Pou Tjenn An Jan Ou Ni Pou An Jan Osi

Bon jan établi asou lanmityé. Pli ou apwann konsèné Jehovah, sé pli lanmityé ou kay ni pou li. Kon lanmityé’w pou Bondyé ka pwofité, dézi’w pou sèvi’y ka pwofité osi. Sa kay pousé’w pou vini an disip Jézi Kwi. (Mafyou 28:19) Lè’w vini an manm fanmi Témwen Jehovah ki ni lakontantman, ou sa èspéyansé bon jan épi Bondyé pou tout tan. Ki sa ou ni pou fè?

Ou ni pou obéyi lwa Bondyé pou moutwé ou enmen’y. “Nou ka moutwé mizi lanmityé nou ni pou Bondyé, lè nou obéyi konmandman’y; èvèk sé konmandman’y-lan pa wèd pou swiv.”—1 Jan 5:3.

Apliké sa ou apwann. Jézi bay an pawabòl pou èspliké sa. An nonm ki savan bati kay li asou kayè. An nonm ki kouyon bati kay li asou sab. Lè an gwan mové tan vini, kay-la ki bati asou kayè-a pa anfondwé, mé kay-la ki bati asou sab-la tonbé èvèk I kwazé nèt. Jézi di tout sa ki tann enstwit li èvèk fè’y yo menm kon nonm savan-an ki bati asou kayè-a. Mé sa ki kouté enstwit li èvèk pa fè’y yo menm kon nonm kouyon-an ki bati asou sab-la. Kilès nonm ou avoudwé ou té yé?—Mafyou 7:24-27.

Dèdikasyon. Sa vlé di ou ka apwoché Jehovah an lapwiyè èvèk ou ka di’y ou vlé fè divwa’y pou tout tan. Lè ou fè divwa Bondyé sa ka moutwé ou sé an disip Jézi Kwi.—Mafyou 11:29.

Batenm. “Lévé, batizé èvèk kwiyé asou non’y pou lavé tout péché’w.”—Twavay 22:16.

Sèvi Bondyé épi tout tjè’w. “Népòt bagay ou ka fè, fè’y épi tout tjè’w bay Jehovah, èvèk pa bay lézòm.”—Kòlòsé 3:23.