Kisa Ki Sa Édé Nou Lè Katjil Nou Ka Dékouwajé Nou?

1-2. (a) Ki kwèsyon adan sèvant Jéhova ka mandé? (b) Kisa nou kay diskité an atik sala?

DÉLÈ, nou tout ka kwèsyonnen valè nou pou Jéhova, èk disizyon nou té fè an tan pasé. Pou ègzanp, on jenn moun pé fè kòlonng pou batizé paski i pa asiwé si Jéhova vwéman mélé épi’y. On lòt ègzanp sé sa, on fwè té chwazi pou mété sèvis Jéhova pwèmyé an lavi’y lè’y té jenn, pito i té chwazi pou fè an chay lajan. Mé apwézan i pli vyé, èk lajan-an i ni sé pou potjiwé sa fanmi’y bizwen sèlman. Konsa, pitèt i ka katjilé si’y té vwéman fè on bon disizyon lè’y té jenn. Èk mi on lòt ègzanp. On sésé ki an laj ki pa ni fòs kon avan. Èk pitèt i ka santi dékouwajé, paski sé bagay-la i té sa fè, i pa sa fè yo ankò. Bon. Ès ou ja mandé kò’w sé kèstyon sala: ‘Ès Jéhova vwéman mélé épi mwen? Ès sé sakwifis-la mwen té fè bay Jéhova té vo éfò-a? Ès mwen ni valè an zyé Jéhova toujou?’

² Bon. Si nou pa éséyé pou twapé wépons pou kwèsyon kon sa, sa sa annékòz nou pou pèd lafwa nou an Jéhova, èk doubout adowé’y. Konsa, an atik sala, nou kay wè mannyè Bib-la sa édé nou si nou ni katjil ki ka dékouwajé nou, tèl kon: (1) Jéhova pa antéwésé an nou; (2) sé disizyon-an nou té fè an tan pasé pa té bon; èben (3), nou pa ni valè an zyé Jéhova ankò.

KISA KI SA ÉDÉ NOU LÈ NOU NI KWÈSYON KI KA DÉKOUWAJÉ NOU?

3. Kisa nou sa fè lè nou ni kwèsyon ki ka dékouwajé nou?

³ Lè nou ni kwèsyon ki ka dékouwajé nou, i byen enpòtan pou twapé sé wépons-lan pou sé kwèsyon sala an Bib-la. Alò, si nou fè sa, lafwa nou an Jéhova, épi wilasyon nou épi’y kay vini pli fò. Èk sa kay édé nou pou “doubout fò an lafwa-a.”​—1 Kòr. 16:13.

4. Koumannyè nou sa “ègzanminé tout sé konmisyon-an byen”? (1 Tèsalonnika 5:21)

⁴ Li 1 Tèsalonnika 5:21. Bon. Bib-la ka ankouwajé nou pou “ègzanminé tout sé konmisyon-an byen”. Alò, koumannyè nou sa fè sa? Èben, lè nou pa asiwé konsèné on bagay, nou sipozé li Bib-la pou wè sa Bib-la ka di konsèné’y. Pou ègzanp, katjilé asou an jenn moun ki kwè i pa ni valè an zyé Jéhova. Konsa, ès i sipozé annèk aksèpté katjil sala? Èben non. I sipozé li Bib-la pou wè sa Jéhova ka vwéman katjilé konsèné’y.

5. Lè nou ni kwèsyon, ki mannyè nou sa twapé wépons Jéhova?

⁵ Lè nou ka li Pawòl Bondyé, sé konmsi Jéhova ka palé ban nou. Mé pou twapé wépons Jéhova pou sé kwèsyon nou-an, nou sipozé fè pli pasé annèk li Bib-la. Wi, nou ni pou twapé èk étidyé sé lévanjil-la ki kay édé nou twapé wépons-lan pou sé kwèsyon-an ki asou lidé nou. Èk pou édé nou, nou sa fè wichach an sé piblikasyon nou-an. (Pwov. 2:3-6) Osi, nou vlé pwédyé bay Jéhova, èk mandé’y pou édé nou twapé wépons-lan pou sé kwèsyon-an. An plis di sa, nou sa gadé pou pwensip Bib èk lòt enfòmasyon ki sa édé nou an sitiwasyon nou. Èk i bon pou li konsèné sèvant Jéhova an Bib-la ki té ni katjil èk santiman menm kon nou.

6. Ki mannyè sé mitin-lan sa édé nou twapé wépons pou kwèsyon ki ka dékouwajé nou?

⁶ Lè nou étidyé Bib-la an sé mitin-lan, sé konmsi Jéhova ka palé ban nou. Konsa, si nou ka toujou atandé sé mitin-lan, nou kay tann kéchòy hòd an diskou èben tann an wimak ki ka wéponn kwèsyon-an ki asou lidé nou. (Pwov. 27:17) Alò, apwézan, annou diskité kisa ki sa édé nou pou twapé wépons pou kwèsyon ki ka dékouwajé nou.

KISA OU SA FÈ SI’W PA ASIWÉ JÉHOVA MÉLÉ ÉPI’W?

7. Ki kwèsyon adan di nou pé mandé?

⁷ Ès ou ja mandé kò’w: ‘Ès Jéhova vwéman mélé épi mwen?’ Èben, si’w ka santi Jéhova pa mélé épi’w, pitèt ou ka katjilé i pa posib pou’w vini jan Jéhova, Moun-lan ki fè syèl-la èk latè-a. Anfen, pitèt Wa David té ka santi menm kon sa. Wi, i té sipwi Jéhova mélé épi lézòm. An Sam 144:3 i di: ‘Dyé Jéhova, kisa lézòm yé, pou’w sa gadé yo? Kisa lézòm yé pou’w pwan ka yo?’ Bon. Ki koté ou sa twapé wépons-lan pou kwèsyon sala: ‘Ès Jéhova vwéman mélé épi chak di nou?’

8. Silon 1 Sanmyèl 16:6, 7,10-12, kisa Jéhova ka wè an lézòm?

⁸ Bib-la ka enstwi nou ki, Jéhova mélé épi moun ki pa enpòtan pou lézòt. Pou ègzanp, Jéhova voyé pwofèt Sanmyèl lakay Jèsi pou chwazi yonn an sé gason’y-lan pou vini wa Izwayèl. Èk Jèsi kwiyé sèt (7) an sé ywit (8) gason’y-lan pou jwenn Sanmyèl. Mé, i pa té kwiyé David, pli jenn-lan.a Kanmenm, sété David Jéhova té chwazi. (Li 1 Sanmyèl 16:6, 7, 10-12.) Wi, Jéhova wè ki kalté moun David té yé. Èk i té sav jenn nonm sala té vwéman enmen’y.

9. Ki mannyè ou sa asiwé Jéhova mélé épi’w? (Gadé pòtwé-a osi.)

⁹ Katjilé asou mannyè Jéhova ja moutwé i mélé épi’w. Pou ègzanp, i ka ba’w pli mèyè konsèy-la ki sa édé’w an sitiwasyon’w. (Sam 32:8) Bon. Ki mannyè Jéhova sa fè sa si’y pa konnèt ou byen? (Sam 139:1) Alò lè’w swiv konsèy Jéhova èk ou wè mannyè i ka édé’w, ou kay ni asiwans-lan ki Jéhova vwéman mélé épi’w. (1 Kw. 28:9; Twav. 17:26, 27) Wi, Jéhova ka wè tout sa’w ka fè pou adowé’y èk obéyi’y. I ka osi wè sé bèl kawaktè-a ou ni, èk i vlé vini jan’w. (Jér. 17:10) Èvèk pa dé kontan i kay kontan si ou vlé vini jan’y osi.​—1 Jan 4:19.

KISA OU SA FÈ SI’W KA SANTI SÉ DISIZYON-AN OU TÉ FÈ AN TAN PASÉ PA TÉ BON?

10. Lè nou katjilé asou sé disizyon-an nou té fè an tan pasé, ki kwèsyon nou pitèt kay mandé kò nou?

¹⁰ Délè adan fwè èk sè ka katjilé asou sé disizyon-an yo té fè an tan pasé, èk yo pa asiwé si yo té bon disizyon. Pou ègzanp, pitèt yo té kité an bon twavay ki té ka péyé byen. Èben yo désidé pou pa ouvè an biznis pou yo sa fè pli an sèvis Jéhova. Mé apwézan plizyè lanné ja pasé, èvèk yo ka wè adan moun ki té fè diféwan disizyon ni an chay lajan, èk yo ka viv an bon lavi. Èk a kòz di sa, pitèt sé fwè èk sè sala kay katjilé: ‘Ès sé sakwifis-la mwen té fè pou mwen fè pli an sèvis Jéhova té bon? Èben, ès mwen té sipozé twavay pli, konsa apwézan mwen té kay ni pli lajan?’

11. Kisa ki té dékouwajé moun-lan ki té ékwi Samz swasant twèz (73)?

¹¹ Si’w ja mandé kò’w kwèsyon kon sa, gadé sa Bib-la di konsèné moun-lan ki té ékwi Samz swasant twèz (73). I té wè moun ki pa té ka adowé Jéhova té an bon santé, yo té wich, èk yo té ka sanm yo pa té ni pyès pwòblenm. (Sam 73:3-5, 12) Alò, lè’y wè akonmsi tout bagay té ka maché byen bay sé moun sala, i santi tout sa’y té ka fè bay Jéhova té anven. Anfen, sé katjil négatif sala ‘té ka twakasé’y tout lajounen’. (Sam 73:13, 14) Konsa, ki sa’y fè pou aji épi sé katjil négatif sala?

12. Silon Sam 73:16-18, kisa ki té édé moun-lan ki té ékwi Samz sala épi katjil ki té ka dékouwajé’y?

¹² Li Sam 73:16-18. Bon, moun-lan ki té ékwi Samz swasant twèz (73) té alé an tanp Jéhova. Wi, anpami pèp Jéhova koté i té sa byen katjilé. Konsa sa édé’y wéyalizé menm si sé moun-lan ki pa té ka adowé Jéhova té ni an bon lavi, yo pa té ni èspwa pou tan ki ka vini. Alò i pa té dékouwajé ankò. Èk i té ni asiwans-lan ki, disizyon-an i té fè pou mété Jéhova pwèmyé an lavi’y, sété pli mèyè disizyon-an i té sa janmen fè. Èk a kòz di sa, i té détèminé pou kontiné an sèvis li pou Jéhova.​—Sam 73:23-28.

13. Kisa ou sa fè si’w ka wigwété disizyon ou té fè an tan pasé? (Gadé pòtwé-a osi.)

¹³ Wi, menm kon moun-lan ki té ékwi Samz swasant twèz (73), ou sa aji épi katjil ki ka dékouwajé’w. Mé kisa ou ni pou fè? Èben chonjé sé bon bagay-la ou ni-an, tèl kon bennédiksyon Jéhova. Èk chonjé sé moun-lan ki pa ka adowé Jéhova pa ni èd li. Osi paski yo pa ni èspwa, sa ki pli enpòtan pou yo, sé pou yo ni on bon djòb, èk an bon lavi. Kanmenm ou ka enjwi an chay bon kado hòd Jéhova apwézan, mé i pwonmèt pou ba’w an chay lòt bon bagay an tan ki ka vini. (Sam 145:16) An plis di sa, katjilé asou sa: Si’w té fè diféwan disizyon an tan pasé, ou pa asiwé mannyè lavi’w té kay yé jòdi. Mé, la ni yon bagay ou sa asiwé: Lè’w fè disizyon paski ou enmen Bondyé èk ou enmen lézòt, ou kay toujou ni sé bagay-la ou bizwen ki kay ba’w djèwté.

LÈ’W KA KWÈ OU PA NI VALÈ AN ZYÉ JÉHOVA ANKÒ

14. Pouki adan pèp Jéhova pèd konfyans yo? Èk ki kwèsyon ki pitèt asou lidé yo?

¹⁴ Adan pèp Jéhova pèd konfyans yo, paski yo pa sa fè an chay an sé bagay-la yo vlé fè an sèvis Jéhova. Pou ègzanp, adan di yo an laj, adan di yo malad, èk adan di yo enfim. Konsa yo pitèt ka santi yo pa enpòtan pou Jéhova ankò. Èk pitèt yo ka mandé kò yo: ‘Ès mwen ni valè an zyé Jéhova toujou?’

15. Ki asiwans moun-lan ki té ékwi Samz swasant wonz (71) té ni?

¹⁵ Moun-lan ki té ékwi Samz swasant wonz (71), té kwè i pa té ni valè an zyé Jéhova paski i té pèd fòs li. Konsa i di Jéhova an lapwiyè: ‘Pa abandonnen mwen lè mwen pèd fòs mwen.’ (Sam 71:9, 18) Èk menm si i té ka santi fèb i té ni asiwans-lan ki, si’y té adowé Jéhova épi fidèlité, Jéhova té kay kontiné djidé’y èk sipòté’y. Osi i apwann ki, Jéhova plè épi moun ki ka fè tout sa yo pé an sèvis li menm si yo ni limitasyon.​—Sam 37:23-25.

16. An ki mannyè sé fwè èk sè-a ki an laj ni valè an zyé Jéhova toujou? (Sam 92:12-15)

¹⁶ Si’w sé an fwè èben on sè ki an laj, katjilé asou mannyè-a Jéhova ka santi konsèné’w. Wi, Jéhova sa édé’w pou fè tout sa’w pé an sèvis li magwé ou ni limitasyon. (Li Sam 92:12-15.) Alò, pito ou fiksé asou sa ou pa sa fè ankò, fiksé asou sa ou sa fè. Pou ègzanp, ou sa fòtifyé lézòt épi ègzanp ou èk lè’w moutwé yo ou antéwésé an yo. Osi ou sa di lézòt konsèné mannyè Jéhova ja sipòté’w pou plizyè lanné, èk ki pwonmèt an Bib-la ou ka gadé pou pli an tan ki ka vini. Èvèk an plis di sa, toujou chonjé lapwiyè’w bay lézòt ni an chay pouvwa. (1 Pita 3:12) Wi, menm si nou an laj, nou malad, ében nou enfim, nou tout sa fè kéchòy bay Jéhova èk bay lézòt.

17. Poutji nou pa vlé miziwé kò nou épi lézòt?

¹⁷ Si’w ni tèt cho paski ou pa sa fè pli an sèvis ou bay Jéhova, toujou chonjé Jéhova ka apwésyé népòt sa ou fè an sèvis li. Pitèt ou ka miziwé sa’w ka fè épi sa lézòt ka fè. Mé pa janmen fè sa. Alò, poutji nou ka di sa? Ében sa sé paski Jéhova pa ka miziwé nou épi lézòt. (Gal. 6:4) Pou ègzanp, Mari té bay Jézi losyon ki té chè anpil kon an kado. (Jan 12:3-5) Okontwè, vèv pòv-la mété kat sou pou kontwibyousyon’y an tanp-lan. (Louk 21:1-4) Mé, Jézi pa té miziwé sé dé (2) madanm sala. Pito sa, i wè lafwa yo. Wi, Jézi swiv ègzanp Papa’y. Konsa ou sa ni asiwans-lan ki, Jéhova ka wè tout sa ou ka fè paski ou ni lafwa an li èk ou enmen’y. Osi tout sa ou ka fè ba li ni valè menm si ou ka santi sé pa djè ou ka fè.

18. Kisa nou sa fè pou édé nou ganyen a bout kwèsyon ki ka dékouwajé nou? (Gadé bwèt-la “Pawòl Jéhova Sa Édé Nou Twapé Wépons Pou Sé Kwèsyon-an Ki Ka Dékouwajé Nou-an.”)

¹⁸ Wi, nou tout ni kwèsyon ki ka dékouwajé nou délè. Mé kon nou ja apwann, Bib-la sa édé nou pou twapé wépons pou sé kwèsyon-an ki ka dékouwajé nou-an. Konsa fè tout sa’w pé pou twapé sé wépons-lan. Èvèk lè’w twapé sé wépons-lan, katjil négatif ou pa kay dékouwajé’w ankò. Wi, toujou chonjé Jéhova byen konnèt ou. Anfen, i ka apwésyé tout sé disizyon-an ou té fè pou mété’y pwèmyé an lavi’w. Èk i kay tjenn pwonmèt li pou wékonpansé’w. Alò, ni asiwans-lan ki Jéhova enmen, épi i mélé épi chak sèvant fidèl li.