Kontiné Swiv Jézi Apwé Ou Batizé

1-2. Ki bennédiksyon yon moun ka twapé apwé i batizé?

PA DÉ kontan nou ka kontan lè nou batizé èk nou vini manm fanmi Jéhova. Wi, sé on lonnè pou ni on bon wilasyon épi Jéhova. Èk sé pou wézon sala nou dakò épi sa Sam 65:4 ka di: ‘Pa dé bon i bon pou moun-an ou chwazi-a èk moun-an ou fè apwoché’w pou’y wété an lakou’w.’

² Chonjé sé pa népòt moun Jéhova ka chwazi pou vini pwé’y. Kon nou té diskité an atik-la avan, Jéhova ka chwazi moun ki vlé ni on bon wilasyon épi’y pou vini pwé’y. (Jémz 4:8) Konsa, lè’w dèdiké lavi’w bay Jéhova èk ou batizé, ou ka vansé pwé Jéhova adan on mannyè ki spésyal. Èk ou sa ni asiwans-lan ki, Jéhova ‘kay vidé bennédiksyon’y asou’w jis tan ou pa mantjé anyen’.​—Mala. 3:10; Jér. 17:7, 8.

3. Ki gwo wèskonsabilité chak moun ki batizé ni? (Ékléziyastis 5:4, 5)

³ Lè’w batizé sa sé koumansman lavi’w an sèvis ou pou Jéhova. Konsa, ou ni on gwo wèskonsabilité, paski apwé ou batizé, ou ni pou fè tout sa’w pé pou tjenn pwonmèt ou pou sèvi Jéhova èk wèsté fidèl pou li. Èvèk ou ni pou fè sa menm si ou twapé tantasyon pou fè sa ki pa bon, ében ou ka èspéyansé pwòblenm an lavi’w. (Li Ékléziyastis 5:4, 5.) Osi, kon yonn an sé disip Jézi-a, ou kay fè tout sa’w pé pou swiv ègzanp li, èk konmand li. (Maf. 28:19, 20; 1 Pita 2:21) Alò, atik sala kay édé’w fè sa.

KONTINÉ SWIV JÉZI MENM SI OU KA ÈSPÉYANSÉ TANTASYON ÈK PWÒBLENM

4. An ki sans disip Jézi ka pòté poto soufwans-lan?

⁴ Apwé on moun batizé, i kay èspéyansé pwòblenm an lavi’y. Wi, Jézi fè sa klè, lè’y di, disip li kay pòté an poto soufwans. Anfen i di, yo kay pòté’y “toulé jou”. (Louk 9:23) Bon. Ès Jézi té ka di, sé disip li-a té kay soufè toulé jou? Janmen. Pito sa, i té ka di, magwé sé disip li-a té kay twapé bennédiksyon, yo té kay èspéyansé pwòblenm osi. Èvèk, adan sé pwòblenm-lan té kay byen difisil pou aji épi.—2 Tim. 3:12.

5. Ki bennédiksyon Jézi pwonmèt tout moun ki mété Wéyòm-lan pwèmyé an lavi yo?

⁵ Paski ou ka mété Wéyòm Bondyé pwèmyé an lavi’w, pitèt ou ja èspéyansé òpozisyon hòd fanmi’w, ében pitèt ou ni mwens lajan èk pozèsyon. (Maf. 6:33) Ében si sé sa, Jéhova konnèt tout sa ou ja fè ba li. (Hib. 6:10) Anfen, pitèt ou ja èspéyansé sa Jézi té di an Mak 10:29, 30: “Pyès moun ki ja kité kay li ében fwèʼy ében séséʼy ében manmanʼy ében papaʼy ében ich li ében tèʼy pou lapéti mwen épi Bon Nouvèl-la kay wisivwè yon san fwa pli an tan sala. I kay wisivwè pli kay, fwè, sésé, manman, manmay épi tè — èk épi yo i kay jwenn an chay pèsikasyon, épi an tan pou vini-an, lavi étonnèl.” Konsa toujou chonjé, sé bennédiksyon-an ou ja wisivwè-a otan pli pasé sé sakwifis-la ou ja fè-a.—Sam 37:4.

6. Pouki ou ni pou kontiné goumen kont “dézi lachè-a” apwé ou batizé?

⁶ Apwé ou batizé ou ni pou kontiné goumen kont “dézi lachè-a”. (1 Jan 2:16) Èk sa sé paski ou p’òkò pawfé. Pitèt délè ou ka santi menm kon zapòt Pòl. Mi sa’y di an Ronm 7:22, 23 konsèné kò’y: “Tjè mwen menm ka widjèwté an lwa Bondyé-a. Mé mwen ka wè an kò mwen menm an lòt pwensip ki ka lévé ladjè épi pwensip-la ki an lidé mwen-an, épi i ja fè mwen pwizonnyé lwa péché-a ki ka twavay an lachè mwen-an.” Osi, pitèt délè, ou ka santi dékouwajé paski ou ni pou goumen kont vyé dézi. Kanmenm, si’w katjilé asou pwonmèt-la ou fè bay Jéhova lè’w dèdiké lavi’w ba li, sa kay ba’w fòs-la pou goumen kont tantasyon. Konsa, lè’w ka aji épi tantasyon, pwonmèt sala kay édé’w wété fidèl pou Jéhova. Pouki nou sa di sa?

7. Poutji nou sa di dèdikasyon’w kay édé’w wèsté fidèl pou Jéhova?

⁷ Ében lè’w dèdiké lavi’w bay Jéhova, ou inyowé kò’w. Sa vlé di, ou désidé pou widjèkté népòt dézi ében népòt bagay, ki kay déplè Jéhova. (Maf. 16:24) Konsa, lè’w twapé yon tantasyon, ében ou ka aji épi on sitiwasyon ki difisil, ou pa kay ni pou katjilé asou sa pou fè, paski ou ja désidé asou sa’w kay fè. Wi, ou kay wèsté fidèl pou Jéhova. Anfen ou kay fè menm kon Jòb. Menm si Jòb té ni pou aji épi sitiwasyon ki té byen difisil, i di épi tout tjè’y: ‘Mwen kay wèsté fidèl pou Bondyé!’—Jòb 27:5.

8. Lè’w wéfléchi asou dèdikasyon’w, koumannyè sa sa édé’w wézisté tantasyon?

⁸ Wi, lè’w wéfléchi asou dèdikasyon’w, ou kay twapé fòs-la ou bouzwen-an pou wézisté tantasyon. Pou ègzanp, adan moun ka moutwé mawi, ében madanm lòt moun antansyon romantik. Ès ou té kay fè sa? Mé non! Èk sa sé paski, ou ja pwonmèt Jéhova ou pa kay janmen fè kéchòy kon sa. Alò, si’w pa kité vyé dézi lachè-a wasiné an tjè’w, pli ta ou pa kay ni pou goumen pou tiwé yo. Konsa, ou pa kay ‘menm alé asou chimen’ sé méchan-an.—Pwov. 4:14, 15.

9. Lè’w wéfléchi asou dèdikasyon’w, koumannyè sa sa osi édé’w mété Jéhova pwèmyé an lavi’w?

⁹ Lè’w pwan tan pou wéfléchi asou dèdikasyon’w, sa kay édé’w pou fè disizyon ki kay plè Jéhova. Pou ègzanp, si on moun ofè’w twavay ki kay anpéché’w atandé mitin, ou kay sav sa pou fè. Anfen, avan moun-lan ofè’w twavay-la, ou ja konnèt ou pa kay aksèpté’y, paski i kay anpéché’w atandé mitin. Non, ou pa kay aksèpté on twavay kon sa, èk apwé éséyé pou twapé on mannyè pou mété Jéhova pwèmyé. Osi, lè’w katjilé asou ègzanp Jézi, sa kay édé’w plè Jéhova. Wi, Jézi té détèminé pou plè Papa’y. Alò, menm kon Jézi nou vlé fè’y détèminasyon nou pou widjèkté népòt bagay ki kay déplè Jéhova.—Maf. 4:10; Jan 8:29.

10. Apwé ou batizé, koumannyè Jéhova kay édé’w ‘kontiné swiv’ Jézi?

¹⁰ Lè’w ka èspéyansé pwòblenm, ében ou twapé tantasyon, si’w wèsté fidèl pou Jéhova sa kay bay pwèv ki, ou vlé ‘kontiné swiv’ Jézi. Èk ou sa ni asiwans-lan ki, Jéhova kay édé’w kontiné swiv Jézi. Anfen, 1 Kòrint 10:13 ka ban nou asiwans-lan ki: “Bondyé ka tjenn pwonmèt li, épi i pa kay kitéʼw pasé anba pyès tantasyon ki kay twò fò paséʼw. Lè ou anba tantasyon sala, i kay baʼw kouway-la pou ou sa diwé, épi i kay toujou ouvè an chimen baʼw pou ou sa chapé.”

SA OU SA FÈ POU KONTINÉ SWIV JÉZI

11. Kisa ki sa vwéman édé’w pou kontiné swiv Jézi? (Gadé pòtwé-a osi.)

¹¹ Jézi té sèvi Jéhova épi tout tjè’y, èk i té ni an bon wilasyon épi’y paski i toujou té ka palé épi’y an lapwiyè. (Louk 6:12) Anfen, si’w dévlopé labitid-la pou toujou fè bagay ki kay édé’w vansé pli pwé Jéhova, sa kay vwéman édé’w pou kontiné swiv Jézi apwé ou batizé. An Filipay 3:16, Bib-la di nou pou “kontiné maché menm mannyè-a nou té koumansé maché-a.” Èk an chay sèvant Jéhova ka swiv konsèy sala. Konsa tanzantan ou kay tann bèl èspéyans hòd fwè èk sè ki désidé pou fè pli an sèvis yo pou Jéhova. Pitèt yo atandé Lékòl-la Pou Pwoklanmatè Wéyòm-lan, ében yo alé wann sèvis koté ki bizwen pli fwè èk sè. Konsa si sitiwasyon’w ka pèwmité’w, pitèt ou sa fè menm bagay-la. Wi, pèp Jéhova ka toujou gadé pou diféwan mannyè pou fè pli an sèvis yo pou li. (Twav. 16:9) Mé menm si ou pa sa fè pli apwézan, pa janmen obliyé Jéhova enmen’w menm kon i enmen sé fwè èk sè-a ki ka fè pli. Anfen, sa ki enpòtan sé sa; kontiné andiwé kon’w ka fè pli mèyè’w pou Jéhova. (Maf. 10:22) Èk toujou chonjé, ou ka fè Jéhova kontan lè’w fè tout sa ou pé silon sitiwasyon’w. Èvèk lè’w fè sa ou kay moutwé ou ka vwéman kontiné swiv Jézi apwé ou batizé.—Sam 26:1.

12-13. Kisa ou sa fè si’w santi ou pa ni menm lajwa-a ou té ni an sèvis ou pou Jéhova kon’w té ni avan? (1 Kòrint 9:16, 17) (Gadé osi bwèt-la “Pa Doubout Kouwi Kous-la.”)

¹² Apwé ou batizé pitèt délè ou pé santi lapwiyè’w pou Jéhova pa ka sòti ofon tjè’w, ében ou pa ni menm lajwa-a kon’w té ni avan an minis ou. Pitèt ou pa ka enjwi li, ében kouté Bib-la asou òdiyo kon avan. Si’w ka santi kon sa délè, sa pa vlé di ou pèd lisentèspwi Jéhova. Chonjé nou pyès pa pawfé, èk délè nou ka èspéyansé chanjman an mannyè-a nou ka santi. Kanmenm, si’w wéyalizé ou pa zélé kon avan, i kay bon pou’w katjilé asou ègzanp zapòt Pòl. Magwé i té éséyé byen wèd pou swiv ègzanp Jézi, zapòt Pòl té sav délè i té kay ni pou goumen wèd pou tjenn dézi-a pou fè sa i té ni pou fè-a fò. Anfen i jis di: “Mé sé pa mwen ki chwazi pou fèʼy, sé an wèskonsabilité Bondyé mété asou mwen.” Sa vlé di Pòl té détèminé pou akonpli minis li menm si i pa té toujou ézé pou fè sa.—Li 1 Kòrint 9:​16, 17.

¹³ Alò menm kon Pòl, nou pa vlé fè disizyon ki bazé asou mannyè nou ka santi. Nou vlé détèminé pou fè sa ki bon menm si nou pé santi nou pa vlé fè’y. Wi, si’w kontiné fè sa ki dwèt, apwé an lè santiman’w pé jis chanjé. Anfen, i pé vini pli ézé pou’w fè sa ki dwèt, èk ou kay èspéyansé pli lajwa. An plis di sa, si’w kontiné pou fè létid pèwsonnèl ou, pwédyé, atandé mitin èk pwéché bon nouvèl-la, sa kay édé’w pou kontiné swiv Jézi apwé ou batizé. Èk lè sé fwè èk sè-a wè mannyè ou ka andiwé an sèvis ou pou Jéhova, sa kay vwéman ankouwajé yo.​—1 Tèsa. 5:11.

“GADÉ LAVI ZÒT . . . ÈGZANMINÉ KONSYANS ZÒT”

14. Kisa nou toujou ni pou ègzanminé, èk poutji? (2 Kòrint 13:5)

¹⁴ Apwé ou batizé i enpòtan pou’w toujou ègzanminé kò’w. (Li 2 Kòrint 13:5.) Konsa tanzantan, i bon pou ègzanminé pwogwé-a ou ka fè-a. Pou ègzanp: ‘Ès ou ka pwédyé wèglé? Ès ou ni labitid-la pou li ében kouté Bib-la asou òdiyo? Ès ou ni labitid-la pou étidyé Bib-la? Ès ou ka atandé tout sé mitin-lan èk ès ou ka patajé an minis-la?’ Si’w ka fè sé bagay sala sa bon, mé chaché pou diféwan mannyè pou enjwi sé bagay sala plis toujou. Pou ègzanp ou sa mandé kò’w kèstyon tèl kon: ‘Ès mwen sa èspliké bay an moun sèten enstwiksyon ki an Bib-la? Kisa mwen sa fè pou mwen ni pli lajwa an minis-la? Ès lapwiyè mwen ka vwéman sòti ofon tjè mwen? Ès mwen ka toujou atandé sé mitin-lan? Kisa mwen sa fè pou kouté pli byen an sé mitin-lan? Èk kisa mwen sa fè pou patisipé pli an sé mitin-lan?’

15-16. Kisa ou apwann an èspéyans Robert ki sa édé’w ‘pou doubout fò’ anba tantasyon?

¹⁵ I enpòtan pou ègzanminé kò’w pou konnèt fèblès ou. Nou ka wè sa a klè an èspéyans yon fwè yo ka kwiyé Robert. Robert di: “Lè mwen té apipwé ven (20) lanné, yon jou an tifi mwen té ka twavay épi envité mwen lakay li. Tifi-a di mwen: ‘Sé nou tousèl ki té kay la, èk nou kay ni an bon tan.’ Alò, mwen wéyalizé i té vlé ni sèks épi mwen. An koumansman-an mwen éséyé ba’y détwa èskiz, mé finalman mwen di non.” Èk mwen èspliké poutji mwen pa aksèpté envitasyon’y. Bon. Robert fè byen paski i ‘doubout fò’ anba tantasyon. Kanmenm, pli ta lè Robert katjilé asou èspéyans-lan, i wéyalizé i té sa fè pli mèyè. I di: “Mwen pa té widjèkté tantasyon-an tifi-a asé vit ében asé fò kon Jozèf té fè lè’y widjèkté madanm Pòtifa. (Jen. 39:7-9) Anfen, mwen té sipwi i té si tèlman wèd pou mwen wifizé’y. Wi, èspéyans sala édé mwen wè mwen té vwéman ni pou fòtifyé wilasyon mwen épi Jéhova.”

¹⁶ Si’w fè tan pou ègzanminé kò’w menm kon Robert té fè, ou kay twapé bennéfis. Wi, menm si ou doubout fò anba tantasyon ou sa mandé kò’w: ‘Ki otan tan i té pwan mwen pou widjèkté tantasyon-an?’ Kanmenm, si’w wéyalizé ou ni pou fè pli mèyè, pa vin dékouwajé. Pito sa, ou sipozé kontan ou konnèt fèblès ou. Konsa, pwédyé bay Jéhova konsèné fèblès sala, èk twavay wèd pou ganyen a bout fèblès sala èk pou obéyi Jéhova.​—Sam 139:23, 24.

17. Ki mannyè Robert té onnowé non Bondyé?

¹⁷ La ni a lòt bagay nou apwann an èspéyans Robert. Robert di: “Apwé mwen widjèkté envitasyon tifi-a i di mwen: ‘Ou pasé tès-la!’ Lè’y di sa mwen mandé’y, kisa sa vlé di? A lè sala i di mwen, yon jan’y ki pa an Témwen Jéhova ankò, di’y, ‘tout jenn Témwen Jéhova ka fè bagay ki pa bon an sigwé.’ Konsa i di jan’y i té kay tès mwen pou wè si sa i té di-a té vwé. Lè mwen tann sa, pa dé kontan mwen té kontan mwen té onnowé non Jéhova. Wi, paski mwen wèsté fidèl pou Jéhova anba tantasyon, mwen onnowé non’y èk mwen ba’y tjè kontan.”

18. Kisa ou détèminé pou fè apwé ou batizé? (Gadé osi bwèt-la “Dé Atik Ou Kay Enjwi.”)

¹⁸ Lè’w dèdiké lavi’w bay Jéhova èk ou batizé, ou ka moutwé ki, népòt sa ki fèt ou détèminé pou onnowé non’y. Toujou chonjé, Jéhova konnèt tout sé difikilté-a ou ka andiwé, èk sé tantasyon-an ou ka goumen kont. Alò ou sa ni konfyans-lan ki, i kay benni éfò-a ou ka fè-a pou wèsté fidèl pou li. Èk ou sa asiwé i kay sèvi lisentèspwi’y pou ba’w fòs-la ou bouzwen pou tjenbé fò. (Louk 11:11-13) Wi, épi èd Jéhova ou kay sa kontiné swiv Jézi apwé ou batizé.