Jakòb Èk Isò Fè Lapé

Jéhova té pwonmèt Jakòb i té kay pwotéjé’y menm kon i té pwotéjé Abrahanm èk Ayzak. Jakòb té alé wèsté adan an plas yo ka kwiyé Hérann. Apwé an tan i mayé èk i té ni an gwo fanmi. I osi té vini byen wich.

Apwé tjèk tan, Jéhova di Jakòb: ‘Déviyé an péyi’w.’ Alò Jakòb èk fanmi’y koumansé an voyaj ki té kay byen lonng. Padan yo té asou chimen, déotwa moun vin di Jakòb: ‘Isò fwè’w-la ka vini èk i ni kat san «400» nonm épi’y!’ Jakòb té pè. I té kwè Isò té vlé fè li èk fanmi’y ditò. Kon sa Jakòb pwédyé. I di Jéhova: ‘Souplé Jéhova, sové mwen anba lanmen fwè mwen-an.’ Li denmen, Jakòb voyé an kado bay Isò. I voyé tibwen mouton, kabwit, bèf, chanmo, èk bouwik ba li.

Menm swè sala, lè Jakòb té pa kò’y, i wè an nanj! Yo dé-a koumansé lité. Anfen yo lité jis tan jou ouvè. Magwé Jakòb té ni mal, i pa té ka ladjé. An lè nanj-lan di’y: ‘Ladjé mwen pou mwen alé.’ Mé Jakòb di: ‘Non! Tout tan ou pa benni mwen, m’a ka ladjé’w!’

Alafen, nanj-lan benni Jakòb. Alò sa fè Jakòb sav, Jéhova pa té kay kité Isò fè’y anyen ki mové.

Pli ta li bonmaten, Jakòb wè Isò èk kat san «400» nonm ka vini adan an distans. Jakòb kité fanmi’y an chimen èk i pousé douvan pou wivé fwè’y. Lè’y té tou pwé Isò, i pòstenné douvan’y sèt «7» fwa. Isò kouwi vin jwenn Jakòb èk i anbwasé’y. Yo dé-a mété pléwé atè, èk apwé, yo fè lapé. Ki mannyè ou kwè Jéhova té santi lè’y wè mannyè Jakòb mennajé sitiwasyon sala?

Apwé, Isò alé lakay li èk Jakòb kontiné épi voyaj li. An tout, Jakòb té ni douz «12» gason. Non yo sété: Roubenn, Siméyon, Livay, Jouda, Dann, Naftali, Gad, Achè, Isaka, Zèbyoulonn, Jozèf, èvèk Bennjamin. Jéhova sèvi Jozèf, yonn «1» an sé gason Jakòb-la, pou sové pèp Li. Ès ou konnèt ki mannyè Jéhova té fè sa? Annou wè.