Sé Jenn Fwè Nou-an, Swiv Ègzanp Mak Èk Timòfi

1-2. Kisa ki té sa anpéché Mak èk Timòfi pou fè pli an sèvis Jéhova èk édé sé fwè èk sè yo-a?

SÉ JENN fwè nou-an, ès ou vlé fè pli an sèvis Jéhova èk édé sé fwè èk sè-a an kongwigasyon-an? San dout, wépons ou sé “wi”. Ében nou byen kontan pou wè mannyè an chay jenn fwè vlé fè pli! (Sam 110:3) Mé kanmenm, pitèt la ni bagay ki ka fè’y difisil pou ou fè pli an sèvis ou pou Jéhova. Pou ègzanp: ‘Ès ou pè pou fè pli paski ou pa konnèt ki mannyè lavi’w kay yé, ében pitèt paski ou pa konnèt ki koté Jéhova vlé’w wann sèvis? Ében pitèt ou pa té aksèpté yon ansayman paski ou pa té ni konfyans-lan ou té sa fè’y byen.’ Ében si sé sa, la ni an chay moun ki té ka santi menm kon ou.

² Pou ègzanp, an pwenmyé syèk-la, dé (2) jenn fwè, Mak èk Timòfi té ka santi menm kon sa. Mé menm si yo pa té konnèt ki mannyè lavi yo té kay yé, ében yo pa té santi yo té sa fè twavay-la byen, yo pa té kité sé bagay sala anpéché yo fè pli bay Jéhova. Lè Pòl èk Bannabas té envité Mak pou voyajé épi yo pou pwéché an plas ki té lwen, Mak pitèt té ka viv adan an bèl kay épi manman’y. (Twav. 12:​12, 13, 25) Kanmenm, Mak kité kay li pou i té sa fè pli bay Jéhova. Pwèmyéman i alé Antiyòk, èk pli ta, i alé diféwan plas ki té pli lwen épi Pòl èk Bannabas. (Twav. 13:​1-5) Èk lè Pòl envité Timòfi pou vin twavay épi’y, pitèt Timòfi té ka viv épi pawan’y. Bon. Timòfi té byen jenn, alò i té sa kwè i pa té ni asé èspéyans pou fè twavay sala. (Gadé 1 Kòrint 16:​10, 11 èk 1 Timòfi 4:12.) Kanmenm, i aksèpté envitasyon-an èk Jéhova benni’y an chay pou sa.—Twav. 16:​3-5.

3. (a) Ki mannyè nou sav Pòl té enmen Mak èk Timòfi? (2 Timòfi 4:​6, 9, 11) (Gadé sé pòtwé-a osi.) (b) Ki kèstyon nou kay diskité an atik sala?

³ Bon. Mak èk Timòfi apwann mannyè pou pwan ka an chay diféwan wèskonsabilité an kongwigasyon-an menm si yo té jenn. Èk Pòl té enmen sé jenn nonm sala si tèlman, lè’y apwann i té kay mò, i di yo pou vin vizité’y. (Li 2 Timòfi 4:​6, 9, 11.) Bon. Pouki Pòl té enmen Mak èk Timòfi si tèlman? Osi, ki mannyè sé jenn fwè nou-an sa swiv ègzanp yo? Èk ki mannyè konsèy Pòl sa édé sé jenn fwè nou-an jòdi jou? Ében an atik sala nou kay diskité sé kèstyon sala.

SWIV ÈGZANP MAK TWAVAY WÈD POU FÈ PLI BAY JÉHOVA ÈK POU ÉDÉ LÉZÒT

4-5. Ki mannyè Mak té moutwé i té vlé twavay wèd pou édé lézòt?

⁴ Lè nou vlé édé lézòt, nou ka twavay wèd pou édé yo, menm si délè i difisil pou fè sa. Èk sé sa Mak té fè. Pou ègzanp, lè Pòl wifizé pwan’y asou dézyenm voyaj li kon an misyonnè, san dout sa té kwazé tjè’y èk i té byen dézapwenté. (Twav. 15:​37, 38) Kanmenm, ès sa té anpéché Mak édé sé fwè’y èk sè’y-la? Mé non.

⁵ Pou ègzanp, Mak alé épi kouzen’y Bannabas pou wann sèvis an diféwan plas. Èk apipwé wonz (11) lanné pli ta, lè Pòl menm té an pwizon an Ronm, Mak té la pou édé’y. (Filém. 23, 24) Anfen, Pòl té apwésyé sipò Mak si tèlman, i di Mak sété yonn an sé moun-lan ki “ja édé mwen an chay”.—Kòl. 4:​10, 11.

6. Ki bennéfis Mak té èspéyansé paski i té ka pasé tan épi Kwityen ki té fidèl pou Jéhova pou plizyè lanné? (Gadé nòt-la an bout paj-la.)

⁶ Bon. Mak té ni an chay bèl èspéyans paski i té ka pasé tan épi Kwityen ki té fidèl pou plizyè lanné. Pou ègzanp, apwé i pasé tan épi Pòl an Ronm, i alé pasé tan épi zapòt Pita an Babilonn. Anfen, yo té vini si tèlman pwé, Pita di: ‘Mak menm kon an gason pou mwen.’ (1 Pita 5:13) Èk kon yo té ka pasé tan ansanm, Pita di Mak an chay bagay konsèné lavi Jézi èk minis li. Èk pli ta, Mak ékwi sé bagay sala an liv-la ki ka pòté non’y.a

7. Ki mannyè jenn fwè-a Sonn-Woo té swiv ègzanp Mak? (Gadé pòtwé-a osi.)

⁷ Mak té ka twavay wèd an sèvis Jéhova, èk i té ka pasé tan épi fwè èk sè ki té ni èspéyans. Alò, ki mannyè ou sa swiv ègzanp Mak? Ében pitèt ou vlé fè pli an sèvis Jéhova, pitèt ou vlé vini an sèvant ministiriyal ében yon ansyen, mé ou p’òkò kwalifyé. Si sé sa, pito ou vin dékouwajé, kontiné gadé pou diféwan bagay ou sa fè bay Jéhova èk kongwigasyon-an. Bon. Annou konsidiwé ègzanp Sonn-Woob, i ka wann sèvis apwézan kon yon ansyen an Korea. Lè i té pli jenn, i té ka konpawé kò’y épi lòt jenn fwè an kongwigasyon-an. Èk sa sé paski sé ansyen-an té ka bay sé jenn fwè sala diféwan ansayman, mé yo pa té ka ba li. Sa té kasé tjè Sonn-Woo, èk i té ka santi byen dézapwenté. Èk i di sé ansyen-an mannyè-a i té ka santi. Konsa yonn an sé ansyen-an di’y pou gadé pou sa i té sa fè pou édé lézòt, menm si moun pa té konnèt sa i té ka fè. Alò, Sonn-Woo swiv konsèy sala, èk i koumansé édé fwè èk sè ki an laj an kongwigasyon-an, èk lézòt moun ki té bizwen èd pou atandé sé mitin-lan. Apwézan lè Sonn-Woo chonjé èspéyans sala, i di: “Mwen vini kopwann sa i vwéman vlé di pou édé lézòt, èk sa ban mwen an chay lajwa.”

SWIV ÈGZANP TIMÒFI ÈK MOUTWÉ OU VWÉMAN ENMEN SÉ FWÈ’W ÈK SÈ’W-LA

8. Poutji zapòt Pòl chwazi Timòfi pou voyajé épi’y? (Filipay 2:​19-22)

⁸ Pòl té bizwen fwè ki té ni kouwaj lè’y té ka witounen an sé vil-la koté yo té pèsikité’y. Pwèmyé moun-lan i chwazi sété Saylas, ki té ka sèvi Jéhova pou an chay lanné. (Twav. 15:​22, 40) Èk pli ta, zapòt Pòl chwazi Timòfi pou voyajé épi’y. Mé pou ki wézon zapòt Pòl té chwazi Timòfi? Ében yonn an sé wézon-an sé paski sé fwè-a koté Timòfi té ka wèsté té ka di bon bagay konsèné’y. (Twav. 16:​1, 2) Èk osi Timòfi té vwéman enmen moun.—Li Filipay 2:​19-22.

9. Pouki nou sav Timòfi té vwéman enmen sé fwè èk sè-a?

⁹ Lè Timòfi té koumansé twavay épi zapòt Pòl, i té moutwé i té enmen lézòt pli pasé i té enmen kò’y. Alò lè Pòl kité Bèriya, i té sav Timòfi té kay pwan bon ka sé fwè èk sè nèf-la. (Twav. 17:​13, 14) Anfen, diwan tan sala, Timòfi té apwann an chay hòd Saylas, ki té osi wèsté an Bèriya. Mé pli ta, zapòt Pòl voyé Timòfi Tèsalonnika pa kò’y pou ankouwajé sé fwè èk sè-a an vil sala. (1 Tèsa. 3:2.) Èk plizyè lanné apwé sa, lanmityé Timòfi bay sé fwè’y èk sè’y-la té vini pli fò. Wi, i té enmen sé fwè’y èk sè’y-la si tèlman, lè yo té ka soufè i té ka jis pléwé ba yo. (Ronm 12:15; 2 Tim. 1:4) Konsa ki mannyè sé jenn fwè nou-an sa swiv ègzanp Timòfi?

10. Ki mannyè fwè Woo Jae apwann mannyè-a pou moutwé sé fwè èk sè-a i enmen yo?

¹⁰ An fwè non’y sé Woo Jae apwann mannyè-a pou moutwé sé fwè èk sè-a i enmen yo. Lè’y té pli jenn i té difisil pou’y palé épi fwè èk sè ki té pli gwan pasé’y. Konsa, lè’y wè yo an sé mitin-lan i té ka sèlman di yo bonjou. Alò yon ansyen wédé Woo Jae. I di’y, pou’y koumansé an bon konmézasyon épi sé fwè èk sè-a, i sa di yo sa’y enmen konsèné yo. Osi ansyen-an di’y, pou katjilé asou sa lòt moun-lan pitèt antéwésé adan. Bon. Woo Jae fè sa ansyen-an di’y. Èvèk jòdi i sé yon ansyen, èk i di: “Apwézan mwen sa palé épi népòt moun. Èk osi mwen kontan mwen konnèt pli konsèné sé difikilté-a sé fwè èk sè-a ka èspéyansé. Èvèk sa ka édé mwen konnèt sa sé fwè èk sè mwen-an vwéman bizwen, èk sa mwen sa fè pou édé yo.”

11. Ki mannyè sé jenn fwè-a sa moutwé sé fwè èk sè-a yo enmen yo? (Gadé pòtwé-a osi.)

¹¹ Sé jenn fwè nou-an, ou sa apwann mannyè pou moutwé sé fwè èk sè-a ou enmen yo. Pou ègzanp, lè ou an sé mitin-lan éséyé palé épi tout moun. Mandé yo ki mannyè yo yé, èk byen kouté wépons yo. Èvèk lè’w fè sa, sa kay édé’w pou konnèt sa’w sa fè pou édé yo. Pitèt ou kay apwann yon fwè èk sè ki an laj bouzwen èd pou sèvi app-la JW Library^®. Ében pitèt ou kay apwann, yo bizwen an moun pou twavay épi yo an minis-la. Alò, ès ou sa édé yo sèvi app-la, ében twavay épi yo an minis-la? Wi, lè’w édé sé fwè èk sè-a an mannyè sala ou kay vini yon bon ègzanp an kongwigasyon-an.

KONSÈY PÒL SA ÉDÉ’W

12. Ki mannyè sé jenn fwè-a sa twapé bennéfis hòd konsèy-la Pòl té bay Timòfi?

¹² Zapòt Pòl té bay Timòfi bon konsèy pou’y té sa ni an bon lavi èk pou’y té sa enjwi minis li. (1 Tim. 1:18; 2 Tim. 4:5) Konsa, si’w sé an jenn fwè, an ki mannyè konsèy Pòl sa édé’w? Ében ou sa li sé dé (2) lèt-la Pòl té ékwi Timòfi, èk gadé pou wè kisa ou sa apliké an lavi’w. Bon, annou konsidiwé yonn dé ègzanp.

13. Kisa ki kay édé’w pou wèsté fidèl pou Jéhova?

¹³ Bon zapòt Pòl di Timòfi: “Tjenn kòʼw annòd pou ou sa viv an lavi ki kay plè Bondyé.” (1 Tim. 4:7 dézyenm pa-a) Alò, kisa sa vlé di? Ében Pòl té ka di Timòfi pou wèsté fidèl pou Jéhova, èk pou viv an lavi ki kay fè Jéhova kontan. Mé i ka pwan an chay éfò pou wèsté fidèl pou Jéhova èk pou kontiné enmen’y. Èk sa sé wézon-an Pòl di, “tjenn kò’w annòd”. Lè Pòl di sa, i té ka palé konsèné moun ki té ka entwennen byen wèd pou an kous. Sé moun sala té ni pou tjenn kò yo annòd. Sa vlé di, yo té ni pou dévlopé bon labitid ki té kay édé yo pou ganyen. Èk nou ni pou fè menm bagay-la. Nou ni pou dévlopé bon labitid ki kay édé nou pou vansé pli pwé Jéhova.

14. Pou ki wézon nou ka li Bib-la? Bay yon ègzanp.

¹⁴ Bon. I enpòtan pou li Bib-la touléjou. Èk lè nou ka fè sa, nou vlé chonjé wézon-an nou ka li Bib-la sé pou nou vansé pli pwé Jéhova. Pou ègzanp, lè ou li wakont-la konsèné Jézi èk jenn nonm wich-la, ou sa mandé kò’w: ‘Kisa sa ka enstwi mwen konsèné Jéhova?’ (Mak 10:​17-22) Bon, jenn nonm-lan té kwè Jézi sété Mèsaya-a, mé i pa té ni asé lafwa pou vini disip li. Mé magwé sa, Jézi té enmen jenn nonm-lan menm si i pa té ni asé lafwa. Alò, ès sa pa ka touché tjè’w pou wè mannyè Jézi té palé bay jenn nonm-lan adan an mannyè ki té janti? Wi, i a klè, Jézi té vlé jenn nonm-lan ni an bèl lavi an sèvis Jéhova. Èk sé menm bagay-la Jéhova té vlé bay nonm-lan. (Jan 14:9) Konsa, padan ou ka katjilé asou wakont sala, katjilé asou sitiwasyon’w, èk mandé kò’w: ‘Kisa mwen ni pou fè pou vansé pli pwé Jéhova èk pou fè pli bay lézòt?’

15. Pouki i enpòtan pou an jenn fwè vin an bon ègzanp pou lézòt? (1 Timòfi 4:​12, 13)

¹⁵ Bon. Zapòt Pòl osi di Timòfi: “Sé pou ou sé an bon ègzanp bay sé sa ki ka kwè-a.” (Li 1 Timòfi 4:​12, 13.) Wi, zapòt Pòl enkouwajé Timòfi pa sèlman pou li ében enstwi byen, mé osi pou dévlopé bèl kawaktè tèl kon, lanmityé, lafwa, èk pou viv an lavi ki nèt. Èk pouki zapòt Pòl enkouwajé Timòfi pou dévlopé sé bèl kawaktè sala? Ében sa sé paski, sa an moun ka fè otan pli enpòtan pasé sa i ka di. Pou ègzanp, ann’ di ou ni pou bay an diskou asou mannyè pou fè pli an minis-la. Ès i pa kay pli ézé pou ou bay ansayman sala si ou ka fè pli mèyè’w an minis-la? Mé wi! Èk sé fwè èk sè-a ki ka kouté’w kay vlé fè sa ou ka di, paski ou sé an bon ègzanp.—1 Tim. 3:13.

16. (a) Silon 1 Timòfi 4:​12, mansyonnen senk (5) mannyè an jenn fwè sa vini an bon ègzanp. (b) Ki mannyè an jenn fwè sa vini an bon ègzanp “an mannyè [i] ka palé”?

¹⁶ An 1 Timòfi 4:​12, Pòl mansyonnen senk (5) diféwan mannyè an jenn fwè sa vini an bon ègzanp. Konsa, i kay bon pou ou fè tan pou étidyé chak an sé mannyè sala. Pou ègzanp, ann’ di ou vlé vini an bon ègzanp “an mannyè ou ka palé”. Ében ou sa katjilé asou sa ou sa di pou ou sa ankouwajé lézòt. Pou ègzanp: ‘Si ou ka viv épi pawan’w, ès ou sa di yo pli souvan ki otan ou ka apwésyé yo èk sa yo ka fè ba’w? Lè ou atandé sé mitin-lan, ès ou sa di an fwè ében an sè sa ou té enmen an pa-a i té ni? Osi, ès ou sa twavay pli wèd pou bay wépons ou an pawòl ou menm an sé mitin-lan?’ Wi, lè ou ka twavay wèd pou vini an bon ègzanp an mannyè ou ka palé, sé fwè èk sè-a kay wè ou ka vansé pli pwé Jéhova.—1 Tim. 4:15.

17. Kisa ki kay édé an jenn fwè pou fè pli bay Jéhova? (2 Timòfi 2:22)

¹⁷ Pòl di Timòfi: “Pwan pokosyon pou ou pa fè sé mové bagay-la jenn moun ka vlé fè-a.” (Li 2 Timòfi 2:22.) Pòl ankouwajé Timòfi pou wèsté lwen népòt bagay ki té sa anpéché’y fè pli bay Jéhova, ében ki té sa afébli wilasyon’y épi Jéhova. Bon. Pitèt ou wéyalizé ou ka pasé si tèlman tan asou anmizman, ou pa ni tan pou fè pli bay Jéhova. Alò, ès ou sa katjilé asou ki mizi tan ou ka pasé ka jwé vidiyo gémz, ka jwé spò, ében ou asou intannèt-la? Si sé sa, ès ou sa sèvi adan tan sala pou fè pli bay Jéhova èk lézòt? Pou ègzanp, ès ou sa édé pwan ka Sal Wéyòm-lan? Ében ès ou sa fè pli an minis-la, pitèt épi ti kabouwé piblikasyon-an? Anfen, si ou fè sé bagay sala, ou kay fè pli jan ki kay ankouwajé’w pou fè pli bay Jéhova.

LÈ OU ÉDÉ LÉZÒT OU KAY NI AN BÈL LAVI

18. Ki bennédiksyon Mak èk Timòfi té enjwi?

¹⁸ Mak èk Timòfi té fè an chay sakwifis an lavi yo pou yo té sa édé lézòt pli. Èvèk yo té enjwi an chay bèl èspéyans èk yo té ni an bèl lavi. (Twav. 20:35) Pou ègzanp, Mak té alé plas ki té byen lwen pou’y té sa édé sé fwè’y èk sè’y-la. Èk osi, i ékwi an bèl wakont konsèné lavi Jézi èk minis li. Èk Timòfi édé Pòl pou koumansé kongwigasyon, èk pou édé sé fwè èk sè-a. San dout, Jéhova té wè tout sé sakwifis-la Mak èk Timòfi té fè pou fè pli an sèvis li. Èk sé pa dé kontan sa fè tjè’y kontan.

19. Pouki jenn fwè sipozé swiv konsèy-la Pòl té bay Timòfi, èk si yo fè sa, ki kalité lavi yo kay enjwi?

¹⁹ Bon. Nou sa wè zapòt Pòl té vwéman enmen Timòfi an sé bagay-la i té ékwi’y an sé lèt li-a. Kanmenm chonjé, sété Jéhova ki sèvi Pòl pou ékwi sé lèt sala. Konsa, sé lèt-la ka moutwé mannyè Jéhova ka santi konsèné jenn fwè jòdi. Wi, Jéhova enmen’w an chay. Èk i vlé’w ni an bèl lavi an sèvis li. Konsa fè tout sa’w pé pou swiv konsèy Pòl, èk pou kontiné édé lézòt. Si ou fè sa, ou kay ni an bèl lavi apwézan, èk ou kay twapé lavi étonnèl an tan pou vini. Wi, “sé sa ki vwéman lavi.”—1 Tim. 6:​18, 19.