan sé bèt-la ki ka volé-a, épi i ofè yo kon sakwifis bwilé asou lotèl-la. 21 Lè sala Jéhova koumansé pwan an bon ti lòdè ki té ka ba’y plézi. Konsa Jéhova di an tjè’y: “Mwen pa kay janmen ladjé malédiksyon asou latè-a ankò, pou lapéti sa lézòm fè. Paski dépi lézòm toupiti, tout sa ki an tjè yo èk an lidé yo sé pou fè sa ki mové. Èk mwen pa kay janmen détwi tout sa ki vivan konsa ankò. 22 Koumansé dépi apwézan, latè-a pa kay janmen doubout ni gwenn pou planté èk wékòlté, fwédi èk chalè, sézon kawenm èk sézon fwédi, lajouné épi lannwit.”