Limowo
13 A lé sala Jéhova palé bay Moziz, èk l di’y: 2 “Voyé nonm kon èspiyon an péyi Kénann, péyi-a mwen kay bay jan Izwayèl-la. Ou sipozé voyé yon nonm an chak lafanmi, chak nonm kay an chèf anpanmi yo.” 3 Konsa Moziz voyé yo alé hòd savann sèk-la an Pérann pa lòd Jéhova. Tout sé nonm-lan sé té nonm ki té ka pwan douvan an péyi Izwayèl. 4 Mi non yo: an lafanmi Roubenn, Chamouwa gason Zakan; 5 an lafanmi Siméyon, Chéfat gason Horay; 6 an lafanmi Jouda, Kélèb gason Jèfanna; 7 an lafanmi Isaka, Aygal gason Jozèf; 8 an lafanmi Ifréyim, Hochiya gason Nann; 9 an lafanmi Bennjamin, Paltay gason Réfou; 10 an lafanmi Zèbyoulonn, Gadiyèl gason Soday; 11 an lafanmi Jozèf, pou lafanmi Mannasa, Gaday gason Sousay; 12 an lafanmi Dann, Ammiyèl gason Ganmolay; 13 an lafanmi Achè, Sifa gason Michèl; 14 an lafanmi Naftali, Nabay gason Vofsay; 15 an lafanmi Gad, Gouwèl gason Mékay. 16 Sa sé non sé nonm-lan Moziz té voyé kon èspiyon an péyi-a. Èk Moziz kwiyé Hochiya gason Nann Jòchwa. 17 Lè Moziz té voyé yo kon èspiyon an péyi Kénann, l di yo: “Alé Nègèb, épi mouté an sé montany-lan. 18 Ou ni pou wè ki kalité péyi l yé. Gadé si sé moun-lan ki ka wèsté la fò ében fèb, èk si la ni an chay moun o pa. 19 Gadé pou wè si péyi-a bon o pa. Gadé pou wè si yo ka wèsté an tant ében si yo ka wèsté an vil ki byen pwotéjé. 20 Épi gadé si péyi-a wich ében si l pòv, si la ni pyé bwa o pa. Sé pou’w pwan kouwaj èk pwan adan fwitaj péyi-a.” A lè sala i té sézon wézen. 27 Mi sé sa yo té di Moziz: “Nou antwé an péyi-a ou té voyé nou-an. Èk péyi sala ka vwéman koulé épi lèt èk siwo myèl. Mi sé fwi-a ki sòti la. 28 Kanmenm, sé moun-lan ki ka viv an péyi-a fò. Èvèk sé vil-la gwo anpil èk yo byen pwòtéjé. Osi, nou wè sé Anakim-lan la. 29 Sé jan Amalèk-la ka wèsté an péyi Nègèb-la. Èk sé Hitayt-la, sé Jèbyousayt-la, épi sé Amòrayt-la ka wèsté an wèt sé montany-lan. Èvèk sé Kénannayt-la ka wèsté bò lanmè-a, èk bò lawivyè Jouden-an.” 30 Lè sala, Kélèb éséyé pou kalmé sé moun-lan ki té doubout douvan Moziz. I di yo: “Annou mouté la menm. Èk asiwé, nou kay pwan péyi-a, paskè san dout nou sa bat sé moun sala.” 31 Mé sé nonm-lan ki té mouté épi’y-la di: “Nou pa sa alé goumen épi sé moun sala, paskè yo pli fò pasé nou.”