Mwen Vlé Mò—Ès Bib-la Sa Édé Mwen Si Mwen Vlé Tjwé Kò Mwen?

Wépons Bib-la Ka Bay

Wi! Bib-la sa édé’w, paski Bib-la sé pawòl “Bondyé-a ki ka ankouwajé moun ki dékouwajé.” (2 Kòrint 7:6) Èk magwé Bib-la sé pa on liv konsèné maladi an tèt, i ja édé an chay moun ki té vlé tjwé kò yo. Konsa, ou sa asiwé bon konsèy-la ki an Bib-la sa édé’w osi.

• Ki bon konsèy Bib-la ka bay?

• Ès Bib-la ka di nou konsèné moun ki té vlé mò?

• Ki vèwsé an Bib-la ki sa édé’w doubout santi ou vlé tjwé kò’w?

• Kisa ou sa fè si an jan’w di’w, “mwen vlé mò”?

• Mé si mwen ja éséyé pou tjwé kò mwen an tan pasé, ès Bondyé kay pawdonnen mwen?

Ki bon konsèy Bib-la ka bay?

• ● Fè moun konnèt mannyè-a ou ka santi.

  Mi sa Bib-la ka di: ‘An bon jan ka moutwé lanmityé tout tan, èk i sé an fwè nou sa konté asou lè nou an lapenn.’—Pwovèb 17:17.

  Sa vèwsé sala vlé di: Lè nou dékouwajé, nou bizwen moun pou édé nou.

  Si’w pa di pyèsonn anyen, sé katjil négativ-la ou ni-an pé fè’w santi konmsi ou ka pòté an chay ki twò lou pou’w sipòté. Mé si’w palé èk ou fè lézòt moun konnèt mannyè ou ka santi, ou pé koumansé santi pli mèyè, èk ou pé jis koumansé gadé sitiwasyon’w adan an mannyè ki pli pozitiv.

  

  Éséyé fè sa: Palé épi an moun jòdi-a menm. Pitèt ou sa palé épi an moun an fanmi’w èben an jan ou sa konfyé.a On lòt bagay ou sa fè, sé ékwi mannyè-a ou ka santi.

• ● Alé oti dòktè.

  Mi sa Bib-la ka di: “Moun ki an santé pa bizwen dòktè, mé moun ki malad bizwen an dòktè.”—Mafyou 9:12.

  Sa vèwsé sala vlé di: Lè nou malad, nou sipozé alé oti dòktè.

  Lè an moun vlé tjwé kò’y, pitèt sa vlé di moun sala malad an tèt, èben i ni dipwèsyon. Mé menm kon nou pa ka hont lè nou ni lòt maladi, sé konsa nou pa sipozé hont si nou malad an tèt, ében nou ka aji épi dipwèsyon. Èvèk la ni dòktè ki sa twété sé maladi sala.

  Éséyé fè sa: Pli vit ki posib, alé oti on dòktè ki kwalifyé pou twété kalité maladi sala.

• ● Chonjé Bondyé mélé épi’w.

  Mi sa Bib-la ka di: “Senk ti jibyé vo dé kat sou. Èk pa yonn anpami yo Bondyé kay obliyé. . . . Kon sa ou pa ni pou pè, . . . paski ou vo plis pasé an chay jibyé.”—Louk 12:6, 7.

  Sa vèwsé sala vlé di: Ou ni an chay valè an zyé Bondyé.

  Pitèt ou ka santi ou pa kò’w, èk pyèsonn pa mélé épi’w. Mé chonjé, Bondyé vwéman mélé épi’w. I ka wè tout sa’w ka èspéyansé, èk i ka konpwann mannyè ou ka santi, menm si ou ka santi konmsi ou pa vlé viv ankò. Sam 51:17 an Bib NWT ka moutwé: ‘Bondyé pa kay tounen do’y asou on moun ki dékouwajé.’ Wi, Bondyé enmen’w an chay. Èk sé pou wézon sala i vlé’w viv.

  Éséyé fè sa: Ègzanminé pwèv an Bib-la ki ka moutwé Bondyé enmen’w. Pou ègzanp, ou sa li chapit 24 an liv-la Draw Close to Jehovah.

• ● Pwédyé bay Bondyé.

  Mi sa Bib-la ka di: “Tout bagay ou ni ki ka baʼw mal tèt, météʼy an lanmen [Bondyé], paski i ka gadé apwéʼw.”—1 Pita 5:7.

  Sa vèwsé sala vlé di: Bondyé vlé’w palé épi’y ofon tjè’w. Wi, i vlé’w di’y tout sa ki ka twakasé lidé’w.

  Bondyé sa ba’w lapé an tjè’w èk an lidé’w, èvèk i sa ba’w kouway-la pou’w sa kontiné tjenbé fò. (Filipay 4:6, 7, 13) An mannyè sala, Bondyé ka soulajé èk sipòté moun ki mandé’y pou èd.—Sam 55:22.

  

  Éséyé fè sa: Pwédyé bay Jéhova jòdi-a menm. Èk lè’w ka pwédyé sèvi non Bondyé, Jéhova, èvèk di’y tout sa ki asou lidé’w. (Sam 83:18) Osi, mandé’y pou ba’w sa ou bouzwen pou’w sa kontiné tjenbé fò.

• ● Mèdité asou bèl èspwa-a Bib-la ka ban nou pou tan ki ka vini.

  Mi sa Bib-la ka di: “Sa nou ka èspéyé èk konfyans-lan ka tjenbé lam nou fò, pou anyen pa sa chayé nou, menm kon tjò fè-a batiman-an ka ladjé désann ofon lanmè-a ka tjenbé batiman-an.”—Hibrou 6:19.

  Sa vèwsé sala vlé di: Menm kon an batiman ka mouté désann asou lanm lanmè-a diwan an mové tan, sé konsa santiman’w ka chanjé souvan. Yon minit ou ka santi ou ni tjè kontan, èk lòt minit-la ou ka santi tjè’w twis. Mé, bèl èspwa-a ki an Bib-la sa édé’w pou kontwolé imosyon’w.

  Èspwa sala asiwé paski i bazé asou pwonmèt Bondyé pou tiwé tout sé bagay-la ki ka annékòz nou pou soufè.—Wévélasyon 21:4.

  Éséyé fè sa: Pou apwann pli konsèné bèl èspwa-a Bib-la ka ba nou, li lison 5 an ti liv-la Bon Nouvèl-la Bondyé Bay!

• ● Fè kéchòy ou enmen fè.

  Mi sa Bib-la ka di: ‘Tjè kontan sé an bon wimèd.’—Pwovèb 17:22.

  Sa vèwsé sala vlé di: Lè nou fè bagay ki ka ban nou tjè kontan, sa pé fè nou santi pli mèyè.

  

  Éséyé fè sa: Fè bagay ou kontan fè. Pou ègzanp, kouté bèl ti mizik, li an bagay ki ka ankouwajé’w, èben fè an lòt bagay ou kontan fè. An lòt bagay ki sa ba’w tjè kontan, sé lè’w fè kéchòy pou édé lézòt, menm si sé djòs an ti bagay ou fè ba yo.—Twav. 20:35.

• ● Otjipé kò’w byen.

  Mi sa Bib-la ka di: “Lézèksis sa bennéfis ou.”—1 Timòfi 4:8.

  Sa vèwsé sala vlé di: Lè nou fè lézèksis, manjé manjé ki bon pou santé nou, èk fè asiwé nou dòmi asé, sa ka pòté nou an chay bennéfis.

  Éséyé fè sa: Alé pwan an ti maché. Èk maché vit, menm si sé pou djòs 15 minit.

• ● Chonjé, santiman nou èk lòt bagay an lavi ka chanjé.

  Mi sa Bib-la ka di: “Ou pa menm sav sa ki kay fèt denmen.”—Jémz 4:14.

  Sa vèwsé sala vlé di: An pwoblenm ki ka twakasé tèt ou pé diwé sèlman pou an tan, menm si i ka sanm konmsi i pa ni on solousyon.

  Menm si ou ka èspéyansé an sitiwasyon ki byen mové jòdi-a, sitiwasyon-an pé chanjé denmen. Konsa, katjilé asou mannyè ou sa kontiné tjenbé fò. (2 Kòrint 4:8) Paskè pwoblenm-lan ki ka twakasé tèt ou-a pé chanjé apwé an lè, mé si ou tjwé kò’w, ou pa sa chanjé sa.

  Éséyé fè sa: Li sé wakont-la ki an Bib-la konsèné moun ki té tèlman dékouwajé, yo té vlé mò. Èvèk gadé mannyè lavi yo chanjé èk vini pli mèyè apwé an tan. Anfen, souvan, lavi yo chanjé èk i vini pli mèyè pasé yo té ka èspéyé. Annou gadé yonndé ègzanp.

Ès Bib-la ka di nou konsèné moun ki té vlé mò?

Wi. Bib-la ka di nou konsèné moun ki té vlé mò. Mé pito Bondyé pini yo pou sa, i ofè pou édé yo. Èk i sa fè menm bagay-la ba’w.

Ilaydja

• ● Ki moun i té yé? Ilaydja sété on pwofèt ki té byen bwav. Mé délè, i té ka santi dékouwajé. Jémz 5:17 di: “Ilaydja sété an nonm menm kon nou.”

• ● Pouki i té vlé mò? La té on mouman lè Ilaydja té ka santi i té pa kò’y, i té pè, èk i té ka santi i pa té vo anyen. Konsa i plédé épi Jéhova, èk i di’y: ‘Pwan lavi mwen apwézan, Jéhova.’—1 Wa 19:4.

• ● Kisa ki té édé’y? Ilaydja palé épi Jéhova ofon tjè’y. I di Jéhova ègzaktiman ki mannyè i té ka santi. Kisa Jéhova té fè pou ankouwajé’y? Jéhova moutwé Ilaydja i té mélé épi’y, èk i fè Ilaydja wè pouvwa’y. Osi, i bay Ilaydja asiwans-lan ki, i té valowab toujou, èvèk i bay Ilaydja on moun ki té ni konpasyon pou li, pou édé’y.

• ▸ Li konsèné Ilaydja: 1 Wa 19:2-18.

Jòb

• ● Ki moun i té yé? Jòb sété an nonm ki té wich. I té mayé, i té ni ich, èk i té ka adowé Jéhova.

• ● Pouki i té vlé mò? Sibitman, an chay mové bagay wivé Jòb. Pwèmyéman, i pèd tout sa’y té ni. Apwé sa, tout ich li mò adan an dézas, èk i tonbé malad épi an mové maladi. An plis di sa, adan moun akizé’y konmkwé, sé li ki mennen sé pwoblenm sala asou kò’y. Mé sa pa té vwé pyès. Èvèk sa kwazé Jòb si tèlman, i di: ‘Mwen hayi lavi mwen. M’a vlé viv ankò.’—Jòb 7:16.

• ● Kisa ki té édé’y? Jòb pwédyé bay Jéhova, èk i palé épi lòt moun. (Jòb 10:1-3) Ilayou sété on jan Jòb, èk i té ni konpasyon. Ilayou sala ankouwajé Jòb. I édé Jòb pou wè sitiwasyon-an adan an mannyè ki pli pozitiv. Osi, sa ki té pli enpòtan sé sa, Jòb aksèpté konsèy-la èk èd-la Bondyé té ba’y.

• ▸ Li konsèné Jòb: Jòb 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moziz

• ● Ki moun i té yé? Moziz sété on pwofèt ki té fidèl, èk i sété moun-lan Bondyé té sèvi pou djidé pèp li, nasyon Izwayèl.

• ● Pouki i té vlé mò? Moziz té ni an chay wèskonsabilité asou kont li, moun té ka toujou kwititjé’y, èk i té byen fatidjé. Sé pou wézon sala, i té di Bondyé: ‘Souplé, pwan lavi mwen apwézan.’—Limowo 11:11, 15.

• ● Kisa ki té édé’y? Moziz ouvè tjè’y èk i di Bondyé mannyè i té ka santi. Bondyé édé Moziz pou sépawé sé wèskonsabilité-a i té ni-an, èk sa édé’y pou ni mwens strès.

• ▸ Li konsèné Moziz: Limowo 11:4-6, 10-17.