Nou Pa Janmen Pa Kò Nou

1-2. (a) Lè nou ni pwòblenm pouki nou sa di nou pa janmen pa kò nou? (b) Kisa nou kay diskité an atik sala?

LÈ NOU ni pwòblenm, pitèt nou ka santi nou pa kò nou adan an lafowé, èk nou pa sa sòti. Kanmenm nou pa ni pou aji épi pwòblenm nou pa kò nou. Paski Papa nou an syèl ka wè sé difikilté-a nou anba, èk i ka pwonmèt pou édé nou. Wi, Jéhova ka pwonmèt sé sèvant li-a: ‘Mwen kay édé’w.’—Izay. 41:10.

² Alò an atik sala nou kay diskité kat (4) mannyè Jéhova ka édé nou. (1) I ka djidé nou, (2) i ka potjiwé sa nou bizwen, (3) i ka pwotéjé nou, èk (4), i ka soulajé nou. Wi, Jéhova ka ban nou asiwans-lan ki, népòt difikilté nou ka èspéyansé, i pa kay janmen obliyé nou, èvèk i pa kay janmen anbandonnen nou. Konsa nou pa janmen pa kò nou.

JÉHOVA KA DJIDÉ NOU

3-4. Ki mannyè Jéhova ka djidé nou? (Sam 48:14)

³ Li Sam 48:14. Bon. Jéhova sav nou pa sa djidé kò nou èk nou bizwen’y pou djidé nou. Mé ki mannyè i ka djidé pèp li jòdi jou? Ében yonn an sé mannyè-a sé an Pawòl li, Bib-la. (Sam 119:105) Wi, Jéhova ka sèvi Bib-la pou édé nou pou fè bon disizyon, èk pou édé nou katjilé èk fè bagay menm kon li. Èvèk lè nou obéyi sa Jéhova ka enstwi nou an Bib-la, nou ka ni an pli mèyè lavi apwézan, èk nou ka osi ni an bèl èspwa pou viv pou tout tan.a Pou ègzanp, Jéhova ka enstwi nou mannyè pou pawdonnen lézòt èk pou pa wèsté faché épi yo. Osi i ka enstwi nou mannyè pou nou onnèt an tout bagay, èk mannyè pou enmen lézòt ofon tjè nou. (Sam 37:8; Hib. 13:18; 1 Pita 1:22) Wi, lè nou dévlòpé sé bèl kawaktè sala, nou ka vini pli mèyè pawan, pli mèyè mawi èben madanm, èk pli mèyè jan.

⁴ An plis di sa, Jéhova mété an Pawòl li wakont konsèné moun ki té ka èspéyansé difikilté, èk ki té ni santiman menm kon nou. (1 Kòr. 10:13; Jémz 5:17) Lè nou li sé wakont sala, nou ka twapé bennéfis an dé (2) mannyè. Pwenmyéman, nou ka wéyalizé lézòt té èspéyansé menm kalité difikilté-a, èk Jéhova té édé yo pou andiwé. (1 Pita 5:9) Èk dézyenman, nou ka apwann sa nou sa fè pou tjébé fò èk pou tjenn lajwa nou anba sé difikilté sala.—Ronm 15:4.

5. Ki moun Jéhova ka sèvi pou djidé nou?

⁵ Jéhova ka osi sèvi sé fwè èk sè-a pou djidé nou.b Pou ègzanp, sé ansyen-an pou sékyout-la ka vizité sé kongwigasyon-an pou ankouwajé nou. Sé diskou-a yo ka bay ka fòtifyé lafwa nou, èk ka édé nou pou wèsté an lilyon. (Twav. 15:40–16:5) Osi, sé ansyen-an an sé kongwigasyon-an ka twavay wèd pou édé chak di nou wèsté pwé Jéhova. (1 Pita 5:​2, 3) An plis di sa, pawan ka enstwi ich yo pou fè bon disizyon, pou ni bon kondwit, èk pou ni an bon wilasyon épi Jéhova. (Pwov. 22:6) Èk sé sésé-a ki ni èspéyans ka édé sé sésé-a ki pli jenn, pa bon ègzanp yo, lè yo ba yo bon konsèy, èk lè yo ankouwajé yo.—Titòs 2:​3-5.

6. Kisa nou ni pou fè pou twapé bennéfis hòd konsèy Jéhova?

⁶ Bon. Jéhova ha ban nou tout sa nou bizwen pou nou sa fè bon disizyon, èk pou ni an bon lavi. Konsa, ki mannyè nou sa moutwé apwésiyasyon pou sa i ha fè ban nou? Ében silon Pwovèb 3:​5, 6 nou ni pou ‘konfyé Jéhova épi tout tjè [nou], èk pa dépan asou lasajès [nou].’ Èk lè nou fè sa, lévanjil-la ka osi di, ‘[Jéhova] kay fè tout bagay maché byen an lavi [nou]’. Sa vlé di, i kay édé nou pou tjenn kò nou hòd pwòblenm, èk pou ni pli lakontantman an lavi nou. Wi, Jéhova konnèt èk enmen nou si tèlman, i ka ba chak di nou konsèy-la nou bizwen. Èk nou ka vwéman apwésyé sa!—Sam 32:8.

JÉHOVA KA POTJIWÉ SA NOU BOUZWEN

7. An ki diféwan mannyè Jéhova ka potjiwé sa nou bouzwen? (Filipay 4:19)

⁷ Li Filipay 4:19. Bon. Jéhova pa ka sèlman djidé nou. I ka osi benni éfò nou pou twapé manjé, had, èk an plas pou wèsté. (Maf. 6:33; 2 Tèsa. 3:12) Sé vwé, délè nou ka ni tèt cho konsèné sé bagay sala, mé Jéhova pa vlé nou bay kò nou mal tèt konsèné sé bagay sala. (Maf. 6:25) Èk sa sé paski Papa nou pa kay janmen anbandonnen nou. (Maf. 6:8; Hib. 13:5) Èvèk nou sa konfyé’y épi tout tjè nou.

8. Kisa Jéhova té fè ba David?

⁸ Katjilé asou mannyè-a Jéhova té édé David. Pou ègzanp, pou plizyè lanné i té ka kouwi hòd Wa Sòl, mé Jéhova ba David èk sé nonm li-an sa yo té bouzwen pou yo sa viv. Lè David wéfléchi asou mannyè-a Jéhova té otjipé’y tout sé lanné sala, i ékwi: ‘Mwen té jenn, èk atjwèlman mwen ja gwan, mé mwen pa janmen wè Bondyé tounen doʼy asou nonm-lan ki dwèt-la, ni mwen pa janmen wè ich li ka mandé lachawité.’ (Sam 37:25) Wi, menm kon David, pitèt ou ha wè mannyè Jéhova ha potjiwé sa ou, èk sé fwè’w èk sè’w-la bizwen diwan tan ki difisil.

9. Ki mannyè Jéhova ka potjiwé sa pèp li bizwen lè an dézas fèt? (Gadé sé pòtwé-a osi.)

⁹ Jéhova ka osi potjiwé sa pèp li bouzwen lè an dézas fèt. Pou ègzanp, diwan an gwo lafen an Jérouzalèm an pwenmyé syèk-la, sé fwè èk sè-a an diféwan koté té voyé sa sé fwè èk sè-a an Jérouzalèm té bouzwen. (Twav. 11:​27-30; Ronm 15:​25, 26) Èvèk jòdi jou, pèp Jéhova ka fè menm bagay-la. Wi, lè an dézas fèt, Jéhova ka pousé pèp li pou potjiwé sa sé fwè èk sè-a bizwen, tèl kon manjé, had, glo, èk wimèd. Yo ka osi wanjé kay èk Sal Wéyòm ki donmajé. Èk an plis di sa, yo ka sèvi Bib-la pou konsolé èk ankouwajé sé fwè èk sè-a ki pèdi kay yo, èk moun yo enmen an lanmò.c

10-11. Kisa ou apwann hòd èspéyans Boris?

¹⁰ Jéhova ka osi potjiwé ba moun ki p’òkò ka adowé’y. Èk nou vlé imité Jéhova èk gadé pou diféwan mannyè pou moutwé sé moun sala jantiyès. (Gal. 6:10) Èk lè nou fè sa, nou ka édé yo pou apwann pli konsèné nou èk Jéhova. Pou ègzanp, annou konsidiwé èspéyans yon mèt lékòl ki ka wèsté an péyi Ukraine. Non’y sé Borisd. Magwé i pa an Témwen Jéhova, i té ka toujou moutwé manmay an lékòl li ki sété Témwen Jéhova jantiyès, èk i té ka wèspèkté sa yo té ka kwè adan. Mé a kòz di ladjè-a, i désidé pou kité vilaj-la koté i té ka wèsté pou alé an lòt plas an péyi-a ki té pli sòv, èk sé fwè-a édé’y. Pli ta, Boris atandé Mémoriyal lanmò Jézi. Lè Boris katjilé asou tout sa sé fwè-a té fè ba li, i di: “Sé Témwen-an té moutwé mwen an chay jantiyès èk yo byen gadé apwé mwen. Mwen ka wimèsyé Témwen Jéhova si tèlman.”

¹¹ Nou tout sa moutwé mizéwikòd menm kon Papa nou an syèl, lè nou moutwé moun ki bizwen èd lanmityé, ki yo sé sèvant Jéhova opa. (Louk 6:​31, 36) Èk nou ni èspwa lanmityé-a nou moutwé yo kay pousé yo pou apwann pli konsèné Jéhova, èk pou sèvi’y ansanm épi nou. (1 Pita 2:12) Mé menm si yo koumansé sèvi Jéhova opa, nou kay ni lakontantman paski nou ‘ka pli kontan lè [nou] bay.’—Twav. 20:35.

JÉHOVA KA PWOTÉJÉ NOU

12. An ki mannyè Jéhova pwonmèt pou pwotéjé pèp li kon an gwoup? (Sam 91:​1, 2, 14)

¹² Li Sam 91:​1, 2, 14. Jòdi jou, Jéhova pwonmèt pou pwotéjé pèp li hòd népòt bagay ki sa donmajé wilasyon yo épi’y. Konsa i pa kay janmen kité Satan anpéché pèp li adowé’y an mannyè-a i vlé. (Jan 17:15) Èk lè gwan twibilasyon-an pété, nou sa ni konfyans-lan ki, Jéhova kay tjenn pwonmèt li pou édé nou tjenn lafwa nou fò èk pou sové nou.—Wév. 7:​9, 14.

13. An ki mannyè Jéhova ka pwotèkté chak di nou?

¹³ Bon. Jéhova ka pwotèkté chak di nou an plizyè mannyè. Pou ègzanp, i ha ban nou Bib-la pou nou sa konnèt sa ki bon èk sa ki pa bon. (Hib. 5:14) Èk lè nou swiv pwensip Bib, nou ka pwotéjé wilasyon nou épi Jéhova, nou ka pwotéjé santé nou, èk nou ka ni an pli mèyè lavi. (Sam 91:4) An plis di sa, Jéhova ban nou kongwigasyon-an ki ka édé nou pou wèsté fidèl pou li. (Izay. 32:​1, 2) Chonjé, sé fwè èk sè nou-an an kongwigasyon-an enmen Jéhova èk yo ka obéyi’y. Alò lè nou pasé tan épi yo an sé mitin-lan, an minis-la, èk an lòt diféwan mannyè, sa ka ankouwajé nou èk sa ka édé nou pou tjenn kò nou hòd sa ki mové.—Pwov. 13:20.

14. (a) Pouki Jéhova pa ka pwotéjé nou hòd tout pwòblenm nou? (b) Ki asiwans Sam 9:10 ka ban nou? (Gadé nòt-la an bout paj-la osi.)

¹⁴ An tan pasé, délè Jéhova té ka pwotéjé sèvant li hòd danjé èben hòd lanmò. Bon. Pouki i pa té fè sa an tout sitiwasyon? Èben yon wézon sé sa: Silon Ékléziyastis 9:​11, ‘mové moman èk bagay nou pa ka èspéyé ka wivé nou tout’. Osi, Jéhova ha pèwmité sèvant li pou èspéyansé pèsikasyon èk jis lanmò, pou yo moutwé Satan sé an vyé mantè. (Jòb 2:​4-6; Maf. 23:34) Èk i ka pèwmité menm bagay-la jòdi jou. Kanmenm, magwé Jéhova pa kay tiwé tout sé difikilté nou-an, nou sa ni asiwans-lan ki, i pa kay janmen tounen do’y asou sé sèvant li-a ki wèsté fidèl pou li.e—Sam 9:10.

JÉHOVA KA SOULAJÉ NOU

15. Ki mannyè Jéhova ka sèvi lapwiyè, Pawòl li, èk sé fwè èk sè-a pou soulajé nou? (2 Kòrint 1:​3, 4)

¹⁵ Li 2 Kòrint 1:​3, 4. Délè nou an lapenn, nou ka santi antjèt, ében nou ka santi dékouwajé. Pitèt ou ka èspéyansé an sitiwasyon ki ka fè’w santi ou pa kò’w. Èk pitèt ou ka santi pyèsonn pa ka kopwann mannyè ou ka santi. Mé Jéhova ka kopwann. Chonjé, i pa ka sèlman wè penn nou, i ka osi konsolé nou “an tout twakasman nou”. Mé, ki mannyè Jéhova ka konsolé nou? Ében lè nou vidé tjè nou bay Jéhova an lapwiyè, i ka ban nou an “lapé [ki si] tèlman bon pyèsonn pa sa fini konpwann li.” (Filip. 4:​6, 7) Bon. An lòt mannyè Jéhova ka konsolé nou sé lè nou li Pawòl li. Wi, an Bib-la Jéhova ka di nou ki otan i enmen nou. I ka enstwi nou mannyè pou vini savan èk i ka ban nou an bèl èspwa. Èk an plis di sa, Jéhova ka sèvi sé mitin-lan pou ankouwajé nou. Wi, an sé mitin nou-an, nou ka apwann bèl bagay an Bib-la, èk nou ka enjwi bèl asosiyasyon épi sé fwè èk sè-a ki enmen nou.

16. Kisa ou apwann hòd èspéyans Nathan èk madanm li Priscilla?

¹⁶ Bon. Pou édé nou wè mannyè Jéhova ka sèvi Bib-la pou konsolé èk ankouwajé nou, annou konsidiwé èspéyans Nathan èk madanm li Priscilla ki ka wèsté an Lanméwik. Déotwa lanné pasé, yo désidé pou alé wann sèvis koté ki bizwen pli pwoklanmatè. Nathan di: “Nou té ni konfyans-lan ki, Jéhova té kay benni éfò nou.” Kanmenm, apwé yo wivé ansayman nèf yo, yo tonbé malad èk yo koumansé èspéyansé pwòblenm lajan. Èk a kòz di sa, yo té ni pou kité ansayman-an. Mé yo té ni pwòblenm lajan toujou. Nathan di: “M’a té sa kopwann pouki Bondyé pa té benni nou kon nou kwè i té kay fè. Mwen té jis kwè pitèt mwen té fè an bagay ki pa té bon.” Kanmenm kon tan pasé, Nathan èk Priscilla wéyalizé Bondyé pa té janmen anbandonnen yo. Nathan di: “Wi, diwan tan difisil sala, Bib-la té ka ban nou ankouwajman, èk i té ka djidé nou menm kon an bon jan ki ni lasajès. Èk lè nou fiksé asou mannyè Jéhova té édé nou, pito nou fiksé asou sé difikilté-a nou té èspéyansé-a, sa ka ban nou asiwans-lan ki, i kay kontiné édé nou an tan ki ka vini.”

17. Ki mannyè Helga té wisivwè soulajman? (Gadé pòtwé-a osi.)

¹⁷ Bon. Jéhova sa osi sèvi sé fwè èk sè nou-an pou konsolé nou. Nou sa wè sa an èspéyans Helga ki ka wèsté an péyi Hungary. Pou plizyè lanné Helga té èspéyansé difikilté ki té fè’y santi antjèt èk fè’y santi i pa té vo anyen. Mé lè’y katjilé asou sé bagay-la i ja èspéyansé, Helga wéyalizé Jéhova té ka sèvi sé fwè èk sè-a pou konsolé’y. I di: “Diwan tan sala mwen té ka santi fèb paski mwen té ka twavay wèd. Mwen té ka otjipé manmay mwen ki té malad, èk mwen té ka èspéyansé lòt difikilté. Kanmenm diwan tout tan sala Jéhova té ka toujou édé mwen. Wi, chak jou an sé twant (30) lanné sala, Jéhova té tjenn pwonmèt li pou soulajé mwen. Èk byen souvan, i té ka sèvi sé fwè èk sè-a pou ankouwajé mwen épi pawòl yo. Pou ègzanp, plizyè fwa yo té ka voyé mwen tèks, ti nòt, èben yo té ka di mwen ègzaktiman sa mwen té bizwen tann a lè-a mwen té bizwen’y.”

18. Ki mannyè nou sa soulajé lézòt?

¹⁸ Nou sa swiv ègzanp Jéhova lè nou konsolé lézòt. Mé ki mannyè nou sa fè sa? Ében, nou sa moutwé pasyans lè nou ka kouté yo. Osi, nou sa palé adan an mannyè pou ankouwajé yo, èben nou sa édé yo an lòt mannyè. (Pwov. 3:27) Wi, nou vlé éséyé pou soulajé tout moun, jis moun ki p’òkò ka sèvi Jéhova. Alò lè vwézinaj nou an lapenn, yo malad, èben yo ni tèt cho, nou sa vizité yo, kouté yo, èk patajé lévanjil an Bib-la épi yo ki kay soulajé yo. Alò lè nou swiv ègzanp Jéhova, Bondyé-a “ki ka konsolé nou tout”, nou pa ka édé sèlman sé fwè èk sè nou-an, mé nou ka osi édé moun ki p’òkò ka sèvi Jéhova pou apwann pli konsèné’y.—Maf. 5:16.

JÉHOVA TOUJOU LA POU WÉDÉ NOU

19. Kisa Jéhova ka fè ban nou, èk ki mannyè nou sa fè menm kon li?

¹⁹ Bon. Jéhova vwéman mélé épi tout moun ki enmen’y. Èvèk i pa ka janmen anbandonnen nou lè nou ka èspéyansé difikilté. Anfen, menm kon an pawan ka otjipé ich li, Jéhova ka gadé apwé sèvant fidèl li. Wi, i ka djidé nou, i ka potjiwé sa nou bizwen, i ka pwotèkté nou, èk i ka soulajé nou. Èvèk nou ka swiv ègzanp Jéhova lè nou sipòté èk ankouwajé lòt moun ki ka èspéyansé difikilté. Èk menm si nou pé èspéyansé twakasman an lavi nou, nou sa ni asiwans-lan ki, Jéhova kay toujou la épi nou. Bon. Nou vlé toujou chonjé pawòl li an Izaya 41:​10, koté i di nou, ‘nou pa bizwen pè, paski i la épi nou’. Alò annou ni konfyans-lan ki, népòt sa ki fèt, nou pa janmen pa kò nou!