Lè Nou Vansé Pwé Sé Fwè Èk Sè Nou-an Sa Bon Pou Nou!

1-2. Kisa ki byen enpòtan pou Jéhova, èk kisa i vlé nou fè?

BON, an bagay ki byen enpòtan pou Jéhova, sé mannyè-a nou ka twété moun. Anfen Jézi di, nou ni pou enmen pwochen nou menm kon nou enmen kò nou. (Maf. 22:​37-39) Sa vlé di, nou ni pou moutwé jis moun ki pa ka adowé Jéhova jantiyès. Anfen lè nou fè sa, nou ka swiv ègzanp Jéhova, paski ‘i ka fè sòlèy li lévé anlè ni moun ki mové ni moun ki bon, èk i ka fè lapli tonbé asou moun ki fè sa ki bon èk moun ki fè sa ki pa bon.’—Maf. 5:45. (NWT)

² Bon. Magwé Jéhova enmen tout moun, i ni an lanmityé spésyal pou moun ki ka obéyi’y. (Jan 14:21) Èvèk Jéhova vlé nou swiv ègzanp li. Wi, i vlé nou moutwé sé fwè èk sè nou-an menm kalité lanmityé-a èk afèksyon-an nou ka moutwé bon jan nou ében fanmi nou. Konsa i ka ankouwajé nou pou “ni lanmityé pou yonn a lòt èk tout tjè [nou]”, èk pou “ni lanmityé pou yonn a lòt menm kon fwè èk sè sipozé fè.”—1 Pet. 4:8; Rom. 12:10.

3. Kisa nou ni pou fè pou lanmityé nou pou sé fwè èk sè nou-an pwofité?

³ Bon, menm kon nou ni pou otjipé an plan pou’y sa pwofité, nou osi ni pou twavay wèd pou lanmityé nou pou yonn a lòt pwofité. Anfen, an Hibrou 13:​1, sé sa zapòt Pòl ankouwajé nou pou fè. I di: “Sé pou zòt kontiné enmen yonn a lòt.” Wi, Jéhova vlé nou kontiné twavay wèd pou lanmityé nou pou sé fwè èk sè nou-an pwofité. Konsa an atik sala, nou kay diskité poutji nou ni pou vansé pwé yonn a lòt, èk diféwan mannyè nou sa fè sa.

POUTJI NOU NI POU KONTINÉ VANSÉ PWÉ YONN A LÒT?

4. Silon Sam 133:​1, ki mannyè nou sa kontiné moutwé apwésiyasyon pou lilyon-an nou ni épi sé fwè èk sè nou-an? (Gadé sé pòtwé-a osi.)

⁴ Li Sam 133:1. Wi, nou ka dakò épi lévanjil sala! Kanmenm, nou sa pèd apwésiyasyon nou pou lilyon-an nou ka enjwi épi yonn a lòt. Pou ègzanp, lè nou ka wè an bagay toulé jou, tèl kon an bèl pyé bwa èben lanmè-a, nou sa pèd apwésiyasyon nou pou bèlté yo. Èk an menm mannyè-a paski nou ka wè sé fwè èk sè nou-an byen souvan, nou sa pèd apwésiyasyon nou pou lilyon-an nou ka enjwi anpami sé fwè èk sè nou-an. Bon. Ki mannyè nou sa fè asiwé sa pa wivé nou? Èben nou ni pou fè éfò-a pou katjilé asou valè-a chak sé fwè èk sè nou-an ni an kongwigasyon-an, èk pou nou. Èk si nou fè sa, lanmityé nou pou sé fwè èk sè nou-an kay kontiné pwofité.

5. Kisa ki sa fèt lè lézòt moun wè lanmityé-a nou ni pou yonn a lòt?

⁵ Adan moun ki atandé mitin nou pou pwèmyé fwa-a, ka byen sipwi pou wè lanmityé-a nou ni pou yonn a lòt. Anfen, sa ka jis fè adan di yo wéyalizé yo twapé lavéwité-a. Èk sé sa Jézi té di an Jan 13:35: “Si zòt enmen yonn a lòt, sé lè sala tout moun kay sav zòt sé disip mwen.” Pou ègzanp annou konsidiwé èspéyans an jenn madanm, non’y sé Shavi.a Apwé Shavi koumansé étidyé Bib-la épi Témwen Jéhova, i atandé yon konvansyon. Bon, apwé pwèmyé jou-a, tann sa i di sésé-a ki té ka étidyé Bib-la épi’y: “Pawan mwen pa janmen anbwasé mwen. Mé an konvansyon sala, senkant dé (52) moun anbwasé mwen an yon jou! Mwen santi Jéhova té ka sèvi pèp li pou moutwé mwen ki otan i enmen mwen. Mwen pa sa èspéwé pou vini an manm an fanmi sala.” Shavi kontiné étidyé Bib-la, i fè chanjman an lavi’y, èk an lanné dé mil vennkat (2024) i batizé. Wi, lè moun wè bon twavay nou, èk èspwèsman lanmityé-a nou ni pou yonn a lòt, byen souvan sa ka pousé yo pou koumansé sèvi Jéhova.—Maf. 5:16.

6. Lè nou vansé pwé sé fwè èk sè nou-an, ki mannyè sa sa pwotéjé nou?

⁶ Bon. Lè nou vansé pwé sé fwè èk sè nou-an, sa sé an pwotèksyon. Anfen, an Hibrou 3:13 zapòt Pòl di: “Sé pou zòt ankouwajé yonn a lòt toulé jou, . . . pou zòt pa bay péché pyès chans pou kwennen zòt, pou tjè zòt pa vini wèd.” Wi, si nou vini si tèlman dékouwajé, èvèk nou ka twapé’y difisil pou fè sa ki bon, Jéhova sa pousé an fwè ében an sè pou édé nou. (Sam 73:​2, 17, 23) Èk kalité èd sala vwéman bon pou nou.

7. Ki mannyè lanmityé ka édé nou pou ni lilyon? (Kòlòsé 3:​13, 14)

⁷ Bon, nou ka enjwi an chay bennédiksyon paski nou anpami yon gwoup moun ki ka twavay wèd pou moutwé yonn a lòt lanmityé. (1 Jan 4:11) Pou ègzanp, paski nou ni lanmityé pou yonn a lòt, nou ka “sipòté” èk “pawdonnen yonn a lòt.” (Li Kòlòsé 3:​13, 14; Èfés. 4:​2-6) Èk sa ka édé nou pou tjenn lilyon-an nou ka enjwi anpami nou. Anfen a kòz di sa lè nou atandé sé mitin nou-an nou ka adowé Jéhova épi djèwté. Èvèk ou pa sa janmen twapé sa anpami pyès lòt gwoup an latè-a.

BAY FWÈ’W LONNÈ

8. Ki mannyè Jéhova ka édé nou pou tjenn lilyon-an anpami sé fwè èk sè nou-an?

⁸ Bon. Nou pyès pa pawfé, alò lilyon-an nou ni anpami sé fwè èk sè nou-an sé vwéman an miwak. Èk sé Jéhova sèlman ki ka fè sa posib. (1 Kòr. 12:25) Anfen, an 1 Tèsalonnika 4:9 Bib-la ka di nou: “Sé Bondyé ki ja moutwé nou mannyè pou enmen yonn a lòt.” Sa vlé di, Jéhova ka sèvi Bib-la pou di nou ègzaktiman sa nou ni pou fè pou nou sa vansé pli pwé yonn a lòt. Alò lè nou étidyé sé lévanjil-la èk nou fè sa nou apwann, sé vwéman Jéhova ki ka moutwé nou “mannyè pou enmen yonn a lòt”. (Hib. 4:12; Jémz 1:25) Èk sé sa Témwen Jéhova ka twavay byen wèd pou fè.

9. Ki mannyè Ronm 12:​9-13, ka édé nou pou bay fwè nou lonnè?

⁹ Bon. Ki mannyè Pawòl Bondyé ka enstwi nou pou vansé pli pwé yonn a lòt? Alò annou konsidiwé sa zapòt Pòl té di an Ronm 12:​9-13. (Li’y.) Bon. Ès ou òbzòvé ki, zapòt Pòl di: “Chak moun sipozé abésé kòʼy épi bay fwèʼy lonnè”? Mé kisa sa vlé di? Ében sa vlé di, pito nou èspéyé asou fwè ében sè nou pou vansé pwé nou èk pou moutwé nou lanmityé; nou chak ni pou pwan douvan pou moutwé “yonn a lòt lanmityé menm kon fwè èk sè sipozé fè”. Èk nou sa fè sa lè nou donnan épi yonn a lòt, lè nou pawdonnen yonn a lòt, èk lè nou wisivwè yonn a lòt lakay nou. (Èfés. 4:32) Èvèk si’w fè sé bagay sala, ou kay èspéyansé sa Jézi di an Twavay 20:35: “Tjèʼw ka pli kontan lè ou bay pasé lè ou wisivwè.”

10. Ki mannyè nou sa twavay wèd pou édé lézòt? (Gadé pòtwé-a osi.)

¹⁰ Bon. Apwé zapòt Pòl di nou pou bay yonn a lòt lonnè, i osi di ‘pa janmen kité difé-a ki an nou-an tenn.’ Sa vlé di, nou sé moun ki zélé èk nou ka twavay wèd. Alò lè nou twapé yon ansayman, nou kay twavay wèd pou fè’y byen. Anfen Pwovèb 3:​27, 28 ka ankouwajé nou, pou ‘pa wifizé fè bon bay moun ki méwité’y, si nou sa édé yo.’ Konsa, lè yon moun bizwen èd nou, nou vlé fè tout sa nou pé pou édé’y. Osi nou pa vlé fè kòlonng pou fè sa nou ni pou fè, ében di, an lòt moun kay édé’y.—1 Jan 3:​17, 18.

11. Kisa ki sa édé nou vansé pli pwé yonn a lòt?

¹¹ Bon. An lòt mannyè nou sa bay yonn a lòt lonnè, sé lè nou pawdonnen yonn a lòt. Èfésòs 4:26 di: “Pa kité sòlèy-la kouché épi ou faché toujou.” Èk poutji sa si tèlman enpòtan pou nou fè? Èben vèwsé 27 ka di nou, pou “Denmou-an [pa ni] pyès chans asou [nou].” Wi, plizyè fwa an pawòl li, Jéhova ka di nou pou pawdonnen yonn a lòt. Pou ègzanp, Kòlòsé 3:13 ka di nou pou “pawdonnen yonn a lòt.” Anfen lè nou pawdonnen moun, sa ka édé nou pou vansé pli pwé yo. Èvèk sa ka osi édé nou pou tjenn ‘lapé-a ki ka fè nou viv ansanm,’ èk i ka édé pou ‘pwézèvé lilyon-an’ nou ka enjwi-a. (Èfés. 4:3) Wi i a klè, lè nou pawdonnen yonn a lòt nou ka édé pou fòtifyé lilyon-an èk lapé-a anpami pèp Jéhova.

12. Ki mannyè Jéhova ka édé nou pou pawdonnen yonn a lòt?

¹² Bon, délè i byen difisil pou pawdonnen moun ki fè nou ditò èben ki ofwansé nou. Kanmenm, épi èd lisentèspwi Jéhova, nou sa pawdonnen yo. Bon. Pòl osi di, nou ni pou “fè sèvis Bondyé kon an [moun lèspwi Bondyé] ka pwi difé.” (Ronm 12:11) Sa vlé di, lèspwi Bondyé sa édé nou pou moutwé yonn a lòt lanmityé kon fwè èk sè, èk pou pawdonnen yonn a lòt libman. Alò, nou vlé kontiné plédé épi Jéhova pou édé nou.—Louk 11:13.

“LA PA [SIPOZÉ] NI HALÉ KASÉ ANPAMI ZÒT”

13. Kisa ki pé annékòz halé kasé anpami nou?

¹³ Kongwigasyon-an ni tout sòt kalité moun ki ni diféwan kalité sitiwasyon èk kilti. (1 Tim. 2:​3, 4) Konsa nou chak kay fè diféwan chwa lè’y vini pou bagay tèl kon; abiman nou, bab nou, mannyè nou ka tjenn chivé nou, sa nou ka fè pou pwan ka santé nou, sa nou ka gadé asou télévizyon, èk sé liv-la nou ka li. Alò si nou pa pwan pokosyon, sa sa annékòz halé kasé ében divizyon anpami nou. (Ronm 14:4; 1 Kòr. 1:10) Chonjé, Jéhova ha moutwé nou mannyè pou enmen yonn a lòt. Konsa nou ni pou pwan bon pwokosyon pou pa fè akwèdi chwa nou pli mèyè pasé chwa lézòt.—Filip. 2:3.

14. Kisa nou vlé fè a tout lè, èk pouki?

¹⁴ Pou anpéché divizyon an kongwigasyon-an, nou vlé fè tout sa nou pé pou wéfwéchi èk ankouwajé yonn a lòt a tout lè. (1 Tèsa. 5:11) An chay fwè èk sè ki té doubout atandé mitin, èk fwè èk sè sé ansyen-an té tiwé an kongwigasyon-an ha witounen. Alò, nou vlé moutwé yo lanmityé èk byen vini yo! (2 Kòr. 2:8) Pou ègzanp, yon sésé ki pa té atandé mitin pou dis (10) lanné witounen. I di: “Tout moun souwi ban mwen èk yo soukwé lanmen mwen.” (Twav. 3:19) Bon ki mannyè lanmityé sala té afèkté’y? Ében sésé-a di: “Mwen santi konmsi Jéhova té ka édé mwen ni djèwté mwen ankò.” Wi, si nou fè tout sa nou pé pou ankouwajé sé fwè èk sè nou-an, Jézi sa sèvi nou pou ankouwajé fwè èk sè “ki las [èk ki] ka pòté chay lou.”—Maf. 11:​28, 29.

15. An ki lòt mannyè nou sa édé kongwigasyon-an pou ni lilyon? (Gadé pòtwé-a osi.)

¹⁵ An lòt mannyè nou sa édé kongwigasyon-an pou ni lilyon, sé an pawòl nou. Pou ègzanp Jòb 12:11 di: ‘Ès zòwèy-la pa ka ègzanminé sa’y tann, menm kon lanng-lan ka gouté manjé?’ Bon. Menm kon an moun ka gouté manjé i pwépawé pou wè si’y bon avan i bay lézòt, an menm mannyè-a nou vlé katjilé asou sa nou kay di avan nou di’y. (Sam 141:3) Wi, nou vlé toujou fè asiwé sa nou kay di kay ankouwajé, wéfwéchi, èk ‘an bennédiksyon pou moun ki ka tann.’—Èfés. 4:29.

16. Ki moun anpatikilé ki sipozé éséyé ankouwajé lézòt épi pawòl yo?

¹⁶ Mawi èk pawan sipozé palé adan an mannyè ki kay ankouwajé fanmi yo. (Kòl. 3:​19, 21; Titòs 2:4) Osi, sé ansyen-an sipozé wéfwéchi èk konsolé pèp Jéhova. (Izay. 32:​1, 2; Gal. 6:1) Anfen, Pwovèb 15:23 ka di: ‘Lè yon moun di an mo pawòl an mouman-an i sipozé di’y, sé pa dé bon sa bon!’

ENMEN MOUN ÉPI TOUT TJWÈ’W

17. Ki mannyè nou sa fè asiwé nou enmen sé fwè èk sè nou-an épi tout tjè nou?

¹⁷ Zapòt Jan di nou: “Pa . . . moutwé lanmityé an bouch nou tousèl, mé . . . moutwé lanmityé-a nou ni pou vwé-a an sa nou ka fè.” (1 Jan 3:18) Konsa nou vlé lanmityé-a nou ni pou sé fwè èk sè nou-an sòti ofon tjè nou. Mé, ki mannyè nou sa fè asiwé nou enmen sé fwè èk sè nou-an épi tout tjè nou? Ében pli nou pasé tan épi sé fwè èk sè nou-an nou kay vansé pli pwé yo. Èk sa kay édé nou pou enmen yo pli. Pou ègzanp, nou vlé pasé tan épi sé fwè èk sè-a an mitin èk an pwédikasyon-an. Èk osi, nou vlé fè tan pou vizité lézòt. Wi, lè nou fè sé bagay sala, nou ka moutwé sé Jéhova ki ka moutwé nou “[mannyè] pou enmen yonn a lòt.” (1 Tèsa. 4:9) Èk nou kay kontiné pou èspéyansé sa Sam 133:1 ka di: “Pa dé bon i bon èk bèl lè fwè ka viv ansanm an lilyon!”—Sam 133:1.