Menm Kon Pita, Ou Sa Tjenbé Fò Èk Pa Ladjé

1. Ki miwak Jézi té fè? Èk ki mannyè Pita té santi kò’y lè i wè miwak sala?

PITA twavay tout lannwit ka péché, épi i pa tjenbé anyen. Kanmenm, Jézi di’y: “Alé ti miyèt pli lwen an gwan dlo, èk ou èk sé kanmawad ou-a ladjé senn zòt an dlo pou zòt tjenbé pwéson.” (Louk 5:4) Pita pa té kwè i té kay tjenbé pwéson, mé paski Jézi palé ba’y, i kouté épi i ladjé senn-an an glo-a. Apwé yo fè sa, yo tjenbé tèlman pwéson, “senn-an koumansé déchiwé”. Lè yo vini wéyalizé sé on miwak Jézi fè, Pita épi sé lézòt nonm-lan ki té épi’y-la, “té étonnen”. Konsa, Pita “tonbé an pyé Jézi épi i di, “Alé, Senyè, paski mwen sé an nonm ki mové.”” (Louk 5:6-9) Sé konmsi Pita té santi i pa té vo pou an pwézans Jézi.

2. Pouki i bon pou nou konsidiwé ègzanp Pita?

² Wi, Pita té on nonm ki pa té pawfé. Sé lévanjil-la ka di nou délè i fè bagay épi di bagay i té wigwété. Ès sa ja wivé’w? Ès ou ka goumen épi on mové kawaktè? Èben ès ou ka lité épi on fèblès pou an chay tan? Si sa sé sitiwasyon’w, ‘pwan tjè!’ paski ègzanp Pita sa konfòté’w. An ki mannyè? Lè nou konpwann sa Pita té ni pou lité épi, sa ka édé nou wè; Jéhova sav nou pa pawfé. Épi i vlé nou tjenbé fò èk pa ladjé menm si nou ni fèblès. Wi, Jéhova pa té oblijé mété wakont Pita an Bib-la, mé i mété’y la pou nou sa apwann bon lison.​—2 Tim. 3:16, 17.

3. Pouki nou ni pou tjenbé fò èk pa ladjé?

³ Pouki i nésésè pou nou tjenbé fò èk pa ladjé? Sé paski pli nou pwatiké pou fè on bagay, sé pli nou kay fè’y pli byen. Pou ègzanp, si yon moun vlé apwann jwé tanbou, i pé pwan’y an chay mwa pou’y apwann jwé byen. Diwan tan sala, i kay fè lèwè. Mé si i kontiné ka pwatiké, i kay fè pli byen. Èk apwé on tan, i kay apwann pou jwé tanbou-a byen. Mé ès sa vlé di i pa kay janmen fè on lèwè ankò? Mé non. Délè i pé fè ti lèwè lè i ka jwé tanbou-a. Mé sa pa kay anpéché’y jwé’y. I ka kontiné pwatiké jis an tan i vini bon adan’y. An menm mannyè-a, nou pé santi nou ganyen on bout on fèblès, mé nou ka twouvé kò nou ka fè lèwè sala ankò. Mé ès sa vlé di nou pa kay kontiné tjenbé èk nou kay ladjé? Mé non. Nou ni pou wéyalizé, nou pa pawfé, èk délè nou tout ka di èben fè bagay nou ka wigwété pli ta. Mé si nou kontiné tjenbé fò èk pa ladjé, Jéhova kay édé nou pou fè pwogwé. (1 Pita 5:10) Bon. Apwézan, annou konsidiwé ègzanp Pita èk mannyè i tjenbé fò èk pa té ladjé. Wi, Pita fè bagay èk di bagay i té wigwété, mé konpasyon Jézi té édé’y kontiné sèvi Jéhova.

BAGAY PITA TÉ NI POU LITÉ ÉPI ÈK BENNÉDIKSYON’Y

4. (a) An Louk 5:8, kisa Simon Pita di konsèné kò’y? (b) Ki asiwans Jézi ba’y an vèwsé 10?

⁴ Li Louk 5:5-10. Lévanjil-la pa té di nou pouki Pita di i sé on nonm ki mové, ében ki kalté péché i té ni an lidé. Mé pitèt, i té ja fè déotwa mové péché an lavi’y. Èk pitèt Pita té ka santi i pa té bon asé. Alò, Jézi té sav Pita té pè. Konsa, Jézi di’y: “Pa pè.” Osi, Jézi té sav Pita té sa wèsté fidèl pou li. Èk i té ni konfyans an li. Konfyans-lan Jézi té ni an Pita pa té mal plasé; paski pli ta Simon Pita èk fwè’y Androu, kité twavay yo kon péchè èk koumansé swiv Jézi. Wi, sa sété on gwo disizyon yo fè èk Jéhova benni yo toubonnman.​—Mak 1:16-18.

5. Pita pa té kité lèwè i té ja fè ében santiman négativ, anpéché’y swiv Jézi. Konsa, ki bennédiksyon i té enjwi?

⁵ Pita té ni an chay bèl èspéyans kon on disip Jézi. I wè Jézi djéwi moun ki té malad, tiwé vyé lèspwi, épi i jis wè’y lévé moun ki té mò.b (Maf. 8:14-17; Mak 5:37, 41, 42) Mé anpanmi tout sa, la té ni on bagay Pita té wè èk i pa té janmen obliyé. Wi, sa sété yon vizyon koté i té wè gwan pouvwa-a Jézi té kay ni kon wa an Wéyòm Bondyé. Pita té byen étonnen lè i wè mizi laglwa Jézi té kay ni. (Mak 9:1-8; 2 Pita 1:16-18) Pita sav i pa té kay janmen ni bèl èspéyans sala, si i pa té ka swiv Jézi. Konsa, Pita té byen kontan i pa té kité lèwè i té ja fè ében santiman négativ, annékòz li pou pèd sé bennédiksyon sala!

6. Magwé Pita té ka swiv Jézi, ès i té ni pou lité épi fèblès? Ba yon ègzanp.

⁶ Magwé Pita té ka swiv Jézi, sa pa té vlé di i pa té ni pou aji épi fèblès li toujou. Pou ègzanp, lè Jézi té ka di yo konsèné mannyè i té kay soufè èk mò pou akonpli sa ki ékwi an Bib-la, Pita di Jézi sa pa kay fèt. (Mak 8:31-33) Asou on lòt lokazyon, Pita èk sé lézòt zapòt-la té ka chikannen asou chimen-an konsèné kilès anpami yo ki pli enpòtan. Sa pa té pwèmyé fwa-a yo té fè sa. (Mak 9:33, 34) Osi, dènyé swè-a avan Jézi mò, Pita hédi sab li, épi “i fwapé sèvant pli ho chèf pwèt-la. I fè zòwèy dwèt li pwan lavòl”. (Jan 18:10) Èk menm swè sala, Pita té tèlman pè, pou twa fwa, i di i pa konnèt bon jan’y, Jézi. (Mak 14:66-72) Apwé Pita fè lèwè sala, i “chonjé sa Jézi té diʼy-la, “Avan kòk-la chanté, ou kay di twa fwa ou pa konnèt mwen.” Pita pati épi i koumansé pléwé akwèdi tjèʼy té kay waché.”​—Maf. 26:75.

7. Apwé Jézi wésisité, ki òpòtyounité i té bay Pita?

⁷ Jézi pa té abandonnen jan’y, Pita, ki té dékouwajé èk té ka santi akonmsi tjè’y té kay waché. Anfen, apwé Jézi wésisité, i bay Pita òpòtyounité-a pou moutwé’y i vwéman enmen’y. Jézi di’y, Pita, “Swen sé mouton mwen-an.” (Jan 21:15-17) Ès Pita té aksèpté envitasyon sala? Absoliman! Pita té byen kontan pou swen sé mouton Jézi-a. Konsa, i té ni lonnè-a pou té pwèmyé anpanmi sé moun-lan ki té annonté épi lisentèspwi Bondyé.

8. Pouki Pòl té ni pou kowijé Pita?

⁸ Jis apwé Pita vini on Kwityen ki annonté, i té ni pou aji épi fèblès li toujou. An lanné twant sis (36) an lépòk nou, Bondyé voyé Pita pou alé jwenn Kòniliyòs ki pa té on Jwif. Èk la, Bondyé annonté Kòniliyòs épi lisentèspwi’y. Alò, sa té ka moutwé “Bondyé pa ni pwéféwans pou pyèsonn.” Konsa, sé sa ki pa té Jwif, té sa vini on pa an kongwigasyon-an. (Twav. 10:34, 44, 45) Bon. Apwé sa, Pita koumansé manjé épi sa ki pa té Jwif-la, on bagay i pa té janmen fè avan sa. (Gal. 2:12) Kanmenm, adan sé Kwityen-an ki té Jwif té ka santi, moun ki Jwif pa sipozé manjé épi moun ki pa Jwif. Konsa, lè adan di yo vini Antiyòk, Pita doubout manjé épi sé fwè-a ki pa té Jwif. Pitèt i té pè paski i pa té vlé ofwansé sé Kwityen sala. Konsa, lè zapòt Pòl té wè Pita té ka “swiv yo an ipokwizi sala”, i kowijé’y douvan tout sé fwè èk sè-a. (Gal. 2:13, 14) Kanmenm, menm si Pita té fè lèwè, i kontiné tjébé fò. Mé kèstyon-an sé sa: kisa ki édé’y tjenbé fò?

KISA KI ÉDÉ PITA TJENBÉ FÒ ÉPI PA LADJÉ?

9. Ki mannyè Jan 6:68, 69 ka moutwé fidèlité Pita?

⁹ Pita té fidèl, épi i pa kité anyen anpéché’y swiv Jézi. Pou ègzanp, Jézi té di on pawòl sé disip li-a pa té konpwann. Épi pito yo mandé Jézi pou èspliké ba yo, yo koumansé bougonnen, èk yo fè disizyon-an pou doubout swiv li. Kanmenm, Pita pa té bizwen èsplikasyon. Pa wépons li, i moutwé fidèlité’y an Jézi. (Li Jan 6:68, 69.) Konsa, nou ka wè Pita té fidèl. Èk i té sav Jézi sé moun-an ki “ni pawòl-la ki ka bay moun lavi étonnèl”. Wi, fidèlité Pita té édé’y pou tjenbé fò épi pa ladjé.

10. Ki mannyè Jézi moutwé i té ni konfyans an Pita? (Gadé pòtwé-a osi.)

¹⁰ Jézi pa té janmen abandonnen Pita. Anfen, dènyé swè-a avan Jézi mò, Jézi té sav Pita, épi sé lézòt zapòt-la té kay abandonnen’y. Kanmenm, Jézi té moutwé i té ni konfyans an Pita. Èk i té asiwé Pita té kay witounen èk wèsté fidèl pou li. I di Pita: “Lè ou kay witounen a mwen, sé fo ou bay sé lézòt disip-la fòs épi kouway an lafwa yo.” Wi, sa té on bon ankouwajman pou li. (Louk 22:31, 32) Bon. Jézi té konpwann, “Lèspwi [Pita té] vlé fè sa ki dwèt mé [lachè té] fèb.” (Mak 14:38) Konsa, jis apwé Pita di i pa konnèt bon jan’y, Jézi pa té ladjé’y. Alò, apwé Jézi té wésisité, i pawèt douvan Pita pou moutwé’y, i pa té abandonnen’y. (Mak 16:7; Louk 24:34; 1 Kòr. 15:5) Sa oblijé té ankouwajé Pita èk édé’y pou tjenbé fò!

11. Kisa Jézi té fè pou bay Pita asiwans-lan ki Jéhova té kay otjipé’y èk sipòté’y?

¹¹ Jézi bay Pita asiwans-lan ki Jéhova kay otjipé’y èk sipòté’y. Chonjé, pli bonnè an atik-la nou diskité miwak-la Jézi té fè ki té annékòz Pita èk sé lézòt nonm-lan ki té épi’y-la tjenbé an pil pwéson. Yon fwa ankò, apwé Jézi wésisité, i fè on lòt miwak ki té annékòz Pita èk sé lézòt zapòt-la pou tjenbé an pil pwéson. (Jan 21:4-6) San dout, miwak sala té oblijé fòtifyé asiwans Pita ki Jéhova té kay potjiwé labizwen’y. Pitèt sa té fè Pita chonjé pawòl Jézi, koté i té di Jéhova kay potjiwé bay moun ki ka “fè gouvèdman Bondyé bagay-la ki pli enpòtan an lavi [yo].” (Maf. 6:33 NWT) Konsa, lè Pita katjilé asou sa Jézi té di-a, sa édé’y mété twavay pwèchman-an pwèmyé an lavi’y. Asou jou Pentikòs nanné twant twa (33) an lépòk nou, Pita pwéché èk kouwaj èk i édé apipwé twa mil (3,000) moun pou aksèpté bon nouvèl-la. (Twav. 2:14, 37-41) I osi édé moun ki sòti lòt nasyon pou aksèpté Jézi. (Twav. 8:14-17; 10:44-48) Wi, Jéhova vwéman sèvi Pita adan on gwo mannyè pou mennen ni sa ki Jwif ni sa ki pa Jwif an kongwigasyon’y.

KISA NOU KA APWANN?

12. Kisa Jéhova sa fè ban nou si nou ka lité épi on fèblès pou an chay tan?

¹² Lavi sala tèlman wèd èk i difisil pou nou aji épi’y. Mé i pli difisil pou nou aji épi’y lè nou ni on fèblès nou ka lité épi pou an chay tan. Mé Jéhova sa édé nou pou tjenbé fò. Èk mi on bagay ki ka fèt délè. Délè, nou pé santi fèblès nou pli wèd pasé sa Pita té ni pou aji épi. Mé, sé pou nou toujou chonjé, Jéhova sa ban nou fòs-la pou nou pa ladjé. (Sam 94:17-19) Pou ègzanp, yon fwè té on malmanman pou plizyè lanné avan i apwann lavéwité-a. Kanmenm, i désidé pou chanjé lavi’y, kité vyé pwatik sala dèyè, èk viv a ling épi pwensip Bib. Mé ès sa vlé di i pa té ni pou goumen épi mové dézi-a pou kouché épi on nonm ankò? Mé non, la té ni lè i té ni pou goumen épi mové dézi sala. Bon. Kisa ki édé’y pou tjenbé fò? I di: “Jéhova ka fòtifyé nou....Épi lèspwi’y, mwen ja vini apwann i posib pou kontiné viv mannyè-a Jéhova vlé nou viv-la. Alò, menm si mwen pa pawfé, Jéhova ka sèvi mwen, èk i ka kontiné ban mwen fòs.”

13. (a) Ki mannyè nou sa imité ègzanp Pita an Twavay 4:13, 29, 31? (b) Ki lèwè Horst té fè? Èk ki mannyè pawan’y té édé’y? (Gadé pòtwé-a osi.)

¹³ Kon nou té wè, Pita té ja fè détwa lèwè ki té byen sèwyé paski i té ni pèwèz lézòm. Mé paski Pita té ka pwédyé pou bwavté, i té sa aji épi kouwaj. (Li Twav. 4:13, 29, 31.) Alò, nou osi sa ganyen a bout pèwèz nou. Pou ègzanp annou konsidiwé on jenn fwè, non’y sé Horst, ki té ka viv an Germany diwan Dézyenm Gwo Ladjè-a. A lè sala, lè moun té ka di yonn a lòt bonjou, yo té sipozé di: “Heil Hitler!”, sa vlé di “Hitler té kay sové nou”. Épi i pa té diféwan an lékòl-la Horst té ka alé-a. Konsa, Horst té anba an chay chalè. Èk annékòz di sa, li menm té ka di “Hail Hitlèr!” menm si i té sav i pa té bon pou fè sa. Wi, i té ni pèwèz titja’y èk sé manmay lékòl-la. Mé kisa pawan’y té fè lè yo té vini sav sa? Pito yo té lévé faché èk bat li, pawan’y pwédyé épi’y ka mandé Jéhova pou ba’y kouwaj. Épi èd Jéhova èk pawan’y, Horst twapé fòs-la pou doubout fò. Épi pli ta, i òbsòvé: “Jéhova pa té janmen abandonnen’y.”c

14. Ki mannyè sé ansyen-an sa ankouwajé sé fwè èk sè-a ki dékouwajé?

¹⁴ Jéhova èk Jézi Kwi pa kay janmen ladjé nou. Pouki nou ka di sa? Èben, gadé sa ki té fèt épi Pita. Apwé Pita di, i pa konnèt bon jan’y, Jézi, i té ni pou fè on gwo disizyon. I té ni pou désidé pou kò’y menm, ès i té kay doubout swiv Jézi? Èben ès i té kay kontiné swiv li? Mé Jézi té ja sipliyé Jéhova an lapwiyè pou lafwa Pita pa vini fèb. Konsa, Jézi di Pita konsèné lapwiyè-a i té fè ba li-a, èk i di’y i té ni konfyans-lan Pita té kay fòtifyé sé fwè’y-la. (Louk 22:31, 32) Alò, sa oblijé té bay Pita fòs lè i chonjé pawòl Jézi! Bon. Lè nou ni pou fè on gwo disizyon an lavi nou, Jéhova sa sèvi sé ansyen-an pou ban nou asiwans-lan nou bizwen-an pou wèsté fidèl pou li. (Èfés. 4:8, 11) Épi sé sa Paul, an ansyen pou an chay tan, té ka éséyé fè lè i té ka konfòté sé fwè èk sè-a ki té dékouwajé. Délè, sé fwè èk sè sala té ka santi a konmsi yo vlé doubout sèvi Jéhova. Mé i té ka mandé yo pou katjilé asou kisa Jéhova té fè ba yo, pou yo té vini an lavéwité-a èk pou yo té sa ni on bon wilasyon épi’y. Èk apwé sa, i ka ba yo asiwans-lan ki Jéhova enmen yo èk i ni lanmityé fidèl pou yo, èk i pa kay janmen kité yo. Bon. Fwè Paul di: “Mwen ja wè an chay fwè èk sè ki té dékouwajé, mé épi èd Jéhova yo ka kontiné pou tjenbé fò.”

15. Listwa Pita èk Fwè Horst ka moutwé Jéhova kay fè kisa ban nou? (Mafyou 6:33)

¹⁵ Menm kon Jéhova té otjipé èk sipòté Pita èk sé lézòt zapòt-la, i osi kay fè menm bagay-la ban nou lè nou mété twavay pwèchman-an pwenmyé an lavi nou. (Maf. 6:33) Ou chonjé fwè Horst nou té mansyonnen an pawagwaf twèz (13)? Apwé Dézyenm Gwo Ladjè-a, i té ka katjilé pou agwandi sèvis li bay Jéhova èk vini on piyonnè wéglé. Mé fwè-a té byen pòv. Èk i pa té kwè i té sa fè asé lajan pou édé’y wèsté an sèvis an plen. Konsa, kisa i té kay fè? I désidé pou tèsté Jéhova pou wè si Jéhova té kay vwéman potjiwé ba’y. Konsa, pou simenn-lan ansyen-an pou sékyout-la té ka vizité, fwè Horst alé an minis-la touléjou. Bon. An bout simenn-lan, i té byen sipwi lè ansyen-an pou sékyout-la té ba’y on anvlòp ki té plen lajan. Ansyen-an pou sékyout-la pa té di’y ki moun ki té ba’y lajan-an. Kanmenm, anvlòp-la té ni asé lajan pou fwè Horst piyonnè pou détwa mwa. Fwè Horst té gadé kado sala kon asiwans-lan ki Jéhova té kay otjipé’y èk sipòté’y. Konsa, pou lèstan lavi’y, i kontiné mété lentéwé “gouvèdman Bondyé” pwèmyé an lavi’y. ​—Mala. 3:10.

16. Pouki i bon pou nou apwann pli konsèné Pita èk sa i ékwi an sé dé (2) lèt li-a?

¹⁶ Pita té mandé Jézi pou alé, mé i té byen kontan Jézi pa té alé. Anfen, Jézi té kontiné entwennen Pita pou’y sa wèsté fidèl èk vini on bon ègzanp pou Kwityen. Konsa, nou sa apwann an chay bon lison hòd entwennman-an Jézi té bay Pita. Alò, Pita ékwi adan sé lison-an i té apwann-lan an sé dé lèt-la i té voyé bay sé kongwigasyon-an pwèmyé syèk-la. Épi nou ni sé dé (2) lèt sala an Bib-la jòdi jou. Konsa, an lòt atik-la nou kay diskité adan sé lison-an nou sa apwann an sé dé (2) lèt Pita-a, èk mannyè nou sa apliké yo an lavi nou.