Limowo
5 Apwé sa Jéhova palé bay Moziz, i di’y: 2 “Bay jan Izwayèl lòd pou mété népòt moun ki ni lad, ki ni an koulant, èk ki pa pwòp paski i touché an kadav, dèwò kanp-lan. 3 Ki sé an nonm ki sé an fanm, ou sipozé mété yo dèwò kanp-lan. Ou sipozé mété yo dèwò kanp-lan, pou yo pa kontanminé sé kanp-lan koté mwen ka wèsté-a.” 4 Alò, sé sa jan Izwayèl fè; yo mété yo dèwò kanp-lan. Yo fè menm sa Jéhova té di Moziz pou fè. 5 Jéhova kontiné palé bay Moziz, i di’y: 6 “Di jan Izwayèl, ‘Si an nonm ében an fanm fè népòt péché moun abitwé fè èk i moutwé i pa fidèl pou Jéhova, moun sala kay koupab. 7 I ni pou konfésé péché-a i fè-a èk i dwé wimèt tout sa i té pwan èk mété ven pousan valè bagay-la asou’y. I ni pou bay moun-nan i péché kont-la sé bagay sala. 8 Mé si moun-nan i ni pou péyé-a mò èk yo pa ni pyès fanmi ki pwé, péyiman-an dwé vini sa Jéhova. Sa i bay-la kay pou pwèt-la, antiwan bélyé-a pwèt-la ni pou ofè, pou moun-nan ki koupab-la jwenn pawdonnasyon pou péché’y. 9 Tout kontwibisyon sen jan Izwayèl bay pwèt-la kay sa pwèt-la. 10 Sé bagay sen-an chak moun bay pwèt-la kay wèsté sa pwèt-la. Népòt sa an moun bay pwèt-la, bagay sala kay sa pwèt-la. 11 Jéhova kontiné palé bay Moziz, i di’y: 12 “Palé bay manmay Izwayèl èk di yo, ‘Mi sé sa ou ni pou fè si an madanm pwan vyé chimen èk i pa wèsté fidèl pou mawi’y 13 paski yon lòt nonm kouché épi’y mé mawi’y pa sav èk sa wèsté séwé; madanm-lan pa tjenn kò’y pwòp mé pyèsonn pa wè sa i fè-a èk yo pa té bouché’y. 14 Si mawi-a jalou èk i kwè madanm li pa fidèl paski madanm li kouché épi an lòt nonm, ében mawi-a jalou èk i kwè madanm li pa fidèl mé madanm li pa kouché épi an lòt nonm, 15 mawi-a ni pou mennen madanm li douvan pwèt-la, èk i ni pou pòté dis pousan «10%» di yon ifa fawin lòj kon yon lofwann pou madanm li. I pa ni pou vidé lwil asou lofwann-lan, ni mété lansan asou’y, paski sa sé an lofwann pou jalouzi, yon lofwann pou fè moun-nan chonjé péché-a i té fè-a. 16 Pwèt-la kay fè madanm-lan vini pli pwé èk i kay mété’y doubout douvan Jéhova. 17 Pwèt-la kay pwan dlo sen adan an vésèl tè, èk i kay pwan tak lapousyè atè tabennak-la èk mété’y an dlo-a. 18 Èk pwèt-la kay mété madanm-lan doubout douvan Jéhova èk i kay démawé tèt madanm-lan. I kay mété lofwann-nan an lanmen madanm-lan, sa vlé di lofwann-nan pou jalouzi, pou fè moun-nan chonjé péché-a i fè-a. Èk pwèt-la kay ni dlo anmè-a ki ka mennen malédiksyon an lanmen’y.