ATIK LIMOWO 15
CHANSON 30 Papa Mwen, Dyé Mwen, Èk Jan Mwen
‘I Bon Pou [Nou] Vini Pwé Bondyé’!
‘Pou mwen menm, i bon pou mwen vini pwé Bondyé.’—SAM 73:28.
SA ATIK-LA KA FIKSÉ ASOU
Nou kay wè mannyè nou sa vini pli pwé Jéhova èk sé bennéfis-la nou kay twapé lè nou fè sa.
1-2. (a) Kisa nou ni pou fè pou vini bon jan épi an moun? (b) Kisa nou kay diskité an atik sala?
ÈS OU ni an bon jan? Kisa ou té fè pou vini bon jan épi moun sala? Pitèt ou té pasé tan épi’y, pitèt ou té apwann konsèné sé difikilté-a i ka èspéyansé, èk ou vini konnèt sa i enmen èk i pa enmen. Osi ou wè i ni bèl kawaktè ou vlé imité. Èk ou vini enmen jan sala.
2 Wi, si’w vlé vini bon jan épi an moun, ou ni pou pasé tan épi moun-lan, èk sa ka pwan an chay éfò. Èk sé menm bagay-la nou vlé fè lè nou vlé vansé pli pwé Jéhova. Alò atik sala kay diskité sa nou sa fè pou vansé pli pwé Bondyé, èk sé bennéfis-la nou kay twapé lè nou fè sa. Pwèmyéman, annou diskité poutji i bon pou nou vansé pwé Jéhova.
3. Pouki i bon pou katjilé asou sé bennéfis-la nou ka wisouvwè lè nou vansé pwé Jéhova? Ba yon ègzanp.
3 San dout ou ka dakò i bon pou vansé pwé Jéhova. Kanmenm, lè nou katjilé asou ki otan bon i bon pou vansé pwé Jéhova, sa kay pousé nou pou kontiné fè sa. (Sam 63:6-8) Pou ègzanp, nou sav nou ni pou manjé, bwè glo, pozé, èk fè lézèksis pou nou pa tonbé malad. Mé an chay moun ka tonbé malad paski yo pa ka katjilé asou sé bennéfis-la yo kay twapé lè yo fè sé bagay sala. Kanmenm lè nou katjilé asou sé bennéfis-la nou kay twapé si nou fè sé bagay sala, i kay pli ézé pou nou fè yo. An menm mannyè-a, nou sav i bon pou vini pwé Jéhova. Mé lè nou katjilé asou sé bennéfis-la nou kay twapé lè nou fè sa, sa kay pousé nou pou kontiné vansé pli pwé’y.—Sam 119:27-30.
4. Kisa moun-lan ki ékwi Sam 73 té ka di an vèwsé 28?
4 Li Sam 73:28. Moun-lan ki té ékwi Sam 73 sété an Livayt, èk i té an mizisyen an tanp Jéhova. I ka sanm i té ka adowé Jéhova pou plizyè lanné. Mé i té sav i té enpòtan pou’y chonjé, lè’y vini pwé Bondyé sa té bon pou li. Èk i té vlé lézòt konnèt lè yo vini pwé Bondyé i té bon pou yo osi. Alò, pouki i bon pou nou vini konnèt Jéhova pli mèyè èk pou fòtifyé wilasyon nou épi’y?
LÈ NOU ‘VINI PWÉ BONDYÉ’ SA KA BAN NOU LAKONTANTMAN
5. (a) Lè nou vini pli pwé Jéhova pouki sa ka ban nou lakontantman? (b) Silon Pwovèb 2:6-16, ki mannyè lasajès Jéhova ka édé’w èk pwotéjé’w?
5 Kon nou ka vini pli pwé Jéhova, sé pli lakontantman nou ka ni. (Sam 65:4) Èk la ni plizyè wézon pou sa. Pou ègzanp, lè nou li èk obéyi sa Jéhova ka di nou an Bib-la, nou ka vini savan. Èk sa kay anpéché nou fè péché ki gwav, èk i kay pwotéjé nou hòd an chay bagay ki sa blésé nou. (Li Pwovèb 2:6-16.) Èvèk sa sé wézon-an Pwovèb 3:13 ka di: ‘Pa dé bon i bon lè on moun twapé lasajès, èk lè on moun twapé lakonpwann.’
6. Kisa ki annékòz moun-lan ki ékwi Sam 73 pou pèd lajwa’y?
6 Bon. Jis moun ki ni an bon wilasyon épi Jéhova ka santi twis délè. Pou ègzanp, moun-lan ki ékwi Sam 73 té pèd lajwa’y paski i koumansé katjilé asou bagay i kwè ki pa té jis. I koumansé katjilé, moun ki té mové té ni an bon lavi magwé yo pa té mélé épi Bondyé. Èk sa fè’y vini faché. Anfen, i té jis anvi sa yo té ni. Osi i té ka kwè, moun ki té vyolan èk ki té ni lògèy té sa twapé népòt sa yo té vlé. Èk sé moun sala té ni bon santé èk yo pa té ka soufè. (Sam 73:3-7, 12) Sé bagay sala té twakasé’y si tèlman, i té jis kwè i pa té ka fè sans pou kontiné sèvi Bondyé. Anfen, an Sam 73:13 i di: ‘Anvéwité, i pa té ka fè sans pou tjenn tjè mwen nèt, èk pou tjenn lanmen mwen hòd movèsté.’
7. Kisa nou sa fè lè nou ka santi twis? (Gadé pòtwé-a ki asou kouvèti-a.)
7 Magwé moun-lan ki ékwi Sam 73 té ka santi byen twis, i fè an bagay pou chanjé katjil li. Wi, i antwé tanp Bondyé èk Jéhova édé’y. (Sam 73:17-19) Alò lè nou ka santi twis, Jéhova, pli bon jan nou konnèt sa. Konsa nou sa mandé’y pou édé nou sav sa pou fè. Èk konsèy-la nou ka twapé an Pawòl li, èk ankouwajman-an nou ka wisouvwè hòd sé fwè èk sè-a an kongwigasyon-an, kay ban nou fòs-la nou bouzwen pou kontiné sèvi’y menm si nou twis. Èk osi, menm si nou ni si tèlman pwòblenm nou pa sav sa pou fè, Jéhova kay édé nou pou wèsté kam.—Sam 94:19.a
Livayt-la ki ékwi Sam 73 ka doubout an ‘tanp Bondyé’. (Gadé pawagwaf 7)
LÈ NOU ‘VINI PWÉ BONDYÉ’ NOU SA NI AN BON LAVI APWÉZAN, ÈK AN BÈL ESPWA POU TAN KI KA VINI
8. Ki lòt bennéfis nou ka twapé lè nou ‘vini pwé Bondyé’?
8 Bon. La ni dé (2) lòt bennéfis nou ka twapé lè nou ‘vini pwé Bondyé’. Pwèmyéman, nou ka ni an bon lavi apwézan. Èk dézyenman, nou ka ni an bèl èspwa pou tan ki ka vini. (Jér. 29:11) Bon. Annou diskité sé dé (2) bennéfis sala pli.
9. Lè nou ‘vini pwé Bondyé’ ki mannyè sa ka édé nou pou ni an bon lavi?
9 Lè nou ‘vini pwé Bondyé’ nou ka ni an bon lavi. Bon. La ni an chay moun ki pa ka kwè la ni an Bondyé. Èk a kòz di sa, yo pa konnèt pouki lézòm asou latè-a, èk yo ka kwè an tan pou vini, la pa kay ni pyès moun asou latè-a. Kanmenm, paski nou ka étidyé Pawòl Bondyé, nou asiwé la ni an Bondyé. Èk népòt sa nou fè ba li pa kay an ven, paski “[i] kay bay bon bagay pou tout moun ki ka chaché pou li.” (Hib. 11:6) Osi Jéhova fè nou pou adowé’y. Konsa lè nou adowé’y, sa ka ban nou an chay lakontantman.—Dito. 10:12, 13.
10. Silon Sam 37:29, kisa Jéhova pwonmèt moun ki ka konfyé’y?
10 An chay moun pa ni an bèl èspwa pou tan ki ka vini. Pou ègzanp, yo ka sèlman twavay, mayé, fè ich, èk sové lajan pou lè yo pa kay sa twavay ankò. An plis di sa, sé moun sala pa konnèt sa Bondyé ha pwonmèt pou tan ki ka vini. Mé sé pa konsa i yé épi sèvant Bondyé. (Sam 25:3-5; 1 Tim. 6:17) Paski nou asiwé Jéhova kay pwan ka sé sèvant li-a. Wi, nou konnèt Bondyé nou, i sé jan nou, èk i kay fè tout sa i ha pwonmèt nou. Èk yonn an sé bagay-la i pwonmèt nou sé sa: Nou kay adowé’y pou tout tan an Pawadi-a.—Li Sam 37:29.
11. Ki lòt bennéfis nou ka twapé lè nou vini pwé Bondyé? (b) Ki mannyè Bondyé ka santi lè nou vini pwé’y?
11 La ni lòt bennéfis nou ka èspéyansé lè nou ‘vini pwé Bondyé’. Pou ègzanp Jéhova pwonmèt lè nou wépanti péché nou i kay pawdonnen nou. (Izay. 1:18) Èk a kòz di sa, nou pa ni pou twakasé lidé nou konsèné péché nou té fè an tan pasé. (Sam 32:1-5) Osi, lè nou ‘vini pwé Bondyé’ sa ka fè’y kontan. (Pwov. 23:15) Kanmenm nou asiwé ou sa katjilé asou lòt bennéfis ou sa twapé lè ou vini pwé Jéhova. Mé, kisa nou ni pou fè pou nou kontiné vini pwé Bondyé?
SA NOU SA FÈ POU NOU KONTINÉ ‘VINI PWÉ BONDYÉ’
12. Kisa nou ha fè pou nou vini pwé Bondyé?
12 Nou ha fè plizyè bagay pou nou vini pwé Bondyé. Pou ègzanp nou ha apwann konsèné Jéhova èk Gason’y Jézi. Nou ha wépanti hòd péché nou, nou ha moutwé lafwa an Bondyé, èk nou ka fè tout sa nou pé pou obéyi’y. Kanmenm, nou ni pou kontiné fè sé bagay sala, si nou vlé kontiné vini pli pwé Bondyé.—Kòl. 2:6.
13. Ki twa (3) bagay ki sa édé nou pou kontiné vini pli pwé Jéhova?
13 Bon. Annou diskité twa (3) bagay ki kay édé nou pou kontiné vini pli pwé Jéhova. (1) Nou ni pou kontiné li èk étidyé Bib-la. Kanmenm, lè nou ka fè sa, nou vlé fè pli pasé apwann bagay ki nèf. Pito sa, nou vlé éséyé konpwann mannyè Bondyé ka katjilé, sa’y vlé nou fè, èk fè sé bagay-la i vlé nou fè. (Èfés. 5:15-17) (2) Nou ni pou fòtifyé lafwa nou an Jéhova. Èk nou ka fè sa lè nou mèdité asou sé diféwan mannyè-a i ka moutwé nou lanmityé’y. Èvèk (3), nou vlé kontiné hayi sé bagay-la ki ka ofwansé Jéhova, èk pa fè jan épi moun ki ka fè sa ki pa bon.—Sam 1:1; 101:3.
14. Silon 1 Kòrint 10:31, kisa nou sa fè toulé jou pou plè Jéhova? (Gadé sé pòtwé-a osi.)
14 Li 1 Kòrint 10:31. I enpòtan pou nou fè bagay nou sav ki kay plè Jéhova. Mé nou ni pou fè pli pasé pwéché, èk alé mitin. Anfen, sa nou ka fè toulé jou sipozé plè Jéhova. Pou ègzanp, lè nou onnèt an tout sa nou ka fè, èk nou ka sépawé sa nou ni épi lézòt, sa ka fè Jéhova kontan. (2 Kòr. 8:21; 9:7) Jéhova osi vlé nou moutwé nou ka apwésyé lavi-a i ha ban nou-an. Alò nou ka pwan pokosyon épi kisa nou ka manjé èk bwè, èk nou ka fè lòt bagay pou nou wèsté an bon santé. Èk lè Jéhova wè nou ka éséyé plè’y an tout sa nou ka fè, sa ka fè’y enmen nou pli.—Louk 16:10.
Mi yonndé mannyè nou sa plè Jéhova: Kondwi machin nou byen, manjé byen, pwan lézèksis, èk osi sépawé sa nou ni épi lézòt. (Gadé pawagwaf 14)
15. Ki mannyè Jéhova vlé nou twété tout moun?
15 Jéhova ka moutwé tout moun jantiyès, ki yo ka adowé’y opa. (Maf. 5:45) Èk i vlé nou fè menm bagay-la. Pou ègzanp, Titòs 3:2 ka ankouwajé nou pou ‘pa palé moun mal, pa babyé, èk pou toujou moutwé bon mannyè pou tout moun.’ Alò menm si moun pa ka kwè an Jéhova, nou pa janmen vlé kwè nou pli mèyè pasé yo. (2 Tim. 2:23-25) Wi, lè nou twété tout moun épi jantiyès, nou ka kontiné vini pli pwé Jéhova.
NOU SA ‘VINI PWÉ BONDYÉ’ MENM SI NOU KA FÈ LÈWÈ
16. Ki mannyè moun-lan ki ékwi Sam 73 té koumansé santi apwé i sèvi Jéhova pou plizyè lanné?
16 Pitèt délè ou ka santi Jéhova pa pwé’w pou lapéti sé lèwè-a ou ha fè. Mé chonjé ègzanp moun-lan ki té ékwi Sam 73; i di: ‘Mwen té pwèskè kité bon chimen-an. Pyé mwen té pwèskè glisé.’ (Sam 73:2) I osi di, tjè’y té vini ‘si’ èk i ‘pa té ka byen wézonnen, . . . menm kon an bèt ki pa té ni bon sans’ douvan Jéhova. (Sam 73:21, 22) Bon. Ès i té kwè a kòz di fèblès li èk mové atitid li, Jéhova pa té enmen’y èk i pa té kay pawdonnen’y?
17. (a) Menm si moun-lan ki ékwi Sam 73 té ka santi dékouwajé, kisa i té fè? (b) Ki lison nou apwann hòd èspéyans li? (Gadé sé pòtwé-a osi.)
17 Si moun-lan ki ékwi San 73 té ka santi Jéhova té abandonnen’y, i té santi kon sa pou sèlman an ti tan. Anfen i té sav, menm si i té dékouwajé, i té ni pou wèsté pwé Jéhova. Alò, an Sam 73:23, 24 i di: ‘Mé apwézan mwen épi’w pou tout tan. Ou tjenbé lanmen dwèt mwen, ou ban mwen konsèy pou djidé mwen, èk apwé ou kay fè mwen twapé laglwa.’ Bon. Nou osi ni pou mandé Jéhova pou fòtifyé nou lè nou ka santi lafwa nou fèb, èben lè nou ka santi dékouwajé pou lapéti lèwè nou. (Sam 73:26; 94:18) Wi menm si nou fè péché ki gwav, nou sa witounen pou Jéhova, èk nou sa ni asiwans-lan ki, i ‘pawé pou pawdonnen.’ (Sam 86:5) Konsa, menm si nou ka santi byen dékouwajé, i enpòtan pou nou vansé pli pwé Jéhova.—Sam 103:13, 14.
Lè nou ka santi lafwa nou fèb, sé lè sala nou ni pou vansé pli pwé Jéhova. Èk nou sa fè sa lè nou fè tout sa pé an sèvis nou pou li. (Gadé pawagwaf 17)
‘VINI PWÉ BONDYÉ’ POU TOUT TAN
18. Pouki nou sa kontiné vini pwé Jéhova pou tout tan?
18 Nou sa kontiné vini pwé Jéhova pou tout tan, paski nou kay toujou kontiné apwann konsèné’y. Anfen an Ronm 11:33, Bib-la ka di: “Lasajès Bondyé gwan tèlman! I konnèt tout bagay! . . . [Èk] pyèsonn pa sa konpwann mannyèʼy.” Alò pou tout létèwnité, nou kay kontiné apwann konsèné Jéhova.
19. Lè’y vini pou tan ki ka vini, ki asiwans nou ka twapé an sé Samz-lan?
19 Sam 79:13 ka di: ‘Nou menm ki pèp ou, èk mouton ki an savann ou, kay wimèsyé’w pou tout tan, èk pou jennéwasyon apwé jennéwasyon nou kay glowifyé’w.’ Konsa nou sa ni asiwans-lan ki, si nou kontiné vini pwé Bondyé, i kay benni nou pou tout tan. Èk an ling épi Sam 73:26, nou kay di épi konfyans: ‘Bondyé sé kayè tjè mwen. Èk sé li ki pòsyon mwen pou tout tan.’
CHANSON 32 Défann Jéhova!
a Adan moun ki ka santi antjèt èben twis pou an chay tan, pitèt bizwen alé oti dòktè. Pou pli enfòmasyon gadé Gad-la, Limowo 1 2023.