Jesus’ triumphal ride into Jerusalem on a donkey

Ès Pwofèsi Konsèné Mèsaya-a Ka Bay Pwèv Ki Jézi Sé Mèsaya-a?

Wépons Bib-la Ka Bay

Wi. Lè Jézi té asou latè-a, i akonpli an chay pwofèsi konsèné ‘Mèsaya-a, Mèt-la,’ moun-lan ki té kay vini pou “sové latè-a.” (Dannyèl 9:25; 1 Jan 4:14) Èvèk jis apwé i mò, Jézi kontiné akonpli pwofèsi konsèné Mèsaya-a.—Sam 110:1; Twavay 2:34-36.

Kisa mo pawòl-la “Mèsaya” vlé di?

Mo pawòl-la pou Mèsaya, an langaj Hibrou sé Mashiyak. Èvèk mo pawòl-la pou Kwi, an langaj Grik sé Kristòs. Mé, Mashiyak épi Kristòs vlé di menm bagay-la. Yo vlé di, “Moun-lan Bondyé chwazi-a.” Konsa, non-an “Jézi Kwi” vlé di “Jézi, Moun-lan Bondyé chwazi-a,” ében “Jézi Mèsaya-a.”

An tan Bib, lè yo té chwazi on moun pou bay an pozisyon spésyal, souvan, yo té ka vidé lwil asou tèt li pou moutwé moun sala té ni lotowité. (Livitikòs 8:12; 1 Sanmyèl 16:13) Mé, sé Bondyé ki chwazi Jézi pou fè’y vini Mèsaya-a. Sa sé on pozisyon ki ka moutwé Jézi ni an chay lotowité. (Twavay 2:36) Kanmenm, pito Bondyé vidé lwil asou tèt Jézi, i sèvi lisentèspwi’y pou moutwé i té chwazi Jézi kon Mèsaya-a.—Mafyou 3:16.

Ès i posib pou plizyè diféwan moun akonpli sé pwofèsi-a konsèné Mèsaya-a?

Non. Menm kon mak dwèt on moun ka idantifyé moun sala tousèl, akonpliman pwofèsi Bib ka idantifyé yon sèl Mèsaya, ében Kwi. Kanmenm, an Mafyou 24:24 Bib-la di nou: “La kay ni fo Mèsaya épi fo pwòfèt ki kay vini. [Èk] yo kay fè miwak épi gwan twavay épi yo kay éséyé kwennen jis sé moun-an Bondyé ja chwazi-a, si i té posib.”

Ès i posib pou Mèsaya-a pawèt an tan ki ka vini?

Non. Bib-la té di, Mèsaya-a té kay an désandan Wa David. Èvèk David sété an wa an nasyon Izwayèl. (Sam 89:3, 4) Kanmenm, tout dòkyouman sé Jwif-la ki té sa moutwé ki moun ki té désandan Wa David té pèd. I sanm sé dòkyouman sala té péwi lè jan Ronm té détwi vil Jérouzalèm an lanné swasant dis (70) an épòk nou.a Dépi tan sala, la pa ni pyèsonn ki sa bay pwèv pou moutwé i sé désandan Wa David. Mé diwan tan-an Jézi té asou latè-a, vil Jérouzalèm p’òkò té détwi. Ogwèf sé Jwif-la té la toujou. Konsa, i té byen ézé pou véwifyé si an moun té vwéman désandan Wa David. Mé lè Jézi di, i sété désandan Wa David, pyèsonn pa té pwotèsté. Anfen, pa menm sé lèlmi’y-lan ki té di’y, sa pa vwé.—Mafyou 22:41-46.

Konmen pwofèsi konsèné Mèsaya-a ki an Bib-la?

Nou pa sa di ègzaktiman konmen pwofèsi konsèné Mèsaya-a ki an Bib-la, paski moun sa sèvi diféwan mannyè pou konté sé pwofèsi sala. Pou ègzanp, an Izaya 53:2-7 la ni an chay pwofèsi ki ni pou fè épi Mèsaya-a. Mé adan moun sa konté tout sé vèwsé sala kon yon sèl pwofèsi. Èk la ni lòt moun ki sa gadé chak pa an sé vèwsé-a kon an diféwan pwofèsi.

Déotwa pwofèsi konsèné Mèsaya-a Jézi té akonpli

Pwofèsi-a	Koté i yé an Bib-la	Akonpliman-an
I té kay désandan Abrahanm	Jennésis 22:17, 18	Mafyou 1:1
I té kay désandan Ayzak, gason Abrahanm	Jennésis 17:19	Mafyou 1:2
I té kay sòti an nasyon Izwayèl an lafanmi Jouda	Jennésis 49:10	Mafyou 1:1, 3
I té kay an désandan Wa David	Izaya 9:7	Mafyou 1:1
Manman’y té kay an vyèj	Izaya 7:14	Mafyou 1:18, 22, 23
I té kay fèt an vil Bèfléyenm	Mayka 5:2	Mafyou 2:1, 5, 6
Yo té kay kwiyé’y Imannyouwèlb	Izaya 7:14	Mafyou 1:21-23
I té kay fèt adan an fanmi ki pa ni djè lajan	Izaya 53:2	Louk 2:7
Yo té kay tjwé an chay manmay apwé i fèt	Jérémaya 31:15	Mafyou 2:16-18
Yo té kay kwiyé’y pou’y sòti an péyi Éjip	Hozéya 11:1	Mafyou 2:13-15
Yo té kay kwiyé’y an Nazawiyenc	Izaya 11:1	Mafyou 2:23
Yo té kay voyé an mèsajè avan’y	Malakay 3:1	Mafyou 11:7-10
Yo té kay chwazi’y kon Mèsaya-a an lanné ventnèf (29) an épòk noud	Dannyèl 9:25	Mafyou 3:13-17
Bondyé té kay fè moun konnèt sa sé Gason’y	Sam 2:7	Twavay 13:33, 34
I té kay ni an chay lanmityé pou kay Bondyé	Sam 69:9	Jan 2:13-17
I té kay pwoklanmé bon nouvèl	Izaya 61:1	Louk 4:16-21
Twavay pwédikasyon-an i té kay fè an vil Galili té kay bwiyan menm kon an gwo klèté	Izaya 9:1, 2	Mafyou 4:13-16
I té kay fè miwak menm kon Moziz	Ditonronnonmi 18:15	Twavay 2:22
Menm kon Moziz, i té kay palé pawòl Bondyé	Ditonronnonmi 18:18, 19	Jan 12:49
I té kay djéwi an chay moun	Izaya 53:4	Mafyou 8:16, 17
I pa té kay mété tout antansyon asou kò’y	Izaya 42:2	Mafyou 12:17, 19
I té kay moutwé konpasyon pou moun ki ka soufè	Izaya 42:3	Mafyou 12:9-20; Mak 6:34
I té kay fè moun konnèt jistis Bondyé	Izaya 42:1, 4	Mafyou 12:17-20
I té kay on Bon Konsèyè	Izaya 9:6, 7	Jan 6:68
I té kay fè moun konnèt non Jéhova	Sam 22:22	Jan 17:6
I té kay sèvi pawabòl lè’y ka palé	Sam 78:2	Mafyou 13:34, 35
I té kay on Mèt	Dannyèl 9:25	Mafyou 23:10
An pil moun pa té kay kwè an li	Izaya 53:1	Jan 12:37, 38
I té kay menm kon an wòch ki ka fè moun twilbiché	Izaya 8:14, 15	Mafyou 21:42-44
Lézòm té kay widjèkté’y	Sam 118:22, 23	Twavay 4:10, 11
Moun té kay hayi’y san pyès wézon	Sam 69:4	Jan 15:24, 25
I té kay antwé vil Jérouzalèm kon yon wa asou on bouwik	Zèkaraya 9:9	Mafyou 21:4-9
Manmay té kay glowifyé’y	Sam 8:2	Mafyou 21:15, 16
I té kay vini an non Jéhova	Sam 118:26	Jan 12:12, 13
An bon jan’y té kay twayi’y	Sam 41:9	Jan 13:18
Yo té kay twayi’y pou twant (30) pyès dajane	Zèkaraya 11:12, 13	Mafyou 26:14-16; 27:3-10
Jan’y té kay abandonnen’y	Zèkaraya 13:7	Mafyou 26:31, 56
Fo témwen té kay tèstifyé kont li	Sam 35:11	Mafyou 26:59-61
I pa té kay wéponn moun ki té ka akizé’y	Izaya 53:7	Mafyou 27:12-14
Yo té kay kwaché asou’y	Izaya 50:6	Mafyou 26:67; 27:27, 30
Yo té kay ba’y kou asou tèt li	Mayka 5:1	Mak 15:19
Yo té kay bat li	Izaya 50:6	Jan 19:1
I pa té kay défann kò’y lè moun té ka bat li	Izaya 50:6	Jan 18:22, 23
Moun ki té ni pouvwa an gouvèdman té kay fè konplo kont li	Sam 2:2	Louk 23:10-12
Yo té kay klouwé lanmen’y épi pyé’y asou on poto	Sam 22:16	Mafyou 27:35; Jan 20:25
Moun té kay jwé gwenndé pou had li	Sam 22:18	Jan 19:23, 24
Yo té kay gadé’y menm kon on péchè	Izaya 53:12	Mafyou 27:38
Moun té kay jiwé’y èk ensilté’y	Sam 22:7, 8	Mafyou 27:39-43
I té kay soufè pou péché nou	Izaya 53:5, 6	1 Pita 2:23-25
I té kay sanm konmsi Bondyé té abandonnen’y	Sam 22:1	Mak 15:34
Yo té kay ba’y vinèg ki mélé épi fyèl pou bwè	Sam 69:21	Mafyou 27:34
I té kay santi swèf touswit avan i mò	Sam 22:15	Jan 19:28, 29
I té kay délivwé lam li an lanmen Bondyé	Sam 31:5	Louk 23:46
I té kay bay lavi’y	Izaya 53:12	Mak 15:37
I té kay bay lavi’y kon an wanson pou tiwé péché	Izaya 53:12	Mafyou 20:28
Yo pa té kay kasé zo’y	Sam 34:20	Jan 19:31-33, 36
Yo té kay pèsé’y	Zèkaraya 12:10	Jan 19:33-35, 37
Yo té kay téwé’y épi moun ki wich	Izaya 53:9	Mafyou 27:57-60
Bondyé té kay wésisité’y	Sam 16:10	Twavay 2:29-31
Yo té kay wiplasé moun-lan ki twayi’y-la	Sam 109:8	Twavay 1:15-20
I té kay asid asou lanmen dwèt Bondyé	Sam 110:1	Twavay 2:34-36

a McClintock and Strong’s Cyclopedia di: “I a klè, ogwèf sé Jwif-la épi lafanmi yo té péwi lè yo détwi vil Jérouzalèm. I pa té péwi avan sa.”

b Imannyouwèl sé an non an langaj Hibrou ki vlé di, “Bondyé épi nou.” Non sala ka byen dékwi wèskonsabilité-a Jézi ni kon Mèsaya-a. Pwézans Jézi asou latè-a épi twavay-la i fè lè’y té la, ka bay pwèv ki, Bondyé épi moun ki ka adowé’y.—Louk 2:27-32; 7:12-16.

c I sanm mo pawòl-la “Nazawiyen” sòti an mò-a nètsè. Nètsè sé an mo pawòl an langaj Hibrou ki vlé di “jèm.”

d Pou twapé pli enfòmasyon konsèné pwofèsi Bib ki ka moutwé Jézi té kay pawèt kon Mèsaya-a an lanné ventnèf (29) an épòk nou, li atik-la “How Daniel’s Prophecy Foretells the Messiah’s Arrival.”

e Pwofèsi sala an liv Zèkaraya, mé Mafyou 27:9 di, “sé pwòfèt Jérémaya” ki té di sé pawòl sala. I sanm, délè yo té ka mété liv Jérémaya pwèmyé an sèksyon Bib-la yo ka kwiyé “sé pwòfèt-la.” (Louk 24:44) Konsa i sanm, lè Mafyou di “Jérémaya,” i té ka palé konsèné tout sé liv-la ki an sèksyon Bib-la yo ka kwiyé “sé pwòfèt-la.” Èvèk liv Zèkaraya té anpanmi sé liv sala.