Lison Nou Sa Apwann An Dènyé Ti Pawòl Jakòb—Dézyenm Pa-a

1. Kisa nou kay diskité an atik sala?

SÈ GASON Jakòb-la sanblé oliwon papa yo, èk yo ka kouté byen pou yo tann sa’y té ni pou di yo. Kon nou té wè an atik-la avan sala, sa Jakòb té di Roubenn, Siméyon, Livay, épi Jouda, pitèt té sipwi yo. Konsa apwézan, pitèt yo vlé sav kisa papa yo té kay di sé lézòt gason’y-lan. An atik sala, nou kay diskité sa Jakòb té di Zèbyoulonn, Isaka, Dann, Gad, Achè, Naftali, Jozèf, épi Bennjamin. Èvèk nou kay wè ki lison nou sa apwann an sa’y té di yo-a.a

ZÈBYOULONN

2. Kisa Jakòb té di Zèbyoulonn, èk ki mannyè sa’y di’y-la té fèt vwé? (Jennésis 49:13) (Osi gadé bwèt-la.)

² Li Jennésis 49:13. Silon sa Jakòb té di, désandan Zèbyoulonn té kay wèsté bò lanmè-a, èk tèwitwa yo té kay an nò Tè Pwonmèt-la. Pli pasé dé san «200» lanné apwé sa, lè désandan Zèbyoulonn wisivwè pa yo an Té Pwonmèt-la, pòsyon tè-a yo wisouvwè-a té vwéman an nò péyi-a, toupwé Lanmè Galili épi Lanmè Mediterranean. Konsa yo té adan on bon pozisyon pou fè biznis épi moun ki té ka sòti tout diféwan péyi. Pitèt sé sa Moziz té ka palé konsèné, lè’y té di: ‘Sé pou Zèbyoulonn wéjwi lè’y ka sòti.’ (Dito. 33:18) Mé népòt sa’y té yé-a, désandan Zèbyoulonn té ni wézon pou wéjwi.

3. Kisa ki kay édé nou pou ni tjè kontan, magwé nou ka èspéyansé difikilté?

³ Kisa nou sa apwann an ègzanp Zèbyoulonn? Ében, lavi an vyé sistenm sala pa ézé. Konsa nou tout ka èspéyansé difikilté. Mé magwé sa, nou sa ni tjè kontan èk nou sa kontiné ni tjè kontan, si nou satisfè épi sa nou ni. (Sam 16:6; 24:5) Délè, nou ka fiksé pli asou sa nou pa ni, pito nou fiksé asou sa nou ni. Mé chonjé, Jéhova ka benni nou épi an chay bon bagay touléjou. Konsa, si nou fiksé asou sé bon bagay sala, nou kay sa ni tjè kontan an népòt sitiwasyon, ében népòt koté nou yé.​—Gal. 6:4.

ISAKA

4. Kisa Jakòb té di Isaka, èk ki mannyè sa’y di’y-la té fèt vwé? (Jennésis 49:14, 15) (Osi gadé bwèt-la.)

⁴ Li Jennésis 49:14, 15. Jakòb félicité Isaka paskè i té twavayan. Anfen Jakòb di, Isaka té ka twavay wèd kon on bouwik ki plen fòs. I osi di, Isaka té kay wisouvwè on bon tjò tè. Èk sa fèt vwé lè désandan Isaka wisouvwè on bèl tjò tè bò Lawivyè Jouden-an, an Tè Pwonmèt-la. (Jòch. 19:22) San dout, yo twavay wèd pou kiltivé tè yo. Mé, yo té ka osi twavay wèd pou édé lézòt. (1 Wa 4:7, 17) Èk yo té ka édé jan Izwayèl pou bat sé lèlmi yo-a. Pou ègzanp, yo té pwan douvan pou sipòté Barak épi sé lézòt-la, lè jan Izwayèl té kay goumen épi Sisèra épi lawmé’y, bò lawivyè Kichonn-lan.​—Jij 5:15

5. Pouki nou sipozé twavay wèd?

⁵ Kisa nou sa apwann an ègzanp Isaka? Ében Jéhova vlé sèvant li twavay wèd. Èk menm kon’y té ka apwésyé twavay wèd-la désandan Isaka té ka fè-a, sé kon sa i ka apwésyé nou pou tout sa nou ka fè an sèvis li. (Éklé. 2:24) Annou pwan ègzanp sé fwè-a ki ka pwan douvan-an an sé kongwigasyon-an. (1 Tim. 3:1) Sé fwè sala ka twavay byen wèd pou pwotéjé nou, èk pou édé nou tjenn wilasyon nou épi Jéhova fò. (1 Kòr. 5:1, 5; Joud 17-23) Osi, yo ka twavay wèd pou pwépawé tout sé diskou-a èk sé lòt pa-a asou mitin-lan, pou ankouwajé èk fòtifyé nou. Jéhova ka apwésyé yo an chay pou twavay-la yo ka fè-a.​—1 Tim. 5:17.

DANN

6. Lè jan Izwayèl té an wout pou alé an Tè Pwonmèt-la, ki koté désandan Dann té ka maché, èk pouki? (Jennésis 49:17, 18) (Osi gadé bwèt-la.)

⁶ Li Jennésis 49:17, 18. Jakòb té di, Dann té menm kon on sèpan ki pa té pè pou ataké zannimo ki otan pli gwo pasé’y. Konsa, désandan Dann té kay pwotéjé nasyon-an, paskè yo pa té kay pè pou goumen épi sé lèlmi-an. Èk vwéman, lè jan Izwayèl té an wout pou alé an Tè Pwonmèt-la, lafanmi Dann té ka maché pa ‘dèyè pèp-la.’ (Lim. 10:25) Konsa, yo té adan on bon pozisyon pou pwotéjé nasyon-an hòd danjé, ki té ka vini pa dèyè. Bon, sé byen pé moun ki té sa wè kisa désandan Dann té ka fè pa dèyè pèp-la, mé twavay-la yo té ka fè-a té byen enpòtan.

7. Népòt sa nou ka fè bay Jéhova, kisa i bon pou nou toujou chonjé?

⁷ Kisa nou sa apwann an ègzanp Dann? Ében, la ni sèten twavay nou ka fè bay Jéhova, èk nou pé santi konmsi pyèsonn pa ka òbzòvé sa nou ka fè. Pou ègzanp, ès ou ka nétwayé Sal-la, ében ou ka fè lòt bagay pou tjenn plas-la annòd? Ès ou ka twavay lè nou ni sé asanblé-a, ében sé konvansyon-an? Tout sa sé twavay ki byen enpòtan, èk nou ka félicité’w pou sa. Toujou chonjé, Jéhova ka wè tout sa’w ka fè ba li, èk i ka apwésyé sa an chay. Sa ki ka fè’y pli kontan, sé lè’y wè ou ka fè tout sa’w pé ba li paskè ou vlé moutwé’y, ou enmen’y épi tout tjè’w.​—Maf. 6:1-4.

GAD

8. Pouki i té ézé pou sé lèlmi-an ataké désandan Gad? (Jennésis 49:19) (Osi gadé bwèt-la.)

⁸ Li Jennésis 49:19. Jakòb té di Gad, yon gany vòlè té kay ataké’y. Pli pasé dé san «200» lanné apwé sa, lè désandan Gad wivé an Tè Pwonmèt-la, yo éwityé on mòso tè bò Lawivyè Jouden-an, asou fasad sòlèy lévan. Konsa, tè yo té ka bòné épi tè sé lèlmi yo-a. Akòz di sa, i té byen ézé pou sé lèlmi-an ataké yo. Mé, désandan Gad té vlé wèsté la, paskè tè-a té ni an chay plas pou sé zannimo yo-a. (Lim. 32:1, 5) San dout, désandan Gad té ni an chay kouwaj. Mé sa ki té pli enpòtan sé sa, yo té ni an chay konfyans an Jéhova. Yo té tèlman asiwé Jéhova té kay édé yo, yo té ka voyé sòlda yo pou alé édé lèstan nasyon-an pou pwan tè yo asou lòt fasad lawivyè Jouden-an. (Lim. 32:16-19) Èk yo fè sa pou plizyè lanné, paskè yo té asiwé, Jéhova té kay pwotéjé madanm yo épi ich yo paditan sé nonm-lan té an ladjè. Jéhova benni yo paskè yo té ni kouwaj, èk yo té pawé pou fè sakwifis pou yo sa édé sé fwè yo-a.​—Jòch. 22:1-4.

9. Ki mannyè adan sé fwè èk sè nou-an ka moutwé yo ni konfyans an Jéhova?

⁹ Kisa nou sa apwann an ègzanp Gad? Yon lison nou sa apwann an ègzanp Gad sé sa, pou nou sa kontiné sèvi Jéhova lè bagay wèd, nou oblijé mété tout konfyans nou an li. (Sam 37:3) Èk menm si i pa ézé, an chay an sé fwè èk sè nou-an ka moutwé yo ni an chay konfyans an Jéhova. Pou ègzanp, yo ka alé wann sèvis koté ki ni labizwen, yo ka twavay asou pwojé konstwiksyon, ében yo ka fè lòt sakwifis pou yo sa sipòté Wéyòm-lan. Yo ka fè sé sakwifis sala paskè, yo ni konfyans ki fò an Jéhova. Yo asiwé, i kay toujou otjipé yo.​—Sam 23:1.

ACHÈ

10. Magwé lafanmi Achè té ni on bon mòso tè, kisa yo pa té fè èk ki mannyè sa afèkté yo? (Jennésis 49:20) (Osi gadé bwèt-la.)

¹⁰ Li Jennésis 49:20. Jakòb té di, lafanmi Achè té kay vini wich, èk sé sa menm ki fèt. Pòsyon tè-a yo éwityé an Tè Pwonmèt-la té ka pwodwi an chay. (Dito. 33:24) Osi, tè yo té ka bòné épi Lanmè Mediterranean, èk lawad Sidon té asou tè yo. Mé, lafanmi Achè pa té kouwi dèyè sé Kénannayt-la ki té ka wèsté pwé yo-a. (Jij 1:31, 32) I sanm, yo anmasé tout sé vyé pwatik-la sé Kénannayt-la té ka fè-a, èk i sanm yo té ka kouwi dèyè byen latè-a osi. Akòz di sa, yo pa té antéwésé an twavay Jéhova ankò. Pou ègzanp, lè jij Barak té ka mandé jan Izwayèl pou édé’y goumen épi sé Kénannayt-la, lafanmi Achè pa alé. Konsa, yo pa wè bèl miwak-la Jéhova té fè bò dlo Mègido, pou délivwé pèp li. (Jij 5:19-21) Èk apwé laviktwa sala, Barak épi Dèbra té fè on bèl ti chanson pou glowifyé Jéhova. Mé, pitèt lafanmi Achè té byen hont lè yo tann chanson-an ka di: ‘Achè té asiz bò lanmè-a anyen a fè.’​—Jij 5:17.

11. Pouki nou sipozé kité lajan an plas li?

¹¹ Kisa nou sa apwann an ègzanp Achè? Nou vlé fè tout sa nou pé bay Jéhova. Mé nou ni pou pwan bon pokosyon pou nou pa vini kon moun an latè-a, paski an chay moun ka kwè, sa ki pli enpòtan an lavi sé lajan épi byen latè. (Pwov. 18:11) Èk wi, nou bizwen lajan pou achté sa nou bizwen, mé nou ka kité lajan an plas li. (Éklé. 7:12; Hib. 13:5) Èk nou pa ka gaspiyé tan nou épi fòs nou pou kouwi dèyè bagay nou pa menm bizwen. Pito sa, nou ka fè tout sa nou pé bay Jéhova apwézan, paskè nou sav si nou wèsté fidèl, i kay ban nou on bon lavi pou tout tan an pawadi-a.​—Sam 4:8.

NAFTALI

12. Ki mannyè pwofèsi-a konsèné Naftali té fèt vwé? (Jennésis 49:21) (Osi gadé bwèt-la.)

¹² Li Jennésis 49:21. Jakòb té di, Naftali té kay ‘palé bèl ti pawòl.’ Pwofèsi sala té fèt vwé lè Jézi té asou latè-a. Paskè, i té on bon titja èk i pasé an chay tan an vil Kapènéyòm, on vil ki té asou tè lafanmi Naftali. Anfen yo té ka di, Jézi té ka ‘wèsté an vil Kapènéyòm.’ (Maf. 4:13; 9:1; Jan 7:46) An plis di sa, pwofèt Izaya té di, Jézi té kay vini kon ‘on gwo klèté’ pou jan Zèbyoulonn èk jan Naftali. (Izay. 9:1, 2) Wi, Jézi té ka sèvi bèl ti pawòl pou enstwi moun lavéwité-a. Konsa, i sété “bon klèté-a” ki té ka “kléwé tout moun.”​—Jan 1:9.

13. Ki mannyè nou sa palé ‘bèl ti pawòl’ ki kay plè Jéhova?

¹³ Kisa nou sa apwann an ègzanp Naftali? I bon pou nou chonjé, Jéhova antéwésé an sa nou ka di, èk an mannyè-a nou ka palé. Konsa, ki mannyè nou sa palé ‘bèl ti pawòl’ ki kay plè Jéhova? Ében Jéhova ka kontan lè nou palé lavéwité. (Sam 15:1, 2) Èk si nou sèvi pawòl nou pou ankouwajé yonn a lòt, pito nou kwititjé moun ében bougonnen, Jéhova kay byen plè épi nou. (Èfés. 4:29) Osi, nou sa fè pli éfò pou koumansé kozé épi moun adan on mannyè pou nou sa di yo konsèné Jéhova.

JOZÈF

14. Ki mannyè sa Jakòb té di konsèné Jozèf té fèt vwé? (Jennésis 49:22, 26) (Osi gadé bwèt-la.)

¹⁴ Li Jennésis 49:22, 26. Jakòb té byen plè épi Jozèf, yonn-lan ‘yo té mété apa an mitan sé fwè’y-la.’ Jakòb té di, ‘Jozèf sé boujon on pyé bwa ki ka pòté fwi.’ Pyé bwa-a sété Jakòb, èk boujon-an sété Jozèf. Sé li ki té pwèmyé gason Rétjèl, madanm-lan Jakòb té pli enmen-an. Jakòb té osi di, Jozèf té kay éwityé dé «2» pa-a Roubenn té sipozé wisivwè-a. (Jen. 48:5, 6; 1 Kw. 5:1, 2) Pwofèsi sala té fèt vwè lè désandan dé «2» gason Jozèf té vini dé «2» lafanmi an nasyon Izwayèl. Non yo sété Ifraim épi Manassa. Èk chak di yo wisouvwè on pòsyon té an Tè Pwonmèt-la.​—Jen. 49:25; Jòch. 14:4.

15. Magwé sé fwè Jozèf-la té fè’y wè bon mizè, ki mannyè i twété yo?

¹⁵ Jakòb té osi di, ‘moun té ka sèvi bannza yo épi flèch yo pou ataké Jozèf, èk yo kontiné hayi’y.’ (Jen. 49:23) Sé moun sala sété sé fwè Jozèf-la. La tè ni on tan lè yo té jalou Jozèf, èk yo fè’y wè bon mizè. Kanmenm, i pa tjenn yo asou tjè’y, èk i pa kité sa yo fè’y-la afèkté wilasyon’y épi Jéhova. Kon Jakòb té di: ‘Bannza’y wèsté an plas li, èk lanmen’y té fò.’ (Jen. 49:24) Wi, Jozèf té sa sèvi bannza’y, mé i pa janmen wann sé fwè’y-la mal pou mal. Menm si yo té fè’y méchansté, i moutwé yo lanmityé épi mizèwikòd. (Jen. 47:11, 12) Jozèf té ni konfyans an Jéhova. Konsa, i kité sé difikilté-a i té ka èspéyansé-a fè’y vini on pli mèyè moun. (Sam 105:17-19) Akòz di sa, Jéhova té sa sèvi’y pou fè bagay ki té byen èstòdinè.

16. Lè nou ka èspéyansé difikilté, ki mannyè nou sa swiv ègzanp Jozèf?

¹⁶ Kisa nou sa apwann an ègzanp Jozèf? Lè nou ka èspéyansé difikilté, sé pa pou nou janmen kité sa afèkté wilasyon nou épi Jéhova, ében wilasyon nou épi yonn a lòt. Chonjé, délè Jéhova ka pèwmité nou pou èspéyansé difikilté. (Hib. 12:7) Paskè i sav, si nou wèsté fidèl anba twaka, nou kay dévlopé pli bèl kawaktè Kwityen, tèl kon mizèwikòd épi pasyans. (Hib. 12:11) Èk si nou kontiné tjébé fò, Jéhova kay benni nou, menm kon’y té benni Jozèf.

BENNJAMIN

17. Ki mannyè sa Jakòb té di konsèné Bennjamin té fèt vwé? (Jennésis 49:27) (Osi gadé bwèt-la.)

¹⁷ Li Jennésis 49:27. Jakòb té di, lafanmi Bennjamin té kay menm kon on chyen mawon, èk yo té kay sa goumen byen. (Jij 20:15, 16; 1 Kw. 12:2) Ében pwèmyé wa-a an Izwayèl sété Wa Sòl. I té sòti an lafanmi Bennjamin, èk i goumen wèd épi sé Filistin-lan. (1 Sm 9:15-17, 21) An chay lanné apwé sa, Mòdikay épi Wenn Èsta té sové lavi tout sé Jwif-la. Èk yo dé-a té sòti an lafanmi Bennjamin.​—Èsta 2:5-7; 8:3; 10:3.

18. Ki mannyè nou sa swiv ègzanp lafanmi Bennjamin?

¹⁸ Kisa nou sa apwann an ègzanp Bennjamin? San dout, désandan Bennjamin té byen kontan lè Sòl vini wa, paskè i té sòti an lafanmi yo. Mé, Jéhova chwazi David pou vini wa apwé Sòl, èk David té sòti an lafanmi Jouda. Magwé sa, désandan Bennjamin fè tout sa yo té pé pou sipòté Wa David. (2 Sm 3:17-19) Èk plizyè lanné apwé sa, lè sé dis «10» lafanmi-an té lévé kont lafanmi Jouda, lafanmi Bennjamin kontiné sipòté lafanmi Jouda, épi wa-a Jéhova té chwazi-a. (1 Wa 11:31, 32; 12:19, 21) Konsa, annou swiv ègzanp lafanmi Bennjamin, èk annou fè tout sa nou pé pou sipòté sé moun-lan Jéhova ka sèvi pou djidé pèp li jòdi jou.​—1 Tèsa. 5:12.

19. Kisa nou apwann an dènyé ti pawòl Jakòb?

¹⁹ Mi bèl lison nou apwann an dènyé ti pawòl Jakòb! Lè nou konsidiwé mannyè tout sa’y té di-a té fèt vwé, sa ka fòtifyé konfyans nou ki, Jéhova kay akonpli tout sa i pwonmèt pou fè. Èk lè nou konsidiwé sé bennédiksyon-an sé gason’y-lan té wisouvwè-a, sa ka édé nou pou konpwann kisa nou ni pou fè, si nou vlé plè Jéhova.