Ègzodòs
33 Apwé sa Jéhova di Moziz: “Ou menm èk pèp-la ou mennen sòti péyi Éjip, alé an plas-la mwen té sèwmanté bay Abranm, Ayzak èk Jakòb. Mwen té di yo: ‘Mwen kay ba désandan’w tè sala’. 2 Mwen kay voyé an nanj mwen douvan’w, èk i kay kouwi dèyè sé jan Kénann-la, sé jan Amòrayte-la, sé jan Hitayt-la, sé jan Pèwizayt-la, sé jan Hayvayt-la èk sé jan Jèbusayt-la. 3 Alé adan péyi-a koté lèt èk siwo myèl ka koulé. Mé mwen pa kay alé épi’w, pou mwen pa détwi’w asou chimen-an, paski ou sé an pèp ki ni tèt wèd.” 4 Lè sé moun-lan tann mannyè Bondyé té palé wèd, sa fè yo lapenn, èk pa yonn adan yo ki té mété bèl bagay asou yo. 5 Jéhova di Moziz: “Di jan Izwayèl, ‘Ou sé an pèp ki ni tèt wèd. An yon moman mwen té sa antwé anpanmi’w èk détwi’w. Kon sa pa mété pyès bèl bagay asou’w padan mwen ka katjilé pou wè ki sa mwen kay fè épi’w.’” 6 Sé sa ki fè, dépi asou Mòn Hòrèb jan Izwayèl pa té ka mété pyès bèl bagay asou yo. 7 Apwé sa, Moziz pwan tant li èk mété’y an ti distans déwò kanp-lan. I kwiyé tant-lan tant mitin-lan. Chak moun ki té vlé mandé Jéhova an bagay, té ni pou alé an tant mitin-lan, ki té déwò kanp-lan. 8 Chak fwa Moziz té ka alé an tant-lan, tout sé moun-lan té ka lévé épi yo té ka doubout douvan tant yo menm, èk yo té ka gadé Moziz jis tan i antwé an tant-lan. 9 Kon Moziz té antwé an tant-lan, nwaj-la té ka désann èk i té ka doubout douvan tant-lan padan Bondyé té ka palé épi Moziz. 10 Lè sé moun-lan wè nwaj-la doubout douvan tant-lan, yo chak té ka lévé èk bésé douvan tant yo menm. 11 Jéhova té palé fidji pou fidji épi Moziz, menm kon an nonm té kay palé épi an lòt nonm. Lè Moziz té an kanp-lan, Jòchwa gason Nun, sèvant Moziz, pa té ka janmen kité tant-lan. 12 Apwé sa, Moziz di Jéhova: “Ou di mwen, ‘djidé pèp sala.’ Mé ou p’òkò di mwen ki moun ou kay voyé épi mwen. Osi ou ja di mwen: ‘Mwen konnèt ou byen, épi ou ja jwenn favè an zyé mwen.’ 13 Tanpwi souplé, si mwen ja jwenn favè an zyé’w, édé mwen konnèt mannyè’w. Konsa mwen sa konnèt ou èk kontiné jwenn favè an zyé’w. Osi chonjé, nasyon sala sé pèp ou.” 14 Lè sala Bondyé di Moziz: “Mwen menm kay alé épi’w èk mwen kay ba’w lapé.” 15 Apwé sa Moziz di Bondyé: “Si ou pa ka alé épi nou, kité nou koté-a nou yé-a. 16 Ki mannyè moun kay konnèt mwen èk pèp ou ja jwenn favè an zyé’w? Ès sé pa lè ou alé épi nou, moun kay konnèt mwen èk pèp ou diféwan hòd tout lòt pèp ki asou latè-a?” 20 Mé i di: Ou pa sa wè fidji mwen, paski pyèsonn pa sa wè mwen épi kontiné viv.