Ki Mannyè Bib-la Di Nou Sipozé Bay?
Wépons Bib-la Ka Bay
Bib-la ka ankouwajé nou pou bay épi tout tjè nou. Osi, i ka moutwé nou sipozé ni bon wézon lè nou ka bay. An plis di sa, Bib-la ka moutwé lè moun bay, yo menm kay ni tjè kontan èk sé moun-lan ki wisivwè sa yo ka bay-la kay ni tjè kontan osi. (Pwovèb 11:25; Louk 6:38) Wi, Jézi di: “Tjè’w ka pli kontan lè ou bay pasé lè ou wisivwè.”—Twavay 20:35.
Pouki nou vlé bay épi tout tjè nou?
Paskè nou ka plè Bondyé, lè nou bay épi tout tjè nou. Anfen Bib-la di: “Chak moun sipozé bay sa I ja fè lidé’y pou bay. Sé pa pou zòt siyé dèyè lè zòt ka bay, épi sé pa pou zòt bay paski an moun ka fòsé zòt. Bondyé enmen an moun ki ka bay épi tout tjè’y.”—2 Kòrint 9:7.
Wi, lè nou bay épi tout tjè nou, nou sa “vini dwèt . . . an zyé Bondyé.” (Jémz 1:27) Èk sa sé an mannyè nou sa adowé Bondyé èk ni favè’y. Pwovèb 19:17 di, ‘Moun-nan ki wann moun ki maléwé favè sé Jéhova i ka pwété.’ Wi, lè nou édé moun ki an labizwen, nou ka twavay ansanm épi Bondyé. Èk Jéhova ka konsidiwé sa nou fè pou moun-lan kon an dèt i dwé nou. Sé pou wézon sala, Bib-la di Bondyé kay “wékonpansé [nou] pou sa [nou] fè-a.”—Louk 14:12-14.
Ès nou ka toujou plè Bondyé lè nou bay?
Non. Nou pa ka plè Bondyé si nou ka bay pou mové wézon. Pa ègzanp, nou pa ka fè tjè Bondyé kontan, si nou ka bay pou sé wézon sala:
Pou moun glowifyé nou.—Mafyou 6:2.
Pou jwenn an bagay déviwé.—Louk 14:12-14.
Pou éséyé achté salvasyon.—Sam 49:6, 7.
Non. Nou pa ka plè Bondyé si sa nou ka bay, ka sipòté aktivité èk atitid ki pa ka plè Bondyé. Pou ègzanp, i pa bon pou bay an moun lajan pou’y sa jwé gwenndé ében pou’y sèvi dwòg èben pou’y bwè twòp alkòhòl. (1 Kòrint 6:9, 10; 2 Kòrint 7:1) An plis di sa, i pa bon pou bay an moun lajan si moun-lan sa twavay pou otjipé kò’y, mé i pa vlé twavay.—2 Tèsalonnika 3:10.
Non. Nou pa ka plè Bondyé si nou ka bay tèlman, èk sa ka annékòz nou pou néglijé fanmi nou. Bib-la di a klè tèt fanmi-a ni pou potjiwé tout sa fanmi’y bizwen. (1 Timòfi 5:8) Konsa, si fanmi-a ka soufè paski tèt fanmi-a ka bay lézòt tèlman, sa pa bon pyès. Anfen, padan Jézi té asou latè-a, la té ni moun ki pa té vlé otjipé pawan yo. Yo di tout sa yo ni sé “an kado [yo] ja bay Bondyé.” Alò, Jézi kondanné yo.—Mak 7:9-13.