Pa Kité Anyen Anpéché’w Batizé

1. Pouki ou vlé batizé?

SAN DOUT, ou vlé moutwé Jéhova ki otan ou enmen’y, paski i ha ba’w lavi èk tout bèl kado. Bon. Pli mèyè mannyè-a ou sa moutwé ou enmen Jéhova sé lè ou dèdiké lavi’w bay Jéhova èk ou batizé. Èk lè’w fè sa, ou ka vini an manm an fanmi Jéhova. Konsa, Jéhova kay djidé’w, èk i kay otjipé’w, paski ou mété lavi’w an lanmen’y. (Sam 73:24; Izay. 43:1, 2) Osi, lè’w dèdiké lavi’w bay Bondyé èk ou batizé, ou ni èspwa-a pou viv pou tout tan.​—1 Pita 3:21.

2. Kisa nou kay diskité an atik sala?

² Pitèt la ni bagay ki ka anpéché’w batizé. Si sé sa, pwan tjè. Paski la ni an chay moun ki té ni pou fè chanjman an lavi yo pou yo té sa batizé, èk apwézan yo ka sèvi Jéhova épi an chay djèwté. Bon, an atik sala nou kay diskité ègzanp adan sé moun-lan ki té batizé an pwèmyé syèk-la, pou nou wè sé difikilté-a yo té èspéyansé, èk sa nou sa apwann hòd ègzanp yo.

SÉ JAN SANMARIYA-A BATIZÉ

3. Ki chanjman sé jan Sanmariya-a té ni pou fè pou yo té sa batizé?

³ Sé jan Sanmariya-a té ka viv an tan Jézi, èk yo té ni wilizyon yo menm. Èk an chay di yo té ka viv an vil Chèkenm èk an Sanmariya. Bon. Sé jan Sanmariya-a té ka aksèpté sèlman sé pwèmyé senk (5) liv-la ki an Bib-la, èk pitèt liv Jòchwa. Konsa, avan yo té sa batizé yo té ni pou aksèpté tout Pawòl Bondyé èk apwann hòd li. Èk sé vwé, yo té ka èspéyé Mèsaya-a té kay vini silon sa ki ékwi an Ditonronnonmi 18:18, 19. (Jan 4:25) Mé yo té ni pou aksèpté Jézi kon Mèsaya-a, avan yo té sa batizé, èk sé sa an pil di yo té fè. (Jan 4:39) Osi adan di yo té ni pou ganyen a bout hayisan-lan yo té ni pou sé Jwif-la.​—Louk 9:52-54.

4. Kisa sé jan Sanmariya-a té fè lè Filip pwéché ba yo?

⁴ Kisa ki édé sé jan Sanmariya-a pou batizé? Lè Filip “pwéché konsèné Jézi Kwi” bay sé jan Sanmariya-a, yo aksèpté “pawòl Bondyé”. (Li Twavay 8:5, 6, 14.) Bon. Sé jan Sanmariya-a kouté Filip magwé i sété yon Jwif. Pitèt yo té chonjé lévanjil ki ka di: ‘Bondyé pa ni pwéféwans pou pyèsonn.’ (Dito. 10:17-19) Wi, sé jan Sanmariya-a aksèpté sa Filip té ka di yo konsèné Jézi Kwi. An plis di sa, Filip té tiwé vyé lèspwi andidan an chay moun, èk i té djéwi moun ki té enfim èk moun ki té ka bwété. (Twav. 8:7) Alò sé jan Sanmariya-a aksèpté tout sa Filip té ka di, paski yo té sa wè a klè sé Bondyé ki té voyé’y.

5. Ki lison nou sa apwann hòd sé jan Sanmariya-a?

⁵ Bon sé jan Sanmariya-a té sa wifizé kouté Filip, paski i sété an Jwif, ében paski i té ka di yo bagay yo pa té janmen tann avan. Mé paski yo té ni asiwans-lan ki, sa Filip té ka enstwi yo sété lavéwité-a, yo pa tadé pou batizé. Anfen, Twavay 8:12 ka di: “Mé lè sé moun-an tann Filip, yo vini kwè Bon Nouvèl-la konsèné Jézi Kwi épi mannyè Bondyé ka kondwi sé moun li-an. Épi Filip batizé yo, nonm kon fanm.” ‘Alò, ès ou ni asiwans-lan ki, Pawòl Bondyé sé lavéwité-a? Ès ou asiwé Témwen Jéhova pa ka moutwé pwéféwans, èk yo ka moutwé lanmityé anpanmi yo menm kon Jézi té di?’ (Jan 13:35) Si wépons ou sé wi, pa kité anyen anpéché’w batizé. Èk si ou fè sa, ou sa ni konfyans-lan ki, Jéhova kay benni’w.

6. Ki mannyè ègzanp Rueben sa édé’w?

⁶ Rueben lévé adan an fanmi Témwen Jéhova an péyi Almany. Kanmenm, lè’y té pli jenn i pa té asiwé Bondyé té ka ègzisté. Alò kisa i fè? Ében lè’y wéyalizé i pa té ni asé enfòmasyon asou sijé-a, i désidé pou apwann pli. I di: “Mwen fè an chay wichach pou mwen sa twapé lavéwité-a. Èk mwen étidyé tòpik évolousyon-an plizyè fwa.” Osi Rueben li liv-la, Is There a Creator Who Cares About You? èk sa édé’y pou fòtifyé lafwa’y an Bondyé. Alafen Rueben di: ‘Wi, Jéhova ka vwéman ègzisté.’ Èk apwé Rueben vizité pwensipal òfis Témwen Jéhova i koumansé enmen pèp Jéhova pli. Bon, lè Ruben viwé Almany, i batizé. Èvèk i té dis sèt (17) lanné. Alò menm kon Rueben, si’w ni pyès dout konsèné Bondyé, Bib-la, èben népòt lòt bagay, fè wichach an sé piblikasyon nou-an. Wi, pli ou konnèt konsèné Jéhova èk Pawòl li, i kay fè’y pli ézé pou ganyen a bout népòt dout ou ni. (Èfés. 4:13, 14) Èk lè ou apwann konsèné lanmityé-a èk lilyon-an anpanmi pèp Jéhova, èk ou menm èspéyansé’y, ou kay ni pli lanmityé pou sé fwè èk sè-a.

SÒL KI SÒTI TASÒS BATIZÉ

7. Pouki Sòl té ni pou chanjé katjil li?

⁷ Bon. Annou konsidiwé ègzanp Sòl ki sòti Tasòs. Sòl té byen konnèt Lwa sé Jwif-la, èk i té ni an gwo pozisyon anpami yo. (Gal. 1:13, 14; Filip. 3:5) A lè sala, an chay Jwif té ka kwè sé Kwityen-an sété apòsta. Konsa, Sòl té kwè i té ka fè volonté Bondyé lè’y té ka pèsikité yo. (Twav. 8:3; 9:1, 2; 26:9-11) Alò, si Sòl té vlé aksèpté Jézi èk batizé, i té ni pou pawé kò’y pou èspéyansé pèsikasyon.

8. (a) Kisa ki édé Sòl pou batizé? (b) Silon Twavay 22:12-16, ki mannyè Annannayas té édé Sòl? (Gadé pòtwé-a osi.)

⁸ Bon. Kisa ki édé Sòl pou batizé? Ében lè Jézi palé bay Sòl, an gwo klèté fè’y vini avèg. (Twav. 9:3-9) Èvèk Sòl wèsté san manjé pou twa jou, èk san dout i mèdité asou sa ki té wivé’y. Èk sa édé’y pou ni asiwans-lan ki, Jézi sé vwéman Mèsaya-a, èk sété disip Jézi ki té ni wilizyon vwé-a. Konsa, san dout, i té fè Sòl lapenn lè’y chonjé mannyè i té sipòté sé moun-lan ki té tjwé Stivann! (Twav. 22:20) Konsa, apwé sé twa jou-a, yon disip yo ka kwiyé Annannayas apwoché Sòl, i fè’y wè ankò, èk i ankouwajé’y pou batizé. (Li Twavay 22:12-16.) Bon, Sòl abésé kò’y, i kouté Annannayas èk i batizé.​—Twav. 9:17, 18.

9. Ki lison nou sa apwann hòd ègzanp Sòl?

⁹ Bon, la ni bèl lison nou sa apwann hòd Sòl. Pou ègzanp, Sòl pa té kité lògèy ében pèwèz lézòm anpéché’y batizé. Osi Sòl abésé kò’y, èk i té pawé pou fè népòt chanjman an lavi’y ki té nésésè pou’y sa vini an disip Jézi. (Twav. 26:14, 19) Èk Sòl té pawé pou vini an Kwityen menm si i té sav i té kay èspéyansé pèsikasyon. (Twav. 9:15, 16; 20:22, 23) Èk apwé i batizé, i kontiné dépan asou Jéhova pou édé’y tjenbé fò. (2 Kòr. 4:7-10) Alò, sé vwé, lè’w batizé kon yon Témwen Jéhova lafwa’w kay vini anba tès, èk ou kay èspéyansé òpozisyon. Kanmenm, ou sa ni konfyans-lan ki, Bondyé èk Jézi kay ba’w èd-la ou bizwen pou’w sa tjenbé fò èk wèsté fidèl.​—Filip. 4:13.

10. Ki bennéfis ou sa twapé hòd ègzanp Anna?

¹⁰ Anna té lévé an Iwòp. Apwé manman’y batizé, papa Anna kité’y étidyé Bib-la épi Témwen Jéhova lè’y té ni nèf (9) lanné. Èk sa annékòz pwòblenm épi lòt moun an fanmi’y ki té ka viv ansanm épi yo. Wi, yo té kontwayé, paski yo té ka wè’y kon an hontèz pou yon moun kité wilizyon fanmi’y. Bon, lè Anna té douz (12) an, i di papa’y i té vlé batizé. Mé papa’y té vlé sav si sa sété disizyon’y menm èben si moun té ka ba’y chalè pou batizé. Anna di’y: “Mwen vlé batizé paski mwen enmen Jéhova.” Konsa, papa’y kité’y batizé. Mé apwé Anna batizé, fanmi’y kontiné maltwété’y. Anfen, gwanpapa’y jis di’y: “I té kay pli mèyè si ou té ka viv vyé lavi èben fimen pito ou vini an Témwen Jéhova.” Bon, kisa ki édé Anna? Èben Anna di: “Sé Jéhova ki édé mwen pou tjenbé fò, èk osi papa mwen épi manman mwen té ka sipòté mwen.” Anna jis ékwi sé diféwan lè-a Jéhova té édé’y, èk tanzantan i ka gadé sa i té ékwi pou’y chonjé mannyè Jéhova té édé’y. Konsa, si ou pè pèsikasyon, toujou chonjé Jéhova kay édé’w.​—Hib. 13:6.

KÒNILIYÒS BATIZÉ

11. Kisa ki té sa anpéché Kòniliyòs batizé?

¹¹ An lòt moun nou sa apwann hòd sé Kòniliyòs. I sété an chèf sòlda an militè Ronm-lan ki té ka konmandé yon san (100) sòlda. (Twav. 10:1) Bib-la osi di, “[i] té ka swiv wilizyon sé Jwif-la. [Èk] i té ka fè an chay pou édé sé Jwif-la ki té pòv-la.” (Twav. 10:2) Bon, Jéhova voyé zapòt Pita pou pwéché bon nouvèl-la bay Kòniliyòs. Alò, ès gwo pozisyon Kòniliyòs té kay anpéché’y batizé?

12. Kisa ki édé Kòniliyòs pou batizé?

¹² Bon. Kisa ki édé Kòniliyòs pou batizé? Bib-la ka di nou, Kòniliyòs épi tout fanmiʼy “té ka swiv wilizyon sé Jwif-la.” Épi i té ka toujou pwédyé bay Bondyé. (Twav. 10:2) Konsa, lè Pita pwéché bon nouvèl-la bay Kòniliyòs, i èk fanmi’y mété lafwa an Jézi èk yo batizé. (Twav. 10:47, 48) Wi, Kòniliyòs té pawé pou fè népòt chanjman ki té nésésè pou’y sa adowé Jéhova ansanm épi fanmi’y.​—Jòch. 24:15; Twav. 10:24, 33.

13. Ki lison ou sa apwann hòd Kòniliyòs?

¹³ Bon, menm kon Sòl, Kòniliyòs pa té kité gwo pozisyon’y anpéché’y batizé. Alò, ès ou ni pou fè gwo chanjman an lavi’w pou’w sa batizé? Si sé sa, dépan asou Jéhova, i kay édé’w. Wi, si ou fè lidé’w pou swiv pwensip Bib an lavi’w pou’w sa sèvi Jéhova, i kay benni’w.

14. Kisa ou sa apwann an ègzanp Tsuyoshi?

¹⁴ Tsuyoshi ka viv an Japon, èk i té ni pou doubout fè sèten bagay an twavay li pou’y té sa batizé. Ou wè, i té ka asisté mèt yon lékòl ki té ka enstwi moun mannyè pou awanjé flè. Bon, mèt lékòl-la té ka awanjé flè pou lètèman Buddhist, èk i té ka fè bagay diwan lètèman-an ki té ni pou fè épi fo wilizyon. Mé lè mèt lékòl-la pa té sa atandé yon lètèman, Tsuyoshi té ni pou alé an plas li. Kanmenm lè Tsuyoshi apwann lavéwité-a konsèné lanmò, i wéyalizé i pa té sa batizé si i kontiné patisipé an bagay fo wilizyon. (2 Kòr. 6:15, 16) Konsa, Tsuyoshi di mèt lékòl-la i pa té sa fè sé bagay sala ankò. Èk kisa ki fèt? Mèt lékòl-la pèwmité’y pou tjenn twavay li san i patisipé an bagay fo wilizyon. Konsa Tsuyoshi batizé yon lanné apwé i koumansé étidyé Bib-la.a Alò si ou ni pou fè chanjman an twavay ou pou’w sa batizé, ou sa ni asiwans-lan ki, Jéhova kay potjiwé sa ou èk fanmi’w bizwen.​—Sam 127:2; Maf. 6:33.

SÉ JAN KÒRINT-LA BATIZÉ

15. Kisa ki té sa anpéché sé jan Kòrint-la batizé?

¹⁵ Sé moun-lan an Kòrint té enmen lajan èk yo té ka viv vyé lavi. Konsa i pa té ézé pou moun an vil sala koumansé sèvi Jéhova. Mé lè zapòt Pòl koumansé pwéché bon nouvèl-la konsèné Jézi an vil Kòrint, “an chay moun an Kòrint tann konmisyon Pòl épi yo kwè épi yo té wisivwè batenm.” (Twav. 18:7-11) Anfen Jézi palé ba Pòl adan an vizyon èk i di’y: “Mwen ni an chay moun an vil sala ki sé sa mwen.” Alò, Pòl kontiné pwéché an Kòrint pou yon lanné é dimi.

16. Kisa ki édé sé jan Kòrint-la pou batizé? (2 Kòrint 10:4, 5)

¹⁶ Bon. Kisa ki édé sé jan Kòrint-la pou batizé? (Li 2 Kòrint 10:4, 5.) Wi, sé jan Kòrint-la ki aksèpté bon nouvèl-la konsèné Jézi, té sa doubout mové pwatik tèl kon, bwè twòp alkòhòl, vòlè, èk kouché épi nonm kon yo èben fanm kon yo. (Hib. 4:12) Èk tout sé bagay sala té posib, paski Pawòl Bondyé èk lisentèspwi’y té édé yo fè sé chanjman sala.​—1 Kòr. 6:9-11.b

17. Kisa ou sa apwann hòd sé jan Kòrint-la?

¹⁷ Bon. Magwé sé jan Kòrint-la té ni pou fè gwo chanjman, yo pa té fè èskiz. Pito sa, yo twavay wèd pou vini asou chimen-an ki kay mennen yo pou lavi étonnèl. (Maf. 7:13, 14) Konsa, ès ou ka twavay wèd pou ganyen a bout an vyé labitid èben an vyé pwatik, pou ou sa batizé? Ében si sé sa, kontiné twavay wèd pou ganyen a bout li, èk plédé épi Jéhova pou lisentèspwi’y édé’w pou éwisi.

18. Ki mannyè ègzanp Monika sa édé’w?

¹⁸ Monika ka viv adan an péyi yo ka kwiyé Georgia. I té twavay wèd pou doubout sèvi vyé pawòl sal, èk pou pa kouté ében gadé vyé anmizman, pou’y sa batizé. I di: “Avan mwen té batizé, mwen pwédyé bay Jéhova pou édé mwen fè sé chanjman-an, èk i édé mwen. Jéhova té sav mwen té vlé fè sa ki bon, èk i té toujou la pou édé mwen èk djidé mwen.” Monika batizé lè’y té ni sèz (16) an. Alò, ès la ni bagay ou ni pou doubout fè, pou ou sa sèvi Jéhova adan an mannyè i kay aksèpté? Ében si sé sa, kontiné mandé Jéhova pou ba’w pouvwa-a ou bizwen pou fè sé chanjman sala. Èk i kay ba’w lisentèspwi’y pou ou sa éwisi.​—Jan 3:34.

LAFWA’W SA ÉDÉ’W POU TIWÉ MÒN

19. Kisa ki sa édé’w ganyen a bout gwo pwòblenm? (Gadé pòtwé-a osi.)

¹⁹ Bon. Menm si ou ni bagay an lavi’w ki ka anpéché’w batizé, toujou chonjé Jéhova enmen’w èk i vlé’w vini an manm an fanmi’y. Anfen an Mafyou 17:20 Jézi té di sé disip li-a: “Si ou té ni an ti tak lafwa gwòsè an ti gwenn moutad, ou té kay sa di mòn sala, ‘Sòti la épi alé pa la,’ épi i té kay alé. Ou té kay sa fè népòt bagay!” Bon. Sé té annèk déotwa lanné sé disip sala té épi Jézi. Alò lafwa yo té ni pou pofité. Mé Jézi ba yo asiwans-lan ki, si lafwa yo vini fò, Jéhova té kay édé yo ganyen a bout gwo pwòblenm. Èk Jéhova kay édé’w pou fè menm bagay-la.

20. Ki mannyè ègzanp sé Kwityen-an nou mansyonnen an atik sala ka ankouwajé’w?

²⁰ Bon. Si la ni an bagay an lavi’w ki ka anpéché’w batizé, twavay wèd pou ganyen a bout li. Èk ègzanp sé Kwityen-an an tan pasé èk jòdi sa fòtifyé’w èk ankouwajé’w pou fè sa. Wi, kité ègzanp yo ankouwajé’w èk pousé’w pou dèdiké lavi’w bay Jéhova èk batizé. Anfen, sa sé pli mèyè disizyon-an ou sa janmen fè!