Lison Nou Sa Apwann An Sa Jézi Fè Diwan Sé Dènyé 40 Jou-a I Té Asou Latè-a

1-2. Lè dé (2) disip Jézi té ka alé Imayòs, kisa ki fèt?

JOU-A SÉTÉ, li sèz (16) Nizan, lanné twant twa (33) an lépòk nou. Sé disip Jézi-a té byen twis èk yo té pè. Dé (2) di yo kité Jérouzalèm pou alé Imayòs, yon vilaj ki té apipwé sèt (7) lyé hòd Jérouzalèm. Sé dé (2) disip sala té byen dékonpòté, paski sé moun-lan té djòs tjwé Jézi. Sé disip-la té ni èspwa, Jézi té kay fè an chay bon bagay bay sé Jwif-la, kon’y sété Mèsaya-a. Mé lè’y mò, i pa té sanm sa té kay fèt. Kanmenm, on bagay yo pa té ka èspéwé fèt.

² Kon yo té ka maché asou chimen-an, on nonm jwenn yo èk i koumansé maché épi yo. Sé dé (2) disip-la koumansé di nonm-lan konsèné sé mové bagay-la ki té wivé Jézi. Nonm-lan koumansé palé épi yo, èk i di yo bagay yo pa té kay janmen obliyé. Nonm-lan “koumansé dépi an liv Moziz èk i kontiné èvèk sé ékwiti sé pwòfèt-la,” pou èspliké ba yo pouki Mèsaya-a té ni pou soufè èk mò. Lè yo twa-a wivé Imayòs, sé lè sala sé dé (2) disip-la wéyalizé, nonm-lan ki té ka maché èk palé épi yo-a sété Jézi. Bondyé té wésisité’y. Ès ou sa imajiné mizi kontan sé disip-la té kontan pou apwann, Mèsaya-a té vivan!​—Louk 24:13-35.

3-4. (a) Kisa Jézi té fè bay sé disip li-a, èk ki mannyè sa édé yo? (b) Kisa nou kay diskité an atik sala? (Twav. 1:3)

³ An sé dènyé kawant (40) jou-a i té asou latè-a, Jézi pawèt douvan sé disip li-a plizyè fwa. (Li Twav. 1:3.) Lè Jézi mò, sé disip li-a té an lapenn èk yo té pè. Mé diwan sé kawant (40) jou-a apwé i wésisité, yo chanjé paski Jézi ankouwajé yo an chay. Akòz di sa, yo twapé konfyans épi tjè kontan ankò, èk yo té pawé pou kontiné pwéché épi kouwaj.a

⁴ La ni bèl lison nou sa apwann an sa Jézi té fè diwan sé kawant (40) jou sala. An atik sala, nou kay diskité twa (3) bagay enpòtan i fè diwan tan sala: (1) I ankouwajé sé disip li-a, (2) i édé yo pou konpwann lévanjil-la pli mèyè, èk (3), i entwennen yo, épi i pwépawé yo pou pli gwo wèskonsabilité yo té kay ni an sèvis Jéhova. Nou kay osi wè mannyè nou sa imité ègzanp Jézi an sé twa (3) mannyè sala.

ANKOUWAJÉ LÉZÒT

5. Pouki nou sa di, sé disip Jézi-a té bizwen ankouwajman?

⁵ Vwéman, sé disip Jézi-a té bizwen ankouwajman. Pouki nou sa di sa? Ében, adan di yo té fè gwo sakwifis pou yo té sa swiv Jézi. Pou ègzanp, adan té kité kay yo, fanmi yo, èk ti biznis yo, pou yo té sa pasé pli tan épi Jézi. (Maf. 19:27) Èk la té ni moun ki té ka maltwété adan sé disip-la senpliman paski, yo té désidé pou swiv Jézi. (Jan 9:22) Mé sé disip-la té fè sé sakwifis sala épi tout tjè yo, paskè yo pa té ni pyès dout ki, Jézi sété Mésaya-a—moun-lan yo kwè ki té kay délivwé sé jan Izwayèl-la. (Maf. 16:16) Konsa lè sé moun-lan tjwé Jézi, sé disip li-a té pè, yo té an lapenn, èvèk yo té dékouwajé, paskè yo té ka katjilé Mèsaya-a pa té kay sa fè sa yo té ka èspéwé-a. Sé sa ki fè yo té tèlman bizwen ankouwajman.

6. Kisa Jézi fè apwé i wésisité?

⁶ San dout Jézi té konpwann, i té natiwèl pou sé disip li-a santi lapenn. I té sav, wézon-an yo té twis, sé pa paski lafwa yo té fèb. Lanmò’y sété on bagay ki té soukwé yo. Konsa, menm jou-a i wésisité, i koumansé ankouwajé yo. Pou ègzanp, paditan Mari Madlenn té bò djòl twou-a ka pléwé, Jézi pawèt douvan’y. (Jan 20:11, 16) Osi, Jézi pawèt douvan sé dé (2) disip-la ki té ka alé Imayòs-la. Èvèk i pawèt douvan zapòt Pita. (Louk 24:34) Mé kisa nou sa apwann an ègzanp Jézi? Annou konsidiwé sa ki té fèt lè’y té pawèt douvan Mari Madlenn.

7. Silon wakont-la an Jan 20:11-16, kisa Jézi wè Mari ka fè, èk kisa Jézi fè pou ankouwajé’y? (Gadé pòtwé-a osi.)

⁷ Li Jan 20:11-16. Wi, li 16 Nizan, byen bonnè li bonmaten-an, adan sé madanm-lan ki té ka swiv Jézi, alé bò twou-a koté kò Jézi té yé-a. (Louk 24:1, 10) Yonn adan sé madanm-lan sété Mari Madlenn. Lè Mari wivé bò twou-a, i pa wè kò Jézi. Konsa, i alé di Pita épi Jan sa. Sé dé (2) disip sala kouwi alé bò twou-a, èk Mari swiv yo. Lè yo wè kò Jézi pa té la pou vwé, Pita épi Jan viwé lakay yo, mé Mari wèsté bò djòl twou-a ka pléwé. Mari pa té sav sa, mé Jézi té la ka gadé’y. Èk lè’y wè Mari ka pléwé, Jézi té vlé konfòté’y. Konsa, i pawèt douvan Mari, èk i bay on konmisyon enpòtan pou délivwé. I di Mari pou alé di sé zapòt-la, li Jézi, té vivan. Sa sété on bagay ki té senp, mé i ankouwajé Mari an chay.​—Jan 20:17, 18.

8. Ki mannyè nou sa imité Jézi?

⁸ Ki mannyè nou sa imité Jézi? Nou ka imité Jézi lè nou ankouwajé sé fwè èk sè nou-an pou kontiné sèvi Jéhova. Menm kon Jézi, nou ni pou òbzòvé sé difikilté-a sé fwè èk sè nou-an ka èspéyansé. Osi, sé pou nou éséyé konpwann mannyè yo ka santi, èk fè tout sa nou pé pou ankouwajé èk konfòté yo. Annou pwan ègzanp yon sè yo ka kwiyé Jocelyn. Sésé’y té mò adan on mové aksidan. Sé-a di: “Pou konmen mwa, mwen té ka santi an chay lapenn.” Kanmenm, on fwè épi madanm li, envité Jocelyn lakay yo. Yo kité’y palé konsèné sa’y té ka santi, yo pwan tan yo pou kouté’y, yo twété’y épi jantiyès, èk yo bay asiwans-lan ki, i té ni an chay valè an zyé Jéhova. Sè Jocelyn di, “Mwen santi akwèdi mwen té ka néyé, èk Jéhova sèvi fwè èk sè sala pou sové mwen. Sa yo fè ban mwen ankouwajé mwen pou kontiné sèvi Jéhova.” Nou osi sa ankouwajé lézòt, si nou kité yo palé hòd tjè yo, èk si nou pwan tan pou kouté yo byen. Lè sala, nou kay sa konfòté yo, èk édé yo pou kontiné sèvi Jéhova.​—Ronm 12:15.

ÉDÉ MOUN POU KONPWANN PAWÒL BONDYÉ

9. Ki difikilté sé disip Jézi-a té ni, èk kisa Jézi fè pou édé yo?

⁹ Sé disip Jézi-a té aksèpté Pawòl Bondyé kon lavéwité, èk yo té ka fè tout sa yo té pé pou obéyi Jéhova. (Jan 17:6) Mé, yo té ka twapé’y difisil pou konpwann, pouki Jézi té mò kon yon kwiminèl. Jézi té konnèt sé disip-la té ni lafwa, èk i té sav yo té enmen Jéhova. Mé, i wéyalizé yo té bizwen konpwann lévanjil-la pli mèyè. (Louk 9:44, 45; Jan 20:9) Konsa, i édé yo pou wézonnen asou lévanjil-la, pou yo té sa konpwann sa yo li pli byen. Annou gadé mannyè i té fè sa, lè’y jwenn sé dé (2) disip-la asou chimen-an pou alé Imayòs.

10. Ki mannyè Jézi édé sé disip li-a pou konpwann, i sété vwéman Mèsaya-a? (Louk 24:18-27)

¹⁰ Li Louk 24:18-27. Pito Jézi di sé disip-la ki moun i té yé la menm, i mandé yo kwèstyon. Pouki ou kwè i fè sa? Ében, pitèt i té vlé ba yo on chans pou di sa ki té asou lidé yo, èk an tjè yo. Èk sé sa menm yo fè. Yo di’y, yo té ka kwè Jézi té kay vini Wa an Izwayèl, èk délivwé yo anba lanmen sé jan Ronm-lan. Jézi kité yo palé. Èk lè yo fini, i sèvi lévanjil-la pou édé yo konpwann plizyè pwofèsi ki té akonpli an lanmò’y.b Pli ta, Jézi édé sé lézòt disip-la pou konpwann sé pwofèsi-sala. (Louk 24:33-48) Kisa nou sa apwann an wakont sala?

11-12. (a) Ki mannyè nou sa imité Jézi lè nou ka enstwi lavéwité-a? (Gadé sé pòtwé-a osi.) (b) Ki mannyè fwè-a ki té ka étidyé épi Nortey-a té édé’y?

¹¹ Ki mannyè nou sa imité Jézi? Pwèmyéman, lè’w ka enstwi étidyan Bib ou, mandé yo bon kwèstyon ki kay ankouwajé yo pou palé konsèné bagay ki asou lidé yo, ében bagay yo antéwésé adan. (Pwov. 20:5) Kouté yo byen. Apwé ou konpwann sitiwasyon yo, moutwé yo mannyè pou twapé vèwsé an Bib-la ki sa édé yo épi sitiwasyon-an yo ka èspéyansé-a. Èk pito ou di étidyan-an kisa pou fè, mandé’y kwèstyon pou édé’y wézonnen asou lévanjil-la, èk pou édé’y wè mannyè i sa sèvi sa’y li an Bib-la an lavi’y. Annou konsidiwé ègzanp yon fwè hòd péyi Ghana, yo ka kwiyé Nortey.

¹² Lè Nortey té ni sèz (16) lanné, i koumansé étidyé Bib-la. Mé touswit apwé sa, fanmi’y koumansé bay chalè pou fè’y doubout étidyé Bib-la. Kisa ki édé Nortey pou kontiné étidyé? Ében, fwè-a ki té ka étidyé épi’y-la té ja sèvi Mafyou chapit 10 pou édé’y konpwann, Kwityen ki vwé té kay èspéyansé pèsikasyon. Konsa, Nortey di: “Lè yo koumansé pèsikité mwen, sa ban mwen asiwans-lan ki, sa mwen té ka apwann-lan sété lavéwité-a.” Osi, fwè-a sèvi Mafyou 10:16 pou édé Nortey wè mannyè i sa pwan pokosyon, èk moutwé wèspé lè’y ka diskité Bib-la épi fanmi’y. Bon, apwé Nortey batizé, i té vlé wann sèvis kon yon piyonnè. Mé papa’y té vlé’y alé younivèsité. Pito i di Nortey kisa pou fè, fwè-a ki té ka étidyé épi’y-la édé’y pou wézonnen asou pwensip Bib, pou édé’y fè on bon disizyon. Kisa ki té wézilta-a? Ében Nortey désidé pou koumansé piyonnè. Mé, papa’y kouwi dèyè’y. I fè Nortey kité kay-la. Ki mannyè Nortey ka gadé sitiwasyon sala? Mi sé sa i di: “Mwen asiwé mwen té fè on bon disizyon.” Wi, si nou pwan tan pou édé moun apwann mannyè pou wézonnen asou lévanjil-la, nou sa édé yo pou fòtifyé lafwa yo èk kontiné sèvi Jéhova.​—Èfés. 3:16-19.

ÉDÉ FWÈ POU VINI YON “KADO”

13. Kisa Jézi té fè pou fè asiwé twavay pwèchman-an té kay kontiné apwé i alé an syèl? (Èfésòs 4:8)

¹³ Lè Jézi té asou latè-a, i fè twavay-la Papa’y té mandé’y pou fè-a byen konmifo. (Jan 17:4) Mé i pa té ka kwè, sé li yonn ki té sa fè twavay Jéhova. Konsa, diwan sé twa (3) lanné é dimi-a i té ka pwéché asou latè-a, i pwan tan pou entwennen sé disip li-a. Jézi té ni konfyans an sé disip-la. Èvèk avan i viwé an syèl, i ba yo gwo wèskonsabilité-a pou pwéché èk enstwi moun Bon Nouvèl-la, èk pou otjipé pèp Jéhova, ki si tèlman valowab an zyé’y. Pitèt adan sé disip-la p’òkò té menm ni twant (30) lanné, lè Jézi ba yo sé gwo wèskonsabilité sala. (Li Èfésòs 4:8.) Mé ki mannyè Jézi té sèvi sé dènyé kawant (40) jou-a i té asou latè-a, pou édé sé fwè sala kwalifyé pou vini, yon “kado” bay pèp li?​—Gadé nòt-la pou Èfésòs 4:8 an Tèstanman Nèf-la.

14. Diwan sé dènyé kawant (40) jou-a Jézi té asou latè-a, ki konsèy i bay sé disip li-a? (Gadé pòtwé-a osi.)

¹⁴ Épi lanmityé èk jantiyès, Jézi bay sé disip-la konsèy yo té bizwen. Pou ègzanp, i wéyalizé adan sé disip-la pa té ka vwéman kwè i té mò, èk wésisité. Konsa, i ba yo konsèy pou édé yo konnèt lavéwité-a. (Louk 24:25-27; Jan 20:27) Osi, i di yo pou fiksé pli asou té sa yo sa fè pou otjipé pèp Bondyé, pito yo fiksé asou mannyè pou fè lajan. (Jan 21:15) I fè yo chonjé, yo pa té sipozé konpawé sa yo ka fè an sèvis Jéhova, épi sa lézòt moun ka fè bay Jéhova. (Jan 21:20-22) Èvèk la té ni yonndé katjil yo té ni konsèné Wéyòm-lan, ki pa té aplon. Konsa, Jézi édé yo pou konpwann lavéwité-a konsèné Wéyòm-lan, èvèk i édé yo pou wèsté fiksé asou twavay pwèchman-an. (Twav. 1:6-8) Kisa sé ansyen-an sa apwann an ègzanp Jézi?

15-16. (a) Ki mannyè sé ansyen-an sa imité Jézi? (b) Ki konsèy yon ansyen bay Patrick, èk ki mannyè sa édé’y?

¹⁵ Ki mannyè sé ansyen-an sa imité Jézi? Ében, sé ansyen-an ni wèskonsabilité-a pou entwennen tout sé fwè-a an kongwigasyon-an, jis sé fwè-a ki jenn. Èvèk yo sipozé édé sé fwè-a pou fè pli an kongwigasyon-an.c Mé sé ansyen-an sav, sé fwè-a yo ka entwennen-an pa pawfé, èk yo kay bizwen konsèy paskè la ni an chay bagay yo ni pou apwann. Konsa, sé ansyen-an sipozé ba yo konsèy épi lanmityé èk jantiyès. Si yo fè sa, sé fwè-a yo ka entwennen-an kay apwann mannyè i enpòtan pou ni imilité, pou pwan wèskonsabilité yo sèwyé, èk pou yo toujou pawé pou édé lézòt.​—1 Tim. 3:1; 2 Tim. 2:2; 1 Pita 5:5.

¹⁶ Annou konsidiwé mannyè sé ansyen-an té ba yon fwè yo ka kwiyé Patrick, bon konsèy pou édé’y. Lè fwè Patrick té jenn, i pa té janti an mannyè-a i té ka palé, èk an mannyè-a i té ka twété moun. I té ka jis twété sé sè-a an menm mannyè-sala. Yon ansyen òbzòvé Patrick té bizwen fè chanjman. Konsa, i bay konsèy. I palé épi Patrick fèplé, mé i fè sa épi jantiyès. Mi sé sa Patrick di: “Mwen kontan ansyen-an moutwé mwen mannyè pou mwen fè chanjman. Lè mwen té ka wè lòt fwè ka wisouvwè pwivilaj an kongwigasyon-an, mwen té ka santi dékouwajé, paskè mwen té vlé sé pwivilaj sala. Mé, konsèy-la ansyen-an té ban mwen-an édé mwen pou fiksé asou mannyè mwen sa moutwé imilité, èk édé sé fwè èk sè-a, pito mwen fiksé asou pozisyon ében pwivilaj mwen sa twapé an kongwigasyon-an.” Patrick aksèpté konsèy-la, i fè pwogwé, èk an wézilta di sa, i koumansé wann sèvis kon yon ansyen lè’y té ni venn twa (23) lanné.​—Pwov. 27:9.

17. Ki mannyè Jézi moutwé i té ni konfyans an sé disip li-a?

¹⁷ Jézi bay sé disip li-a wèskonsabilité-a pou, pa sèlman pwéché Bon Nouvèl-la, mé osi pou enstwi moun. Sa vlé di, i ba yo wèskonsabilité-a pou èspliké pawòl li, épi édé moun pou konpwann enstwiksyon’y, èk swiv ègzanp li. Pitèt sé disip-la té ka kwè, yo pa té kay sa fè twavay-la Jézi té mandé yo pou fè-a. Mé Jézi té ni konfyans ki, yo té kay sa fè twavay-la. Anfen, i té tèlman asiwé yo té kay fè’y byen, i di yo: “Menm kon Papa-a voyé mwen, sé menm mannyè-a mwen ka voyé zòt.”​—Jan 20:21.

18. Ki mannyè sé ansyen-an sa imité Jézi?

¹⁸ Ki mannyè sé ansyen-an sa imité Jézi? Ansyen ki savan ka kité lézòt fè sèten twavay an kongwigasyon-an. (Filip. 2:19-22) Pou ègzanp, sé ansyen-an sa mandé sé jenn moun-lan an kongwigasyon-an pou édé nétwayé Lasal Wéyòm-lan, èk tjenn li an bon kondisyon. Èvèk lè sé ansyen-an bay on moun on bagay pou fè, yo ka entwennen moun-lan byen, èk yo ka bay moun-lan chans pou fè twavay-la. An mannyè sala yo ka moutwé yo ni konfyans ki, moun-lan kay fè twavay-la byen. Mafyou sé yon fwè ki ka wann sèvis kon ansyen. Mé i pa ni jè tan dépi i vini yon ansyen. Fwè sala di, i vwéman apwésyé mannyè sé ansyen-an té ka bay entwennman, èk mannyè yo té ka moutwé yo té ni konfyans ki, i té kay fè sa yo entwennen’y pou fè-a byen. Fwè Mafyou di ankò: “Lè mwen té fè lèwè, yo té ka édé mwen pou apwann hòd lèwè mwen, èk wè mannyè pou mwen fè twavay-la pli mèyè lòt kou-a.”d

19. Kisa nou sipozé ditèminé pou fè?

¹⁹ Wi, Jézi sèvi sé dènyé kawant (40) jou-a i té asou latè-a pou ankouwajé, enstwi, èk entwennen lézòt. Annou ditèminé pou swiv ègzanp li, èk fè menm bagay-la. Èvèk nou sav Jézi kay édé nou pou fè sa, paskè i pwonmèt: “Mwen kay toujou la épi’w pou jis an bout latè-a.”​—Maf. 28:20.