Imité Mannyè Jéhova Èk Jézi Ka Katjilé

1-2. (a) Kisa Jézi di ki pli enpòtan koumandman-an? (b) Kisa Jézi té ditèminé pou fè?

JÉZI di, “Konmandman-an ki pli enpòtan-an sé sa, ‘. . . . Ou oblijé enmen Bondyé Senyèʼw épi tout tjèʼw, épi tout lam ou, épi tout lidéʼw épi èk tout kouway ou.’” (Mak 12:29, 30) Bon. Ès ou té òbzòvé nou ni pou enmen Jéhova épi tout lidé nou? Èben, sa ni pou fè épi mannyè-a nou ka katjilé. Magwé nou pa sa janmen fini konpwann tout katjil Jéhova, si nou étidyé mannyè-a Jézi té ka katjilé sa kay édé nou pou konpwann katjil Jéhova pli mèyè. Wi, Jézi konnèt ègzaktiman mannyè-a Papa’y ka katjilé, épi i ka byen imité’y.​—1 Kòr. 2:16.

² Jézi enmen Jéhova épi tout lidé’y. I té sav sa Jéhova té vlé’y fè, èk i té ditèminé pou kouté’y menm si i té ni pou soufè pou lapéti sa ki dwèt. Alò, Jézi wèsté fiksé asou divwa Papa’y, èk la pa té ni anyen an lavi’y ki té pli enpòtan pou li pasé sa!

3. Kisa Pita té apwann hòd Jézi? Épi kisa i té ankouwajé sé Kwityen-an pou fè? (1 Pita 4:1)

³ Pita épi sé lézòt zapòt-la té ni on bèl pwivilaj pou pasé tan épi Jézi èk pou apwann mannyè-a i ka katjilé. Lè Pita ékwi pwèmyé lèt li, i ankouwajé sé kwityen-an pou pwépawé kò yo pou yo sa ni menm lidé épi Jézi. (Li 1 Pita 4:1.) Bon, lè Pita sèvi èspwèsyon-an “sé pou zòt pwépawé”, i té ka dékwi sòlda ki pwépawé kò yo pou goumen. Alò, an menm mannyè-a, si Kwityen apwann pou katjilé menm kon Jézi, yo kay ni tout sa yo bizwen pou goumen kont mové dézi, èk latè-a Satan ka kondwi-a.​—2 Kòr. 10:3-5; Èfés. 6:12.

4. Kisa nou kay diskité an atik sala?

⁴ Apwézan, nou kay ègzanminé mannyè Jézi ka katjilé, èk nou kay wè kouman nou sa imité’y. Wi, nou kay wè mannyè nou sa (1) imité mannyè Jéhova ka katjilé, ki kay édé nou tout ni “yon sèl lidé” (2) moutwé imilité, èk (3) moutwé bon syans lè nou apiyé asou Jéhova an lapwiyè.

IMITÉ MANNYÈ JÉHOVA KA KATJILÉ

5. Asou ki lokazyon Pita pa té wiflèkté katjil Jéhova?

⁵ Annou konsidiwé yon lokazyon lè Pita pa té wiflèkté katjil Jéhova. Ou wè, Jézi té di sé zapòt li-a: ‘Mwen ni pou alé Jérouzalèm, èk sé chèf wilizyon-an kay awété mwen èk kay fè mwen soufè an chay, èk tjwé mwen.’ (Maf. 16:21) Alò, lè Pita tann sa, i té twouvé’y difisil pou kwè Jéhova té kay kité yo tjwé Jézi, Mèsaya-a, ki té kay sové jan Izwayèl. (Maf. 16:16) Konsa, “Pita mennen Jézi asou koté épi i diʼy, “Kité Bondyé pwézèvéʼw sa, Mèt! Sa pa sipozé wivéʼw pyès!”” (Maf. 16:22) Bon. Jézi pa té dakò épi sa Pita té di’y-la paski Pita pa té ni katjil Jéhova.

6. Ki mannyè Jézi moutwé i ni katjil Jéhova?

⁶ Jézi byen konnèt mannyè Papa’y ka katjilé, èk i ka imité’y. Sé pou wézon sala, Jézi té di Pita: “Sòti bò mwen! Ou vlé fè twavay Satan! Ou sé on bawad an chimen mwen. Lidé sala pa sòti an Bondyé. Sé lézòm ki ka katjilé kon sa.” (Maf. 16:23) Jézi té sav, pou akonpli divwa Jéhova, i té ni pou soufè èk mò. Konsa, menm si Pita té ni bon atansyon, Jézi widjèkté konsèy li. Alò, Pita apwann on bon lison. Wi, i té ni pou katjilé menm kon Jéhova ka katjilé. Anfen, sa sé on lison nou tout sipozé apwann.

7. Ki mannyè Pita moutwé i té ka katjilé kon Jéhova? (Gadé pòtwé-a.)

⁷ Pli ta, Pita té moutwé i té vlé katjilé menm kon Jéhova. Bon. Lè-a té wivé pou moun ki pa Jwif vini pèp Bondyé. Alò, Jéhova diwèkté Pita pou alé pwéché bay Kòniliyòs, ki té kay anpanmi sé pwenmyé moun-lan ki pa té Jwif pou vini Kwityen. Bagay-la sé sa, sé Jwif-la pa té “sipozé mélé épi an moun ki pa Jwif ében ni mété pyé lakay li.” Konsa, Pita té ni pou chanjé katjil li pou i té sa pwéché bay moun ki pa té Jwif. Wi, i té ni pou koumansé katjilé menm kon Jéhova. Èk lè Kòniliyòs té mandé Pita pou vizité’y, i alé san i “mandé pyès kwèsyon.” (Twav. 10:28, 29) Épi i pwéché bay Kòniliyòs èpi fanmi’y. Èk kisa ki té wézilta-a? Yo tout batizé èk vini Kwityen.​—Twav. 10:21-23, 34, 35, 44-48.

8. Ki mannyè nou sa moutwé nou ka katjilé menm kon Jéhova? (1 Pita 3:8)

⁸ Plizyé lanné apwé, Pita ankouwajé sé Kwityen-an, épi i di yo pou ni “yon sèl lidé.” (Li 1 Pita 3:8.) Jòdi-a, nou menm kon pèp Jéhova, sa ni “yon sèl lidé” si nou imité mannyè-a Jéhova ka katjilé, menm kon nou apwann li an Bib-la. Pou ègzanp, Jézi ankouwajé sé disip li-a pou ‘fè gouvèdman Bondyé bagay-la ki pli enpòtan an lavi yo’. (Maf. 6:33 NWT) Bon. Épi konsèy sala an lidé, annou di on fwè èben on sè an kongwigasyon-an désidé pou koumansé wann sèvis kon on piyonnè wéglé. Alò nou pa sipozé di’y i ni pou chwazi on lavi ki pli ézé. Mé pito, nou vlé di’y bagay pozitiv konsèné chwa-a i fè-a; épi ofè pou édé’y.

MOUTWÉ IMILITÉ

9-10. Ki mannyè Jézi moutwé i ni an chay imilité?

⁹ Swè-a avan yo tjwé Jézi, i enstwi Pita èk sé lézòt zapòt-la on lison ki byen enpòtan konsèné imilité. Jézi voyé Pita èk Jan pou pwépawé dènyé wipa-a i té kay manjé épi yo-a. Alò, yo té ni pou fè asiwé la té ni on bésin épi on sèvyèt pou lavé èk swiyé pyé sé moun-lan lè yo antwé kay-la. Mé ki moun ki té kay abésé kò’y pou fè twavay sala?

¹⁰ Sa fè kò lonng, Jézi abésé kò’y èk i fè twavay-la on sèvant té sipozé fè. “I tiwé gòl-la i té ni anlèʼy-la, èk i mawé an sèvyèt an wenʼy. Apwé sa, i vidé dlo adan an bésin èk i koumansé lavé pyé sé disip li-a èk i swiyéʼy èk sèvyèt-la i té ni an wenʼy-lan.” (Jan 13:4, 5) Anfen, sa sipwi sé zapòt li-a. Épi pitèt i té pwan a chay tan pou lavé pyé sé douz (12) zapòt li-a. Mé Jézi abésé kò’y, èk i fè tout twavay sala. I jis lavé pyé Jida, nonm-lan ki té kay twayi’y-la. Apwé Jézi fini lavé pyé yo, i di sé disip-la: “Ès zòt konpwann sa mwen fini fè bay zòt-la? Zòt ka kwiyé mwen Titja èk Senyè. Zòt byen palé, paski sé sa mwen yé pou vwé. Mé si mwen ki Senyèʼw èk Titjaʼw ja abésé kò mwen pou lavé pyéʼw, zòt sipozé lavé pyé yonn a lòt tou.”​—Jan 13:12-14.

11. Ki mannyè Pita moutwé i té apwann imilité? (1 Pita 5:5) (Gadé pòtwé-a osi.)

¹¹ Ès Pita té apwann hòd ègzanp Jézi? Wi. Pou ègzanp, apwé Jézi witounen an syèl, Pita fè on miwak koté i djéwi on nonm ki té enfim an dé pyé’y dépi i té fèt. (Twav. 1:8, 9; 3:2, 6-8) On gwan latilyé moun té wè miwak sala. Konsa, yo asanblé owon Pita. (Twav. 3:11) Mé Pita pa té vlé tout atansyon sala hòd sé moun-nan, magwé i té lévé adan on kilti koté gwan pozisyon té enpòtan pou an chay moun. Anfen, Pita abésé kò’y épi i bay Jéhova èk Jézi tout lonnè-a. Épi i di sé moun-nan: “Sé pouvwa-a ki an non Jézi Kwi-a ki bay nonm enfim sala kouway. Sa fèt paski nou ni lafwa an Jézi.” (Twav. 3:12-16) Pli ta, Pita pitèt té chonjé mannyè Jézi té mawé on sèvyèt owon wen’y èk lavé pyé sé zapòt li-a, lè i ékwi sé Kwityen-an èk di yo: “Zòt tout sipozé abésé kò zòt anba yonn a lòt.”(Li 1 Pita 5:5.) Wi, Pita té apwann, èk i swiv ègzanp Jézi lè i vini pou imilité.

12. Ki mannyè nou sa moutwé nou ka bésé kò nou?

¹² Nou sa swiv ègzanp Pita èk kontiné pou abésé kò nou. Mé chonjé, on moun ki ka abésé kò’y, pa ni pou fè sa pa bouch li tousèl. I ka fè pli pasé annèk di bagay ki ka fè moun kwè i sé on moun ki ka abésé kò’y. Anfen, lè Pita di “abésé kò zòt”, sa osi ni pou fè épi mannyè-a nou ka katjilé konsèné kò nou èk konsèné lézòt. Alò, lè nou fè bagay bay lézòt, nou pa ka fè’y pou yo admiwé nou. Non nou ka fè’y paski nou enmen Jéhova èk nou enmen moun. Osi, lè nou sèvi Jéhova épi tjè kontan, èk fè tout sa nou pé bay fwè èk sè nou, menm si moun wè opa, nou ka moutwé, nou ka abésé kò nou.​—Maf. 6:1-4.

‘SÉ POU OU NI BON SYANS’

13. Kisa i vlé di pou “ni bon syans”?

¹³ Kisa i vlé di pou “ni bon syans”? (1 Pita 4:7 NWT) An Kwityen ki ni bon syans ka fè tout sa i pé pou fè disizyon ki ka wiflèkté katjil Jéhova. Moun-lan sav, la pa ni anyen an lavi ki pli enpòtan pasé wilasyon’y épi Jéhova. I pa ka kwè i twò enpòtan, èk i sav i pa ni wépons-lan pou tout bagay. Konsa, i ka dépan asou Jéhova, èk i ka toujou pwédyé èk mandé’y pou diwèksyon.

14. Asou ki lokazyon Pita pa té apiyé asou Jéhova?

¹⁴ Dènyè swè-a avan Jézi mò, i vèti sé disip li-a. I di yo: “Òswè-a menm zòt tout kay kouwi kité mwen. . . . Pita wéponn Jézi [épi an pil konfyans] épi i di, “Menm si tout lézòt abandonnenʼw, mwen pa kay janmen kouwi kitéʼw!”” Pli ta menm swè-a, Jézi bay adan sé disip li-a konsèy sala: “Pa kité sonmèy pwanʼw, épi pwédyé pouʼw pa tonbé anba tantasyon.” (Maf. 26:31, 33, 41) Alò, si Pita té swiv konsèy sala èk apiyé asou Jéhova, i té kay santi bwav asé pou di i sété yon disip Jézi. Mé pito, i di i pa konnèt Jézi. Èk apwé sa, i wigwété sa i té di-a an chay.​—Maf. 26:69-75.

15. Koumannyè Jézi moutwé, i ka dépan asou Jéhova konplètman?

¹⁵ Magwé Jézi té pawfé i té ka dépan asou Jéhova konplètman. I té ka toujou pwédyé pou diwèksyon. Anfen, swè-a avan i mò, Jézi kontiné ka pwédyé ba Papa’y Jéhova. Épi sa ba’y kouwaj-la pou fè divwa Papa’y. (Maf. 26:39, 42, 44; Jan 18:4, 5) Konsa, nou asiwé Pita pa té janmen obliyé, Jézi té pwédyé konmen kou diwan dènyé swè’y asou latè-a. San dout, èspéyans sala té oblijé wété épi Pita pou tout lavi’y.

16. Ki mannyè Pita moutwé i té ‘ni bon syans’? (1 Pita 4:7)

¹⁶ Kon tan pasé, Pita apiyé asou Jéhova pli, an lapwiyè. Pou ègzanp, apwé Jézi wésisité, i bay Pita épi sé lézòt zapòt-la asiwans-lan ki, yo té kay wisouvwè lèspwi Bondyé pou yo té sa pwéché Bon Nouvèl-la. Kanmenm, Jézi mandé yo pou wèsté an Jérouzalèm jistan sa fèt. (Louk 24:49; Twav. 1:4, 5) Bon. Kisa Pita té ka fè paditan i té ka èspéwé? Èben, Pita èk sé lézòt Kwityen-an “té ka asanblé souvan pou pwédyé ansanm.” (Twav. 1:13, 14) Épi pli ta, an pwèmyé lèt li, Pita ankouwajé sé Kwityen-an pou ni bon sans èk apiyé asou Jéhova an lapwiyè. (Li 1 Pita 4:7.) Wi, Pita vini on fwè ki té matwité. Èk paski i dévèlopé bon sans, i té sa édé èk fòtifyé sé fwè èk sè-a.​—Gal. 2:9.

17. Menm si nou ni abilité-a pou fè bagay pa kò nou, kisa nou ni pou kontiné fè? (Gadé pòtwé-a osi.)

¹⁷ Bon, pou ni bon sans nou ni pou apwoché Bondyé souvan an lapwiyè. Wi, nou ni pou kontiné pwédyé bay Jéhova pou èd menm si nou kwè i ézé pou fè sèten bagay pa kò nou. Osi, lè nou ni on disizyon ki enpòtan pou fè, nou ka pwédyé bay Jéhova pou djid, paski nou sav sé li ki konnèt sa ki bon pou nou.

18. Menm kon Pita, kisa nou vlé kontiné fè?

¹⁸ Nou ka wimèsyé Jéhova pis i fè nou adan an mannyè pou nou sa imité kawaktè’y. (Jen. 1:26) Mé nou sav, nou pa kay sa imité kawaktè Jéhova konplètman. (Izay. 55:9) Kanmenm, menm kon Pita, nou vlé kontiné pou apwann katjilé menm kon Jéhova ka katjilé, abésé kò nou, épi moutwé nou ni bon sans.