Limowo

11 Alò sé moun-lan koumansé bougonnen an zòwèy Jéhova. Lè Jéhova tann sa, i té faché anpil, èvèk i voyé an difé asou yo, èk difé bwilé adan sé moun-lan bòdaj kanp-lan. 2 Lè sé moun-lan koumansé hélé bay Moziz, i sipliyé Jéhova èk difé-a tenn. 3 Alò yo kwiyé non plas-la Tabara, piski Jéhova té voyé difé asou yo. 4 Gwoup étwanjé-a ki té anpanmi yo té koumansé moutwé vowasité, épi jan Izwayèl osi koumansé hélé èk di: “Ki moun ki kay ban nou vyann pou manjé? 5 Nou ka byen chonjé sé bon pwéson-an nou té ka manjé pou anyen an péyi Éjip, osi sé konkonm-la, moulon-an, powo-a, lonyon-an, èk lay-la! 6 Mé apwézan nou la kon fèy ki sèk. Sèl sa nou ka wè sé manna sala.” 7 Manna-a té kon an gwenn ki blan, èk i té ka sanm an gonm bwa ki ka santi bon. 8 Sé moun-lan té ka alé toupatou pou anmasé manna-a èk yo té ka kwazé’y an moulen ében pilé’y adan an pilon. Apwé sa, yo té ka tjwit li an chòdyè ében yo té ka fè pen won épi’y. I té ni menm gou épi bonbon ki fèt épi lwil. 9 Lè séwen-an té ka tonbé asou kanp-lan lé òswè, manna-a té ka tonbé ansanm épi’y. 10 Moziz té ka tann sé moun-lan ka pléwé, chak fanmi, èk chak moun té ka pléwé douvan tant yo. Èk Jéhova té vini faché an chay, èvèk Moziz osi pa té kontan pyès. 11 Moziz di Jéhova: “Pouki ou bay sèvant ou pwòblenm sala? Ès sé kontan ou pa kontan mwen ki fè ou ladjé chay tout sé moun sala asou do mwen? 12 Ou ka di mwen, ‘Chayé yo asou lèstonmak mwen, menm kon an sèvant ka chayé an ti bébé yo ka bay tété.’ Ou vlé mwen mennen yo an péyi-a ou pwonmèt pou bay ayèl yo? Ès sé mwen ki fè yo? Ès sé mwen ki manman yo ében papa yo? 13 Ki koté mwen kay jwenn asé vyann pou bay sé moun sala? Paski yo pa ka doubout pléwé an zòwèy mwen, ka di, ‘Ban nou vyann pou nou manjé!’ 14 Mwen pa sa pòté tout sé moun sala pa kò mwen; chay-la twò lou pou mwen. 15 Si sé kon sa ou kay twété mwen, souplé pwan lavi mwen apwézan. Mé si mwen ja jwenn favè an zyé’w, pa kité mwen wè pyès malè ankò.” 21 Apwé sa Moziz di: “Mwen anpami sis san mil «600, 000» nonm ki vayan, mé ou ka di mwen: ‘Mwen Bondyé kay ba yo vyann, èk yo kay manjé pou yon mwa’! 22 Menm si yo tjwé tout sé mouton-an, èk tout sé bèf-la, ès sa kay asé vyann pou yo? Ében menm si yo tjenbé tout sé pwéson-an ki an lanmè-a, ès sa kay asé pou yo? 23 Lè sala Jéhova di Moziz: “Ès lanmen Jéhova twò kout? Bon, ou kay wè si sa mwen di-a pa kay fèt pou vwé.”