Livitikòs
9 Jéhova kontiné palé épi Moziz, i di’y: 10 “Palé épi jan Izwayèl èk di yo, ‘Lè zòt wivé an péyi-a mwen ka bay zòt èk zòt wékòlté jaden zòt, zòt ni pou mennen an patjé an pwèmyé fwi-a zòt té wékòlté an jaden zòt bay pwèt-la. 11 Èk pwèt-la kay lévé patjé-a èk pasé’y douvan Jéhova pou zòt jwenn favè’y. Jou-a apwé Sabaf-la pwèt-la kay lévé patjé-a èk pasé’y douvan Jéhova. 12 Asou jou-a pwèt-la ka lévé patjé-a èk pasé’y douvan Jéhova, zòt sipozé ofè an jenn bélyé mouton kon an sakwifis bwilé pou Bondyé. 13 Osi zòt ni pou ofè dé «2» dis pousan «10%» di yon ifa bon kalité fawin fwans ki mélé épi lwil kon an sakwifis gwenn. Sa sé yon sakwifis ki bwilé an difé pou Jéhova, an bon lòdè pou ba’y plézi. Èk osi ofè yon ka «1⁄4» hin diven pou vidé bay Bondyé. 14 Zòt pa sipozé manjé pyès kalité pen, gwenn ki woti, ében gwenn zòt djòs wékòlté jis tan jou sala wivé, lè zòt ofè sakwifis bay Bondyé zòt. Sa sé an konmandman pou zòt swiv pou tout tan, pou tout jennéwasyon zòt, népòt koté zòt ka wèsté. 15 “‘Zòt ni pou konté sèt Sabaf. Zòt kay koumansé konté jou-a apwé Sabaf-la, jou-a lè pwèt-la lévé patjé-a èk pasé’y douvan Bondyé. Zòt sipozé konté sèt simenn antyè. 16 Jou-a apwé sètyenm «10yenm» Sabaf-la zòt sipozé konté senkant jou. Asou jou sala zòt dwé ofè gwenn zòt djòs wékòlté bay Jéhova. 17 Zòt sipozé mennen dé «2» pen ki sòti an kay zòt pou pwèt-la lévé’y èk pasé’y douvan Bondyé. Sé dé «2» pen-an sipozé fèt épi dé «2» dis pousan «10%» di yon ifa bon kalité fawin fwans. Zòt sipozé tjwit yo épi lèlven, kon pwèmyé fwi bay Jéhova. 18 Osi ansanm épi sé pen-an, zòt sipozé ofè sèt mal mouton ki yon lanné chak ki pa ni défo, épi yon jenn towo bèf èk dé bélyé mouton. Zòt kay bwilé yo an difé bay Jéhova, ansanm épi gwenn-lan épi diven-an zòt ofè. Sa sé yon sakwifis ki bwilé an difé pou Jéhova, an bon lòdè pou ba’y plézi. 19 Èk zòt sipozé ofè an jenn kabwit kon an sakwifis péché èvèk dé mal mouton ki ni yon lanné chak kon an sakwifis lapé. 20 Pwèt-la kay lévé jenn kabwit-la épi pen pwèmyé fwi wékòt-la, ansanm épi sé dé mal mouton-an èk pasé yo douvan Jéhova. Sé bagay sala sipozé sen bay Jéhova, yo sé pou pwèt-la. 21 Asou jou sala zòt kay anonsé an konvansyon ki sen pou adowé Bondyé. Zòt pa sipozé fè pyès twavay wèd. Sa sé an konmandman pou zòt swiv pou tout tan, pou tout jennéwasyon zòt, népòt koté zòt ka wèsté. 22 “‘Lè zòt wékòlté jaden zòt, pa wékòlté tout bòdaj jaden zòt èk pa anmasé tout sa ki wèsté hòd wékòt zòt. Zòt dwé kité pou lé pòv èk sé étwanjé-a ki anpanmi zòt. Mwen sé Jéhova Dyé zòt.’” 23 Jéhova kontiné palé épi Moziz, i di’y: 24 “Di jan Izwayèl, ‘asou pwèmyé jou sètyenm «7yenm» mwa-a, zòt sipozé pozé. Jou sala zòt kay kòné twonpèt-la pou fè moun chonjé konvansyon sen-an pou adowé Bondyé. 25 Zòt pa sipozé fè pyès twavay wèd, zòt kay ofè an sakwifis bwilé pou Jéhova.’”