Jéhova Ni Zyéʼy Asou Pèp Li

1. Pouki Jézi té mandé Jéhova pou pwotèkté sé disip li-a?

SWÈ-A AVAN Jézi mò, i mandé Papaʼy an bagay spésyal. I mandé Jéhova pou pwotèkté sé disip li-a. (Jan 17:15, 20) Wi, Jéhova té toujou ni zyéʼy asou pèp li. Kanmenm, Jézi té sav Satan té kay bay sé disip li-a an chay òpozisyon. Èk i té sav, sé disip li-a té kay bizwen èd Jéhova pou ganyen a bout tout sé difikilté-a Satan té kay mennen asou yo.

2. Silon Sam 33:18-20, pouki nou pa bizwen pè lè nou ka èspéyansé difikilté?

² An tan jòdi, sistenm sala ki anba kondwit Satan ka mété an chay chalè asou Kwityen ki vwé. Nou ni pou aji épi an chay difikilté ki sa dékouwajé nou, èk mété fidèlité nou pou Jéhova anba tès. Mé kon nou kay wè an atik sala, nou pa ni anyen pou pè paski Jéhova ni zyéʼy asou nou. Konsa, Jéhova ka wè sé difikilté-a nou ka èspéyansé, èk i toujou pawé pou édé nou aji épi yo. Annou konsidiwé dé ègzanp an Bib-la ki ka moutwé mannyè Jéhova ka tjenn zyéʼy “asou sé moun-lan ki ni wèspé pou li-a.”​—Li Sam 33:18-20.

LÈ NOU KA SANTI NOU PA KÒ NOU JÉHOVA KA ÉDÉ NOU

3. An ki sitiwasyon nou pé santi nou pa kò nou?

³ Magwé nou ni an chay fwè èk sè an kongwigasyon-an, délè nou pé santi nou pa kò nou. Pou ègzanp, si an jenn moun ni pou èspliké sa i ka kwè adan an lékòl li, ében si i adan an kongwigasyon nèf, i pé santi i pa kòʼy. Adan di nou pé santi twis paski nou dékouwajé épi nou pé kwè nou ni pou aji épi sa pa kò nou. Pitèt nou pa vlé di moun sa nou ka èspéyansé paski, nou ka kwè yo pa kay konpwann. Èk délè nou pé jis kwè pyèsonn pa mélé épi nou. Lè nou ka santi nou pa kò nou, sa pé fè nou santi fèb èk antjèt. Mé, Jéhova pa janmen vlé nou santi kò nou konsa. Pouki nou sa di sa?

4. Pouki pwofèt Ilaydja té di: ‘Sé mwen yonn ki wèstéʼ?

⁴ Annou konsidiwé ègzanp Ilaydja. Jèzibèl té di i té kay tjwéʼy. Konsa pou pli pasé kawant (40) jou Ilaydja té ka kouwi pou sové laviʼy. (1 Wa 19:1-9) Finalman, lè Ilaydja wivé adan an kav i di Jéhova: ‘Mwen sé sèl [pwofèt-la] ki wèsté.ʼ (1 Wa 19:10) La té ni lòt pwofèt. Pou ègzanp, Obadaya té séwé yon san (100) pwofèt pou Jèzibèl pa tjwé yo. (1 Wa 18:7, 13) Konsa, pouki Ilaydja té ka santi i pa kòʼy? Pitèt i té ka katjilé, sé pwofèt-la Obadaya té séwé-a té ja mò. Ében pitèt i té ka santi i pa kòʼy paski pyès lòt moun pa té koumansé sèvi Jéhova, apwé sa ki té fèt asou Mòn Carmel. Ében pitèt i té ka kwè, moun pa té konnèt danjé-a i té adan, ében yo pa té mélé épiʼy. Bib-la pa ka ban nou tout détay konsèné mannyè Ilaydja té ka santi kòʼy. Mé, nou sav Jéhova té konpwann santiman Ilaydja. Èk i té sav ki mannyè i té kay édéʼy.

5. Kisa Jéhova té fè pou moutwé Ilaydja i pa té pa kòʼy?

⁵ Jéhova té fè plizyè bagay pou édé Ilaydja. I ankouwajéʼy pou palé. Dé fwa i mandé Ilaydja: ‘Kisa ou ka fè isi-a?ʼ (1 Wa 19:9, 13) Épi chak fwa Jéhova koutéʼy konʼy palé hòd tjèʼy. Jéhova moutwé Ilaydja i toujou la, épi i ni an chay pouvwa. Osi, i bay Ilaydja asiwans-lan, la ni an chay lòt moun ki ka adowéʼy. (1 Wa 19:11, 12, 18) San dout, apwé Ilaydja palé bay Jéhova, épi tann wépons li, sa soulajéʼy. An lòt bagay Jéhova té fè pou édé Ilaydja sé sa, i bay twavay ki té enpòtan pouʼy fè. I voyéʼy pou annonté Hazael kon wa an Siriya, Jehu kon wa an Izwayèl, épi Ilaycha kon an pwofèt. (1 Wa 19:15, 16) Lè Jéhova té bay Ilaydja sé twavay sala pou fè, i té édéʼy pou fiksé asou bagay ki té pozitiv. Osi, Jéhova té baʼy Ilaycha kon an bon konpayn. Ki mannyè ou sa wisouvwè èd Jéhova, lè ou ka santi ou pa kòʼw?

6. Lè ou ka santi ou pa kòʼw, kisa ou sa pwédyé pou? (Sam 62:8)

⁶ Jéhova vlé nou palé éʼpiʼy an lapwiyè. I konnèt sé difikilté-a nou ka èspéyansé, épi i ka ban nou asiwans-lan, i kay kouté lapwiyè nou a népòt lè. (1 Tèsa. 5:17) I ka kontan lè nou palé épiʼy. (Pwov. 15:8) Konsa, lè ou ka santi ou pa kòʼw, kisa ou sa pwédyé pou? Fè menm kon Ilaydja èk palé bay Jéhova ofon tjèʼw. (Li Sam 62:8.) Di Jéhova tout sé bagay-la ki ka twakaséʼw, èk mannyè yo ka fèʼw santi kòʼw. Mandé Jéhova pou moutwéʼw sa pou fè, lè ou ka santi ou pa kòʼw, ében ou twis. Pou ègzanp, si an jan lékòl ou mandéʼw an kwèsyon konsèné sa ou ka kwè adan, épi ou pè pou wéponn, mandé Jéhova pou baʼw kouwaj-la pou wéponn. Ou sa jis mandé Jéhova pou baʼw lasajès-la pouʼw èspliké sa ou ka kwè adan, adan an mannyè ki dous. (Louk 21:14, 15) Èk si ou dékouwajé, mandé Jéhova pou édéʼw palé épi an Kwityen ki ni èspéyans. Ou sa mandé Jéhova pou édé moun-lan pou koutéʼw épi konpwann sitiwasyonʼw. Konsa, palé épi Jéhova ofon tjèʼw, gadé mannyè i ka wéponn lapwiyèʼw, èk aksèpté èd lézòt. Si ou fè sa, ou pa kay santi tèlman pa kòʼw.

7. Kisa ou apwann an ègzanp Mauricio?

⁷ Jéhova ban nou tout an twavay ki enpòtan pou fè. Ou sa ni konfyans-lan Jéhova ka wè, épi i ka apwésyé tout sa ou ka fè an kongwigasyon-an épi an minis-la. (Sam 110:3) Lèʼw ka fè tout sa ou pé an sèvis Jéhova, ki mannyè sa ka édéʼw lèʼw ka santi ou pa kòʼw? Konsidiwé ègzanp an fwè yo ka kwiyé Mauricio.b Touswit apwé i batizé, an bon janʼy koumansé kité lavéwité-a. Mauricio di: “Lè mwen wè bon jan mwen kité Jéhova, mwen pèd konfyans an kò mwen. Mwen katjilé: ès mwen té kay sa wèsté fidèl pou Jéhova? Mwen té ka santi annwi, èk mwen té ka kwè pyèsonn pa té kay konpwann sitiwasyon mwen.” Kisa ki té édé Mauricio? I di: “ Mwen koumansé pasé pli tan an minis-la. Sa édé mwen pou pa fiksé asou kò mwen, épi pou pa katjilé asou bagay négativ. Lè mwen té ka twavay épi lézòt an minis-la, mwen té ka kontan, èk mwen pa té ka santi tèlman annwi.” Vwéman, menm si nou pa sa alé kay an kay kon nou té ka fè avan, lè nou ékwi lèt ében pwéché asou téléfòn-lan épi sé fwè èk sè-a, sa ka fòtifyé nou. Ki lòt bagay ki té édé Mauricio? I di: “Mwen té ka fè pli an kongwigasyon-an. Lè mwen té ni an pa an sé mitin-lan, mwen té ka pwépawé byen. Sé asayman sala té ka fè mwen santi, Jéhova épi lézòt ka apwésyé mwen.”

JÉHOVA KA ÉDÉ NOU LÈ NOU DÉKOUWAJÉ

8. Lè nou ka èspéyansé mové difikilté, ki mannyè sa pé afèkté nou?

⁸ Nou sav nou kay èspéyansé difikilté diwan sé dènyé jou sala. (2 Tim. 3:1) Mé, sèten difikilté pé sipwi nou. Pou ègzanp, pitèt san ou té ka èspéyé ou pèd twavay ou. Ében pitèt dòktè diʼw ou ni an mové maladi. Ében pitèt ou pèd an moun ou enmen an lanmò. Sé difikilté sala sa fèʼw twis èk dékouwajéʼw. Sitou, lè yo ka vini yonn apwé lòt. Mé chonjé, Jéhova ni zyéʼy asou nou. Konsa, épi èd li nou sa andiwé anba népòt difikilté.

9. Mansyonnen adan sé difikilté-a Jòb té èspéyansé.

⁹ Annou konsidiwé mannyè Jéhova té édé Jòb. I sété an nonm ki té fidèl mé i spéyansé an chay mové difikilté ki té vini asouʼy san i té ka èspéyé. Pou ègzanp, an yon jou Jòb vini konnèt yo vòlè ében tjwé tout zannimoʼy, tout sèvant li mò, épi sa ki té pli mové, tout ich li mò menm jou sala. (Jòb 1:13-19) Touswit apwé sa, padan i té ka aji épi tout lapenn sala, Jòb tonbé malad épi an mové maladi ki té ka baʼy an chay doulè. I té ni plòk toupatou asou kòʼy. (Jòb 2:7) Sitiwasyonʼy té si tèlman mové, Jòb di: ‘Mwen hayi lavi mwen: Mwen pa vlé kontiné viv.ʼ​—Jòb 7:16.

10. Kisa Jéhova té fè pou édé Jòb andiwé? (Gadé pòtwé-a ki asou kouvèti-a.)

¹⁰ Jéhova té ni zyéʼy asou Jòb. Paski i té enmen Jòb, i baʼy sa i té bizwen pou wèsté fidèl. Jéhova palé épi Jòb èk i fèʼy chonjé, sé li Jéhova ki ni tout lasajès épi i mélé épi lézòm èk zannimo paski sé li ki fè yo. Jéhova palé konsèné an chay zannimo ki té èstòdinè. (Jòb 38:1, 2; 39:9, 13, 19, 27; 40:15; 41:1, 2) Osi, Jéhova sèvi an jenn nonm yo ka kwiyé Elihu pou fòtifyé èk konfòté Jòb. Elihu bay Jòb asiwans-lan, Jéhova ka toujou benni sèvant fidèl li. Mé Jéhova osi sèvi Elihu pou bay Jòb bon konsèy pou kowijéʼy. Elihu té édé Jòb pou chonjé, lè nou konpawé kò nou épi Jéhova, Kwéyatè inivès-la, nou byen piti. Èk i fè Jòb wéyalizé i té ka fiksé asou kòʼy twòp. (Jòb 37:14) An lòt bagay Jéhova té fè pou édé Jòb sé sa, i bay bon twavay pou fè. I mandé Jòb pou pwédyé bay sé twa janʼy-lan ki té péché kont Jéhova. (Jòb 42:8-10) Mé ki mannyè Jéhova ka édé nou jòdi jou lè nou ka èspéyansé mové difikilté?

11. Ki mannyè Bib-la ka konfòté nou lè nou ka èspéyansé difikilté?

¹¹ Jéhova pa ka palé épi nou diwèktiman menm kon i té palé épi Jòb. Mé i ka sèvi Pawòl-li ki an Bib-la pou palé épi nou. (Ronm 15:4) I ban nou an bèl èspwa pou tan ki ka vini ki ka konfòté nou. Annou konsidiwé déotwa pwen an Bib-la ki sa soulajé nou lè nou ka èspéyansé difikilté. An Bib-la, Jéhova ban nou asiwans-lan, la pa ni anyen, ki sa “tiwé nou an [lanmityéʼy],” pa menm mové difikilté. (Ronm 8:38, 39) Osi, i ka fè nou chonjé, i ‘pwé tout moun ki ka kwiyé asouʼyʼ an lapwiyè. (Sam 145:18) Èk Jéhova ka di nou, si nou dépan asouʼy nou sa andiwé anba népòt difikilté, épi nou sa ni tjè kontan menm si nou ka soufè. (1 Kòr. 10:13; Jémz 1:2, 12) Pawòl Bondyé ka fè nou chonjé, sè difikilté-a nou ka èspéyansé-a sé pou an ti tan, mé sé bennédiksyon-an Jéhova kay ban nou kay diwé pou tout tan. (2 Kòr. 4:16-18) Jéhova ban nou asiwans-lan i kay détwi sous difikilté nou. Sa sé Satan Denmou-an épi tout sé zèlèv li-a. (Sam 37:10) Ès ou ja apwann déotwa lévanjil pa tjè ki sa ankouwajéʼy èk édéʼw andiwé lèʼw ka èspéyansé difikilté?

12. Kisa nou ni pou fè si nou vlé jwenn bennéfis an Pawòl Bondyé?

¹² Jéhova vlé nou pwan tan pou toujou étidyé Pawòl li, épi i vlé nou katjilé asou sa nou li. Lè nou mété an pwatik sa nou apwann an Bib-la, lafwa nou ka vini pli fò, èk nou ka vini pli pwé Papa nou, Jéhova. Épi sa ka ban nou pli fòs pou andiwé anba difikilté. Jéhova osi ka bay moun ki ni konfyans an Pawòl li lisentèspwiʼy. Épi lisentèspwi Jéhova ka ban nou “pouvwa-a” nou bizwen pou andiwé népòt difikilté.​—2 Kòr. 4:7-10.

13. Kisa Èslav-la ki Fidèl èk ki ni Lasajès ka ban nou pou édé nou andiwé?

¹³ Gwanmèsi èd Jéhova, Èslav-la ki Fidèl èk ki ni Lasajès ka ban nou an chay atik, vidiyo, épi mizik pou édé nou bati lafwa ki fò, épi pou ni an bon wilasyon épi Jéhova. (Maf. 24:45) Konsa, nou ni pou byen sèvi sé pwovizyon-an Jéhova ka ban nou. Tjèk tan ki pasé, an sè an Lanméwik palé konsèné mannyè-a i ka apwésyé tout sé pwovizyon-an Jéhova ka potjiwé ban nou. I di: “Diwan sé kawant lanné-a mwen ka sèvi Jéhova, fidèlité mwen ja vini anba tès plizyè fwa.” Sè sala té ni pou aji épi plizyè mové difikilté. Pa ègzanp, an chofè ki té sou tjwé gwan papaʼy adan an aksidan. Pawanʼy tonbé malad épi yo mò. Èk li menm, té ni kansè dé fwa. Kisa ki édéʼy pou andiwé? I di: “Jéhova toujou ka pwan bon ka mwen. Manjé spiwityouèl-la Èslav-la ki Fidèl èk ki ni Lasajès-la ka potjiwé édé mwen pou andiwé. Konsa, menm kon Jòb mwen sa di: ‘Jis lè mwen mò, mwen kay wèsté fidèl pou Bondyé!ʼ​—Jòb 27:5.

14. Ki mannyè Jéhova ka sèvi sé fwè-a épi sé sè-a pou sipòté nou lè nou ni difikilté? (1 Tèsalonnika 4:9)

¹⁴ Jéhova ja enstwi pèp li mannyè-a pou enmen yonn a lòt, épi pou sipòté yonn a lòt lè yo ka èspéyansé difikilté. (2 Kòr. 1:3, 4; li 1 Tèsalonnika 4:9.) Menm kon Elihu, sé fwè èk sè nou-an pawé pou édé nou wèsté fidèl lè nou ka èspéyansé difikilté. (Twav. 14:22) Pou ègzanp, konsidiwé mannyè sé fwè-a èk sé sè-a an kongwigasyon Diane té ankouwajéʼy èk édéʼy wèsté pwé Jéhova, lè mawiʼy té ni an mové maladi. I di: “I té wèd. Mé nou santi Jéhova anbwasé nou diwan tan difisil sala. Kongwigasyon-an fè an chay bagay pou sipòté nou. Sé fwè-a èk sé sè-a vizité nou. Yo kwiyé nou asou fòn-lan. Épi yo anbwasé nou. Tout sa té édé nou pou andiwé. Sé fwè-a èk sé sè-a té ka sèvi machin yo pou mennen mwen mitin, épi an minis-la lè mwen té sa alé.” I sé vwéman an bennédiksyon pou ni fwè épi sè an kongwigasyon-an ki enmen yonn a lòt.

NOU KA APWÉSYÉ MANNYÈ-A JÉHOVA KA OTJIPÉ NOU

15. Pouki nou asiwé nou sa andiwé anba difikilté?

¹⁵ Nou tout kay èspéyansé difikilté an lavi nou. Mé kon nou ja apwann, nou pa kay janmen ni pou aji épi sé difikilté sala pa kò nou. Paski kon yon bon papa, Jéhova toujou ni zyéʼy asou nou. I pwé nou, èk i toujou pawé pou édé nou lè nou kwiyé asouʼy. (Izay. 43:2) Konsa, nou asiwé nou sa andiwé anba népòt difikilté paski, Jéhova ja ban nou tout sa nou bizwen pou andiwé. Pou ègzanp, i ban nou bèl pwivilaj-la pou palé épiʼy an lapwiyè. I ban nou Bib-la. I ka ban nou an chay manjé spiwityouèl. Épi i ban nou fwè èk sè ki enmen nou, épi ki ka édé nou lè nou bizwen èd.

16. Kisa nou ni pou fè si nou vlé Jéhova kontiné otjipé nou?

¹⁶ Sé pa dé kontan nou kontan pou ni an Papa an syèl ki ka tjenn zyéʼy asou nou. “Nou ni tjè kontan pou sa i ja fè ban nou.” (Sam 33:21) Lè nou byen sèvi tout sa Jéhova ja ban nou, nou ka moutwé nou enmen Jéhova, èk nou ka apwésyé tout sé pwovizyon-an i ka ban nou. Mé, si nou vlé Jéhova kontiné otjipé nou, nou ni pou fè tout sa nou pé pou wèsté an lanmityéʼy. Sa vlé di, nou toujou ni pou obéyi Jéhova épi fè sa ki dwèt an zyéʼy. Si nou fè sa, Jéhova kay tjenn zyéʼy asou nou pou tout tan!​—1 Pita 3:12.