Ègzodòs

32 Paditan Moziz té asou montany-lan, sé moun-lan wè i té ka pwan an chay tan avan’y désann. Alò, sé moun-lan asanblé oliwon Éronn èk yo di’y: “Lévé èk fè an dyé ban nou ki kay djidé nou. Paski nou pa sav sa ki wivé Moziz sala, nonm-lan ki djidé nou hòd péyi Éjip.” 2 Lè sala Éronn di yo: “Pwan sé zanno lò-a an zòwèy madanm zòt, èk gason zòt, èk fi zòt, épi mennen yo ban mwen.” 3 Alò tout sé moun-lan koumansé tiwé sé zanno lò-a ki té an zòwè’y yo, èk yo mennen yo ba Éronn. 4 Épi Éronn pwan lò-a hòd yo èk i sèvi an zouti pou fè an imaj an ti bèf. Sé moun-lan koumansé di: “Jan Izwayèl, sa sé bondyé’w ki té fè’w sòti péyi Éjip.” 5 Lè Éronn wè sa, i bati an lotèl douvan ti bèf-la. Apwé sa, Éronn hélé: “Denmen, la kay ni an fèt pou Jéhova.” 6 Alò, li denmen bonmaten, sé moun-lan lévé bonnè èvèk yo koumansé ofè sakwifis bwilé èvèk sakwifis lapé. Apwé sa, yo asiz pou yo manjé èvèk bwè. Épi apwé yo manjé, yo doubout pou enjwi kò yo. 7 Lè sala Jéhova di Moziz: “Désann, paski sé pèp ou-a ou tiwé an péyi Éjip ja péché. 8 Yo tounen byen vit hòd sé konmand mwen-an. Yo ja fè an imaj an ti bèf èvèk yo ka adowé’y èk yo ka ofè’y sakwifis. Épi yo ka di: ‘Sa sé bondyé’w ki té fè’w sòti péyi Éjip.’” 9 Jéhova di Moziz: “Mwen ja wè sé moun sala ni tèt di. 10 Konsa, kité mwen détwi yo paski mwen byen faché, èk kité mwen fè an gwo nasyon épi’w pito.” 32 Mé si ou vlé, padonnen péché yo. Si sé pa sa, tanpwi souplé, tiwé non mwen an liv-la ou ékwi-a. 33 Kanmenm, Jéhova di Moziz: Sé non moun-lan ki péché kont mwen, mwen kay tiwé an liv mwen.”