Poutji Ou Sipozé Batizé?

1-2. Kisa ki ka fèt byen souvan lè moun batizé? Èk kisa nou kay diskité an atik sala?

DIWAN yon asanblé ében yon konvansyon, ès ou ja òbzòvé sé moun-lan ki kay batizé-a? Èk lè fwè-a mandé yo sé dé (2) kwèsyon-an, ou ka tann mannyè-a yo ka wéponn sé kwèsyon sala épi asiwans. Osi ou ka wè mannyè fanmi yo èk jan yo kontan pou yo. Èk apwé yo sòti an dlo-a ou ka wè lajwa-a asou fidjay yo, èk ou ka tann mannyè tout moun ka aplodi. Anfen toulé simenn plizyè mil moun ka batizé kon Témwen Jéhova.

² Èk ou, ès ou ja batizé? Si ou pʼòkò batizé, ès ou ka katjilé konsèné batenm? Si ou ka katjilé konsèné batenm, ou sé an moun ki byen spésyal an latè méchan sala paski ou ka moutwé ou vlé ‘adowé [Jéhova].ʼ (Sam 14:1, 2) Alò atik sala ékwi èspwèsman pou ou, ki ou jenn ki ou an laj. Kanmenm, nou ki ja batizé, nou vlé fòtifyé détèminasyon nou pou kontiné adowé Jéhova pou tout tan. La ni plizyè wézon pouki nou ka adowé Jéhova. Mé an atik sala nou kay diskité twa (3) an sé wézon sala.

OU ENMEN LAVÉWITÉ ÈK SA KI DWÈT

3. Pouki sèvant Jéhova enmen lavéwité èk sa ki dwèt? (Sam 119:128, 163)

³ Jéhova koumandé pèp li pou ‘enmen lavéwité.ʼ (Zèk. 8:19) Jézi osi ankouwajé sé disip li-a pou enmen sa ki dwèt. (Maf. 5:6) Sa vlé di, si an moun vlé fè tjè Jéhova èk Jézi kontan, moun sala ni pou ni an dézi ki fò pou fè sa ki dwèt, bon, èk nèt an zyé Bondyé. Ès ou enmen lavéwité? Èk ès ou enmen sa ki dwèt? Nou asiwé ou enmen toulé dé, paski ou sé an moun ki hayi mansonj, èk tout kalté movèzté. (Li Sam 119:128, 163.) Alò an moun ki ka manti ka imité Satan, moun-lan ki ka kondwi latè sala. (Jan 8:44; 12:31) Yonn an sé bagay-la Satan vlé fè, sé pou sali non sen Dyé Jéhova. Konsa, dépi an jaden Édenn i ka simen mansonj konsèné Bondyé. I ka éséyé fè moun kwè Bondyé sé pa an Dyé ki onnèt, i ki ka gadé pou kòʼy tousèl, èk i ka séwé bagay ki bon hòd lézòm. (Jen. 3:1, 4, 5) Sé mansonj-lan Satan ka simen asou Jéhova ka fè moun kwè Bondyé méchan. Alò, Satan sa enflouwansé moun ki pa ‘enmen lavéwitéʼ, pou fè tout kalté movèzté épi bagay ki pa bon.​—Ronm 1:25-31.

4. Kisa Jéhova ka fè ki ka moutwé i sé ‘Dyé lavéwité-aʼ? (Gadé pòtwé-a osi.)

⁴ Jéhova sé ‘Dyé lavéwité-aʼ, èk i kontan pou enstwi moun ki enmenʼy lavéwité-a. (Sam 31:5) Pou ègzanp, Jéhova ka enstwi pèp li mannyè-a pou wèsté onnèt, èk mannyè-a pou fè sa ki dwèt. A kòz di sa yo ka ni pli wèspé pou kò yo, èvèk yo ka ni lapé an lidé yo èk an tjè yo. Èk osi, sa ka anpéché Satan kwennen yo. (Pwovèb 13:5, 6) Kon ou ka étidyé Bib-la, ès Jéhova ja édéʼw an sé mannyè sala? San dout, ou vlé fè tout sa Bondyé di ki dwèt, paski ou ja apwann sa Bondyé di nou pou fè kay mennen bennéfis pou ou èk tout lézòm. (Sam 77:13) Konsa, ou vlé moun konnèt lavéwité-a. (Mafyou 6:33) Èk ou vlé bay pwèv ki, sa Satan di konsèné Dyé nou Jéhova pa vwé. Kanmenm, koumannyè ou sa fè sa?

5. Ki mannyè ou sa moutwé ou enmen lavéwité-a èk sa ki dwèt?

⁵ Yon mannyè ou sa moutwé ou enmen lavéwité-a èk sa ki dwèt, sé lè ou viv laviʼw adan an mannyè ki ka moutwé tout moun ou ka widjèkté mansonj Satan, èk ou ka sipòté lavéwité-a. Osi ou kay viv laviʼw adan an mannyè ki kay moutwé ou vlé Jéhova pou Kondwitèʼw, èk ou vlé fè tout sa i di ki dwèt. Alò ki mannyè ou sa fè sa? Ou sa fè sa lè ou dèdiké laviʼw pou Jéhova. Sa vlé di, ou kay pwonmèt Jéhova an lapwiye ki, sé li yonn ou kay sèvi pou tout tan. Èk apwé ou fè sa, ou kay batizé. Wi, si ou vwéman enmen lavéwité èk sa ki dwèt, sa kay motivéʼw pou batizé.

OU ENMEN JÉZI KWI

6. Silon Sam 45:4, poutji ou enmen Jézi Kwi?

⁶ Annou gadé déotwa wézon poutji nou enmen Jézi an Sam 45:4. NWT (Liʼy.) Silon lévanjil sala nou ka wè Jézi enmen lavéwité, imilté, èk sa ki dwèt. Alò, si ou enmen lavéwité èk sa ki dwèt, san dout ou enmen Jézi osi. Pou ègzanp i ka touché tjè nou lè nou wè mannyè Jézi té doubout pou sa ki vwé èk sa ki dwèt. (Jan 18:37) Kanmenm, an ki mannyè Jézi ka enstwi nou pou moutwé imilité?

7. Kisa ou enmen konsèné imilité Jézi?

⁷ Jézi ka enstwi nou mannyè pou moutwé imilité pa ègzanp li. Pou ègzanp, lè Jézi té asou latè-a, i bay Papaʼy tout laglwa-a, i pa janmen pwan laglwa-a pou kòʼy. (Mak 10:17, 18; Jan 5:19) Lèʼw mèdité asou imilité-a Jézi té moutwé, ès i ka ankouwajéʼw pou enmen Jézi pli èk pou swiv ègzanp li? Asiwé. Alò pouki Jézi ka moutwé imilité? Sé paski Jézi enmen Papaʼy. Èk Papaʼy Jéhova plen imilité èk Jézi ka imité ègzanp li. (Sam 18:35; Hib. 1:3) Wi, lè nou wè mannyè-a Jézi ka imité kawaktè Papaʼy, sa ka ankouwajé nou pou enmen Jézi.

8. Poutji nou enmen Wa nou Jézi Kwi?

⁸ Jéhova entwennen Jézi, èk i apwentéʼy kon Wa. Konsa, Jézi sé pli mèyè Wa-a nou sa ni, èk nou enmenʼy toubonnman. (Izay. 50:4, 5) Èk osi, Jézi ja moutwé ki otan enmen i enmen nou. (Jan 13:1) Alò kon Wa nou, Jézi méwité lanmité nou. Anfen, Jézi ka kwiyé moun ki enmenʼy janʼy. Èk yo ka moutwé yo enmenʼy lè yo obéyi koumandmanʼy. (Jan 14:15; 15:14, 15) I vwéman sé an bèl lonnè pou nou sa vini jan épi Gason Bondyé!

9. An ki mannyè batenm Kwityen menm kon batenm Jézi?

⁹ Jézi konmandé sé disip li-a pou batizé. (Maf. 28:19, 20) Anfen, i menm té batizé. Konsa, i ba yo an bèl ègzanp pou swiv. Mé an déotwa mannyè, batenm Jézi té diféwan hòd batenm sé disip li-a. (Gadé bwèt-la: “Ki Mannyè Batenm Jézi Èk Batenm Sé Disip Li-a Diféwan?”) Kanmenm adan lòt mannyè, batenm Kwityen menm kon batenm Jézi. Pou ègzanp lè Jézi té batizé, i té ka moutwé Papaʼy i té pawé pou fè volontéʼy. (Hib. 10:7) An menm mannyè-a, lè disip Jézi batizé, yo ka moutwé moun yo ja pwonmèt Jéhova pou fè volontéʼy. Alò, a lè sala yo ka moutwé bagay-la ki pli enpòtan an lavi yo sé pou fè volonté Jéhova èk pa sa yo. Konsa, yo ka moutwé yo ka swiv ègzanp Jézi Kwi, Mèt yo.

10. Ki mannyè ou sa moutwé ou enmen Jézi?

¹⁰ Kon ou ka vini konnèt Jézi pli mèyè, ou ka vwéman kwè Jézi sé sèl Gason Bondyé. Èk ou byen kontan Bondyé apwentéʼy pou kondwi nou. Osi ou ka apwésyé mannyè Jézi ka moutwé imilité èk mannyè i ka imité Papaʼy. Èk ou ja apwann mannyè Jézi té swè moun ki té fen, soulajé moun ki té dékouwajé, èk i jis djéwi moun ki té malad. (Maf. 14:14-21) An plis di sa, ou ka wè mannyè i ka djidé kongwigason-an jòdi jou. (Maf. 23:10) Èk ou sav Jézi kay fè jis plis pasé sa an tan pou vini kon Wa an Wéyòm Bondyé. Alò ki mannyè ou sa moutwé ou enmen Jézi? Ében ou ka moutwé ou enmen Jezi lè ou swiv ègzanp li. (Jan 14:21) Èk an bèl mannyè ou sa fè sa, sé lè ou dèdiké laviʼw pou Jéhova èk batizé.

OU ENMEN JÉHOVA

11. Kisa ou kay di ki pli enpòtan wézon-an pou ou batizé? Èk pouki ou kwè sa?

¹¹ Kisa ki pli enpòtan wézon-an pou ou batizé? Ében Jézi ka ban nou wépons-lan an Mak 12:30 koté i di: “Ou oblijé enmen Bondyé Senyèʼw épi tout tjèʼw, épi tout lam ou, épi tout lidéʼw épi èk tout kouway ou.” Ès lanmityéʼw pou Bondyé fò konsa?

12. Pouki ou enmen Jéhova? (Gadé pòtwé-a osi.)

¹² Nou ni si tèlman wézon pou enmen Jéhova. Pou ègzanp, ou ja apwann an Bib-la, sé Jéhova ‘ki sous laviʼ èk sé li ki ka bay “tout bon kado èk tout bon bagay ki pa ni défo.” (Sam 36:9; Jémz 1:17) Wi, Jéhova donnan èk i benyen lanmityé. Konsa tout sa nou ka enjwi sé li ki ban nouʼy.

13. Poutji nou sa di wanson-an sé vwéman an bèl kado Jéhova ban nou?

¹³ Wanson-an sé vwéman an bèl kado Jéhova ban nou. Pouki nou sa di sa? Ében katjilé asou bon wilasyon-an Jéhova èk Jézi ni épi yonn a lòt. Jézi èk Papaʼy ja pasé plizyè bilyon lanné ansanm, konsa yo byen pwé yonn a lòt. (Pwov. 8:22, 23, 30) Èk sé pou wézon sala Jézi té sa di: “Papa-a enmen mwen” èk “mwen enmen Papa-a.” (Jan 10:17; 14:31) Apwézan katjilé asou lapenn-lan Jéhova té èspéyansé, lè i kité Gasonʼy soufè èk mò. Poutji Jéhova fè sa? Sé paski Jéhova enmen lézòm èk i enmenʼw tou. Wi, Jéhova enmen nou si tèlman, i bay sèl Gasonʼy kon an sakwifis pou ou èk lézòt moun twapé chans-lan pou viv pou tout tan. (Jan 3:16; Gal. 2:20) Vwéman, la pa ni an lòt pli bon wézon pasé sa pou enmen Jehova.

14. Kisa ki pli mèyè bagay-la ou sa fè épi laviʼw?

¹⁴ San dout, sé bagay-la ou ka apwann konsèné Jéhova ka fèʼw enmenʼy pli. Asiwé ou vlé kontiné vansé pli pwé Bondyé pou tout tan. Èk i vwéman posib pou fè sa. Anfen, Jéhova ka ankouwjéʼw pou fè tjèʼy kontan. (Pwov. 23:15, 16) Alò, ki mannyè ou sa fè tjè Jéhova kontan? Ou sa fè sa an mannyè-a ou ka viv laviʼw, ni an sa ou ka di ni an sa ou ka fè. Konsa, mannyè-a ou chwazi pou viv laviʼw kay moutwé Jéhova ou vwéman enmenʼy. (1 Jan 5:3) Alò, si ou chwazi pou viv laviʼw adan an mannyè ki ka plè Jéhova, sa sé pli mèyè bagay-la ou sa fè épi laviʼw.

15. Ki mannyè ou sa moutwé Jéhova ou vwéman enmenʼy?

¹⁵ Ki mannyè ou sa moutwé Jéhova ou vwéman enmenʼy? Pwèmyéman, ou ni pou dèdiké laviʼw pou Jéhova. Sa vlé di ou kay pwonmèt Jéhova an lapwiyè ki, sé li yonn ou kay sèvi pou tout tan. (Sam 40:8) Kanmenm, ou pa vlé tjenn sa kon an sigwé. Konsa, apwé sa ou kay batizé, paski ou vlé tout moun konnèt ou ja fè pwonmèt sala bay Jéhova. Kon nou ja diskité an atik sala, sé pa dé kontan ou kay kontan asou jou batenm ou, paski batenm byen enpòtan. Anfen, lè ou dèdiké laviʼw pou Jéhova èk ou batizé, ou ka koumansé an lavi ki nèf, pa pou plè kòʼw mé pou plè Jéhova. (Ronm 14:8; 1 Pita 4:1, 2) Wi sa vwé, sa sé an gwo disizyon pou fè. Mé batenm ou kay fèʼy posib pou ou sa ni an bon lavi apwézan èk pou tout tan. Koumannyè sa posib?

16. Silon Sam 41:12, ki mannyè Jéhova kay benni moun ki sèvi lavi yo an sèvis li?

¹⁶ La pa ni pyèson ki pli donnan pasé Jéhova. Népòt sa ou baʼy, i kay toujou baʼw plis pasé ou baʼy. (Mak 10:29, 30) Chonjé menm si ou ka viv an vyé latè Satan, si ou sèvi laviʼw an sèvis Jéhova, i kay benniʼw èk i kay baʼw an lavi ki plen lakontantman. Èk sa sé annèk koumansman lavi nèf ou. Alò, lavi nèf-la ou koumansé lè ou batizé pa janmen ni pou doubout. Anfen, ou sa kontiné adowé Papaʼw Jéhova pou tout tan. Wi, ou kay viv pou tout tan menm kon Jéhovah, èk lanmityéʼw pou li kay kontine pou pwofité jou apwé jou.​—Li Sam 41:12.

17. Kisa Jéhova pʼòkò ni ou sa baʼy?

¹⁷ La ni an bagay Jéhova pʼòkò ni èk ou sa baʼy. Kisa i yé? Jéhova ja baʼw an chay bon bagay. Wi, tout sa ou ka enjwi an laviʼw, sé Jéhova ki ba ouʼy. Kanmenm, lè ou dèdiké laviʼw pou Jéhova èk ou batizé, ou ni òpòtyounité-a pou bay Jéhova an bagay ki byen spésyal. Anfen, an bagay i pʼòkò ni èk sa sé lanmityé fidèl ou. (Jòb 1:8; 41:11; Pwov. 27:11) Vwéman, sa sé pli mèyè bagay-la ou sa fè épi laviʼw. San dout pli mèyè wézon-an pouʼw batizé sé paski ou enmen Jéhova.

ÈS OU PAWÉ POU BATIZÉ?

18. Ki kwèsyon ou sa mandé kòʼw pou ou sav siʼw pawé pou batizé?

¹⁸ Ki mannyè ou kay wéponn kwèsyon sala, ès mwen kay batizé? Pyèsonn pa sa wéponn kwèsyon sala pou ou. Kanmenm i té kay bon pou mandé kòʼw, ‘Pouki wézon mwen pʼòkò batizé?ʼ (Twav. 8:36) Ében i kay bon si ou chonjé sé twa (3) bagay-la nou diskité an atik sala kisa motivéʼw pou batizé. Pwèmyéman, ou enmen lavéwité èk sa ki dwèt. Alò, mandé kòʼw: ‘Ès mwen anvi wè jou-a lè tout moun asou latè-a kay palé lavéwité èk fè sa ki dwèt?ʼ Dézyenman, ou enmen Jézi Kwi. Alò mandé kòʼw: ‘Ès mwen vlé Jézi Kwi pou Wa mwen, èk ès mwen vlé swiv ègzanp li?ʼ Èk twazyenm bagay-la ki pli enpòtan sé, ou enmen Jéhova. Alò mandé kòʼw: ‘Ès mwen vlé adowé Jéhova èk fè tjèʼy kontan?ʼ Si ou wéponn wi pou tout sé kwèsyon sala, i sanm ou pawé pou batizé. Alò kisa ki ka anpéchéʼy batizé?​—Twav. 16:33.

19. Ki mannyè ilistwasyon-an an Jan 4:34 sa ankouwajéʼw pou fè disizyon-an pou batizé?

¹⁹ Si an ka ou pa asiwé ou pawé pou batizé, annou konsidiwé an ilistwasyon Jézi té bay ki kay ankouwajéʼw. (Li Jan 4:34.) An Jan 4:34, Jézi té di pou fè twavay Papaʼy té menm kon manjé pou li. Poutji i di sa? Sé paski menm kon manjé bon pou nou, Jézi té sav tout sa Papaʼy Jéhova mandé nou pou fè, bon pou nou osi. Wi, Jézi té sav, Jéhova pa té kay janmen mandé nou pou fè anyen ki té kay fè nou ditò. Alò, ès ou kwè Jéhova vléʼw batizé? Si wépons ou pou kwèsyon sala sé wi. (Twav. 2:38) Ou sa asiwé si ou obéyi koumand sala èk ou batizé, ou kay twapé bennéfis èk ou kay fè tjè Jéhova kontan. Konsa, menm kon ou pa té kay tadé pou manjé an bon wipa, pa tadé pou fè disizyon-an pou batizé.

20. Ki kwèsyon nou kay wéponn an lòt atik-la?

²⁰ Ès ou pawé pou batizé? An chay moun pé di, “Non, mwen pʼòkò pawé.” Kanmenm, i enpòtan pou chonjé ki, lè an moun dèdiké laviʼy pou Jéhova èk i batizé, la pa ni an lòt disizyon ki pli enpòtan pasé sa. Alò, i byen enpòtan pou ou katjilé konsèné disizyon sala, paski i kay pwan tan èk an chay éfò pou ou kwalifyé pou batenm. Mé si ou vwéman vlé batizé, kisa ou sa fè apwézan pou pwépawé kòʼw pou batenm? Nou kay wéponn kwèsyon sala an lòt atik-la.