Kontiné An Sèvis Jéhova Menm Si La Ni Bagay Ki Ka Dékouwajé’w

1. Ki bennédiksyon nou ka enjwi paski nou an ògannizasyon Jéhova?

I VWÉMAN sé an bennédiksyon pou nou ki an kongwigasyon Jéhova, paski lavi an latè sala, ka vini pli difisil jou apwé jou. Mé Jéhova ja ban nou fwè èk sè pou édé nou. (Sam 133:1) Jéhova ka édé nou ni anpil lakontantman an fanmi nou. (Èfés. 5:33–6:1) Épi i ka ban nou lajwa èk lasajès-la nou bizwen pou aji épi tèt cho.

2. Kisa nou ni pou fè èk pouki?

² Nou ni pou twavay wèd pou kontiné sèvi Jéhova épi fidèlité. Pouki nou ni pou fè sa? Sé paski moun kay fè ében di bagay ki kay ofwansé nou. Osi, nou pé santi dékouwajé lè nou fè lèwè. Èspwèsman si nou ka fè menm lèwè-a plizyé fwa. Anfen nou ni pou kontiné sèvi Jéhova (1) menm si on fwè ében on sè ofwansé nou, (2) menm si mawi nou èben madanm nou dézapwenté nou, èk (3) menm si nou santi dékouwajé lè nou fè on lèwè ki gwav. An atik sala nou kay konsidiwé chak an sé sitiwasyon sala. Èk nou kay osi konsidiwé kisa nou sa apwann hòd moun ki té fidèl an Bib-la.

KONTINÉ AN SÈVIS JÉHOVA MENM SI ON FWÈ ÉBEN ON SÈ OFWANSÉ’W

3. Ki difikilté nou pé ni pou aji épi?

³ Difikilté nou pé ni pou aji épi. Délè adan sé fwè èk sè nou-an pé ni ti labitid ki ka kontwayé nou. Lézòt pé fè kéchòy ki dézapwenté nou, ében pitèt yo fè on bagay ki pa janti. Sé ansyen-an sa osi fè lèwè. Épi sé bagay sala pé annékòz adan di nou pou ni dout sa sé ògannizasyon Jéhova. Èvèk pito nou kontiné sèvi Jéhova ansanm, an lilyon épi sé fwè èk sè-a, nou pé désidé pou doubout palé bay moun-lan ki ofwansé nou-an èk jis doubout atandé sé mitin nou-an. (Zeph. 3:9) Ès ou kwè sa sé on bon disizyon? Èben annou gadé ègzanp yon moun an Bib-la ki té èspéyansé pwòblenm menm kon sa.

4. Kisa Pòl té ni pou aji épi?

⁴ Ègzanp-lan an Bib-la: Zapòt Pòl. Zapòt Pòl té sav sé fwè èk sè-a pa té pawfé. Pou ègzanp, adan di yo an kongwigasyon-an an Jérouzalèm té ja tann mannyè Pòl té ka pèsikité sé Kwityen-an konsa yo té pè’y. Anfen, yo pa té menm kwè Pòl té vini on disip Jézi. (Twav. 9:​26) Pli ta apwé sa, adan di yo té ka palé dèyè do Pòl pou donmajé wépitasyon’y. Mi sé sa yo té ka di: “Tout djòl fò Pòl sé an lèt li tousèl, mé i menm fèb kon an mòpyon, épi sa i ni pou di-a pa vo dé sou tjiv.” (2 Kòr. 10:10) Sa yo té ka di konsèné Pòl sété pou fè sé moun-lan pèd konfyans an li. Sé pa té sa tousèl Pòl té ni pou aji épi. I té wè on ansyen fè on mové disizyon ki té sa afébli lafwa sé lézòt fwè-a. (Gal. 2:​11, 12) Mi on lòt bagay Pòl té ni pou aji épi ankò. Yonn an sé bon konpany li-a, Mak, té dézapwenté’y toubonnman, lè i té tounen do’y asou’y. (Twav. 15:37, 38) Bon. Pòl té sa kité népòt an sé sitiwasyon sala fè’y doubout asosiyé épi sé sa ki té ofwansé’y-la. Mé i pa té fè sa. Pòl kontiné chéwi sé fwè èk sè-a. Anfen i kontiné sèvi Jéhova èk fidèlité. Mé kèstyon-an sé: Kisa ki édé’y kontiné wèsté pwé sé fwè èk sè’y-la?

5. Kisa ki édé Pòl pou kontiné wèsté pwé sé fwè èk sè-a? (Kòlòsé 3:13, 14) (Gadé pòtwé-a osi.)

⁵ Pòl té enmen sé fwè èk sè’y-la. Lanmityé-a Pòl té ni-a té édé’y pou pawdonnen lézòt, èk fiksé asou bon kawaktè yo. Épi i di nou pou fè sa osi an Kòlòsé 3:​13, 14. (Li’y. ) Bon. Annou gadé mannyè Pòl té swiv konsèy li menm lè i té ni pou aji épi Mak. Mak pa té kontiné épi Pòl pou yo té fini twavay pwèchman-an. Pòl pa té kontan sa pyès. Mé i pa té wèsté faché kont Mak. I té pawdonnen’y. Mé ki mannyè nou sav sa? Sé paski lè Pòl té ékwi bèl ti lèt-la bay kongwigasyon-an an Kòlòsé, i di “[Mak] anpanmi sé moun-lan ki la épi mwen. . . . Épi yo ja édé mwen an chay.” (Kòl. 4:​10, 11) Paditan Pòl té an pwizon an Ronm, i di Timòfi pou mennen Mak épi’y “paski [Mak] kay sa édé mwen an chay an twavay-la.” (2 Tim. 4:​11) Konsa, nou ka wè a klè Pòl té pawdonnen sé fwè-a èk i té wèsté pwé yo. Kèstyon-an sé: Kisa nou sa apwann an ègzanp Pòl?

6-7. Kisa ki sa édé nou kontiné moutwé sé fwè èk sè nou-a lanmityé? (1 Jan 4:7)

⁶ Kisa nou sa apwann an ègzanp sala? Jéhova vlé nou kontiné moutwé fwè èk sè nou lanmityé. (Li 1 Jan 4:7.) Konsa, lè on fwè èben on sè pa twété nou mannyè-a on Kwityen sipozé, nou asiwé sé pa èspwé yo té vlé fè’y, paski yo vlé fè sa ki dwèt an zyé Jéhova. (Prov. 12:18) Jéhova enmen tout sèvant li ki fidèl, menm si yo ka fè lèwè. Konsa, lè nou fè lèwè, Jéhova pa ka ladjé nou, ni i pa ka faché épi nou. Anfen, i ka kontiné wèsté bon jan nou. (Sam 103:9) Ès nou pa byen kontan Jéhova ka pawdonnen nou lè nou fè lèwè? Mé wi, nou byen kontan! Konsa annou swiv ègzanp li èk pawdonnen lézòt!​—Èfés. 4:⁠32–​5:1.

⁷ Bon, nou bizwen wèsté pwé sé fwè èk sè nou-a. Èk sa sé paski kon bout-la ka vini pli pwé, pèsikasyon kay vini pli mové. Anfen, yo pé jis mété nou lajòl pou lapéti lafwa nou. Èk si sa fèt nou kay bizwen sé fwè èk sè nou-a a lè sala plis pasé avan. (Prov. 17:17) Annou konsidiwé sa ki té wivé Josep,a on ansyen a Spain. Yo té mété’y an pwizon ansanm épi sé lézòt fwè-a paski yo wifizé fè sèvis militè. Wi, yo pa té vlé mélé kò yo an zafè latè-a. Mi sé sa Josep di: “An pwizon-an nou tout té ka wèsté ansanm. Alò délè nou té ka annèwvé yonn-a-lòt. Nou té ni pou pawdonnen yonn-a-lòt ofon tjè nou. Sa édé nou pou wèsté an lilyon épi yonn-a-lòt. Èk sa pwotéjé nou paski an pwizon-an, la té ni pwizonnyé ki pa té ka sèvi Jéhova tout oliwon nou. Bon. Asou yon lokazyon, mwen té ni on aksidan èk mwen kasé bwa mwen èk yo mété’y adan on kas. Alò, mwen pa té sa fè anyen pou kò mwen. Mé yonn an sé fwè mwen-an té ka wédé mwen anpil. I jis té ka lavé had mwen ban mwen. Konsa, mwen èspéyansé lanmityé ki fidèl lè mwen té bouzwen’y pli!” Bon. Èspéyans sala ka ban nou bon wézon pou nou wanjé népòt pwòblenm nou ni épi yonn-a-lòt dépi apwézan!

KONTINÉ AN SÈVIS JÉHOVA MENM SI MAWI’W ÈBEN MADANM OU DÉZAPWENTÉ’W

8. Ki difikilté moun ki mayé ni pou aji épi? 

⁸ Difikilté nou pé ni pou aji épi. Tout mawiyaj kay ni difikilté tanzantan. Bib-la di a klè, “sa ki mayé kay ni an chay twaka pou pasé.” (1 Kòr. 7:​28) Mé pouki Bib-la di sa? Sé paski ni mawi-a ni madanm-lan pa pawfé. Yo toulédé ni diféwan kawaktè. Yo toulédé ni sa yo enmen épi sa yo pa enmen. Délè, yo sòti an diféwan péyi èk ni diféwan kilti. Apwé yo mayé, yo pé wè la ni ti labitid moun-lan yo mayé-a ni yo pa té òbsòvé avan. Tout sé bagay sala pé annékòz pwòblenm. Épi pito yo twavay ansanm pou éséyé wanjé sé twaka-a ki an mawiyaj-la, yo ka blanmé yonn-a-lòt magwé yo toulédé ka fè lèwè. Délè, yo pé jis koumansé katjilé, sé an sépawasyon èben on dévos ki sa édé yo wanjé pwòblenm yo. Mé ès yo dwé sépawé èben dévosé pou wanjé sé pwòblenm yo-a? b Annou gadé sa nou sa apwann an ègzanp an madanm an Bib-la, ki té wèsté fidèl pou Jéhova magwé mawi’y té ka fè lavi’y mizéwab.

9. Ki difikilté Abigél té ni an mawiyaj li?

⁹ Ègzanp-lan an Bib-la: Abigél. Abigél té mayé épi on nonm yo ka kwiyé Nébal. Bib-la di Nébal sété on nonm ki té ni tèt di èk i pa té ka aji byen épi moun. (1 Sm 25:3) Sa oblijé té fè’y difisil pou Abigél viv épi mawi’y. Mé ès Abigél té janmen jwenn on chans pou sòti anba mawiyaj sala? Wi, i té twapé chans sala lè David té pawé pou tjwé mawi’y paski mawi’y té ensilté David èk sé sòlda’y-la. (1 Sm 25:​9-​13) Èben sa té on bon lè pou Abigél kouwi èk kité David tjwé Nébal. Mé i pa té fè sa. Pito sa, i plédé épi David pou pa tjwé mawi’y. (1 Sm 25:23-​27) Bon. Pouki Abigél pa té kité David tjwé Nébal?

10. Pouki Abigél té wèsté adan on mawiyaj ki té tèlman difisil?

¹⁰ Abigél té enmen Jéhova. Épi i té ka wèspèkté sé wèg-la i té mété an plas lè i vini pou mawiyaj. San dout, Abigél té ja tann konsèné sa Jéhova té di Adanm an jaden Édenn, lè i té ba’y Èv kon on madanm. (Jen. 2:24) Abigél té sav, mawiyaj sé yon awanjman ki sen pou Jéhova. Épi i té vlé plen Jéhova. Alò, i té kay fè népòt sa i pé pou’y sové jan kay li èk mawi’y. I pwan démach byen vit, pou’y anpéché David tjwé Nébal. I té osi dakò pou pwan apoloji pou on lèwè i pa té fè. Abigél té bwav. I pa té gadé pou kò’y tousèl. Èk nou wè, Jéhova té enmen’y. Kèstyon-an sé, kisa mawi èk madanm sa apwann hòd ègzanp Abigél?

11. (a) Kisa Jéhova vlé moun ki mayé fè? (Èfésòs 5:33) (b) Carmen twavay wèd pou sové mawiyaj li. Kisa ou apwann an ègzanp li? (Gadé pòtwé-a osi.)

¹¹ Kisa nou sa apwann an ègzanp sala? Jehovah vlé tout moun ki mayé pou wèsté ansanm menm si i difisil pou viv épi moun-an. Jéhova ka byen kontan pou wè moun ki mayé ka twavay wèd pou wanjé pwòblenm yo èk pou enmen èk wèspèkté yonn-a-lòt. (Li Èfésòs 5:33.) Bon. Annou konsidiwé ègzanp yon sésé yo ka kwiyé Carmen. Apipwé sis (6) lanné apwé i mayé, i koumansé étidyé Bib-la épi Tèmwen Jéhova èk i batizé tjèk tan apwé sa. Carmen di: “Mawi mwen pa té kontan sa pyès! I koumansé jalou Jéhova. I té ka ensilté mwen èk i té ka di i té kay kité mwen.” Magwé tout sa mawi’y té ka fè’y la, Carmen wèsté épi’y pou senkant (50) lanné. Carmen twavay wèd pou enmen èk wèspèkté mawi’y. I di: “Kon tan pasé, mwen apwann mannyè pou sav kouman mawi mwen té ka santi pli mèyè. Osi mwen apwann pou palé adan on mannyè ki janti. Paski mwen enmen Jéhova, èk mwen sav mawiyaj sakwé pou li, mwen fè tout sa mwen pé pou mawiyaj mwen ni siksé. M’a janmen éséyé pou kité mawi mwen.” c Konsa, si ou ni pwòblenm an mawiyaj ou, sé pou’w toujou chonjé pou konfyé Jéhova. Èk i kay sipòté’w, èk édé’w pou tjenbé fò an mawiyaj ou.

KONTINÉ AN SÈVIS JÉHOVA MENM SI’W FÈ ON LÈWÈ KI GWAV

12. Ki mannyè nou pé santi si nou fè on péché ki gwav?

¹² Difikilté nou pé ni pou aji épi. Nou pé santi byen dékouwajé si nou fè on péché ki gwav. Bib-la di, péché nou pé fè nou santi dékouwajé toubonnman èk nou pé jis pèd èspwa. (Sam 34:18) Èk sé sa ki té wivé yon fwè, non’y sé Robert. I twavay wèd pou an chay lanné pou i sa vini on sèvant ministiriyal. Mé i fè on péché ki té gwav èk i té péché kont Bondyé. Robert di: “Lè mwen wéyalizé sa mwen té fè-a, konsyans mwen bat mwen an chay. Èk mwen pa té ka santi kò mwen byen. Sé konmsi mwen té ni on mal a lèstonmak mwen. Mwen pléwé, épi mwen pwédyé bay Jéhova. Mwen té ka katjilé, ‘Bondyé pa té kay janmen vlé kouté lapwiyè mwen ankò paski mwen dézapwenté’y.” Wi i vwé, si nou fè on péché ki gwav, sa sa kasé tjè nou. Épi nou sa koumansé kwè Jéhova ja abandonnen nou konsa la pa ni pyès wézon pou nou kontiné an sèvis li. (Sam 38:4) Èben si ou ja santi mannyè sala, konsidiwé ègzanp on moun an Bib-la ki kontiné an sèvis Jéhova magwé i té fè on péché ki té gwav.

13. Ki lèwè Pita té fè avan i té fè gwo péché-a? Kisa ki gwo péché-a Pita té fè?

¹³ Ègzanp-lan an Bib-la: Zapòt Pita. Swè-a avan yo té tjwé Jézi, zapòt Pita té fè plizyè lèwè. Èk sé lèwè sala annékòz li pou fè on gwo péché. Bon. Pwèmyé lèwè-a i té fè-a sé sa, i moutwé twòp konfyans an kò’y. I té ka bavadé lè i di, menm si sé lézòt zapòt-la abandonnen Jézi, i menm pa kay janmen fè sa. (Mak 14:27-29) Mi on lòt lèwè i fè. Paditan yo té an jaden Gèfsèmanni, pou twa fwa Pita alé dòmi pito i wèsté asou gad. (Mak 14:32, 37-41) Bon. On lòt lèwè Pita té fè sé sa: lè’y wè sé moun-lan vini awété Jézi, Pita chapé kò’y épi i abandonnen Jézi. (Mak 14:50) Finalman, Pita fè on gwo péché. Pou twa fwa i manti èk di i pa konnèt bon jan’y Jézi. I jis sèmanté ka di, “Vonmyé Bondyé pini mwen apwézan, mwen ka palé lavéwité! Mwen pa konnèt nonm-lan ou ka palé konsèné-a!” (Mak 14:66-71) Apwé Pita fini di sa, i wéyalizé i fè on gwo péché. Pita té ka santi tèlman koupab sa kwazé tjè’y èk i koumansé pléwé. (Mak 14:72) Djòs imajiné penn-lan Pita té ka santi an tjè’y-la, lè détwa nèditan apwé sa, yo tjwé bon jan’y-lan, Jézi. A lè sa-a, Pita dwétèt té ka santi i pa vo anyen.

14. Kisa ki té édé Pita pou kontiné sèvi Jéhova? (Gadé pòtwé-a.)

¹⁴ Pita té sa tjébé fò èk kontiné sèvi Jéhova pou plizyé wézon. Pou ègzanp, i pa té ka wèsté pa kò’y. I té ka alé jwenn sé lézòt disip-la, èvèk yo té ka konfòté’y. (Louk 24:33) Osi, apwé Jézi wésisité, i fè Pita wè’y, pitèt pou ankouwajé’y. (Louk 24:34; 1 Kòr. 15:5) Èvèk pli ta apwé sa, andji Jézi di Pita i té dézapwenté épi sé lèwè-a i té fè-a, i di jan’y i kay ba’y on pli gwo wèskonsabilité. (Jan 21:15-17) Pita té sav i té fè on gwo péché. Kanmenm, i kontiné pou éséyé fè sa ki dwèt. Mé pouki Pita té ka mété tèlman éfò pou fè sa ki dwèt? Sé paski i té asiwé mèt li, Jézi, té enmen’y toujou. Èk sé fwè-a kontiné ka sipòté. Bon, kèstyon-an sé, ‘Kisa nou sa apwann hòd ègzanp Pita?’

15. Ki asiwans Jéhova vlé nou ni? (Sam 86:5; Ronm 8:38, 39) (Gadé pòtwé-a osi.)

¹⁵ Kisa nou sa apwann an ègzanp sala? Jéhova vlé fè nou asiwé ki i enmen nou èk i kay pawdonnen nou. (Li Sam 86:5; Ronm 8:38, 39.) Lè nou fè on péché nou ka santi koupab. Sa sé on bagay ki natiwèl. Kanmenm sé pa pou nou kwè Jéhova pa enmen nou èk i pa kay janmen pawdonnen nou. Alò, si nou ka santi konsa nou ni pou chaché pou èd lamenm. Chonjé, pli bonnè-a, nou té palé konsèné Robert. I di: “Mwen té fè on péché paski mwen té ka dépan asou kò mwen pou wézisté tantasyon.” Robert wéyalizé i té bouzwen palé épi sé ansyen-an. I di: “Lè mwen palé épi sé ansyen-an, yo fè mwen santi Jéhova enmen mwen. Épi mwen menm santi sé ansyen-an enmen mwen tou. Yo édé mwen wè Jéhova pa té abandonnen mwen.” Konsa, si nou ni pyès katjil négativ, nou sa asiwé, Jéhova enmen nou an chay. Alò, si nou fè on péché, dépi nou wépanti, chaché pou èd, èk éséyé pou pa wépété menm lèwè-a, Jéhova kay pawdonnen nou. (1 Jan 1:8, 9) Konsa asiwans sala Jéhova ban nou-a, kay édé nou pou kontiné sèvi’y menm si nou fè gwo péché!

16. Pou ki wézon ou détèminé pou kontiné an sèvi Jéhova?

¹⁶ Jéhova ka vwéman apwésyé sé èfò-a nou ka fè pou éséyé sèvi’y diwan tan difisil sala. Épi èd Jéhova, nou sa kontiné sèvi’y épi fidèlité lè nou dézapwenté èk lèwè nou menm èben lèwè lézòt. Nou sa kontiné pou enmen sé fwè èk sè-a èk pawdonnen yo lè yo ofwansé nou. Nou osi sa moutwé Bondyé fondjè lanmityé-a nou ni pou li, èk wèspé pou awanjman i mété an plas pou mawiyaj, lè nou fè tout sa nou pé pou wanjé pwòblenm nou pé ni an mawiyaj nou. Èk si nou fè on péché, nou sa mandé Jéhova pou èd, aksèpté lanmityé’y èvèk pawdonnasyon’y, épi kontiné sèvi’y. Alò, nou sa asiwé Jéhova kay benni nou si nou pa doubout “fè sa ki bon.”​—Gal. 6:9.