Lison Nou Sa Apwann An Dènyé Ti Pawòl Jakòb​—Pwèmyé Pa-a

1-2. Kisa Jakòb fè touswit avan i mò, èk pouki i fè sa? (Gadé pòtwé-a osi.)

JAKÒB té ja an laj lè li épi fanmi’y kité Kénann, èk yo alé wèsté an péyi Éjip. Mé diwan tan-an i té an Éjip, tjè Jakòb té an plas paskè tout fanmi’y té ansanm. Èk an plis di sa, i té ni chans-lan pou’y wè Jozèf, gason-an i té pli kontan-an. Mé apwé disèt «17» lanné an Éjip, Jakòb wéyalizé tan-an té pwé pou’y mò. (Jen. 47:28) Konsa, i kwiyé tout sé gason’y-lan, èk i fè yo vini ansanm pou’y palé ba yo, paskè i té ni on bagay byen enpòtan i té vlé di yo avan i mò.​—Jen. 49:28.

² Mé sa Jakòb té fè avan i mò-a pa té anyen ki dwòl, paskè a lè sala, lè on tèt fanmi té sav i té kay mò, souvan, i té ka kwiyé fanmi-an ansanm, pou’y palé ba yo. (Izay. 38:1) Èk délè, tèt fanmi-an té ka jis di fanmi’y, ki moun ki té kay pwan douvan an fanmi-an pou ba yo diwèksyon, apwé i mò.

3. An ling épi Jennésis 49:1, 2 pou ki wézon nou sa di, sa Jakòb té di sé gason’y-lan té ni an chay enpòtans?

³ Li Jennésis 49:1, 2. Bon, sa Jakòb té di sé gason’y-lan té ni an chay enpòtans. Pou ki wézon nou sa di sa? Ében Jakòb sété on pwofèt. Konsa sé Jéhova ki fè’y konnèt kisa pou’y di sé gason’y-lan, konsèné sé bagay-la ki té kay wivé yo épi fanmi yo, an tan pou vini. Anfen, sa Jakòb té di sé gason’y-lan an mitin sala, sété on pwofèsi.

4. Kisa nou ni pou tjenn an lidé nou kon nou ka ègzanminé sa Jakòb té di sé gason’y-lan? (Gadé enfòmasyon-an ki anba sijé-a “Fanmi Jakòb.”)

⁴ An atik sala nou kay diskité sa Jakòb té di sé pwèmyé kat «4» gason’y-lan. Non yo sété Roubenn, Siméyon, Livay, épi Jouda. Èk an lòt atik-la, nou kay diskité sa’y té di sé lézòt gason-an. Mé kon nou kay wè, sa Jakòb té di sé gason-an té osi ni pou fè épi désandan yo. Èk apwé on tan, désandan sé douz «12» gason sala té kay agwandi pou vini nasyon Izwayèl. Listwa nasyon Izwayèl ka moutwé a klè, pwofèsi-a Jakòb té bay-la té fèt vwé. Konsa, kon nou ègzanminé sa Jakòb té di-a, tjenn sa an lidé’w, èk gadé pou sé bèl lison-an nou sa apwann. Wi, bèl lison ki kay édé nou pou viv adan on mannyè ki ka plè Papa nou Jéhova.

ROUBENN

5. Pitèt kisa Roubenn kwè ki té kay fèt apwé papa’y mò?

⁵ Pwèmyéman, Jakòb palé épi Roubenn. I di’y: “Roubenn, ou sé pwèmyé gason mwen.” (Jen. 49:3) Bon, a lè sala pwèmyé gason-an té ka wisouvwè an chay lonnè an fanmi-an. Konsa, pitèt Roubenn té ka èspéwé pou’y éwityé pli an byen papa’y, pasé sé lézòt fwè’y-la. Èk pitèt i té ka kwè, sé li ki té kay vini tèt fanmi-an apwé Jakòb mò.

6. Pou ki wézon Roubenn pa wisouvwè pwivilaj-la pwèmyé gason-an té sipozé wisouvwè-a? (Jennésis 49:3, 4)

⁶ Kanmenm, Roubenn pa wisouvwè pwivilaj-la pwèmyé gason-an té sipozé wisouvwè-a. (1 Kw. 5:1) Pouki? Ében, Jakòb té mayé épi dé sésé. Non yo sété Liya épi Rétjèl. Mé Jakòb té kontan Rétjèl pli pasé i té kontan Liya. Bon, Rétjèl té bay Jakòb sèvant li Bilha, kon on madanm. Apwé Rétjèl mò, Roubenn alé, épi i kouché épi Bilha. (Jen. 35:19, 22) Pouki i fè sa? Ében, manman Roubenn sété Liya. Konsa, pitèt Roubenn té ka kwè si’y kouché épi Bilha, sa té kay fè papa’y hayi Bilha. Èk a lè sala, papa’y té kay kontan manman’y, Liya pli. Èben pitèt i té ni zyé pou Bilha, èk i pa kontwolé kò’y. Mé népòt sa’y té yé-a, Roubenn fè on bagay ki té byen mové. Èk sa déplè Jéhova, èk i déplè papa’y Jakòb osi.​—Li Jennésis 49:3, 4.

7. Kisa ki wivé Roubenn épi désandan’y? (Osi, gadé enfòmasyon-an ki anba sijé-a “Pwofèsi-a Jakòb Té Bay Touswit Avan I Mò.”)

⁷ Jakòb té di Roubenn: “Anyen pa kay maché byen épi’w.” Èk kon’y di kon ki fèt. Lè nou ègzanminé Bib-la, la pa ni pyès wakont ki ka di, on moun an fanmi Roubenn té janmen wann sèvis kon wa, pwèt, ében pwofèt an nasyon Izwayèl. Kanmenm, magwé Roubenn té déwèspèkté papa’y, Jakòb pa tounen do asou’y. I bay Roubenn on pòsyon an byen’y. Èk désandan Roubenn sété yonn an sé lafanmi-an an Izwayèl. (Jòch. 12:6) Osi, la ni wakont an Bib-la ki ka moutwé, Roubenn té ni bèl kawaktè. Èk i sanm, i pa janmen fè imowalité sèksyouwal ankò.​—Jen. 37:20-22; 42:37.

8. Ki lison nou sa apwann an ègzanp Roubenn?

⁸ Kisa nou sa apwann an ègzanp Roubenn? Ében nou ni pou fè tout sa nou pé pou kontwolé kò nou, pou nou pa tonbé an vyé lavi. Èk si nou anba tantasyon pou fè on péché, i bon pou nou pwan tan pou katjilé asou mannyè aksyon nou kay afèkté Jéhova, fanmi nou, épi lézòt. I osi bon pou nou chonjé pwensip Bib-la ki ka di: “Sa an nonm planté, sé sa i kay wékòlté.” (Gal. 6:7) On lòt lison nou sa apwann an ègzanp Roubenn sé sa, Dyé nou Jéhova sé on Papa ki plen mizéwikòd. Èk wi, lè nou fè on lèwè nou pé soufè pou sa. Mé si nou wépanti, èk nou ka fè éfò pou fè sa ki dwèt, nou sa asiwé Jéhova kay pawdonnen nou, èk i kay benni nou.

SIMÉYON ÉPI LIVAY

9. Pou ki wézon Jakòb pa té plè épi Siméyon èk Livay? (Jennésis 49:5-7)

⁹ Li Jennésis 49:5-7. Bon, sa Jakòb té di Siméyon épi Livay ka moutwé i pa té plè épi yo pyès. Mé pouki? Ében, plizyè lanné avan sa, sé dé «2» gason sala té fè on bagay ki moutwé yo té byen vyolan. Sa ki té fèt sé sa, on nonm yo té ka kwiyé Chikèm té anvyolé sésé yo. Non sésé-a sété Dayna. Lè sa fèt, tout sé gason Jakòb-la té faché, èk nou sa konpwann sa. Mé Siméyon épi Livay pa kontwolé kòlè yo. Yo fè on plan pou kwennen Chikèm épi pèp li. Yo di yo kon sa, si tout sé nonm-lan an vil-la sikonsayz, yo té kay fè lapé épi yo. Konsa, Chikèm épi sé nonm-lan dakò pou sikonsayz. Mé twazyenm jou-a apwé yo sikonsayz, paditan yo té ka soufè toujou, ‘Siméyon épi Livay pwan sab yo, yo antwé an vil-la san pyèsonn sav, èk yo tjwé tout sé nonm-lan ki té an vil-la.’​—Jen. 34:25-29.

10. Ki mannyè sa Jakòb té di Siméyon èk Livay té fèt vwé? (Osi, gadé enfòmasyon-an ki anba sijé-a “Pwofèsi-a Jakòb Té Bay Touswit Avan I Mò.”)

¹⁰ Sa Siméyon épi Livay té fè-a té byen mové, èk sa twakasé papa yo an chay. Sé pou wézon sala i di yo, désandan yo kay simen toupatou an tèwitwa Izwayèl. Sa Jakòb té di yo-a té fèt vwé apipwé dé san «200» lanné apwé sa, lè désandan’y antwé Tè Pwonmèt-la. A lè sala, chak lafanmi wisouvwè on pòsyon tè pou kò yo. Mé, lafanmi Siméyon épi lafanmi Jouda pa wisouvwè sa. Sa yo wisouvwè, sé plizyè ti tjò tè toupatou an Tè Pwonmèt-la. Konsa lafanmi Siméyon té ni yonndé vil andidan tèwitwa lafanmi Jouda. (Jòch. 19:1) Èk lafanmi Livay té ni kawant ywit «48» vil. Mé, sé vil sala té simen toupatou an Tè Pwonmèt-la.​—Jòch. 21:41.

11. Ki bon bagay désandan Siméyon épi Livay té fè?

¹¹ Bon, désandan Siméyon épi Livay pa té swiv mové ègzanp ayèl yo. Anfen, an chay moun an lafanmi Livay té moutwé yo té ka adowé Jéhova épi tout tjè yo. Pou ègzanp, lè Moziz té désann Mòn Saynay épi Lwa-a Jéhova té bay-la, i jwenn jan Izwayèl ka adowé ti bèf an lò-a yo té fè-a. Mé lafanmi Livay pa té tonbé an mové bagay sala. Èk pli ta, yo édé Moziz pou détwi tout sé moun-lan ki té ka adowé ti bèf-la. (Ègz. 32:26-29) On lòt bon bagay nou sa di konsèné désandan Livay sé sa, sé yo sèlman ki té ka wann sèvis kon pwèt an nasyon Izwayèl. (Ègz. 40:12-15; Lim. 3:11, 12) Èk désandan Siméyon té fè bon bagay osi. Pou ègzanp, lè désandan Jouda té ka goumen pou tèwitwa yo an Té Pwonmèt-la, désandan Siméyon édé yo pou bat pèp Kénann.​—Jij 1:3, 17.

12. Ki lison nou sa apwann an ègzanp Siméyon épi Livay?

¹² Kisa nou sa apwann an ègzanp Siméyon épi Livay? Ében, ègzanp Siméyon épi Livay ka moutwé nou mannyè i enpòtan pou nou kontwolé kòlè nou. Èk, si on moun maltwété nou ében on moun nou enmen, sa kay fè nou faché. (Sam 4:4) Mé Bib-la ka di, “on moun ki faché pa sa fè sa ki ka plè Bondyé.” (Jémz 1:20) Wi, si on moun faché èk yo pa kontwolé kò yo, sa ka toujou mennen mové wézilta. Konsa, si on moun fè’w ditò, pito ou wann moun-lan fé pou fé, éséyé pou swiv pwensip Bib, ki moun-lan sé on sèvant Jéhova opa. Si’w fè sa, ou pa kay di ében fè anyen ki kay ofwansé ében donmajé lézòt, èk sa kay plè Jéhova. (Ronm 12:17, 19; 1 Pita 3:9) On lòt bèl lison nou sa apwann an ègzanp Siméyon épi Livay sé sa, nou pa oblijé swiv mové ègzanp lézòt. Konsa, si’w sé on jenn moun, èk pawan’w ka fè sa ki pa bon, ou pa ni pou fè menm kon yo. Ou sa apwann pou fè sa ki dwèt an zyé Jéhova. Si’w fè sa, ou sa asiwé Jéhova kay édé’w, èk i kay benni’w.

JOUDA

13. Pou ki wézon Jouda pitèt té antjèt lè Jakòb té kay palé épi’y?

¹³ Bon, apwé Jakòb fini palé épi Siméyon èk Livay, i koumansé palé épi Jouda. Mé, lè Jouda tann sa papa’y té di Siméyon épi Livay, pitèt i té antjèt paskè i té sav i menm té fè yonndé bagay ki té byen mové. Pou ègzanp, i té édé sé fwè’y-la pou kwazé bwizé vil Chikèm. (Jen. 34:27) Èk i té édé yo pou vann Jozèf kon yon èslav. Lè yo fini, yo tout fè konplo pou kwennen papa yo. (Jen. 37:31-33) Osi, Jouda té kouché épi bèl fi’y. Mé a lè-a, i té kwè fi-a sété on fanm vyé lavi.​—Jen. 38:15-18.

14. Ki bon bagay Jouda té fè? (Jennésis 49:8, 9)

¹⁴ Ében si Jouda té antjèt, pitèt i wèsté bouch gwan ouvè lè’y tann sa papa’y di’y, paskè sé yenki bennédiksyon Jakòb ba’y. Èk Jakòb di’y an chay bon bagay ki té kay wivé li épi fanmi’y. (Li Jennésis 49:8, 9.) Mé pou ki wézon Jakòb fè sa? Ében magwé Jouda té fè bagay ki pa té bon, i té fè sa ki té bon osi. Pou ègzanp, i té moutwé an chay natiwèl pou papa’y. Èk i té moutwé konpasyon pou dènyé ti fwè’y.​—Jen. 44:18, 30-34.

15. An ki diféwan mannyè pwofèsi-a konsèné Jouda té akonpli?

¹⁵ Jakòb té di, Jouda té kay kondwi sé fwè’y-la. Kanmenm, sa pa té fèt la menm. Anfen, i pwan pwèskè dé san «200» lanné avan pwofèsi sala koumansé akonpli. Mé, an ki diféwan mannyè sa té fèt? Ében, lè nasyon Izwayèl té ka maché an Savann sèk-la pou alé an Tè Pwonmèt-la, lafanmi Jouda té douvan, èk tout sé lézòt-la té ka swiv yo. (Lim. 10:14) Èk konmen lanné apwé sa, lè jan Izwayèl té pawé pou antwé Tè Pwonmèt-la, lafanmi Jouda sété pwèmyé lafanmi-an ki té ni pou goumen épi jan Kénann. (Jij 1:1, 2) Osi, Wa David èk an chay an sé wa-a ki té kondwi apwé’y, té sòti an lafanmi Jouda. Mé la ni lòt mannyè pwofèsi-a konsèné Jouda té akonpli.

16. Ki mannyè pwofèsi-a ki an Jennésis 49:10 té akonpli? (Osi, gadé enfòmasyon-an ki anba sijé-a “Pwofèsi-a Jakòb Té Bay Touswit Avan I Mò.”)

¹⁶ Silon sa Jakòb té di, on moun yo té ka kwiyé Shaylo, té kay sòti an lafanmi Jouda, èk moun sala té kay kondwi lézòm pou tout tan. (Li Jennésis 49:10.) Moun sala sé Jézi Kwi. Mé, ki mannyè nou sav sa? Ében, nanj Gabwiyèl té di Mari, Jéhova té kay bay Jézi, “kondwit gwan papa’y, Wa David.” (Louk 1:32, 33) Osi, Bib-la ka kwiyé Jézi, “Lyon-an Ki Sòti an Lafanmi Jouda-a, désandan Wa David-la.”​—Wév. 5:5.

17. Ki mannyè nou sa imité Jéhova, lè on fwè èben on sè wisouvwè on pwivilaj?

¹⁷ Kisa nou sa apwann an ègzanp Jouda? Ében Jouda té fè yonndé lèwè ki té byen sèwyé, èk sé fwè’y-la té konnèt sa. Konsa lé yo tann sé bon bagay-la Jakòb di ki té kay wivé Jouda, pitèt yo di an lidé yo, ‘ki mannyè Jouda kay wisouvwè tout sé bennédiksyon sala, lè’y ni tèlman défo?’ Mé, sé pa konsa Jéhova té ka gadé sitiwasyon-an. Èk wi, Jéhova té konnèt Jouda té fè bagay ki pa té bon. Mé, i osi té ka wè bonté-a ki té an Jouda, èk i benni’y pou sa. Sa sé on bèl ègzanp Jéhova ban nou pou nou swiv. Paskè délè, lè on fwè ében on sè wisouvwè on pwivilaj, nou pé di ‘tèl moun ni tèlman défo, ki mannyè yo wisouvwè bèl ansayman sala?’ Mé nou ni pou chonjé, Jéhova ka toujou gadé pou sé bèl kawaktè-a sèvant li ni, èk i ka benni yo pou sa. Konsa, annou fè menm kon Jéhova, èk gadé pou bonté-a ki an sé fwè èk sè nou-an.

18. Pouki nou bizwen ni pasyans?

¹⁸ On lòt bèl lison nou sa apwann an ègzanp Jouda sé sa, nou ni pou pwan pasyans. Paskè, kon nou sav, Jéhova ka toujou tjenn pwonmèt li. Mé i pa ka toujou fè sa a lè-a ében an mannyè-a nou ka èspéwé. Chonjé, i té pwan an chay tan avan lafanmi Jouda koumansé kondwi pèp Bondyé. Mé paditan yo té ka èspéyé, yo sipòté sé moun-lan ki té ka pwan douvan an nasyon-an, ki moun-lan té sòti an lafanmi yo opa. Pou ègzanp, Moziz té sòti an lafanmi Livay, Jòchwa té sòti an lafanmi Ifréyim, èk Wa Sòl té sòti an lafanmi Bennjamin. Mé lafanmi Jouda sipòté yo tout. Konsa, annou swiv ègzanp lafanmi Jouda, èk sipòté népòt moun Jéhova chwazi pou pwan douvan an ògannizasyon’y.​—Hib. 6:12.

19. Kisa nou apwann konsèné Jéhova, an sa Jakòb té di pwèmyé kat «4» gason’y-lan?

¹⁹ La ni plizyè bagay nou sa apwann konsèné Jéhova, an sa Jakòb té di pwèmyé kat «4» gason’y-lan. Pwèmyéman, ‘Bondyé pa ka gadé bagay an menm mannyè-a lézòm ka gadé’y.’ (1 Sm 16:7) Dézyenman, Jéhova ni an chay pasyans, èk i toujou pawé pou pawdonnen nou. Èk wi, Jéhova pa ka kontan lè nou fè sa ki pa bon, mé an menm di tan-an i ka konpwann sitiwasyon nou. I sav nou kay fè lèwè, paskè nou pa pawfé. Èk menm si nou té fè gwo lèwè an tan pasé, dépi nou vwéman wépanti, Jéhova kay benni nou. An lòt atik-la nou kay wè ki lison nou sa apwann an sa Jakòb té di sé lézòt gason’y-lan.