Sé Lison-an Nou Sa Apwann An Sé Dé Lèt Pita-a

1. Touswit avan Pita mò, kisa Bondyé sèvi’y pou fè?

ZAPÒT Pita té sav i té kay mò touswit. Ou wè, i té sèvi Jéhova fidèlman pou konmen lanné. I té la épi Jézi ka pwéché. Èk sé li ki koumansé twavay pwédikasyon-an bay moun ki pa té Jwif. Osi, Pita té on manm pwensipal konmité-a. Wi, Pita té fè an chay an sèvis Jéhova. Mé menm si i té ka mò touswit, Jéhova ba’y pli twavay pou fè. Konsa, apipwé swasant dé pou swasant kat an lépòk nou, (62-64 C.E.) Bondyé sèvi’y pou ékwi dé (2) lèt—pwèmyé èk dézyenm liv Pita. Pita té ni konfyans, sé lèt sala té kay édé sé Kwityen-an apwé i mò.​—2 Pita 1:12-15.

2. Pouki sé Kwityen-an té bizwen sé dé (2) lèt Pita-a?

² Zapòt Pita té ékwi sé dé (2) lèt li-a lè sé fwè’y-la té ka “soufè tout sòt kalité soufwans.” (1 Pita 1:6) Lè sa-a, nonm méchan té ka éséyé mennen fo lésisyon èk kondwit ki pa nèt an kongwigasyon-an. (2 Pita 2:1, 2, 14) Èk toutalè, sé Kwityen-an ki té ka wèsté an Jérouzalèm té kay èspéyansé “finisman tout bagay”. Sa vlé di, lawmé Ronm té kay détwi Jérouzalèm èk tanp-lan. (1 Pita 4:7) San dout, sé dé (2) lèt Pita-a, té kay édé sé Kwityen-an pou wèsté fidèl magwé yo té kay èspéyansé difikilté. Osi, sé dé (2) lèt sala, té kay édé yo wè mannyè yo té sa pwépawé pou sé difikilté-a ki té kay vini.b

3. Pouki i bon pou ègzanminé sé dé (2) lèt Pita-a?

³ Magwé Pita té ékwi sé dé (2) lèt li-a bay sé Kwityen-an an pwèmyé syèk-la, Jéhova fè asiwé nou ni yo an Bib-la jòdi-a. Konsa, jòdi jou, nou sa jwenn bennéfis an sa zapòt-la té ékwi. (Ronm 15:4) Menm kon sé kwityen-an an pwèmyé syèk-la nou ka viv anpanmi moun koté ki kondwit yo pa nèt. Osi nou ka èspéyansé difikilté ki ka fè’y wèd pou nou sèvi Jéhova. An plis di sa, toutalè nou kay èspéyansé on twibilasyon ki kay pli gwav pasé sa sé Jwif-la té èspéyansé lè lawmé Ronm détwi Jérouzalèm èk tanp li. Bon. Lè nou ègzanminé sé dé (2) lèt Pita-a, nou kay twapé détwa lison ki enpòtan ki kay édé nou. Sé lison sala, kay édé nou pou (1) pwépawé pou bout sistenm sala, (2) pa pè sa moun ka kwè konsèné nou èben sa yo pé fè nou, èk (3) pou nou ni an chay lanmityé pou yonn a lòt. Sé lison sala, sa édé sé ansyen-an wè mannyè yo sa édé sé fwè èk sè-a an kongwigasyon-an wèsté fidèl.

KONTINÉ ÈSPÉWÉ

4. Kon nou wè 2 Pita 3:3, 4, kisa ki pé fébli lafwa nou?

⁴ Nou ka viv anpanmi moun ki pa ka kwè sa Bib-la ka di konsèné tan ki ka vini. Konsa, moun pé pwan nou sèvi wizib paski pou plizyè lanné nou ka pwéché bout sistèm sala tou pwé. Adan moun ka di, ‘Dépi tan yo fèt yo ka tann sa èk pyès bagay p’òkò chanjé. “Tout bagay menm mannyè-a toujou, menm kon i té yé lè Bondyé té fè latè-a.” Konsa, bout-la zò ka palé konsèné-a pa kay janmen vini.’ (Li 2 Pita 3:3, 4.) Konsa, si nou tann vwézinaj nou, on moun an twavay nou èben on moun an fanmi di on bagay kon sa, sa pé fébli lafwa nou. Mé Pita di nou sa ki kay édé nou pou tjébé fò.

5. Kisa ki sa édé nou ni pasyans kon nou ka èspéwé bout vyé sistèm sala? (2 Pita 3:8, 9)

⁵ Adan moun ka kwè Jéhova ka tadé pou mennen on bout pou vyé sistèm sala. Mé pawòl Pita ka édé nou wè mannyè Jéhova ka konté tan, diféwan hòd mannyè lézòm ka konté tan. (Li 2 Pita 3:8, 9.) Alò, pou Jéhova, yon mil lanné sé menm kon yon jou. An plis di sa, Jéhova ni pasyans paski i pa vlé pyèsyonn péwi. Konsa, si nou chonjé sé bagay sala, sa kay édé nou ni pasyans. Kanmenm, lè jou Jéhova wivé, i kay pwan aksyon vitman pou détwi vyé sistèm sala. Konsa, nou ni on gwan pwivilaj pou sèvi tan-an ki wèsté-a avan gwan jou sala, pou pwéché Bon Nouvèl-la toupatou an latè-a.

6. Ki mannyè nou sa “èspéyé pou jou-a lè Bondyé kay vini jijé latè-a”? (2 Pita 3:11, 12)

⁶  Li 2 Pita 3:11, 12. Pita di nou pou “èspéyé pou jou-a lè Bondyé kay vini jijé latè-a”. Mé ki mannyè nou sa fè sa? Èben, si’y posib, touléjou, nou sa katjilé asou mannyè nou sa enjwi lavi an pawadi-a. Ou sa imajiné ou ka planté bèl jaden’w èben bèl flè. Ou ka manjé bon manjé ki ni an chay gou! Ou sa imajiné ou ka anbwasé fanmi’w ki wésisité. Èk ou sa imajiné ou ka enstwi moun ki té ka viv plizyé lanné ki pasé konsèné Bondyé. Lè’w ka mèdité asou sé bagay sala, i kay édé’w ni pasyans kon’w ka èspéwé gwan jou Jéhova. Wi, èk i kay osi édé’w pou ni asiwans-lan ki nou ka vwéman viv an dènyé tan-an èk bout sistèm sala kay vini touswit. Èk paski nou ja konnèt sa ki kay fèt an tan pou vini-a, nou pa kay kité mové moun tiwé nou asou “bon chimen-an” èben annékòz nou pou tounen do nou asou Jéhova.​—2 Pita 3:17.

PA PÈ SA MOUN KA KWÈ KONSÈNÉ NOU ÈBEN SA YO PÉ FÈ NOU

7. Si nou pè sa moun pé fè nou èben sa yo pé di nou, kisa sa pé annékòz nou pou fè?

⁷ Nou vlé fè tout sa nou pé pou pwéché bay tout moun paski nou sav bout vyé sistèm sala opwé. Mé magwé nou vlé pwéché, délè nou ka tjébé dèyè pou di kéchòy konsèné Bon Nouvèl-la. Pouki? Sa sé paski nou pé pè sa moun pé fè nou èben sa moun pé di konsèné nou. Annou konsidiwé sa ki té wivé zapòt Pita. Swè-a avan Jézi mò, Pita té pè pou di sé moun-lan i sété yonn an sé disip Jézi-a. Anfen, twa fwa Pita té di sé moun-lan i pa konnèt Jézi. (Maf. 26:69-75) Kanmenm, tjèk tan apwé, Pita té ganyen a bout pèwèz sala. Koumannyè nou sav sa? Paski i di an 1 Pita 3:14: “Sé pa pou ou pè pyèsonn, épi pa kité anyen twoublé’w.” Wi, sé pawòl sala ka ban nou asiwans-lan ki, nou sa ganyen a bout pèwèz lézòm menm kon Pita.

8. Kisa ki sa édé nou ganyen a bout pèwèz lézòm? (1 Pita 3:15)

⁸ Kisa ki sa édé nou ganyen a bout pèwèz lézòm? (Li 1 Pita 3:15.) Wi, Pita di nou, “Adowé Jézi an tjè’w épi ba li lonnè kon i sé senyè-a.” Kisa vèwsé sala vlé di? Vèwsé sala vlé di nou ni pou toujou chonjé Jézi Kwi sé Wa nou èk i ni an chay pouvwa. Konsa, lè’w an ti miyèt pè pou pwéché, ou ni pou katjilé konsèné Wa nou, Jézi. Wi, ou sa imajiné Jézi ka asid asou twòn li épi plizyè milyon di nanj tout oliwon’y. Anplis di sa, i bon pou ou chonjé ki, Jézi ni “tout pouvwa asou tout sa ki an syèl épi sa ki asou latè-a”. Èk osi, Jézi pwonmèt i kay “toujou la épi’w pou jis an bout latè-a.” (Maf. 28:18-20) Bon. Zapòt Pita di nou an lòt bagay nou sa fè. I ka ankouwajé nou pou “toujou pawé” pou fè défans pou lafwa nou. Ki mannyè nou sa fè sa? Èben, si ou vlé pwéché bay moun ou ka twavay épi, moun an lékòl ou, èben moun ou jwenn népòt lòt koté, ou ni pou byen katjilé konsèné ki lè i kay bon pou ou palé. Èk apwé ou fè sa, ou ni pou pwépawé kisa ou kay di. Osi, ou ni pou mandé Jéhova pou ba’w kouwaj. Wi, lè nou chonjé Wa nou, pwépawé andavans èk pwédyé pou kouwaj, nou sa asiwé Jéhova kay édé nou ganyen a bout pèwèz lézòm.​—Twav. 4:29.

‘SÉ POU OU NI LANMITYÉ POU YONN A LÒT ÈK TOUT TJÈ’W’

9. Asou yon lokazyon Pita pa té moutwé lanmityé. Kisa i té fè? (Gadé pòtwé-a osi.)

⁹ Zapòt Pita té apwann mannyè pou moutwé sé fwè èk sè-a lanmityé. Wi, i té tann lè Jézi té di yo: “Mwen ka bay zòt an konmandman nèf: Sé pou zòt enmen yonn a lòt. Enmen yonn a lòt menm kon mwen ja enmenʼw.” (Jan 13:34) Magwé Pita té tann sa Jézi té di, asou yon lokazyon, i té wifizé manjé épi sé fwè èk sè’y-la ki pa té Jwif. Wézon-an sété paski i té pè sé Kwityen-an ki té Jwif. Sé pou sa zapòt Pòl kwiyé sa zapòt Pita té fè-a yon “ipokwizi”. (Gal. 2:11-14) Kanmenm, Pita pwan konsèy Pòl èk i apwann hòd li. Konsa, an toulé dé lèt Pita, i fè on pwen ki enpòtan: nou pa anni ni pou santi lanmityé pou sé fwè èk sè nou-a, mé nou ni pou moutwé yo lanmityé.

10. Kisa ki kay édé nou pou moutwé fwè èk sè nou “an chay lanmityé”? (1 Pita 1:22)

¹⁰ An lèt li, Pita di nou pou toujou ni an chay lanmityé pou sé fwè èk sè nou-a. (Li 1 Pita 1:22.) Wi, nou kay ni lanmityé sala, lè nou “obéyi lavéwité-a”. Sa vlé di, sa nou té apwann an Bib-la. Yonn an sé bagay-la nou apwann an sé lévanjil-la sé: “Bondyé pa ni pwéféwans pou pyèsonn.” (Twav. 10:34, 35) Alò, nou pa ka obéyi koumand Jézi si nou moutwé adan moun an kongwigasyon-an sèlman lanmityé. I vwé, la ni fwè èk sè nou pli pwé épi pasé lézòt. Èk sa pa on mové bagay, paski la té ni disip Jézi té pli pwé épi osi. (Jan 13:23; 20:2) Mé zapòt Pita ka fè nou chonjé, nou ni pou fè kon nou pé pou nou ni lanmityé pou fwè èk sè nou épi tout tjè nou. Sa vlé di, nou ni pou “enmen tout sé fwè èk sè [nou]-a” paski nou tout sé yon fanmi.​—1 Pita 2:17.

11. Kisa i vlé di pou enmen lézòt épi “tout tjè” nou?

¹¹ Zapòt Pita ankouwajé nou pou ‘ni lanmityé pou yonn a lòt épi tout tjè nou.’ Sa vlé di, nou ni pou enmen moun menm si nou twouvé’y difisil pou moutwé yo lanmityé. Pou ègzanp, si on fwè èben on sè ofwansé nou, kisa nou kay fè? Èben pitèt pwenmyé bagay-la nou ka wè pou fè sé pou twété moun-lan menm mannyè-a i té twété nou. I pa kay ézé pou moutwé moun sala lanmityé. Mé Jézi té enstwi Pita ki Bondyé pa enmen kalté atitid sala. (Jan 18:10, 11) Mi sa Pita ékwi an 1 Pita 3:9: “Lè moun fèʼw sa ki pa bon, sé pa pou ou fè yo menm bagay-la déviwé. Lè yo ensiltéʼw, sé pa pou ou ensilté yo déviwé, mé mandé Bondyé pou benni yo pito.” Alò, lè nou ni lanmityé épi tout tjè nou, jik pou moun ki ofwansé nou, nou kay twété yo janti.

12. (a) Si nou enmen sé fwè èk sè nou-a épi “tout tjè” nou, kisa sa kay édé nou pou fè? (b) Silon sa nou wè an vidiyo-a Jéhova Ka Benni Nou Lè Nou Fè Lapé, kisa ou vlé fè épi tout fòs ou?

¹² An pwèmyé lèt li, zapòt Pita di si nou ni lanmityé épi tout tjè nou, sa kay édé nou pou pawdonnen, pa yonndé péché, mé “an latilyé péché.” (1 Pita 4:8) Ou wè, pitèt Pita té chonjé sa Jézi té enstwi’y konsèné pawdonnasyon. Asou yon lokazyon, Pita mandé Jézi konmen fwa i ni pou pawdonnen fwè’y ki ka kontiné péché kont li. “Ès sé sèt (7) fwa?” An moman sala, Pita té kwè i té on bon moun lè i di Jézi i té kay pawdonnen fwè’y sèt (7) fwa. Mé Jézi té ka enstwi Pita, èk nou, nou toujou ni pou pawdonnen pwochen nou lè i di “ni pou pawdonnenʼy swasant dis (70) fwa sèt fwa.” (Maf. 18:21, 22) Kanmenm, si ou twapé’y wèd pou pwan konsèy sala, pa dékouwajé! Délè tout sèvant Jéhova ki enpawfé, ka twouvé’y difisil pou pawdonnen pwochen yo. Mé sa ki enpòtan, sé sa: nou ni pou fè tout sa nou pé pou pawdonnen pwochen nou èk fè lapé épi yo.c

SÉ POU SÉ ANSYEN-AN OTJIPÉ KONGWIGASYON JÉHOVA BYEN

13. Kisa ki ka fè’y difisil pou ansyen twouvé tan pou ankouwajé sé fwè èk sè yo-a?

¹³ Apwé Jézi té wésisité, i di Pita an Jan 21:16: “Swen sé mouton mwen-an.” Pita té toujou chonjé sé pawòl sala, èk té pwan wèskonsabilité sala sèwiyé. Jòdi jou, ansyen osi ni pou chonjé sé pawòl sala paski sa sé asaynman yo, èk asaynman sala pou ankouwajé sé fwè èk sè-a byen enpòtan. Mé délè, i pa ézé pou sé ansyen-an twouvé tan pou fè asaynman enpòtan sala. Chonjé, sé ansyen-an ni pou fè tan pou fanmi yo pwèmyé. Yo ni pou potjiwé bay fanmi yo èk fè asiwé yo ni tout sa yo bizwen pou viv. Yo ni pou fè asiwé fanmi yo ka santi yo vwéman enmen yo. Èk yo ni pou kontiné édé fanmi yo ni an bon wilasyon épi Jéhova. Anplis di sa, ansyen ni pou pwan douvan an twavay pwédikasyon-an. Èk osi, yo ka twavay wèd pou pwépawé diskou pou sé mitin-lan, sé asanmblé-a èk sé konvasyon-an. La ni lòt ansyen ki ni pli wèskonsabilité toujou. Adan di yo ka wann sèvis an Konmité-a pou Konminiké épi Lopital-la. Èk adan di yo ka wann sèvis an Dépatman ki Wèskonsab pou Plan èk Konstwiksyon. Wi, sé ansyen-an toujou ni an chay twavay pou fè!

14. (a) Silon 1 Pita 5:1-4, kisa ki wèskonsabilité sé ansyen-an? (b) Kisa ansyen sa fè si yo twapé i difisil pou gadé apwé sé fwè èk sè-a?

¹⁴ Li 1 Pita 5:1-4. Wi, Pita ankouwajé sé ansyen-an pou “gadé apwé sé ich Bondyé-a.” Jòdi jou, sé ansyen-an vlé obéyi koumand sala paski yo enmen sé fwè èk sè-a èk sa sé wèskonsabilité yo. Mé délè, i difisil pou sé ansyen-an gadé apwé sé fwè èk sè-a an kongwigasyon yo paski yo toujou anbawasé, èben yo las èk yo pa ni kouway-la pou fè’y. Si ou sé an ansyen èk ou adan sitiwasyon sala, kisa ou sa fè? Èben, ou sa di Jéhova tout sa ki ka twakasé’w. Ou sa mandé’y pou ba’w kouway-la pou édé sé fwè èk sè-a ou enmen an chay-la. Wi, Jéhova kay vwéman wéponn lapwiyè kon sa. Anfen, Pita di: “Si pyèsonn ka édé lézòt, i sipozé fè’y épi kouway-la Bondyé ba li-a.” (1 Pita 4:11) Bon. Ansyen osi ni pou chonjé ki, sé fwè èk sè-a kay toujou èspéyansé pwoblenm an vyé sistèm sala. Èk Jézi Kwi “ki anho tout sé lézòt gad mouton-an”‏ sa édé yo otan pli pasé sa sé ansyen-an sa fè. Jézi sa édé yo tjenbé fò anba népòt difikilté atjwèlman èk an tan pou vini. Bon. Jéhova vlé sé ansyen-an pou gadé apwé sé fwè-a, enmen yo, sipòté yo èk “viv lavi [yo] kon an bon ègzanp” pou yo sa swiv.

15. Kisa William té fè pou édé sé fwè èk sè-a an kongwigasyon’y? (Gadé pòtwé-a osi.)

¹⁵ William, an fwè ki ka wann sèvis kon an ansyen pou plizyè lanné, ka byen konpwann mannyè i enpòtan pou gadé apwé sé fwè èk sè-a. Konsa, lè panndèmik Covid-la koumansé, i èk sé lòt ansyen-an an kongwigasyon’y té fè éfò pou fè kontak épi chak fwè èk sè an gwoup yo toulé simenn. Pouki yo té fè an chay éfò pou fè sa? William di: “Plizyè fwè èk sè té an kay yo pa kò yo, èk sèl bagay-la yo té sa fè sé pou katjilé. Èk i té kay byen ézé pou bon katjil yo tounen mové katjil.” Alò, lè yon fwè èben yon sè té ni an pwoblenm, William kouté’y byen paski i té vlé konpwann sa ki té ka twakasé’y èk sa i té bizwen. Anplis di sa, William té sèvi wèbsayt nou, jw.org, pou twapé piblikasyon èk vidéyo pou’y sa sèvi pou édé yo èk ankouwajé yo. William osi di: “Apwézan, i byen enpòtan pou ansyen gadé apwé sé fwè-a plis pasé avan. Menm kon nou ka twavay wèd pou édé moun apwann konsèné Jéhova èk vini an lavéwité-a, ansyen ni pou twavay wèd pou gadé apwé sé fwè èk sè-a èk édé yo wèsté fidèl pou Jéhova.”

KITÉ JÉHOVA “FÈ TOUT SA KI NÉSÉSÈ BAʼW”

16. Ba yonndé ègzanp koté ki nou pé ni pou fè chanjman.

¹⁶ An atik sala, nou ja diskité yonndé lison nou apwann an sé dé (2) lèt Pita-a. Pitèt ou ja ègzanminé kò’w èk wè koté ou ni pou fè chanjman. Pou ègzanp, pitèt ou vlé katjilé pli asou sé bennédisyon-an ou kay enjwi an tan pou vini. Èben pitèt ou vlé pwéché bay moun ou ka twavay épi, moun an lékòl ou, èben moun ou jwenn népòt lòt koté. Èben pitèt ou vlé moutwé sé fwè èk sè ou-a pli lanmityé. Osi, si ou sé yon ansyen, ès ou ditèminé pou gadé apwé sé ich Bondyé-a èk fè’y épi djèwté an tjè’w? Si nou onnèt épi kò nou, nou kay wè koté nou ni pou fè chanjman, mé nou pa sipozé santi dékouwajé. 1 Pita 2:3 ka di nou: “Senyè-a bon.” Konsa, i kay édé nou pou fè pli byen. Osi, Pita ban nou asiwans-lan ki: “Bondyé . . . kay fè tout sa ki nésésè baʼw. I kay fèʼw fò an lafwaʼw. I kay fè lidéʼw fò épi i kay anpéchéʼw tiwé lidéʼw asou Jézi.”​—1 Pita 5:10.

17. Si nou tjébé fò, èk kité Jéhova “fè tout sa ki nésésè ban” nou, kisa nou kay wisouvwè?

¹⁷ Asou yon lokazyon, Pita té santi i pa té vo pou an pwézans Jézi. (Louk 5:8) Mé épi èd Jéhova èk Jézi, Pita tjébé fò èk i pa té ladjé. Kon wézilta, Jéhova pèwmité Pita “pou antwé an wéyòm koté Senyè nou Jézi Kwi ka kondwi pou tout tan-an.” (2 Pita 1:11) Sa té on bèl pwivilaj! Konsa, si nou tjébé fò èk pa ladjé menm kon Pita, magwé i pa ézé pou fè sa, èk nou kité Jéhova fè tout sa ki nésésè ban nou, nou kay enjwi on bèl pwivilaj osi, pou viv pou tout tan! Wi, “pou lapéti lafwa-a [nou ka] mété an Bondyé-a, [nou kay] wisivwè salvasyon.”​—1 Pita 1:9.