Ès Ou Pawé Pou Batizé?

Konʼw ka étidyé Bib-la ou ja apwann an chay bagay konsèné Jéhova. San dout, ou osi ja fè chanjman pou apliké saʼw ka apwann. Mé, pitèt ou ka santi ou pʼòkò pawé pou dèdiké laviʼw pou Jéhova épi batizé. An lison sala nou kay diskité déotwa bagay ki sa anpéchéʼw batizé, épi mannyè ou sa ganyen a bout yo.

1. Kisa ou ni pou konnèt avan ou batizé?

Pouʼw sa batizé, ou ni pou “vini konnèt [lavéwité-a].” (1 Timòfi 2:4) Mé, sa pa vlé di ou ni pou konnèt tout sa ki an Bib-la avan ou batizé. Anfen, tout Kwityen ni pou kontiné apwann, jis Kwityen ki ja batizé pou an chay lanné. (Kòlòsé 1:9, 10) Kanmenm, avan ou batizé, la ni sèten bagay an Bib-la ou bizwen apwann. Sé ansyen-an an kongwigasyon-an kay édéʼw konnèt siʼw ja apwann asé an Bib-la pouʼw batizé.

2. Kisa ou ni pou fè avan ou sa batizé?

Avan ou sa batizé, ou ni pou “tounen hòd péchéʼw épi vin jwenn Bondyé.” (Li Twavay 3:19.) Sa vlé di ou ni pou wigwété tout péché ou ja fè, épi ou ni pou mandé Jéhova pou pawdonnenʼw. Osi, ou ni pou widjèkté tout kondwit ki pa bon, épi ou ni pou détèminé pou viv adan an mannyè ki kay plè Bondyé. An plis di sa, ou ni pou koumansé atandé sé mitin-lan, èk pwéché ansanm épi kongwigasyon-an.

3. Pouki ou pa sipozé kité lapèwèz anpéchéʼw batizé?

Adan moun pè pou batizé paski yo kwè yo pa kay sa fè tout sa Jéhova vlé. Mé chonjé nou pa pawfé, konsa délè nou kay fè lèwè. Bib-la mansyonnen nonm èk fanm fidèl ki té fè lèwè. Jéhova sav nou pyès pa pawfé, konsa i sav nou kay fè lèwè. (Li Sam 103:13, 14.) Lèʼy wèʼw ka fè fòs kòʼw pou obéyiʼy, sa ka fè tjèʼy kontan! Èk i kay édéʼw. Anfen, Jéhova pwonmèt la pa ni anyen ki “sa janmen tiwé nou an [lanmityéʼy].”—Li Ronm 8:38, 39.

ANNOU APWANN PLI

4. Vini konnèt Jéhova pli mèyè

Kisa ou ni pou konnèt konsèné Jéhova avan ou sa batizé? Ou ni pou konnèt Jéhova byen asé pouʼw enmenʼy, épi pouʼw ni dézi-a pou plèʼy. Annou gadé VIDIYO-A, Chimen-an Pou Batenm pou wè mannyè étidyan Bib owon latè-a ja fè sa. Èk apwé nou kay kozé asou kwèsyon sala:

VIDIYO: Chimen-an Pou Batenm (3:56)

• An vidiyo-a, kisa ki édé adan sé moun-lan pou pwépawé pou batenm?

Annou li Ronm 12:2, èk apwé nou kay kozé asou sé kwèsyon sala:

• Ès ou vwéman kwè Bib-la sé lavéwité-a? Ès ou vwéman kwè Témwen Jéhova ka enstwi lavéwité-a?

• Si ou ni pyès dout, kisa ou sa fè?

5. Ganyen a bout difikilté ki sa anpéchéʼw batizé

Nou tout kay ni difikilté lè nou désidé pou dèdiké lavi nou pou Jéhova èk batizé. Pou wè yonn an sé difikilté sala, annou gadé VIDIYO-A, Lanmityé Pou Jéhova Ka Édéʼw Ganyen A Bout Tout Difikilté èk apwé nou kay kozé asou sé kwèsyon sala:

VIDIYO: Lanmityé Pou Jéhova Ka Édéʼw Ganyen A Bout Tout Difikilté (5:22)

• An vidiyo-a, ki kalité difikilté Narangerel té ni pou ganyen a bout pouʼy té sa sèvi Jéhova?

• Ki mannyè lanmityé sésé-a pou Jéhova té édéʼy ganyen a bout sé difikilté sala?

Annou li Pwovèb 29:25 èk 2 Timòfi 1:7, èk apwé nou kay kozé asou kwèsyon sala:

• Kisa ki ka ban nou kouwaj pou ganyen a bout tout kalité difikilté?

6. Ni konfyans Jéhova kay édéʼw

Jéhova kay édéʼw pou plèʼy. Annou gadé VIDIYO-A, Dyé Jéhova Ké Édéʼw èk apwé nou kay kozé asou sé kwèsyon sala:

VIDIYO: Dyé Jéhova Ké Édéʼw (2:50)

• An vidiyo-a, kisa ki té ka anpéché étidyan Bib-la batizé?

• Kisa étidyan Bib-la apwann ki té édéʼy fòtifyé konfyans li an Jéhova?

Annou li Izaya 41:10, 13, èk apwé nou kay kozé asou kwèsyon sala:

• Pouki ou sa ni konfyans-lan ou sa fè sa Jéhova vlé?

7. Dévlopé pli apwésiyasyon pou lanmityé Jéhova

Pli ou katjilé asou mannyè Jéhova enmenʼw, sé pli ou kay apwésyéʼy èk sé pli ou kay vlé sèviʼy pou tout tan. Annou li Sam 40:5, èk apwé nou kay kozé asou kwèsyon sala:

• Ki bennédiksyon Jéhova ja baʼw ou ka vwéman apwésyé?

Pwofèt Jérémaya té enmen Jéhova èk Pawòl li. Osi, i té vwéman apwésyé pwivilaj-la i té ni pou pòté non Jéhova. Mi sa i di an Jérémaya 15:16: ‘Pawòl ou té fè tjè mwen kontan an pil. Paski, mwen ka pòté nonʼw, Dyé Jéhova.ʼ Annou kozé asou sé kwèsyon sala:

• Pouki i sé an bèl pwivilaj pou vini an Témwen Jéhova?

• Ès ou vlé batizé kon an Témwen Jéhova?

• Ès la ni anyen ki ka anpéchéʼy batizé?

• Kisa ou kwè ou bizwen fè pouʼw sa batizé?

CHONJÉ SÉ PWEN SALA

Épi èd Jéhova, ou sa ganyen a bout népòt difikilté ki pé anpéchéʼw batizé.

Annou Wivizé Sa Nou Ja Apwann

• Ès ou ni pou konnèt tout sa ki an Bib-la avan ou sa batizé? Pouki?

• Ki chanjman ou pé ni pou fè avan ou sa batizé?

• Pouki ou pa sipozé kité lapèwèz anpéchéʼw batizé?

LÒT ENFÒMASYON OU SA GADÉ

Apwann kisa ki sipozé pouséʼw pou batizé.

“Ès Ou Pawé Pou Batizé?” (Gad-la, Mas 2020)

Apwann mannyè ou sa ganyen a bout difikilté ki pé anpéchéʼw batizé.

“Kisa Ki Ka Anpéché Mwen Batizé?” (Gad-la, Mas 2019)

Gadé mannyè yon nonm ganyen a bout gwo difikilté i té ni pouʼy batizé.

Pouki Ou Ka Tadé Pou Pwan Batenm? (1:10)

Yon nonm yo kwiyé Ataa té ka tadé pou batizé. Gadé sa ki édéʼy fè disizyon enpòtan sala.

Ès Mwen Vwéman Méwité Tout Sa? (7:21)