Ditonronnonmi

7 “Lè Jéhova, Bondyé zòt, mennen zòt an tè-a zòt kay pwan kon yon byen èk kay wèsté-a, i kay kouwi dèyè sé gwo nasyon-an bay zòt: désandan Hitayt, jan Girgachayt, jan Amorayt, moun Kénann, jan Perizayt, jan Hivayt, èk jan Jèbyousayt. Sèt nasyon ki pli gwo, èk pli fò pasé zòt. 2 Jéhova Bondyé zòt kay ladjé yo an lanmen zòt èk zòt kay détwi yo. Zòt sipozé fè asiwé zòt détwi yo. Zòt pa sipozé fè pyès agwéman épi yo ében moutwé yo pyès favè. 3 Zòt pa sipozé mayé yo. Zòt pa sipozé mayé fi zòt épi gason yo, ében pwan fi yo pou gason zòt mayé. 4 Paski, yo kay fè gason zòt doubout swiv mwen pou yo alé sèvi lòt dyé. Lè sala Jéhova kay vwéman faché kont zòt, èk i pa kay tadé pou détwi zòt. 5 “Pito, mi sé sa zòt sipozé fè yo: Kwazé sé lotèl yo-a èk sé poto sen yo-a ki fèt an wòch, koupé sé poto sen yo-a ki fèt an bwa èk bwilé sé imaj yo-a. 6 Paski zòt sé yon pèp ki sen pou Jéhova Bondyé zòt. Èk Jéhova Bondyé zòt ja chwazi zòt anpami tout sé moun-nan ki asou latè, pou zòt vini pèp li, èk byen spésyal li 7 “Sé pa paskè zòt sété pli gwo nasyon-an anpami tout sé nasyon-an ki fè Jéhova moutwé zòt afèksyon èk i chwazi zòt, anfen, sé zòt ki té pli piti anpami tout sé nasyon-an. 8 Mé, sé paski Jéhova té enmen zòt, èk paski i té tjenn sèman-an i té fè épi ayèl zòt ki fè Jéhova sèvi tout pouvwa’y pou délivwé zòt, pou tiwé zòt anba èslavaj, anba lanmen Féro, wa Éjip. 9 Zòt byen konnèt, Jéhova Bondyé zòt sé Dyé-a ki vwé, Dyé-a ki fidèl, Dyé-a ki ka tjenn agwéman’y, èk ki ka moutwé lanmityé ki fidèl pou moun ki enmen’y, èk moun ki ka obéyi konmandman’y pou wivé jis mil jennéwasyon yo. 10 Mé i pa kay mantjé détwi moun ki hayi’y, pou fè yo péyé pou sa. I pa kay tadé pou pwan aksyon kont moun ki hayi’y; i kay fè yo péyé pou sa. 11 Kon sa, fè asiwé zòt kouté tout sé konmandman-an, tout sé lwa-a, èk tout sé lòd-la mwen ka bay zòt jòdi-a, èk obéyi yo. 12 “Si zòt kontiné kouté tout sé lwa sala, èk zòt obéyi yo, Jéhova Bondyé zòt kay tjenn agwéman-an i té fè-a, èk i kay kontiné moutwé zòt lanmityé ki fidèl menm kon i té sèmanté sé ayèl zòt-la. 13 I kay enmen zòt, i kay benni zòt, èk i kay fè zòt vini an gwo nasyon. Wi, i kay fè zòt ni an chay ich, jaden zòt kay wann, zòt kay ni an chay manjé, diven, èk lwil, èk bèf zòt èk mouton zòt kay fè piti an tè-a i té sèmanté i kay bay ayèl zòt. 14 Sé zòt ki kay pli benni anpami tout sé nasyon-an. La pa kay ni yon nonm ében yon fanm anpami zòt ki pa kay ni ich, èk tout zannimo zòt kay fè piti. 15 Jéhova kay tiwé tout maladi anpami zòt, èk i pa kay ladjé pyès sé vyé maladi-a zòt té konnèt an Éjip asou zòt. Olyé sa, i kay ladjé sé maladi sala asou tout moun ki hayi zòt. 16 Zòt sipozé détwi tout sé moun-nan Jéhova Bondyé zòt kay livwé an lanmen zòt. Yo pa ni pou fè zòt lapenn, èk zòt pa ni pou adowé sé dyé yo-a, paski sa kay vini yon zatwap pou zòt. 17 Si zòt di an tjè zòt, ‘Sé nasyon-an ni pli moun pasé nou. Ki mannyè nou kay bat yo?’ 21 Zòt pa bizwen pè yo paski Jéhova, Bondyé zòt ki épi zòt sé an Bondyé ki gwan èk ki ka fè moun twanblé.