Éwitaj-la Pasé Pou Jakòb

Ayzak té kawant «40» lanné lè’y mayé Ribèka. I té enmen Ribèka an chay. Apwé an tan, yo fè jimo, dé «2» gason.

Yo té kwiyé sa ki sòti avan Isò èk yo té kwiyé lòt-la, Jakòb. Isò sété an bon chasè èk i pa té enmen wété an kay. Mé Jakòb té enmen wété an kay.

An tan sala, lè an papa mò, i té ka kité tout tè’y èk lajan’y bay sé gason’y-lan. Sé sa yo ka kwiyé yon éwitaj. Bon sijètman, sé pwèmyé gason-an ki té ka éwityé pli gwo pòsyon-an. An fanmi Ayzak, sé gason’y-lan té kay osi éwityé sé bèl bagay-la Jéhova té pwonmèt Abrahanm. Isò pa té tèlman antéwésé an sé pwonmèt sala. Mé pou Jakòb, sé pwonmèt sala té vwéman enpòtan.

Yon jou, Isò fè lachas tout lajouné èk i viwé lakay li tou las. Lè’y wivé, I pwan lòdè an bon manjé Jakòb té ka fè. I di Jakòb: ‘Mwen ka mò fen! Ban mwen ti tak adan manjé-a ou ni la-a!’ Jakòb di’y: ‘N’ay ba ou’y. Mé avan mwen ba ou’y, pwonmèt mwen ou kay ban mwen éwitaj ou.’ Isò di’y: ‘Ki mélé mwen épi éwitaj! Ou sa pwan’y. Sé manjé mwen vlé.’ Ou kwè sa té an bon bagay pou Isò fè? Mé non. Pouki? Paski Isò boukanté an bagay ki té ni an chay valè pou an ti bòl manjé.

Lè Ayak té byen vyé, i désidé pou bay Isò, pli gwan gason’y-lan, an bennédiksyon. Mé Ribèka édé Jakòb, pli jenn gason-an, twapé bennédiksyon-an pito. Lè Isò vin sav sa, i té si tèlman faché, i koumansé fè plan pou tjwé jimo’y. Ayzak èk Ribèka té vlé pwotéjé Jakòb. Kon sa yo di’y: ‘Ay wété épi Lébann, fwè manman’w, jis tan Isò bésé kòlè’y.’ Jakòb kouté pawan’y èk i kouwi pou chapé lavi’y.