Jéhova ‘Ka Djéwi Sé Moun-lan Ki Ni Tjè Kasé-a’

1. Kisa Jéhova ka wè lè i gadé sé sèvant li-a?

KISA Jéhova ka wè lè i gadé sé sèvant li-a? Jéhova ka wè tout bagay. I ka wè lè yo ni lajwa èk lè yo an lapenn. (Sam 37:18) Èk lè i wè yo ka fè tout sa yo pé pou sèvi’y menm si yo an lapenn, sa ka ba’y an chay tjè kontan. Èk sé pa sa tousèl-an! I pawé pou sipòté èk konfòté yo.

2. (a) Kisa Jéhova kay fè bay sé moun-lan ki ni tjè kasé-a? (b) Kisa nou ni pou fè pou twapé bennéfis an èd-la Jéhova ka ban nou-a?

² Mi sé sa Jéhova di i kay fè bay sé moun-lan ki ni tjè kasé-a. An Sam 147:3 i di: ‘I ka bandé koté-a yo blésé-a.’ Wi, lévanjil sala ka dékwi mannyè Jéhova kay édé moun ki ni lapenn an tjè yo. Mé kisa nou ni pou fè pou twapé bennéfis an èd-la Jéhova ka ban nou-a? Èben, annou konsidiwé ilistrasyon sala. On dòktè sa fè sa i pé pou édé on moun ki blésé twapé djéwizon. Mé kanmenm, pou moun-lan santi pli mèyè, i ni pou fè sa dòktè-a di’y pou fè, ès pa? Konsa, an menm mannyè-a, pou nou twapé bennéfis hòd èd-la Jéhova ka ban nou-a, nou ni pou fè sa i di nou pou fè. An atik sala, nou kay gadé sa Jéhova ka di sé moun-lan ki ni lapenn an tjè yo, èk nou kay konsidiwé ki mannyè nou sa apliké sé konsèy li-a.

JÉHOVA VLÉ NOU SAV, NOU NI AN CHAY VALÈ

3. Pouki la ni moun ki ka santi yo pa vo anyen?

³ Jòdi jou, an chay moun pa ni lanmityé pou yonn a lòt. Annékòz di sa, yo pé maltwété lézòt èk fè yo santi yo pa vo anyen. Pou ègzanp, nou ni yon sè nou, non’y sé Helena, i di: “Mwen lévé adan on fanmi ki pa ni lanmityé. Papa mwen té vyolan, èk i toujou té ka di nou, nou pa vo anyen.” Pitèt menm kon Helen, on moun ja maltwété’y, èben té ka toujou ensilté’w èk fè’w santi ou pa vo anyen. Si sa sé sitiwasyon’w, ou pé twouvé’y difisil pou kwè on moun sa vwéman enmen’w.

4. Ki asiwans Jéhova ban nou an Sam 34:18?

⁴ Mé pwan tjè! Si on moun ja maltwété’w pa pè, paski ou sa asiwé Jéhova enmen’w, èk ou ni an chay valè an zyé’y. Wi, lévanjil-la ka di i “toujou pwé sé moun-an ki dékouwajé-a.” (Li Sam 34:18.) Si ou ka santi ou pèd èspwa, chonjé, Jéhova ja wè sé bon kawaktè’w-la. Sé li menm ki mennen’w vini pwé’y. (Jan 6:44) Épi paski i enmen’w an chay èk ou ni anpil valè an zyé’y, Jéhova toujou pawé pou édé’w.

5. Lè nou gadé ègzanp Jézi, kisa nou sa apwann?

⁵ Lè nou gadé ègzanp Jézi nou ka apwann an chay konsèné konpasyon Jéhova, paski Jézi ka wiflèkté kawaktè papa’y. Ou wè, lè Jézi té asou latè-a, i té ni an chay konpasyon pou moun ki té ka santi yo pa vo anyen paski lézòt moun té ka maltwété yo. (Maf. 9:9-12) Pou ègzanp, la té ni on madanm ki té ka soufè pou douz-an paski i té on maladi ki té ka fè’y pèd an chay san. Madanm-lan té ni èspwa, si i té sa anni touché had Jézi, i té kay djéwi. Èk sé sa i fè. Mé ès Jézi té maltwété’y lè i fè sa? Mé non, anfen Jézi konfòté’y èk i di’y: “Ich mwen, lafwa-a ou ni an Bondyé-a ja fè ou vini byen.” (Mak 5:25-34) Wi, Jézi té ka imité kawaktè papa’y Jéhova. (Jan 14:9) Konsa, ou sa asiwé, Jéhova kay twété’w menm mannyè-a Jézi té twété madanm-lan. Osi, Jéhova ka wè sé bon kawaktè’w-la, tèl kon lafwa’w èk lanmityé-a ou ni pou li.

6. Kisa on moun sa fè si i ka santi i pa vo anyen?

⁶ Kisa ou sa fè si ou ka santi ou pa vo anyen? Èben, mi sé sa ou sa fè. Ou sa li èk mèdité asou sé vèwsé-a ki a Bib-la ki ka ba’w asiwans-lan ki ou ni an chay valè an zyé Jéhova.b (Sam 94:19) Épi si ou té ni antansyon pou fè on bagay, mé ou pa té sa fè’y, pa kité sa dékouwajé’w. Osi, pa santi dékouwajé paski ou pa sa fè otan kon lézòt sa fè. Bon, on lòt bagay ankò, pa konpawé kò’w épi lézòt moun, èk pa katjilé asou sa ou pa sa fè. Toujou chonjé Jéhova wézonnab. I sav ou fèt épi lapousyè. Alò, i pa ka mandé’w pou fè plis pasé sa ou sa fè. (Sam 103:13, 14) Osi, si on moun té abizé’w an tan pasé, ès ou kwè Jéhova vlé’w blanmé kò’w pou sa ki té wivé’w-la? Non, janmen! Èk pa janmen kwè sa sété fòt ou. Sé pou ou toujou chonjé, Jéhova kay jijé moun ki ka maltwété èk abizé lézòt, mé i ka toujou édé sé sa ki ka soufè-a. (1 Pita 3:12) Anfen, nou ni on sè nou, non’y sé Sandra. Lè i té on ti manmay, pawan’y té ka abizé’y èk sa té afèkté’y. Sandra di: “Wégiliyèman, mwen té ka mandé Jéhova pou édé mwen wè sé bon kawaktè-a li menm té ka wè an mwen.”

7. Ki mannyè sa nou ja èspéyansé an lavi sa édé nou an twavay pwèchman-an?

⁷ Délè, yon mal pé tounen pou on byen. Pouki nou di sa? Sé paski Jéhova sa sèvi moun ki ja soufè pou édé lézòt. Wi, Jéhova sa sèvi’w pou édé lézòt. Anfen, Jéhova ja ba ou on bèl pwivilaj pou fè twavay pwèchman-an épi’y. (1 Kòr. 3:9) Konsa, ou kay jwenn moun ki ka soufè, èk ou pé sa édé yo paski ou menm té ja èspéyansé mové bagay an lavi’w. Èk èspéyans ou ka fè’y pli ézé pou ou konpwann soufwans yo èk pou ou ni konpasyon pou yo. Bon. Ès ou chonjé Helen, nou té mansyonnen pli bonnè-a? Wi, Helen té twapé èd, èk apwézan i ka édé lézòt. I di: “Mwen té ka santi akonmsi m’a té vo anyen. Mé apwézan mwen ka santi Jéhova enmen mwen èk i ka sèvi mwen pou édé lézòt.” Atjwèlman, Helen ka wann sèvis kon on piyonnè wéglé, èk sa ka ba’y anpil djèwté an tjè’y.

JÉHOVA VLÉ NOU AKSÈPTÉ PAWDONNASYON’Y

8. Ki asiwans Izaya 1:18 ka ban nou?

⁸ La ni adan sèvant Jéhova ki ka vwéman wigwété sa yo té fè an tan pasé, èk sa ka anbété sèvèl yo toujou. Délè, i sé on bagay yo té fè avan yo té batizé. Èk délè, i sé on bagay yo fè apwé yo batizé mé Jéhova té ja pawdonnen yo. Konsa, sé pou nou tout chonjé, Jéhova potjiwé wanson-an ban nou. Épi i vlé nou aksèpté bèl kado sala paski i ni anpil lanmityé pou nou. Èk sé pa sa tousèl, Jéhova ka asiwé nou, apwé nou ‘wanjé bagay ant nou dé-a’c, i pa kay janmen tjébé péché sala kont nou ankò. (Li Izaya 1:18.) Pa dé kontan nou kontan, papa nou Jéhova ki ni an chay lanmityé, pa kay janmen chonjé sé péché-a i ja pawdonnen nou pou. Èk sa sé paski, lè i pawdonnen nou, i ka pawdonnen nou konplètman! Èk i ka osi fè tjè nou kontan pou sav ki, Papa nou pa ka janmen ‘obliyé sé twavay-la’ nou fè ba’y-la. ​—Sam 103:9, 12; Hib. 6:10.

9. Pito nou fiksé asou sé lèwè-a an tan pasé, kisa nou sipozé fè? Èk pouki?

⁹ Si ou ka santi dékonpòté konsèné bagay ou té fè an tan pasé, pa kité sa kwazé’w. Pito, sé pou ou fè tout sa ou pé pou katjilé asou sa ou ka fè apwézan, èk sa ou kay sa fè an tan pou vini. Bon. Annou konsidiwé ègzanp zapòt Pòl. Avan i té vini on kwityen, Pòl té bwital, i té ka pèsikité sé kwityen-an, èk i té ka fè sa épi vyolans. Mé pli ta, Pòl vini wigwété sa i té fè-a, èk Jéhova té pawdonnen’y. I té sav Jéhova té pawdonnen’y. (1 Tim. 1:12-15) Konsa, ès Pòl té kontiné katjilé asou sé péché-a i té fè an tan pasé? Mé non, Pòl wifizé fè sa, menm mannyè-a i wifizé katjilé asou sé bagay-la ki té fè’y twapé wèspé kon on Fawizyen. (Filip. 3:4-8, 13-15) Anfen, Pòl kontiné fè tout sa i pé an minis-lan, èk i kontiné fiksé èspwa’y asou tan pou vini. Alò, menm kon Pòl, ou pa sa chanjé sa ki té fèt an tan pasé. Mé sa ou sa fè apwézan, sé éséyé pou plè Jéhova èk ba’y laglwa. Yon bagay ankò, Jéhova ja pwonmèt ou an chay bèl bagay pou tan ki ka vini, konsa, kontiné katjilé asou yo.

10. Kisa nou sa fè si nou té fè on moun ditò an tan pasé?

¹⁰ Pitèt ou ka santi koupab pou bagay ja fè moun an tan pasé, èk ou vlé wanjé sitiwasyon-an. Kisa ou kwè ou sa fè? Èben ou sa fè tout sa ou pé pou fè bagay pli mèyè ba yo. Alò, pa senpliman di yo padon pou sa ou té fè-a, mé moutwé yo osi, pa aksyon’w ki, ou vwéman wigwété. (2 Kòr. 7:11) Ou sa mandé Jéhova pou édé sé moun-lan ou ja fè ditò andiwé. Wi, Jéhova sa édé ni ou ni sé moun-lan ou fè ditò-a pou kontiné sèvi’y èk pou ni lapé.

11. Kisa nou sa apwann hòd ègzanp pwòfèt Jonna? (Gadé pòtwé-a osi.)

¹¹ Sé pou ou chonjé, ou sa apwann hòd lèwè ou té fè an tan pasé. Èk sé pou ou toujou dakò pou kité Jéhova sèvi’w an népòt mannyè i chwazi. Épi sé sa pwòfèt Jonna té fè. Ou wè, Jéhova té koumandé pwòfèt Jonna pou alé Ninivè. Jonna dézobéyi Jéhova, èk i kouwi alé adan an lòt diwèksyon. Konsa, Jéhova kowijé’y, èk i vini apwann hòd lèwè’y. (Jonna 1:1-4, 15-17; 2:7-10) Bon. Paski Jéhova kowijé Jonna, ès sa vlé di Jéhova pa té kay sèvi Jonna kon on pwòfèt ankò? Mé non. Jéhova ba’y on lòt chans pou’y alé Ninivè. Kou sala, i obéyi. Wi, Jonna pa té kité lèwè-a i té fè-a anpéché aksèpté asaynman’y hòd Jéhova.​—Jonna 3:1-3.

JÉHOVA KA SÈVI LISENTÈSPWI’Y POU KONFÒTÉ NOU

12. Silon Filipay 4:6, 7, kisa Jéhova kay ban nou lè nou èspéyansé on bagay téwib an lavi nou?

¹² Lè on bagay téwib wivé nou, Jéhova ka sèvi lisentèspwi’y pou konfòté nou. Annou konsidiwé on bagay téwib Ron èk Carol té èspéyansé. Gason yo tjwé kò’y. Ron èk Carol di: “Anpanmi tout sé difikilté-a nou ja pasé an lavi nou, sé sala ki té pli mové. La ni swè nou pa té sa dòmi. Alò nou pwédyé bay Jéhova. Épi nou sa di nou vwéman èspéyansé lapé-a Filipay 4:6, 7 ka dékwi.” (Li’y. ) Si ou ka santi tjè’w kasé paski on mové bagay té wivé’w, di Jéhova ègzaktiman kouman ou ka santi. Ou sa palé ba li nwit kon lajounen. (Sam 86:3; 88:1) Mandé Jéhova pou lisentèspwi’y, Jéhova kay toujou édé’w.​—Louk 11:9-13.

13. Ki mannyè lisentèspwi Jéhova sa édé nou wèsté fidèl pou li? (Èfésòs 3:16)

¹³ Ès ou ja èspéyansé on sitiwasyon ki difisil èk ki fè’w santi fèb? Si sa ja wivé’w Jéhova sa ba’w lisentèspwi’y pou ou kontiné adowé’y èk fidèlité. (Li Èfésòs 3:16.) Bon. Annou konsidiwé èspéyans yon sè, non’y sé Flora. Li épi mawi’y té ka wann sèvis kon misyonnè. Malèwèzman, mawi’y fè adiltè èk sa annékòz yo pou dévosé. Flora di: “Tjè mwen té kasé. Mwen santi kwazé paski mawi mwen té twayi mwen. Èk sé sa tousèl ki té an lidé mwen. M’a té sa katjilé asou anyen ankò. Mwen vidé tjè mwen bay Jéhova an lapwiyè. Mwen mandé’w pou ban mwen lisentèspwi’y pou édé mwen andiwé. Konsa, Jéhova ban mwen ègzaktiman sa mwen té bizwen pou aji épi sitiwasyon sala. Wi, magwé an koumansman-an tjè mwen té kasé, èk i té ka sanm anyen pa té sa soulajé mwen, Jéhova konfòté mwen, èk i édé mwen vini pli fò. Konsa, épi èd li, mwen té sa andiwé.” Flora té santi, Jéhova té édé’y mété konfyans an li. Mé sé pa sa tousèl. I té asiwé, Jéhova té kay édé’y an tout twaka’y. Flora di i té santi menm mannyè-a Samis-la té ka santi lè i di an Sam 119:32: ‘N’ay byen pwésé pou mwen swiv koumandman’w paskè ou fè lè an tjè mwen.’

14. Apwé nou mandé Jéhova pou lisentèspwi’y, kisa nou sipozé fè?

¹⁴ Apwé ou mandé Jéhova pou ba’w lisentèspwi’y, kisa ou sipozé fè? Èben, ou sa patisipé an bagay ki sa édé’w twapé pli lisentèspwi Bondyé. Wi, ou sa fè bagay tèl kon: atandé sé mitin-lan, pwéché bon nouvèl-la, patisipé an minis-la èk li Bib-la touléjou. Lè ou li pawòl Bondyé touléjou, sa ka édé’w mèdité asou katjil Jéhova. (Filip. 4:8, 9) Kon’w ka li Bib-la, gadé pou wè, moun ki té èspéyansé sitiwasyon ki difisil, èk mèdité asou mannyè Jéhova té édé yo pou andiwé. Ès ou chonjé Sandra, nou té mansyonnen an paragraf sis (6)? Sè sala té soufè anpil paski i té ni an chay pwòblenm an lavi’y. Mi sé sa i di: “Wakont Jozèf té vwéman touché tjè mwen. Paski menm si Jozèf té ni pou aji épi anpil twaka èk enjistis, i pa té kité sa afèkté wilasyon’y épi Jéhova.”​—Jen. 39:21-23.

JÉHOVA KA SÈVI SÉ FWÈ ÈK SÈ-A POU KONFÒTÉ NOU

15. Ki moun ki sa konfòté nou? Èk an ki mannyè yo sa édé nou? (Gadé pòtwé-a osi.)

¹⁵ Lè nou ka soufè, Jéhova ka sèvi fwè èk sè pou “ankouwajé” èk konfòté nou. (Kòl. 4:8,11) Wi, sa sé yonn an sé mannyè-a Jéhova ka moutwé i vwéman enmen nou. Sé fwè èk sè nou-a ka konfòté nou lè yo pasé tan épi nou, èk lè yo ka kouté lè nou ka di yo mannyè-a nou ka santi. An plis di sa, yo pé sèvi Bib-la pou konfòté nou èk di on lapwiyè épi nou.d (Ronm 15:4) Délè, on fwè èben on sè sa édé nou chonjé katjil Jéhova. Épi sa kay édé nou pou andiwé. Épi sa pa tout; sé fwè èk sè-a pawé pou édé nou an népòt yo sa. Wi tèl kon, potjiwé on wipa ban nou lè nou an twaka.

16. Kisa nou ni pou fè, délè, pou nou wisouvwè èd hòd lézòt?

¹⁶ Pou wisouvwè èd hòd lézòt, délè, nou pé ni pou mandé pou li. I bon pou nou chonjé, sé fwè èk sè-a ni lanmityé pou nou, èk yo vlé édé. (Pwov. 17:17) Mé pitèt yo pa sav sa ki an tjè nou èk sa nou bizwen. (Pwov. 14:10) Konsa, si ou ka santi dékouwajé, ou sa palé bay on bon jan èk di yo mannyè ou ka santi. Épi ou sa fè yo sav kisa ki sa édé’w. Osi, ou sa palé épi yonn ében dé ansyen ou ka santi konfòtab épi. Adan sè ja twapé ankouwajman lè yo palé épi yonn sè ki matwité.

17. Ki dé tjalinj ki pé fè’y difisil pou nou twapé ankouwajman? Èk kisa nou ni pou fè pou nou twapé ankouwajman?

¹⁷ La ni sèten tjalinj ki pé anpéché’w wisouvwè ankouwajman. Pou ègzanp, mi yonn. La ni diféwan sitiwasyon ki sa afèkté imosyon’w. Èk annékòz di sa, i pé fè’w santi akonmsi ou vlé wèsté pa kò’w tousèl. Mi on lòt tjalinj ki pé lévé. Délè, sé fwè èk sè-a pé malkonpwann ou èben di on bagay ki ofwansé’w. (Jémz 3:2) Kanmenm, pa wèsté lwen yo, paski Jéhova sa sèvi yo pou ankouwajé’w. Annou konsidiwé ègzanp yon ansyen ki ka soufè épi dipwèsyon. Non’y sé Gavin. Mi sé sa i di: “Anpil délè, mwen pa té vlé palé, èben pasé tan épi pyès sé jan mwen-an.” Magwé sa, fwè Gavin fè éfò-a pou pasé tan épi sé fwè-a, èk byen souvan i té ka santi pli mèyè. Nou osi ni on sè, non’y sé Amy, ki di: “Sa mwen ja èspéyansé an lavi mwen ka fè’y difisil pou mwen konfyé moun. Apwézan, mwen ka apwann pou enmen èk konfyé sé fwè èk sè-a, menm kon Jéhova. Alò, mwen asiwé sa ka fè tjè Jéhova kontan. Èk osi, i ka ban mwen lajwa an tjè mwen.”

SÉ PWONMÈT JÉHOVA-A POU TAN POU VINI KA KONFÒTÉ NOU

18. (a) Kisa Jéhova ja pwonmèt pou tan pou vini? (b) Kisa nou menm ni pou fè apwézan?

¹⁸ Nou ni konfyans ki, tout sa Jéhova ja pwonmèt kay vwéman fèt. Wi, touswit, Jéhova kay tiwé tout maladi, tout penn ki an tjè nou, èk tout dlo ki an zyé nou. (Wév. 21:3, 4) An tan sala, nou pa kay chonjé sé mové bagay-la ki té fè nou soufè, paski Izaya 65:17 di: ‘Sé mové bagay sala pa kay menm vini an lidé yo èk yo pa kay vini an tjè yo non plis.’ (Izay. 65:17) Kon nou ja wè, Jéhova ka pwan ka nou lè nou ka soufè. Sé konmsi i ka ‘bandé koté-a nou blésé-a’. Wi, Papa nou Jéhova enmen nou an chay, èk i ja ban nou tout sa nou bizwen pou édé èk konfòté nou. Konsa, fè asiwé ou aksèpté èd Jéhova, “paski i ka gadé apwé’w.”​—1 Pita 5:7.