Abésé Kò’w Lè La Ni Bagay Ou Pa Konnèt

1. Ki diféwan abilité Jéhova ban nou, èk pouki i ban nou sé abilité sala?

JÉHOVA fè nou adan an bèl mannyè. I ban nou abilité-a pou katjilé, pou apwann bagay nèf, pou ni lakonpwann, èk pou fè sa nou apwann. Mé pouki Jéhova ban nou sé abilité sala? Ében sa sé paski, i vlé nou ‘jwenn nòlaj Bondyé’, èk i vlé nou sèvi abilité-a nou ni pou wézonnen pou ba li an sèvis ki sen.—Pwov. 2:1-5; Ronm 12:1.

2. (a) Kisa nou ni pou chonjé konsèné kò nou? (Jòb 37:23, 24) (Gadé pòtwé-a osi.) (b) Pouki i enpòtan pou nou chonjé nou pa bizwen konnèt tout bagay?

² Bon, Jéhova fè nou épi abilité pou apwann plizyè bagay, kanmenm, la ni chay bagay nou pa konnèt. (Li Jòb 37:23, 24.) Pou ègzanp annou katjilé asou Jòb. Jéhova mandé Jòb plizyè kwèsyon pou fè’y wè la té ni an chay bagay i pa té konnèt. Èk konmézasyon sala épi Jéhova édé Jòb pou wè, i té ni pou abésé kò’y èk chanjé mannyè-a i té ka katjilé. (Jòb 42:3-6) Alò menm kon Jòb, i bon pou nou chonjé, la ni plizyè bagay nou pa konnèt. Èk sa kay édé nou pou abésé kò nou, èk pou ni konfyans-lan ki, Jéhova kay toujou di nou sa nou vwéman ni pou konnèt pou nou sa fè bon disizyon.​—Pwov. 2:6.

3. Kisa nou kay diskité an atik sala?

³ An atik sala, nou kay diskité déotwa bagay nou pa konnèt, èk poutji sa sa fè’y difisil pou nou tjenbé fò. Nou kay osi apwann pouki i bon nou pa konnèt sèten bagay. Èk sa nou kay apwann kay fòtifyé konfyans nou ki, Jéhova, ‘Moun-lan ki ni nòlaj ki pawfé-a’ ka toujou di nou tout sa nou vwéman ni pou konnèt.​—Jòb 37:16.

NOU PA KONNÈT KI LÈ TAN-AN KAY BOUT

4. Silon Mafyou 24:36, kisa nou pa konnèt?

⁴ Li Mafyou 24:36. Bon. Padan Jézi té asou latè-a, i pa té sav “ki jou ében ki nèditan tan-an kay bout.”a Èk i di sé zapòt li-a sé Jéhova ki ka désidé sé bagay sala, èk i “ja mété dat-la épi tan-an pou sa fèt.” (Twav. 1:6, 7) Kanmenm Jéhova pa ban nou enfòmasyon sala, alò nou pa konnèt ègzaktiman ki jou èk ki lè tan-an kay bout.

5. Paski nou pa konnèt ki lè bout-la kay vini, ki mannyè sa pé afèkté nou?

⁵ Silon sa Jézi di, nou pa konnèt ki mizi tan nou kay ni pou èspéwé avan bout-la vini. Èk a kòz di sa, nou pé pèd pasyans nou èk jis vin dékouwajé, èspwèsman si nou ja ka èspéwé pou an chay tan. Nou sa osi vin dékouwajé si fanmi nou ében lézòt moun ka pwan nou sèvi wizib, paski bout-la p’òkò wivé. (2 Pita 3:3, 4) Konsa, nou pé kwè si nou té konnèt jou-a bout-la kay vini, i té kay pli ézé pou ni pasyans èk pou pa vin dékouwajé lè moun pwan nou sèvi wizib.

6. Pouki i bon nou pa konnèt ki lè bout-la kay vini?

⁶ Bon, paski Jéhova pa ka di nou ègzaktiman ki lè bout-la kay vini, sa ka ban nou òpòtunité-a pou moutwé Jéhova nou ka sèvi’y paski nou enmen’y èk nou ka konfyé’y. Anfen nou pa ka sèvi Jéhova épi an dat an lidé nou, paski nou vlé sèvi’y pou tout tan. Alò, pito nou katjilé twòp asou ki lè ‘jou Jéhova’ kay vini, i kay pli mèyè pou katjilé asou sé bon bagay-la ki kay fèt apwé jou sala vini. Épi si nou fè sa, sa kay édé nou pou vansé pli pwé Jéhova èk pou konfyé’y èk obéyi’y.​—2 Pita 3:11, 12.

7. Kisa nou konnèt?

⁷ Bon, i enpòtan pou nou fiksé asou sa nou konnèt. Pou ègzanp, nou konnèt sé dènyé jou-a koumansé an lanné mil nèf san katòz «1914», paski Jéhova té ban nou pwofèsi ki ka moutwé sa a klè. Èk Jéhova osi ban nou plizyè détay konsèné ki mannyè latè-a té kay yé apwé lanné sala. Èvèk nou ha wè sé pwofèsi sala fèt vwé, konsa nou asiwé ‘gwan jou Jéhova tou pwé.’ (Zèf. 1:14) Nou osi konnèt twavay-la Jéhova vlé nou fè, èk sa sé pou di tout moun “Bon Nouvèl-la ki Bondyé kay kondwi adan an mannyè ki nèf.” (Maf. 24:14) Èk nou ka pwéché bon nouvèl sala an apipwé dé san kawant «240» diféwan péyi, èk an plis pasé yon mil «1,000» langaj. Alò nou pa bizwen konnèt “jou-a ében nèditan-an” bout-la kay vini pou nou sa fè tout sa nou pé an twavay sala.

NOU PA KONNÈT ÈGZAKTIMAN KI MANNYÈ JÉHOVA KAY WÉDÉ NOU

8. Kisa nou apwann hòd Ékléziyastis 11:5?

⁸ Li Ékléziyastis 11:5. Bon. An lévanjil sala, èspwèsyon-an ‘twavay Dyé vwé-a’ vlé di sa Jéhova menm ka fè èben sa i ka pèwmité pou fèt pou akonpli divwa’y. Konsa lévanjil-la ka moutwé nou a klè, nou pa sa toujou konnèt sé wézon-an Jéhova ka pèwmité an sèten bagay pou fèt, èben ègzaktiman kisa i kay fè pou wédé nou. (Sam 37:5) Wi, menm mannyè-a siyantis pa sa byen kopwann mannyè-a ti bébé-a ka dévlopé an matwis manman’y, sé menm mannyè-a nou pa sa toujou kopwann mannyè Jéhova kay wédé nou.

9. Paski nou pa sav ègzaktiman ki mannyè Jéhova kay édé nou, kisa nou pé koumansé katjilé?

⁹ Bon. Paski nou pa konnèt ègzaktiman ki mannyè Jéhova kay wédé nou, sa pé tjenn nou dèyè lè nou vlé fè sèten disizyon. Pou ègzanp, nou pé pou ladjé sèten bagay pou nou sa fè pli an minis-lan, ében pou alé wann sèvis koté ki bizwen pli pwoklanmatè. Ében nou pé santi nou pa ni favè Jéhova paski, (1) nou pa sa fè tout sa nou vlé an minis-lan, (2) nou byen anbawasé an minis-lan mé nou pa ni létid Bib, èben (3), nou ka twavay wèd asou an pwojé an ògannizasyon-an mé nou ka èspéyansé an chay difikilté.

10. Ki bèl kawaktè nou sa dévlopé paski nou pa konnèt ègzaktiman ki mannyè Jéhova kay édé nou?

¹⁰ Bon. Paski nou pa konnèt ègzaktiman ki mannyè Jéhova kay édé nou, sa sa édé nou pou dévlopé bèl kawaktè. Pou ègzanp, sa ka édé nou pou abésé kò nou paski nou sav Jéhova toujou konnèt pli mèyè pasé nou. (Izay. 55:8, 9) Nou ka osi apwann mannyè pou mété tout konfyans nou an Jéhova, paski nou asiwé i kay édé nou pou éwisi. Alò lè nou twapé bon wézilta an minis-lan èben asou an pwojé, nou ka bay Jéhova laglwa-a. (Sam 127:1; 1 Kòr. 3:7) Èk menm si bagay pa fèt mannyè-a nou té kwè i té kay fèt, nou ni pou chonjé Jéhova ka wè tout bagay. Konsa nou pa ka pèd lapé nou. (Izay. 26:12) Wi dépi nou fè tout sa nou sa fè, nou sav Jéhova kay édé nou. Èvèk menm si Jéhova pa fè an miwak, nou asiwé i kay djidé nou.​—Twav. 16:6-10.

11. Kisa nou konnèt ki sa vwéman édé nou?

¹¹ Bon. Mi twa «3» bagay nou konnèt ki sa vwéman édé nou. (1) Nou konnèt Jéhova sé an moun ki ka toujou moutwé lanmityé, jistis, èk lasajès. (2) Nou konnèt Jéhova enmen nou pou sa nou ka fè ba li, èk pou sé fwè èk sè nou-an. Èvèk (3) nou konnèt Jéhova ka toujou benni moun ki ka wèsté fidèl pou li.​—Hib. 11:6.

NOU PA SAV SA KI KAY FÈT DENMEN

12. Silon Jémz 4:13, 14, kisa nou pa konnèt?

¹² Li Jémz 4:13, 14. Non. Nou pa sav sa ki kay wivé nou denmen. Èvèk sa sé paski, ‘mové moman èk bagay [nou] pa té ka èspéyé ka wivé [nou] tout.’ (Éklé. 9:11) Alò a kòz di sa nou pa sav si nou kay sa fè sé bagay-la nou vlé fè-a, èben si nou kay vivan pou fè yo.

13. Ki mannyè nou ka santi délè paski nou pa konnèt tout sa ki kay fèt an tan pou vini?

¹³ Paski nou pa konnèt tout sa ki kay fèt an tan pou vini, sa sa fè’y difisil pou nou tjenbé fò. Pou ègzanp, si nou ka ba kò nou twòp tèt cho konsèné sa ki kay fèt, nou sa pèd lajwa nou. Osi, mové bagay sa wivé nou sibitman, èk sa sa kwazé tjè nou. Ében lè bagay pa fèt mannyè-a nou té ka èspéwé, nou sa santi dézapwenté èk dékouwajé.​—Pwov. 13:12.

14. Kisa nou bizwen konnèt èk fè, pou nou sa vwéman ni lakontantman? (Gadé sé pòtwé-a osi.)

¹⁴ Bon. Népòt sa ki fèt an lavi nou, nou sa moutwé nou ka sèvi Jéhova paski nou enmen’y. Plizyè wakont an Bib-la ka moutwé a klè, Jéhova pa ka désidé andavans kisa ki kay wivé nou. Èk Jéhova pa kay pwotéjé nou hòd tout difikilté. Wi, Jéhova sav nou sa ni lakontantman menm si nou pa konnèt tout sa ki kay wivé nou. Anfen, dépi nou mandé’y pou djid li, èk nou obéyi’y, nou kay ni djèwté. (Jér. 10:23) Wi, lè nou dépan asou Jéhova lè nou ka fè disizyon, nou pa kay ni twòp tèt cho konsèné sa ki kay fèt. Èk sa kay édé nou moutwé menm atitid-la disip-la Jémz té ni lè’y di an Jémz 4:15: “Si Bondyé vlé, nou kay viv èk nou kay fè si ében sa.”

15. Kisa nou konnèt konsèné tan-an ki ka vini?

¹⁵ Sé vwé, nou pa konnèt sa ki kay fèt chak jou. Mé kanmenm, nou konnèt ki, Jéhova ha pwonmèt pou ba nou lavi étonnèl, an syèl èben asou latè-a. Èk nou konnèt Jéhova pa sa manti, èk la pa ni anyen ki sa anpéché’y tjenn sé pwonmèt li-a. (Titòs 1:2) Anfen, sé Jéhova tousèl ki sa di mannyè an bagay kay bout, ‘èk dépi byen lontan, [i] ka annonsé bagay ki p’òkò fèt.’ Èk wi, tout sé bagay-la Jéhova té di ki té kay fèt an tan Bib-la té fèt vwé, èk tout sé bagay-la i di ki kay fèt an tan pou vini kay fèt vwé tou. (Izay. 46:10) Nou osi konnèt anyen pa sa anpéché Jéhova enmen nou. (Ronm 8:35-39) Alò i kay ba nou lasajès-la, soulajman-an, èk fòs-lan nou bizwen pou kontiné tjébé fò anba népòt sitiwasyon. Wi, nou ni asiwans-lan ki, Jéhova kay édé nou èk benni nou.​—Jér. 17:7, 8.

NOU PA SA FINI KOPWANN KI OTAN BYEN JÉHOVA KONNÈT NOU

16. Silon Sam 139:1-6, kisa Jéhova konnèt konsèné nou, èk ki mannyè sa ka fè’w santi?

¹⁶ Li Sam 139:1-6. Bon, Jéhova konnèt tout bagay konsèné nou. Pou ègzanp, i konnèt katjil nou, mannyè nou ka santi, sa nou ka di, sa ki adan tjè nou. I osi konnèt tout sa nou ka fè èk poutji nou ka fè’y. Èk kon Wa David di, Jéhova ni abilité-a pou édé nou èk i toujou pawé pou fè sa. Bon. Ki mannyè i ka fè’w santi pou konnèt ki, Dyé Toupisan-an, Senyè-a Ki Pli Ho-a ki fè tout bagay, mélé si tèlman épi’w? Èben nou ka santi menm kon David lè’y di an Sam 139:6: “Mwen pa sa konpwann ki mannyè ou fè konnèt mwen byen kon sa, katjil ou twò ho pou mwen.”

17. Pouki i wèd délè pou kwè Jéhova vwéman konnèt nou?

¹⁷ Pitèt kilti nou, sa ki té fèt an fanmi nou, ében sa nou té ka kwè adan avan nou apwann lavéwité-a, pé fè’y difisil pou nou wè Jéhova kon an Papa ki enmen nou èk ki vwéman antéwésé an nou. Ében pitèt pou lapéti mové bagay nou té fè an tan pasé, nou pé kwè Jéhova pa vlé konnèt nou èben vansé pwé nou. Anfen jis Wa David té ka santi kon sa délè. (Sam 38:18, 21) Osi, yon moun ki ka twavay wèd pou chanjé lavi’y, èk viv adan an mannyè ki kay plè Bondyé pé katjilé: ‘Si Bondyé vwéman konnèt mwen, poutji i pa sa aksèpté mwen kon mwen yé?’

18. Pouki i bon pou nou aksèpté ki, Jéhova konnèt nou pli mèyè pasé nou konnèt kò nou? (Gadé sé pòtwé-a osi.)

¹⁸ I kay bon pou nou aksèpté ki, Jéhova konnèt nou pli mèyè pasé nou konnèt kò nou, èk i ka wè bonté-a ki an nou menm si nou pa sa wè’y. Èk magwé i ka wè lèwè nou, i konnèt nou sa chanjé, èk i la pou édé nou. (Ronm 7:15) Èk lè nou aksèpté Jéhova konnèt kalté moun-lan nou sa vini, sa kay ba nou fòs-la pou wèsté fidèl pou li èk pou ni djèwté kon nou ka sèvi’y.

19. Kisa nou konnèt konsèné Jéhova?

¹⁹ Nou konnèt lanmityé sé kawaktè Bondyé. (1 Jan 4:8) Osi nou konnèt, tout bagay Jéhova ka di nou pou fè èben pou pa fè, sé paski i enmen nou èk i vlé nou enjwi an bèl lavi. An plis di sa, nou konnèt Jéhova vlé nou ni lavi étonnèl, èk sa posib paski Jézi mò pou nou. Èk paski Jézi mò pou nou, nou sa ni asiwans-lan ki, menm si nou ka fè lèwè, nou ka sèvi Jéhova adan an mannyè ki ka plè’y. (Ronm 7:24, 25) Èk an lòt bagay nou konnèt sé sa: “Bondyé konnèt pli pasé konsyans nou, épi i konnèt tout bagay.” (1 Jan 3:19, 20) Wi Jéhova konnèt tout bagay konsèné nou, èk i ni konfyans-lan ki, nou kay ni siksé kon nou ka fè divwa’y.

20. Kisa ki kay édé nou pou pa ni twòp tèt cho konsèné bagay nou pa konnèt?

²⁰ Jéhova ka di nou tout sa nou vwéman bizwen konnèt. Konsa nou pa ni pou bay kò nou twòp tèt cho konsèné sé bagay-la nou pa konnèt. Pito sa, nou ni pou fiksé asou sa ki vwéman enpòtan. Èk lè nou fè sa, nou ka moutwé nou ka abésé kò nou, èk nou ka mété tout konfyans nou an Jéhova, ‘Moun-lan ki ni nòlaj ki pawfé.’ (Jòb 36:4) Alò magwé la ni bagay nou pa konnèt apwézan, nou asiwé Jéhova kay kontiné enstwi nou bagay nèf pou tout tan. Èk nou byen èksité paski nou pa kay janmen fini apwann tout bagay konsèné Papa nou Jéhova.​—Éklé. 3:11.