Ès Ou Pawé Pou Dèdiké Lavi’w Bay Jéhova?

1-2. Kisa an moun ni pou fè avan i sa batizé?

DIWAN sé senk (5) lanné-a ki pasé-a, pli pasé yon milyon moun té batizé kon Témwen Jéhova. Menm kon Timòfi an pwenmyé syèk-la, an chay sé moun sala té apwann lavéwité-a ‘dépi [yo] té ti manmay.’ (2 Tim. 3:14, 15) Lézòt vin’ konnèt Jéhova lè yo té vini pli gwan, èk lézòt an vyéyès yo. Pou ègzanp, yon sésé batizé lè i té ni katwiven disèt (97) lanné di laj!

² Si’w sé yon étidyan Bib ében ou sé an jenn moun èk pawan’w sé Témwen Jéhova, ès ou ka katjilé konsèné batenm? Ében si sa sé dézi’w, sa sé an bon bagay! Kanmenm, avan ou sa batizé ou kay ni pou dèdiké lavi’w bay Jéhova. Alò an atik sala nou kay èspliké kisa i vlé di pou dèdiké lavi’w bay Jéhova. Èk nou kay osi wè poutji ou pa ni pou pè pou dèdiké lavi’w bay Jéhova èk pou batizé.

KISA DÈDIKASYON VLÉ DI?

3. Bay déotwa ègzanp moun an Bib-la ki té dèdiké lavi yo bay Jéhova.

³ An Bib-la, an moun ki té dèdiké bay Jéhova sété yon moun yo té chwazi ében mété apa pou an wézon spésyal. Nasyon Izwayèl sété an nasyon ki té dèdiké bay Jéhova. Mé adan moun an nasyon-an té dèdiké bay Jéhova adan an mannyè spésyal. Pou ègzanp, Éronn té ni an gwo mouchwè asou tèt li. Douvan mouchwè sala té ni an plak ki té fèt an lò ki té ka kléwé. Plak sala té ka moutwé Éronn té dèdiké bay Jéhova adan an mannyè spésyal. Wi, Jéhova té chwazi’y ében mété’y apa pou wann sèvis adan an mannyè spésyal kon chèf pwèt-la an nasyon Izwayèl. (Livi. 8:9) Osi, an lòt gwoup moun an nasyon Izwayèl ki té dèdiké bay Jéhova adan an mannyè spésyal sété sé Nazarayt-la. Mo pawòl-la “Nazarayt” sòti hòd an mo pawòl an langaj Hibrou ki vlé di, “Yon Moun Yo Mété Apa”, ében “An Moun Ki Dèdiké.” Konsa, sé Nazarayt-la té ni pou obéyi sèten koumand an Lwa Moziz-la lézòt jan Izwayèl pa té ni pou swiv.​—Lim. 6:2-8.

4. (a) Lè ou dèdiké lavi’w bay Jéhova, kisa ou ka chwazi pou fè? (b) Kisa i vlé di pou “inyowé” kòʼw? (Gadé pòtwé-a osi.)

⁴ Lè ou dèdiké lavi’w bay Jéhova, ou ka chwazi pou vini yonn an sé disip Jézi-a, èk ou ka désidé pou fè volonté Bondyé bagay-la ki pli enpòtan an lavi’w. Mé kisa sa vwéman vlé di? Ében, an Mafyou 16:24 Jézi di: “Si an nonm vlé vini disip mwen, i ni pou . . . inyowé kòʼy pou lapéti mwen.” (Maf. 16:24) An langaj Gwik, èspwèsyon-an “inyowé kòʼy” osi vlé di: “I ni pou di kò’y non”. Sa vlé di moun-lan ni pou doubout viv lavi’y pou plè kò’y. Konsa, lè’w dèdiké lavi’w bay Jéhova ou kay ni pou widjèkté népòt bagay ki kay déplè’y. (2 Kòr. 5:14, 15) Pou ègzanp, ou kay ni pou widjèkté sé bagay-la “kò-a vlé fè” tèl kon “kouwi vyé lavi.” (Gal. 5:19-21; 1 Kòr. 6:18) Adan moun kwè si’w obéyi koumand kon sa, sa kay fè lavi’w wèd. Kanmenm lavéwité-a sé sa: Si ou vwéman enmen Jéhova èk ou asiwé tout sa i mandé’w pou fè sé pou bennéfis ou, lavi’w kay vini twòp pli mèyè pasé avan. (Sam 119:97; Izay. 48:17, 18) Yon fwè, non’y sé Nicholas, mété’y kon sa. I di: “Ou sa gadé wèg Jéhova kon sé bawad fè-a adan an pwizon ki ka anpéché’w ni libèté, ében ou sa gadé yo kon sé bawad fè-a ki ka pwotéjé’w hòd lyon.”

5. (a) Kisa ou ni pou fè lè’w ka dèdiké kò’w bay Jéhova? (b) Kisa ki diféwans-lan ant dèdikasyon èk batenm? (Gadé pòtwé-a osi.)

⁵ Kisa ou ni pou fè lè’w ka dèdiké kò’w bay Jéhova? Ében, ou ni pou pwonmèt Jéhova an lapwiyè sé li tousèl ou kay adowé èk ou kay mété volonté’y pwenmyé an lavi’w. Anfen, ou ka pwonmèt Jéhova an lapwiyè, ou kay kontiné enmen’y “épi tout tjèʼw, épi tout lam ou, épi tout lidéʼw épi èk tout kouway ou.” (Mak 12:30) Osi, ou ka fè dèdikasyon’w ében pwonmèt sala ant ou èk Jéhova tousèl. Kanmenm batenm diféwan, i ka fèt an piblik. Èk sa sé paski, lè’w batizé ou vlé tout moun sav ou ja dèdiké lavi’w bay Jéhova. Konsa toujou chonjé, lè’w fè dèdikasyon’w, ou ka fè an pwonmèt bay Jéhova ki byen sèwyé. Alò fè tout sa ou pé pou tjenn pwonmèt sala, èk Jéhova ni konfyans-lan ki ou kay fè sa.​—Éklé. 5:4, 5.

POUKI OU SIPOZÉ DÈDIKÉ LAVI’W BAY JÉHOVA?

6. Kisa ki ka pousé an moun pou dèdiké lavi’y bay Jéhova?  

⁶ Pli gwo wézon-an pouki ou sipozé dèdiké lavi’w bay Jéhova sé paski ou enmen’y. Lanmityé’w pou Jéhova pa bazé sèlman asou mannyè ou ka santi. Non, ou enmen Jéhova paski kon’w ka étidyé Bib-la, ou apwann konsèné’y èk ou ni “lakonpwann konsèné sa i vlé [ou] fè”. (Kòl. 1:9) Wi, ou asiwé ki (1) Jéhova wéyèl, (2) Bib-la sé Pawòl li, èk (3) i ka sèvi ògannizasyon’y pou fè divwa’y.

7. Avan nou dèdiké lavi nou bay Jéhova, kisa nou sipozé ka fè?

⁷ Moun ki dèdiké lavi yo bay Jéhova sipozé konnèt sèten enstwiksyon an Bib-la, èk yo sipozé ka viv lavi yo an ling épi pwensip Bib. Osi yo ka fè tout sa yo pé pou patajé sa yo ja apwann épi lézòt moun. (Maf. 28:19, 20) Lanmityé yo pou Jéhova ja pwofité èk sé Jéhova sèlman yo vlé adowé. Ès ou sé yonn an sé moun sala? Si sé sa, ou pa kay dèdiké lavi’w bay Jéhova èk batizé djòs pou fè pawan’w èben moun-lan ki étidyé Bib-la épi’w kontan. Èk ou pa kay annèk fè’y paski tout sé jan’w-lan ka fè disizyon sala. Pito sa, ou kay fè disizyon sala paski ou enmen Jéhova épi tout tjè’w.

8. Ki mannyè apwésiyasyon’w pou Jéhova kay édé’w dèdiké lavi’w ba li? (Sam 116:12-14)

⁸ Lè’w katjilé asou tout sa Jéhova ja fè ba’w, apwésiyasyon’w pou Jéhova kay pousé’w pou dèdiké lavi’w ba li. (Li Sam 116:12-14.) Bib-la ka kwiyé Jéhova “Bondyé[-a] ki ka bay tout bon kado èk tout bon bagay ki pa ni défo.” (Jémz 1:17) Pli bèl kado-a Jéhova ja ban nou sé wanson sakwifis Jézi. Konsa, mèdité asou bèlté kado sala! Wi, wanson-an ka fè’y posib pou’w ni an bon wilasyon épi Jéhova, èk i ka ba’w èspwa-a pou ou viv pou tout tan. (1 Jan 4:9, 10, 19) Alò, yonn an sé pli bèl mannyè-a pou’w moutwé ou apwésyé wanson-an, èk tout sé lézòt bèl kado-a Jéhova ja ba’w, sé pou dèdiké lavi’w ba li. (Dito. 16:17; 2 Kòr. 5:15) Osi, liv-la Ou Sa Ni On Bon Lavi Pou Tout Tan!, lison 46, limowo 4 ka palé konsèné mannyè nou sa moutwé apwésiyasyon nou. Ou kay enjwi twa (3) minit vidiyo-a anba lison sala ki ni tit-la: Ofè Bondyé Sé Kadoʼw-la..

ÈS OU PAWÉ POU DÈDIKÉ LAVI’W BAY JÉHOVA ÈK BATIZÉ?

9. Pouki nou pa sipozé fòsé yon moun pou fè an dèdikasyon?

⁹ Pitèt ou ka santi ou p’òkò pawé pou fè an dèdikasyon èk pou batizé. Pitèt ou bouzwen fè pli chanjman pou viv an ling épi wèg Bondyé, ében pitèt ou bouzwen pli tan pou fòtifyé lafwa’w. (Kòl. 2:6, 7) Anfen, sé pa tout étidyan Bib ki ka fè pwogwé épi menm vitès-la, èk sé pa tout jenn moun ki ka kwalifyé pou dèdikasyon èk batenm a menm laj-la. Alò, pito ou konpawé kò’w épi lézòt moun, éséyé pou apwann ki chanjman ou ni pou fè èk fè tout sa ki nésésè pou’w sa fè pwogwé.​—Gal. 6:4, 5.

10. Kisa ou sa fè si’w santi ou p’òkò pawé pou fè dèdikasyon’w bay Jéhova èk pou batizé? (Osi, gadé enfòmasyon-an ki an bwèt-la: “Jenn Moun Ki Ka Lévé An Lavéwité-a.”)

¹⁰ Si’w santi ou p’òkò pawé pou fè dèdikasyon’w bay Jéhova, pa ladjé. Kontiné twavay pou’w sa dèdiké lavi’w bay Jéhova èk batizé. Mandé Jéhova pou édé’w fè népòt chanjman an lavi’w ki nésésè. (Filip. 2:13; 3:16) Èk si’w fè sa, ou sa ni konfyans-lan ki Jéhova kay kouté lapwiyè’w èk i kay édé’w.​—1 Jan 5:14.

POUKI ADAN MOUN KA TJENBÉ DÈYÈ POU DÈDIKÉ LAVI YO ÈK BATIZÉ?

11. Ki mannyè Jéhova sa édé nou pou wèsté fidèl pou li?

¹¹ Adan moun ka tjenbé dèyè pou fè an disizyon pou dèdiké lavi yo pou Jéhova èk batizé. Adan di yo pé katjilé: ‘Mwen pè pou batizé paski si mwen fè an péché ki gwav yo kay èskonminiké mwen.’ Alò si’w ni pèwèz sala, Jéhova kay ba’w tout sa ou bizwen pou ‘ou viv kon’y vlé’. (Kòl. 1:10) Jéhova kay osi ba ou fòs-la pou’w fè sa ki bon. Wi, ou sa ni konfyans-lan i sa fè sa, paski i ja édé an chay moun pou fè sa ki bon. (1 Kòr. 10:13) Anfen, yonn an sé wézon-an byen pé moun ka èskonminiké, sé paski Jéhova ka édé pèp li pou wèsté fidèl.

12. Kisa nou sa fè ki sa édé nou wèsté fidèl pou Jéhova?

¹² Paski nou pa pawfé, nou ka twapé tantasyon pou fè sa ki mové. (Jémz 1:14) Kanmenm, ou sa chwazi sa ou kay fè lè’w twapé an tantasyon. Malèwèzman, adan moun ka di yo pa sa kontwolé mannyè yo ka santi èk sa yo ka fè. Mé sa pa vwé. Ou sa apwann mannyè pou kontwolé dézi’w. Konsa lè ou twapé tantasyon-an, ou kay sa chwazi pou fè sa ki bon. Bon. La ni bagay ou sa fè ki kay édé’w fè sa ki bon. Pou ègzanp, pwédyé bay Jéhova toulé jou. Toujou étidyé Pawòl Bondyé. Atandé sé mitin-lan, èk palé épi moun konsèné sa ou ka kwè adan. Wi, lè ou ka toujou fè sé bagay sala, ou kay twapé fòs-la ou bouzwen pou wèsté fidèl pou Jéhova. Èk toujou chonjé, Jéhova kay édé’w pou fè sé bagay-la ki kay édé’w wèsté fidèl pou li.​—Gal. 5:16.

13. Ki bon ègzanp Jozèf kité ban nou?

¹³ I kay pli ézé pou’w wèsté fidèl pou Jéhova, si ou désidé andavans sa’w kay fè si ou twapé an tantasyon. Wi, Bib-la ka di nou konsèné plizyè moun ki chwazi pou fè sa ki bon lè yo twapé tantasyon. Pou ègzanp, madanm Pòtifa té éséyé tanté Jozèf plizyè fwa. Mé Jozèf té ja sav sa pou fè. Bib-la di nou, ‘Jozèf wifizé,’ èk i di: ‘Ki mannyè mwen sa fè gwo movèzté sala èk péché kont Bondyé?’ (Jen. 39:8-10) Wi, i a klè, Jozèf té sav sa’y té kay fè avan madanm-lan éséyé pou tanté’y. Konsa, sa té fè’y pli ézé pou’y fè sa ki bon èk wèsté fidèl pou Jéhova.

14. Ki mannyè ou sa widjèkté tantasyon pou fè sa ki pa bon?

¹⁴ Bon. Ki mannyè ou sa swiv ègzanp Jozèf èk widjèkté tantasyon? Ében, avan ou twapé tantasyon désidé sa ou kay fè. Èk pa tadé pou widjèkté bagay Jéhova hayi, èk pa menm katjilé konsèné yo osi. (Sam 97:10; 119:165) Wi, si ou fè sé bagay sala, ou pa kay péché lè’w twapé an tantasyon, paski ou kay ja sav sa ou kay fè.

15. Ki mannyè an moun sa moutwé i “ka chaché pou [Jéhova]”? (Hibrou 11:6)

¹⁵ Pitèt ou asiwé ou twapé lavéwité-a, èk ou vlé sèvi Jéhova épi tout tjè’w. Mé ou pa ka santi ou pawé pou dèdiké lavi’w bay Jéhova èk batizé. Ében si sé kon sa ou ka santi, ou sa plédé épi Jéhova pou édé’w, menm kon Wa David té fè. An Sam 139:23, 24 David di Jéhova: “Ègzanminé mwen, Bondyé, èk konnèt tjè mwen! Chaché an lidé mwen èk konnèt sa ki andidanʼy. Gadé si mwen ni pyès movèzté andidan mwen, èk kondwi mwen an chimen-an ki la pou tout tan-an.” Wi, Jéhova ka benni tout moun “ki ka chaché pou li.” Konsa, lè’w kontiné twavay pou’w sa dèdiké lavi’w bay Jéhova èk pou batizé, ou ka moutwé Jéhova ou ka chaché pou li.—Li Hibrou 11:6.

KONTINÉ VINI PWÉ JÉHOVA

16-17. Si’w sé an jenn moun èk pawan’w ka lévé’w an lavéwité-a, ki mannyè Jéhova ka anmennen’w? (Jan 6:44)

¹⁶ Jézi di, sé Jéhova ki ka anmennen sé disip li-a. (Li Jan 6:44.) Katjilé asou sa Jézi di. Sa Jézi di la sé an bagay èstòdinè. Sa vlé di, Jéhova ka wè an bagay ki bon an chak moun i anmennen, èk i ka gadé moun sala kon ‘byen spésyal li’ ében ‘kon yon byen ki ni an pil valè’. (Dito. 7:6) Wi, sé konsa Jéhova ka gadé’w tou.

¹⁷ Pitèt ou sé an jenn moun èk pawan’w ka lévé’w an lavéwité-a. Kanmenm ou pé santi wézon-an ou ka sèvi Jéhova sé sèlman paski pawan’w ka fè sa, èk pa paski Jéhova ka anmennen’w. Menm si ou pé santi kon sa, Bib-la ka di an Jémz 4:8: “Vini pwé Bondyé èk i menm kay vini pwéʼw.” (1 Kw. 28:9) Alò, si’w fè éfò-a pou “vini pwé Bondyé”, i osi kay vini pwéʼw. Chonjé, Jéhova pa ka gadé’w kon yon jenn moun anpami an gwoup, i antéwésé an chak moun, èk i antéwésé an ou. Alò, kontiné fè éfò-a pou vansé pwé Jéhova èk ou kay èspéyansé sa Jémz 4:8 di pou vwé.—Gadé 2 Tèsalonnika 2:13.

18. Kisa nou kay diskité an lòt atik-la? (Sam 40:8)

¹⁸ Lè’w dèdiké lavi’w bay Jéhova èk ou batizé, ou ka swiv ègzanp Jézi. Wi, Jézi té ofè kò’y bay Papa’y pou fè népòt sa Papa’y té vlé’y fè. (Li Sam 40:8; Hib. 10:7) Bon. An lòt atik-la, nou kay diskité kisa ki kay édé’w pou wèsté fidèl pou Jéhova apwé ou batizé.