Limowo
7 Jou-a Moziz té fini mété tabènak-la ansanm, i annonté’y épi lwil èvèk i mété’y apa pou Bondyé, ansanm épi tout mèb-la ki té andidan’y, lotèl-la, èk tout lòt bagay pou tabènak-la. Lè i té fini annonté èk sanngtifyé sé bagay sala, 2 sé chèf-la an Izwayèl, sé chèf fanmi-an, yo pòté sakwifis yo. Sé chèf lafanmi Izwayèl-la ki té wèskonsab pou wéjistwasyon-an 3 pòté sakwifis yo douvan Jéhova. Yo bay sis wagon ki té kouvè, èk douz bèf. Yon wagon pou dé chèf èvèk yon towo bèf pou chak chèf. Èk yo té mennen yo douvan tabènak-la. 4 Jéhova té di Moziz: 5 “Aksèpté sé bagay sala hòd yo, paski ou kay bizwen yo pou sèvis-la an tant mitin-la. Èk ou sipozé bay chak Livayt sa yo bizwen adan sé bagay sala pou yo fè twavay yo.” 6 Kon sa, Moziz té aksèpté sé wagon-an èk sé towo bèf-la èk i bay sé Livayt-la yo. 7 I bay sé gason Ganshonn-lan dé wagon èk kat towo bèf, silon sa yo té bizwen pou twavay yo. 8 Épi osi, i bay sé gason Mèraray-la kat wagon èk ywit towo bèf, silon sa yo té bizwen pou twavay yo, anba diwèksyon Ifama gason Éronn pwèt-la. 9 Mé, i pa té bay sé gason Kohaf-la anyen paski sé an plas sen-an yo té ka twavay, épi yo té ka pòté sé bagay sen-an asou zépòl yo. 10 Kon sa, sé chèf-la pòté sakwifis yo padan yo té ka dèdiké lotèl-la asou jou-a yo té annonté’y. Lè sé chèf-la té mennen sakwifis yo douvan lotèl-la, 11 Jéhova di Moziz: “Lè yo kay dèdiké lotèl-la, yon chèf kay mennen sakwifis li, yo kay vini yonn apwé lòt, yonn chak jou.” 12 Chèf-la ki té pòté sakwifis li asou pwèmyé jou-a sété Nashonn, gason Aminadab, ki sòti an lafanmi Jouda. 13 I mennen yon vésèl ki fèt épi dajan ki pézé 130 chèkèl èk yon bòl ki fèt épi dajan ki pézé 70 chèkèl. Vésèl-la èk bòl-la té pézé silon sa chèkèl-la an plas sen-an ka pézé. Yo toulé dé té plen épi bon kalité fawin fwans ki té mélé épi lwil pou an sakwifis gwenn. 14 Yon pòt ki fèt épi lò ki ka pézé 10 chèkèl, ki plen épi lansan; 15 yon jenn towo bèf, yon bélyé mouton, èk yon mal mouton ki pòkò yon lanné pou an sakwifis bwilé; 16 yon jenn kabwit pou an sakwifis péché. 17 Èk pou an sakwifis lapé, i mennen dé bèf, senk bélyé mouton, senk mal kabwit, èk senk mal mouton ki ni yon lanné chak. Sa sété sakwifis Nashonn gason Aminadab.