Imité Jézi An Minis Ou

1. Lè’y vini pou twavay pwèchman-an, ki diféwans la ni ant sèvant Jéhova, épi lòt moun ki ka kwiyé kò yo Kwityen?

SÈVANT JÉHOVA kontan pwéché. Wi, yo ka fè tout sa yo pé pou pwéché Bon Nouvèl-la, èk yo byen zélé. Sa sé yonn an sé diféwans-lan la ni ant sèvant Jéhova, èk lézòt moun ki ka kwiyé kò yo Kwityen. (Titòs 2:14) Mé délè, adan di nou pé twapé’y wèd pou kontiné ni djèwté kon nou ka pwéché. Pitèt nou ka santi menm kon yon ansyen, lè’y té di: “Délè mwen annèk pa ni gou-a pou pwéché.”

2. Pou ki wézon nou pé enjwi fè lòt bagay an sèvis Jéhova, pli pasé nou ka enjwi minis-la?

² La ni plizyè diféwan bagay nou sa fè an sèvis Jéhova èk délè, nou pé twapé nou ka enjwi fè adan sé bagay sala pli pasé nou ka enjwi minis-la. Mé pouki? Ében, lè nou ka twavay ansanm épi sé fwè èk sè-a pou bati ében wanjé Lasal Wéyòm, pou pòté soukou apwé on dézas, ében pou ankouwajé yonn a lòt, nou ka wè bon wézilta pou sa nou ka fè-a la menm. Nou ka enjwi lapé-a épi lanmityé-a nou ni-an, èk nou sav sé fwè èk sè-a ka apwésyé twavay nou. Mé lè nou ka pwéché, nou pa ka wè bon wézilta-a la menm. Anfen, nou pé pwéché pou plizyè lanné adan on tèwitwa, èk sé byen pé moun ki aksèpté konmisyon-an. La ni moun ki pé opozé nou. Èvèk nou sav, kon bout-la ka vini pli pwé, sé pli òpozisyon nou kay twapé. (Maf. 10:22) Konsa, ki sa ki kay édé nou pou vini pli zélé an minis nou?

3. Pouki nou sa di, Jézi té menm kon jèwè jaden-an Louk 13:6-9 ka mansyonnen-an?

³ Lè Jézi té asou latè-a, i té zélé an minis li. Wi, i kontiné twavay byen wèd pou pwéché Bon Nouvèl-la. (Li Louk 13:6-9.) An yon ilistwasyon, Jézi té palé konsèné on jèwè jaden, èk on pyé fwitaj. Èk magwé pyé fwitaj-la pa janmen pòté fwi an sé twa (3) lanné-a jèwè-a té ka otjipé’y-la, jèwè-a pa janmen pèd èspwa ki, pyé-a té kay pòté. An menm mannyè-a, magwé sé byen pé Jwif ki té aksèpté Bon Nouvèl-la an sé twa (3) lanné-a i té pwéché ba yo-a, Jézi pa janmen vini dékouwajé, èvèk i pa janmen pèd èspwa. Pito sa, i kontiné pwéché. Wi, i té byen zélé, èk i fè pli éfò pou pwéché bay sé Jwif-la èk pou édé yo vini disip li. Konsa, la ni an chay lison nou sa apwann an ègzanp Jézi, ki sa édé nou pou vini pli zélé an minis nou.

4. Lè’y vini pou ègzanp Jézi an minis-la, ki kat (4) bagay nou kay diskité?

⁴ An atik sala, nou kay diskité mannyè Jézi té zélé an minis li, sitou diwan dènyé sis (6) mwa-a i té asou latè-a. (Gadé nòt-la “After these things” pou Louk 10:1 an Annglé, an Bib NWT.) Si nou swiv ègzanp Jézi, nou kay sa kontiné zélé an minis nou. Konsa, annou gadé kat (4) bagay nou sa apwann an ègzanp Jézi. (1) I té fiksé asou sa Jéhova té vlé’y fè, (2) I té ka konpwann sé pwofèsi-a ki an Bib-la, èk i té ka twavay an ling épi yo, (3) I té ni konfyans Jéhova té kay édé’y an minis li, èk (4) I té ni èspwa, la té ni moun ki té kay kouté Bon Nouvèl-la.

JÉZI TÉ FIKSÉ ASOU TWAVAY-LA JÉHOVA TÉ VLÉ’Y FÈ-A

5. Ki mannyè Jézi moutwé i té ka fiksé asou twavay-la Jéhova té vlé y fè-a?

⁵ Jézi té sav, Bondyé té vlé’y pwéché ‘Bon Nouvèl-la konsèné Wéyòm-lan.’ Konsa, i fiksé atansyon’y asou twavay sala. (Louk 4:43) Wi, sé sa ki té pli enpòtan an lavi’y. Konsa, i twavay wèd pou enstwi moun konsèné Wéyòm-lan, èvèk i té byen zélé an twavay sala. Èk, menm si i pa té wèsté djè tan asou latè-a, Jézi kontiné ka alé “an sé vil-la èk [an sé] vilaj-la” pou enstwi sé moun-lan. (Louk 13:22) Osi, i pwan tan pou entwennen pli disip, pou yo té sa édé’y fè twavay pwèchman-an.​—Louk 10:1.

6. Magwé la ni an chay bagay nou sa fè bay Jéhova, kisa ki pwensipal twavay-la i ban nou pou fè-a? (Gadé pòtwé-a osi.)

⁶ Jòdi jou osi, twavay pwèchman-an sé pwensipal twavay-la Jéhova épi Jézi vlé nou fè. (Maf. 24:14; 28:19, 20) Èk kon nou té di talè-a, la ni an chay diféwan bagay nou sa fè an sèvis Jéhova. Mé, tout twavay nou fè bay Jéhova, ni pou fè épi twavay pwèchman-an. Pou ègzanp, annou di ou ka twavay pou bati Lasal Wéyòm, ében ou ka twavay an Bèfèl. Ében, nou ka bati Lasal Wéyòm paski moun ki aksèpté lavéwité-a bizwen ni plas kon sa, pou yo sa adowé Jéhova. Èvèk tout twavay-la ki ka fèt an plas kon Bèfèl, sé pou édé nou an twavay pwèchman-an. Osi, twavay-la nou ka fè pou édé sé fwè èk sè-a apwé on dézas, ka fè’y posib pou yo kontiné atandé sé mitin-lan èk pwéché. Konsa, i bon pou nou toujou chonjé mannyè twavay pwèchman-an enpòtan. Paskè a lè sala, nou kay toujou fè tout sa nou pé pou nou kontiné pwéché. Mi sé sa yon ansyen yo ka kwiyé Yanòsh, hòd péyi Hungary di asou sa. I di: “Twavay pwèchman-an sé pwensipal ansayman-an Jéhova ban nou pou fè. La pa ni anyen ki sa wiplasé’y. Mwen ka toujou tjenn sa an lidé mwen.”

7. Pouki Jéhova vlé nou kontiné pwéché Bon Nouvèl-la? (1 Timòfi 2:3, 4)

⁷ Bon, yon bagay ki sa édé nou pou vini pli zélé an minis-la, sé si nou apwann pou gadé moun menm mannyè-a Jéhova ka gadé yo. Mé, kisa sa vlé di? Ében Jéhova enmen moun, èk i vlé yo twapé lavi étonnèl. Konsa i ka fè’y posib pou yo tann Bon Nouvèl-la èk vini jan’y. (Li 1 Timòfi 2:3, 4. NWT.) Wi, Bon Nouvèl-la sa sové lavi moun. Sé pou wézon sala Jéhova ka moutwé nou mannyè pou nou palé épi moun konsèné lavéwité-a. Pou ègzanp, ti liv-la Enmen Moun—Èk Édé Yo Vini Disip Jézi, ka moutwé nou mannyè pou koumansé konmézasyon épi moun, pou yo sa étidyé Bib-la, èk vini disip Jézi. Èk menm si sé moun-lan nou ka palé épi-a pa aksèpté lavéwité-a apwézan, pitèt yo kay ni òpòtyounité-a pou fè sa avan gwan twibilasyon-an fini. Wi, pitèt an tan pou vini yo kay chonjé sa nou té ka di yo konsèné Bib-la, èk sa pé pousé yo pou koumansé adowé Jéhova. Mé sèl mannyè sa kay fèt, sé si nou fè menm kon Jéhova. Sa vlé di, nou ni pou enmen moun èk kontiné fè tout sa nou pé pou édé yo apwann lavéwité-a.

JÉZI TÉ KA KONPWANN SÉ PWOFÈSI-A KI AN BIB-LA, ÈK I TÉ KA TWAVAY AN LING ÉPI YO

8. Kon Jézi té ka konpwann pwofèsi Bib, ki mannyè sa édé’y pou sèvi tan’y byen?

⁸ Jézi té ka konpwann sé pwofèsi-a ki an Bib-la. Konsa, i té sav i té ni twa lanné é dimi pou fè minis li. (Dann. 9:26, 27) Èk i té konnèt kisa pwofèsi Bib té ja di konsèné ki lè, èk ki mannyè i té kay mò. (Louk 18:31-34) Kon’y té konnèt sé bagay sala, Jézi sèvi tan’y an pli mèyè mannyè-a. Wi, i kontiné pwéché pou’y té sa fini twavay-la Bondyé té ba’y pou fè-a, èk i té byen zélé.

9. Si nou vwéman konpwann pwofèsi Bib, ki mannyè nou kay sèvi tan nou?

⁹ Si nou mèdité asou pwofèsi Bib ki ka akonpli apwézan, èk lòt pwofèsi ki kay akonpli touswit, nou kay wéyalizé, lè-a byen pwé pou Jéhova détwi vyé sistenm sala. Konsa, nou kay vlé fè tout sa nou pé pou pwéché Bon Nouvèl-la avan bout-la wivé. Mé ki mannyè nou sav bout-la pwé? Ében pwofèsi Bib té ja dékwi kalité atitid-la moun té kay ni, èk sé bagay-la ki té kay fèt an sé dènyé jou-a. Èk nou ka wè sé bagay sala épi dé zyé nou. Osi, pwofèsi Bib ka moutwé, wa soud-la épi wa nòd-la té kay goumen épi yonn a lòt ‘an dènyé tan-an.’ (Dann. 11:40) Sa vlé di an tan nou, gouvèdman Anglo America té kay goumen kont gouvèdman Russia, épi lòt gouvèdman ki ka sipòté Russia. Bon, on lòt bagay nou ka konpwann sé sa, dé (2) pyé imaj-la pwofèt Dannyèl ka palé konsèné an Dannyèl 2:43-45, ka wépwézanté gouvèdman Anglo America. Konsa, nou asiwé Wéyòm Bondyé kay détwi tout lòt gouvèdman touswit. Wi, pwofèsi Bib ka moutwé, nou ka viv an sé dènyé jou-a. Konsa, apwézan sé lè-a pou nou sèvi tan nou an pli mèyè mannyè-a ki posib. Sa vlé di, nou ni pou sèvi tan nou pou pwéché Bon Nouvèl-la.

10. An ki lòt mannyè pwofèsi Bib ka ankouwajé nou pou kontiné pwéché?

¹⁰ Annou gadé dé (2) lòt mannyè pwofèsi Bib ka ankouwajé nou pou pwéché. Pwèmyéman, silon pwofèsi Bib, Bondyé kay fè an chay bon bagay ban nou an tan pou vini. Lè nou apwann konsèné sé bèl bagay sala, sé pa dé anvi nou ka anvi pou sépawé bèl konmisyon sala épi lézòt. Dézyenman, pwofèsi Bib ka moutwé, Jéhova ka édé nou pou fè twavay pwèchman-an. Èk sa ka ban nou kouwaj pou nou kontiné pwéché. Mi sé sa yonndé an sé fwè èk sè nou-an ka di asou sa. Carrie sé on sésé ki ka wann sèvis an péyi Dominican Republic. I di: “Lè mwen katjilé asou sé bèl bagay-la Jéhova kay fè ban nou an tan pou vini, sa ka pousé mwen pou pwéché, paski mwen vlé fè moun konnèt sa sé bèl bagay sala. Èk lè mwen gadé sé kalité pwoblenm-lan moun ka èspéyansé jòdi jou, mwen sav yo bizwen konnèt, Jéhova pwonmèt pou fè bon bagay ba yo.” On sè ki ka wèsté an péyi Hungary di: “Menm si on moun pa ka sanm i kay aksèpté Bon Nouvèl-la mwen ka palé épi’y, paskè kon Izaya 11:6-9 ka moutwé, épi èd Jéhova, népòt moun sa chanjé.” Èvèk, on fwè hòd péyi Zambia yo ka kwiyé Christopher di: “Kon Mak 13:10 té di, Bon Nouvèl-la ka simen oliwon latè-a. Pou mwen, i sé on lonnè pou édé akonpli pwofèsi sala.” Konsa, ou menm, ki pwofèsi Bib ki ka ankouwajé’w pou kontiné pwéché?

JÉZI TÉ NI KONFYANS KI, JÉHOVA TÉ KAY ÉDÉ’Y AN MINIS LI

11. Pouki Jézi té bizwen èd Jéhova pou’y kontiné pwéché? (Louk 12:49, 53)

¹¹ La pa ni pyèsonn ki té sa palé pli mèyè pasé Jézi. I té ka pwan bon pokosyon épi pawòl li, èk i té ka toujou moutwé moun wèspé lè’y té ka pwéché. Mé, magwé sa, i té sav konmisyon Wéyòm-lan té kay mennen konfizyon, paskè i té kay fè adan moun faché èk yo té kay òpozé’y. (Li Louk 12:49, 53.) Anfen, sé mèt wilizyon-an té jis vlé tjwé Jézi, senpliman paski yo té hayi konmisyon-an i té ka pwéché-a. (Jan 8:59; 10:31, 39) Konsa épi tout òpozisyon sala, Jézi té bizwen èd Jéhova pou’y té sa kontiné pwéché zélé. Èk i té asiwé Jéhova té ka sipòté’y, paskè mi sé sa i di: “Papa-a . . . la épi mwen, èk i pa janmen kité mwen [pa kò mwen], paski mwen toujou ka fè sa ki ka plè’y.”​—Jan 8:16, 29.

12. Kisa Jézi té fè pou’y pwépawé sé disip li-a pou yo sa kontiné pwéché magwé òpozisyon?

¹² Pou pwépawé sé disip li-a pou kontiné pwéché magwé òpozisyon, Jézi té ka toujou fè yo chonjé, yo té sa dépan asou Jéhova pou sipò. Plizyè fwa i ba yo asiwans-lan ki, menm si yo èspéyansé pèsikasyon, Jéhova té kay ba yo èd-la yo té bizwen-an. (Maf. 10:18-20; Louk 12:11, 12) Mé, i osi ankouwajé yo pou pwan bon pokosyon. (Maf. 10:16; Louk 10:3) Èk i vèti yo. I di yo pou pa fòsé pyèsonn pou kouté Bon Nouvèl-la. (Louk 10:10, 11) Osi, i di yo, si moun té ka pèsikité yo adan yon vil, kité vil-la èk kouwi alé adan an lòt vil. (Maf. 10:23) Konsa, Jézi té ni an chay konfyans an Jéhova, èk i té byen zélé, mé i té ka fè tout sa’y té pé pou’y pa mété kò’y an danjé.​—Jan 11:53, 54.

13. Ki mannyè ou sa asiwé Jéhova kay édé’w an twavay pwèchman-an?

¹³ Jòdi jou, la ni an chay moun ki ka òpozé twavay pwèchman-an. Konsa san èd Jéhova, nou pa té kay sa janmen kontiné déklawé Bon Nouvèl-la. (Wév. 12:17) Mé, ki mannyè nou sa asiwé Jéhova kay édé nou an twavay sala? Ében, Jézi té pwédyé pou mandé Bondyé pou édé sé zapòt li-a. Nou sa li lapwiyè sala an Jan chapit 17. Èk nou sav Jéhova té wéponn lapwiyè sala, paskè wakont-lan an liv Twavay ka moutwé, magwé sé zapòt-la té èspéyansé an chay pèsikasyon, yo pa janmen doubout pwéché. Mé Jézi pa té annèk pwédyé bay sé zapòt-la tousèl. I pwédyé bay tout moun ki té kay aksèpté Bon Nouvèl-la. Wi, Jézi ja mandé Jéhova pou édé’w. Konsa, ou sa asiwé Jéhova kay édé’w pou’w kontiné pwéché zélé, menm kon’y té édé sé zapòt-la.​—Jan 17:11, 15, 20.

14. Ki mannyè nou sav nou kay sa kontiné pwéché zélé? (Gadé pòtwé-a osi.)

¹⁴ Lavéwité-a sé sa, kon nou ka vini pli pwé bout-la, pitèt i kay vini pli difisil pou nou pwéché Bon Nouvèl-la. Kanmenm, Jézi ban nou asiwans-lan ki, nou kay twapé sa nou bizwen pou nou sa kontiné pwéché zélé. (Louk 21:12-15) Chonjé, sé Jéhova ki té bay sé fwè èk sè-a an pwèmyé syèk-la kouway-la yo té bizwen, pou yo té sa kontiné zélé an twavay pwèchman-an. Èk an tan nou jòdi, adan sé fwè èk sè nou-an ka viv an péyi koté twavay nou anba bann. Mé, yo ka dépan asou Jéhova, èk i ka édé yo pou kontiné pwéché Bon Nouvèl-la. Konsa, si nou dépan asou Jéhova, nou sa asiwé i kay édé nou osi. Wi, Jéhova kay ban nou sa nou bizwen pou nou sa “pwéché tout konmisyon-an i ban nou pou pwéché-a,” èk pou nou sa fè minis-la an mannyè-a i vlé’y fèt. (2 Tim. 4:17) Konsa, nou ka fè menm kon Jézi épi sé disip li-a. Nou ka pwéché zélé, èk nou ka kontan lè moun aksèpté Bon Nouvèl-la. Mé, nou pa ka fòsé pyèsonn pou kouté, èk nou pa ka chikannen épi pyèsonn nonplis.

JÉZI TÉ NI ÈSPWA KI, LA TÉ NI MOUN KI TÉ KAY KOUTÉ BON NOUVÈL-LA

15. Kisa ki ka moutwé Jézi té ni on bon atitid lè’y vini pou minis li?

¹⁵ Jézi té ni on bon atitid lè’y vini pou minis li. I pa janmen pèd èspwa ki, la té ni moun ki té kay kouté Bon Nouvèl-la. Pou ègzanp, tou pwé finisman lanné 30 an lépòk nou, Jézi té sa wè la té ni an chay moun ki té pawé pou kouté Bon Nouvèl-la. I konpawé sé moun sala épi fwi mi, ki té pawé pou moun wékòlté yo. (Jan 4:35) Èk apipwé yon lanné apwé sa, i di sé disip li-a, Sé moun-lan té “menm kon gwenn ki [té] pawé pou anmasé.” (Maf. 9:37, 38) Pli ta ankò, Jézi di sé disip-la, “Wékòt-la pawé. . . . Mandé mèt wékòt-la pou voyé twavayè pou anmasé wékòt-la.” (Louk 10:2) Bon atitid sala édé Jézi pou kontiné pwéché zélé. Èk lè moun aksèpté konmisyon-an i té ka pwéché-a, sa té ka bay an chay tjè kontan.​—Louk 10:21.

16. Ki ilistwasyon Jézi sèvi pou édé sé disip li-a ni on atitid ki pozitiv, lè’y vini pou minis-la? (Louk 13:18-21) (Gadé pòtwé-a osi.)

¹⁶ Jézi enstwi sé disip li-a pou ni on atitid ki té pozitiv lè’y vini pou konmisyon-an yo té ka pwéché-a, paskè kalité atitid sala té kay édé yo pou wèsté zélé an twavay pwèchman-an. Annou konsidiwé dé (2) ilistwasyon Jézi té sèvi pou édé sé disip li-a pou konpwann, minis yo té kay mennen bon wézilta. (Li Louk 13:18-21.) An pwèmyé ilistwasyon-an, Jézi konpawé konmisyon Wéyòm-lan épi on ti gwenn moutad ki ka pwofité, jistan i vini on gwo pyé bwa. Sa té vlé di, an chay moun té kay aksèpté konmisyon-an, èk la pa té ni anyen ki té sa anpéché sa fèt. An dézyenm ilistwasyon-an, Jézi konpawé konmisyon Wéyòm-lan épi lèlven. Menm kon lèlven ka simen an fawin fwans pou fè’y vini on gwo mòso lapat, konmisyon Wéyòm-lan té kay simen oliwon latè-a. Èk moun té kay fè gwo chanjman an lavi yo, lè yo aksèpté’y, menm si i pwan on ti tan pou lézòt wè sé chanjman-an yo ka fè-a. Konsa, Jézi édé sé disip li-a pou konpwann, konmisyon-an yo té ka pwéché-a té kay édé an chay moun.

17. Ki bon wézon nou ni, pou nou kontiné zélé an twavay pwèchman-an?

¹⁷ Jòdi jou osi, lè nou katjilé asou kantité moun Bon Nouvèl-la ka édé oliwon latè-a, sa ka ankouwajé nou pou kontiné pwéché. Katjilé asou sa: chak lanné, plizyè milyon moun ka dakò pou étidyé Bib-la épi Tèmwen Jéhova, èvèk yo ka atandé Mémoriyal lanmò Jézi épi nou. Osi, plizyè milyon moun ka batizé èk yo ka koumansé fè twavay pwèchman-an épi nou. Bon, nou pa konnèt konmen moun ankò ki kay aksèpté konmisyon Wéyòm-lan. Mé sa nou konnèt sé sa, Jéhova ka sanblé on gwan latilyé moun ki kay chapé anba gwan twibilasyon-an ki tou pwé-a. (Wév. 7:9, 14) Wi, Jéhova sé Mèt wékòt-la, èk i ni konfyans ki, la ni an chay moun ki kay aksèpté konmisyon-an. Konsa, sa ka ban nou bon wézon pou nou kontiné pwéché.

18. Lè moun gadé mannyè nou ka fè minis nou, kisa nou vlé yo òbzòvé?

¹⁸ Sé disip Jézi-a té ka toujou pwéché Bon Nouvèl-la, èk yo té ka fè sa byen zélé. Anfen, lè moun té wè mannyè sé zapòt-la pa té ka mété dlo an bouch yo pou yo déklawé Bon Nouvèl-la, yo wèsté bouch gwan ouvè. Èk sé moun sala wéyalizé, sé zapòt sala “té ka maché épi Jézi.” (Twav. 4:13) Konsa, annou dépan asou Jéhova, èk annou pwan kouwaj èk kontiné zélé an twavay pwèchman-an. Lè sala, moun kay òbzòvé, nou ka imité Jézi.