‘Désidé Pou Kò’w Ki Moun Ou Kay Sèvi’

1. Kisa nou ni pou fè pou nou sa vwéman ni djèwté? Èk pouki? (Izaya 48:​17, 18)

PAPA nou enmen nou an chay, èk i vlé nou enjwi lavi nou apwézan èk an tan pou vini. (Éklé. 3:​12, 13) Bon. Jéhova fè nou épi abilité-a pou fè bèl bagay. Mé i pa té ban nou abilité-a pou kondwi kò nou, èben pou désidé pou kò nou sa ki bon èk sa ki mové. (Éklé. 8:9; Jér. 10:23) Wi, Jéhova sav pou nou sa vwéman ni djèwté, nou ni pou sèvi’y èk obéyi’y.—Li Izaya 48:​17, 18.

2. Kisa Satan vlé nou kwè, mé kisa Jéhova ha fè?

² Satan vlé nou kwè nou sa ni djèwté san Jéhova, èk osi nou sa kondwi kò nou. (Jen. 3:​4, 5) Bon. Pou moutwé Satan sé an gwo mantè, Jéhova pèwmité lézòm pou kondwi kò yo pou an ti tan. Èk i byen ézé pou wè, lézòm pa sa kondwi kò yo. Kanmenm, Bib-la ni plizyè ègzanp nonm èk fanm ki té ni an chay lakontantman paski yo té ka sèvi Jéhova. Èk anpami yo tout sété Jézi ki té ni pli djèwté. Anfen an atik sala, nou kay diskité pouki Jézi chwazi pou sèvi Jéhova. Osi, nou kay ègzanminé pouki nou ni pou adowé Jéhova tou. Èk finalman, nou kay wivizé pouki nou chwazi pou sèvi Jéhova.

POUKI JÉZI CHWAZI POU ADOWÉ JÉHOVA

3. Kisa Satan té ofè Jézi, èk kisa Jézi chwazi pou fè?

³ Bon. Padan Jézi té asou latè-a, i té ka toujou moutwé i té chwazi pou adowé Jéhova. Pou ègzanp, pa twò lonng apwé Jézi batizé, Satan di Jézi i té kay ba’y tout sé wéyòm latè-a, si Jézi té sèlman adowé’y yon fwa. Mé tann sa Jézi di’y: “Alé, sòt isi-a, Satan! Lévanjil-la di, ‘Sé Bondyé Senyè-a an moun ni pou adowé épi sé li yonn ou ni pou sèvi.’” (Maf. 4:​8-10) Bon. Pouki Jézi fè chwa sala? Ében annou konsidiwé déotwa wézon.

4-5. Pouki Jézi chwazi pou adowé Jéhova?

⁴ Pli gwo wézon-an Jézi chwazi pou sèvi Jéhova, sé paski i té enmen Papa’y ofon tjè’y. (Jan 14:31) An plis di sa, sa sété pli mèyè bagay-la pou fè. (Jan 8:​28, 29; Wév. 4:11) Osi, Jézi té sav sé Jéhova ki ban nou lavi, nou sa konfyé’y, èk i ka ban nou tout sé bon bagay-la nou ni. (Sam 33:4; 36:9; Jémz 1:17) Èvèk Jéhova té ka toujou palé lavéwité-a bay Jézi, èk sé li ki bay Jézi tout sa i té ni. (Jan 1:14) Okontwè, Satan sé an vyé mantè, i vowas, èk i ka gadé pou kò’y tousèl. Anfen, sèl sa i ha ban nou sé péché èk lanmò. (Jan 8:44) Bon. Jézi té konnèt ni Jéhova ni Satan byen, èk i pa té janmen vlé wébèl kont Jéhova kon Satan té fè.—Filip. 2:​5-8.

⁵ Bon, an lòt wézon Jézi chwazi pou sèvi Jéhova, sé paski i té sav sa té kay akonpli an chay bèl bagay. (Hib. 12:2) Pou ègzanp, Jézi té sav si’y té wèsté fidèl bay Jéhova, i té kay tiwé wipòch asou non Papa’y, èk sa té kay fè’y posib pou mennen an bout pou péché èvèk lanmò.

POUKI JÉHOVA MÉWITÉ ADOWASYON NOU?

6-7. (a) Pouki an chay moun jòdi jou pa ka sèvi Jéhova? (b) Pouki nou sipozé adowé Jéhova sèlman?

⁶ Bon. An chay moun jòdi jou pa ka sèvi Jéhova, paski yo pa konnèt sé bèl kawaktè’y-la, èk yo pa konnèt tout sé bon bagay-la i ha fè ba yo. Anfen, yo menm kon sé jan Afenz-la an pwèmyé syèk-la ki pa té konnèt Bondyé.—Twav. 17:​19, 20, 30, 34.

⁷ Bon, Pòl pwéché bay sé jan Afenz-la èk i di yo: “[Bondyé] ka bay tout moun lavi épi lèspiwasyon épi tout bagay yo bizwen.” Osi i di: “Bondyé fè tout was moun sòti adan yon sèl nonm. . . . Sé li ki ban nou lavi épi sé li ki ka fè nou maché épi sé li ki fè nou sa nou yé-a.” (Twav. 17:​25, 26, 28) Wi, Pòl moutwé yo a klè sé Bondyé ki fè nou, alò sé li sèlman ki méwité adowasyon nou.

8. (a) Kisa Jéhova pa kay janmen fè? (b) Ki mannyè Jéhova ha moutwé nou i enmen nou an chay?

⁸ Bon, sé Jéhova ki fè tout bagay, èk sé li Ki Pli Ho ni an latè-a ni an syèl-la. Èk i sa fè népòt sa i vlé. Konsa, si’y té vlé, i té sa fòsé nou pou sèvi’y. Kanmenm, Jéhova pa kay janmen fè sa. Pito sa, i ka ban nou an chay pwèv ki, i ka ègzisté, èk i enmen chak di nou an chay. Wi, i vlé moun vini jan’y pou tout tan. (1 Tim. 2:​3, 4) Èk Jéhova ka entwennen nou pou enstwi lézòt konsèné sa i kay fè pou lézòm, èk mannyè-a i kay fè’y. (Maf. 10:​11-13; 28:​19, 20) Èk pou nou ki ha chwazi pou adowé Jéhova, i ban nou an kongwigasyon koté nou sa adowé’y, èk osi, i ban nou bon ansyen pou gadé apwé nou.—Twav. 20:28.

9. An ki mannyè Jéhova ha moutwé i enmen tout moun?

⁹ Jéhova ha moutwé ki otan i enmen moun, jis moun ki pa ka kwè i ka ègzisté. Bon. Katjilé asou sa: Pou plizyè mil lanné, an chay moun ka viv lavi yo mannyè-a yo vlé, pito yo obéyi Jéhova. Mé magwé sa, Jéhova ka ba yo sa yo bizwen pa sèlman pou yo viv, mé pou yo enjwi lavi. (Maf. 5:​44, 45; Twav. 14:​16, 17) Pou ègzanp, a kòz di bonté Jéhova, yo sa ni bon jan èk fanmi ki enmen yo, yo sa fè ich, yo sa twavay, èk yo sa enjwi lavi yo. (Sam 127:3; Éklé. 2:24) Wi, i a klè, Jéhova ni an chay lanmityé pou tout moun. (Ègz. 34:6) Bon. Annou diskité pouki nou chwazi pou adowé Jéhova, èk mannyè Jéhova ka benni moun ki chwazi pou adowé’y.

POUKI NOU CHWAZI POU SÈVI JÉHOVA

10. (a) Kisa ki pli gwo wézon-an nou ka sèvi Jéhova? (Mafyou 22:37) (b) Ki mannyè ou ka santi paski Jéhova ka kopwann ou, èk i ka pawdonnen’w? (Sam 103:​13, 14)

¹⁰ Bon. Menm kon Jézi, pli gwo wézon-an nou ka sèvi Jéhova sé paski nou enmen’y. (Li Mafyou 22:37.) Lè nou apwann konsèné bèl kawaktè Jéhova, sa ka fè nou vlé vansé pli pwé’y. Wi, Jéhova ni an chay pasyans épi nou, èk i toujou pawé pou pawdonnen nou. Pou ègzanp, menm si sé jan Izwayèl-la té ka toujou dézobéyi’y, i plédé épi yo èk i di yo: ‘Tounen viwé souplé èk chanjé mové mannyè [zòt].’ (Jér. 18:11) Èvèk magwé nou ka fè an chay lèwè, Jéhova ka pawdonnen nou paski i ka chonjé nou sé lapousyè. (Li Sam 103:​13, 14.) Bon. Lè’w katjilé asou tout sé diféwan lè-a Jéhova ha pawdonnen’w, ès sa pa ka pousé’w pou adowé’y pou tout tan?

11. Pou ki lòt wézon nou ka chwazi pou adowé Jéhova?

¹¹ Nou ka osi sèvi Jéhova paski sa sé pli mèyè bagay-la nou sa fè. (Maf. 4:10) Osi nou konnèt ki, si nou wèsté fidèl pou Jéhova an chay bon bagay kay fèt. Pou ègzanp, nou kay édé tiwé wipwòch asou non Jéhova, nou kay moutwé Satan sé an gwo mantè, èk nou kay fè tjè Jéhova wéjwi. Èk si nou chwazi pou adowé Jéhova, nou kay ni bèl èspwa-a pou kontiné adowé’y pou tout tan!—Jan 17:3.

12-13. Kisa nou apwann hòd èspéyans Jane èk Pam?

¹² Lè nou jenn nou sa apwann pou enmen Jéhova, èk lanmityé sala kay vini pli fò kon tan ka pasé. Èk sé sa ki wivé dé (2) sésé, Jane èk Pam.a Lè yo koumansé étidyé Bib-la Jane té wonz (11) lanné, èk Pam té dis (10) lanné. Magwé pawan yo pa té vlé étidyé Bib-la, yo ba yo pèwmisyon pou étidyé Bib-la épi Témwen Jéhova, mé yo té kay ni pou kontiné atandé lanmès épi fanmi-an. Jane di: “Menm si moun an lékòl mwen té ka pwan dwòg, èk fè imowalité sèksyouwal, sa mwen té ka apwann an Bib-la édé mwen pou pa swiv ègzanp yo.”

¹³ Apwé déotwa lanné, sé dé (2) sésé-a batizé. Pli ta, yo koumansé wann sèvis kon piyonnè, magwé yo té ni pou otjipé pawan yo ki té an laj. Bon, apwé plizyè lanné ha pasé, tann sa Jane di konsèné tout sa Jéhova ha fè ba yo. I di: “Mwen apwann ki, Jéhova fidèl, èk i ka otjipé jan’y. Menm kon 2 Timòfi 2:19 ka di, “[Jéhova] sav ki konpanni moun ki sa li.” San dout, lè moun chwazi pou adowé Jéhova èk enmen’y, Jéhova ka otjipé yo.

14. Ki mannyè nou sa fè défans Jéhova? (Gadé sé pòtwé-a osi.)

¹⁴ Bon. Nou vlé moun konnèt ki, tout sé mové bagay-la yo ha tann konsèné Jéhova pa vwé. Katjilé asou ègzanp sala: ‘Ann’ di ou ni an bon jan; i janti, i donnan, èk i toujou pawé pou pawdonnen. Kanmenm yon moun di, jan’w méchan èk i pa onnèt.’ Ki mannyè sa kay fè’w santi? Ès ou pa té kay vlé fè défans jan’w? Mé wi! Èk an menm mannyè-a, Satan èk sé moun li-an ka simen an chay mansonj, paski yo vlé donmajé wépitasyon Jéhova. Mé nou konnèt lavéwité-a konsèné Bondyé nou. Konsa nou vlé fè défans li. Èk nou ka fè sa lè nou fè tout sa nou pé pou fè moun konnèt lavéwité-a konsèné’y. (Sam 34:1; Izay. 43:10) Wi, nou ka moutwé a klè, nou chwazi pou enmen èk sèvi Jéhova pa sa nou ka di, èk pa sa nou ka fè.

15. Apwé zapòt Pòl fè gwo chanjman an lavi’y, ki bon bagay ki té wivé’y? (Filipay 3:​7, 8)

¹⁵ Bon. Nou pawé pou fè chanjman an lavi nou pou nou sa plè Jéhova, èk pou nou sa fè pli an sèvis li. Anfen zapòt Pòl té fè sa. Pou ègzanp, zapòt Pòl té ni an gwo pozisyon adan wilizyon sé Jwif-la. Mé i kité wilizyon sala dèyè pou’y sa vini yon disip Jézi, èk pou sèvi Jéhova. (Gal. 1: 14) Èk kisa ki té wézilta-a? Ében i té ni bèl èspéyans an sèvis li pou Jéhova, èk apwézan i ka jis kondwi épi Jézi an syèl. Konsa, zapòt Pòl pa té janmen wigwété disizyon-an i té fè-a pou sèvi Jéhova. Èk si nou sèvi Jéhova, nou osi pa kay janmen wigwété disizyon sala.—Li Filipay 3:​7, 8.

16. Kisa nou apwann hòd èspéyans Julia? (Gadé sé pòtwé-a osi.)

¹⁶ Si nou fè sèvis nou pou Jéhova bagay-la ki pli enpòtan an lavi nou, Jéhova kay benni nou apwézan èk an tan pou vini. Bon, annou konsidiwé ègzanp sésé Julia. Lè Julia té an ti manmay, i té ka chanté an légliz li. Èk i té ka chanté si tèlman byen, i koumansé wisivwè entwennman pou vini on chantwèl. Touswit apwé sa, Julia vini popilè èk i té ka chanté an plas ki té byen popilè. Mé padan i té ka atandé yon lékòl ki ka enstwi mizik, an jenn nonm koumansé di’y konsèné Bondyé, èk i di’y non Bondyé sé Jéhova. Pa twò lonng apwé sa, Julia koumansé étidyé Bib-la dé (2) fwa an simenn-lan. Èk tjèk tan apwé sa, Julia désidé pou sèvi tan’y èk kouway li pou sèvi Jéhova, pito i pasé tan’y ka chanté. Bon, i pa té ézé pou fè disizyon sala. Julia di: “An chay moun té ka di mwen, i sété kouyontwi pou doubout chanté pou annèk sèvi Jéhova. Mé mwen té vlé sèvi tout lavi mwen an sèvis Jéhova.” Bon. Ès Julia wigwété disizyon sala i té fè plis pasé twant (30) lanné ki pasé? Ében tann sa’y di: “Mwen byen kontan mwen té chwazi pou sèvi Jéhova. Èk mwen asiwé, i kay ouvè lanmen’y èk i kay satisfè tout dézi mwen an tan pou vini.”—Sam 145:16.

KONTINÉ SÈVI JÉHOVA

17. (a) Kisa moun ki p’òkò koumansé sèvi Jéhova sipozé fè, èk pouki? (b) Kisa nou vlé chonjé si nou ha ka sèvi Jéhova?

¹⁷ Bon. Nou ka viv byen pwé bout vyé sistèm sala. An Hibrou 10:​37, zapòt Pòl di: “An ti tak tan ankò èk moun-an ki kay vini-an kay vini. I pa kay tadé.” Alò moun ki p’òkò ka sèvi Jéhova ni pou fè lidé yo pou fè sa vitman, paski la pa ni an chay tan ankò. (1 Kòr. 7:29) Èk si nou ha ka sèvi Jéhova, nou vlé chonjé, magwé nou ka èspéyansé difikilté, sé pou annèk “an ti tak tan”.

18. Kisa Jézi èk Jéhova vlé nou fè?

¹⁸ Wi, Jézi ankouwajé moun pou vini disip li, èk pou kontiné swiv li. (Maf. 16:24) Konsa, menm si nou ka sèvi Jéhova pou plizyè lanné, nou vlé fè lidé nou pou kontiné adowé’y. Mé nou ni pou twavay wèd pou nou kontiné fè sa. Bon. Pouki nou ka di sa? Ében sa sé paski i pa ézé. Mé lè nou chonjé djèwté-a èk sé bennédiksyon-an nou ni apwézan, sa ka pousé nou pou kontiné sèvi Jéhova!—Sam 35:27.

19. Kisa nou apwann an èspéyans Gene?

¹⁹ Bon. Adan moun ka kwè, si yo sèvi Jéhova, yo pa kay enjwi lavi yo. Alò si’w sé an jenn moun, ès ou kwè i kay twò difisil pou’w sèvi Jéhova? Èben tann sa yon jenn fwè di, non’y sé Gene. I di: “Mwen té ka santi mwen pa té sa enjwi lavi mwen paski mwen sété an Témwen Jéhova. Èvèk i té ka sanm tout sé jenn moun-lan mwen té lévé épi-a té ka enjwi kò yo. Pou ègzanp yo té ka alé fèt, yo té ka ni ‘boy’ frenn èk ‘girl’ frenn yo, ében yo té ka jwé gémz ki té vyolan. Èk i té ka sanm sèl sa mwen té ka fè sé alé mitin, èk alé an minis-la.” Bon. Ki mannyè sa té afèkté Gene? Èben i di: “Mwen koumansé fè adan sé mové bagay-la sé jenn moun-lan té ka fè. Wi, mwen té ni an bon tan, mé mwen pa té vwéman ni djèwté. Konsa, mwen koumansé katjilé asou sé bennéfis-la nou sa enjwi lè nou obéyi sa Bib-la ka di. Èk mwen désidé pou sèvi Jéhova épi tout tjè mwen. Èvèk dépi mwen fè sa, Jéhova ka wéponn chak lapwiyè mwen.”

20. Kisa nou vlé fè lidé nou pou fè?

²⁰ Moun-lan ki té ékwi Sam 65:4 di Jéhova: ‘Pa dé bon i bon pou moun-an ou chwazi-a èk moun-an ou fè apwoché’w pou’y wété an lakou’w.’ Wi, nou vlé fè lidé nou pou kontiné sèvi Jéhova. Èk menm kon Jòchwa, nou vlé di: ‘Pou mwen menm èk fanmi mwen, sé Jéhova nou kay sèvi.’—Jòch. 24:15.