Jéhova Bay Ilaydja Fòs 

Lè Jèzibèl tann sa ki té wivé sé pwofèt Bal-la, i lévé faché. Èk i voyé on konmisyon bay Ilaydja. I di’y: ‘Denmen, ou kay mò menm kon sé pwofèt Bal-la.’ Lè Ilaydja tann sa, i vini tèlman pè i kouwi alé séwé an dézè-a, èk i pwédyé. I di: ‘Jéhova, mwen pa sa pwan ankò. Djòs kité mwen mò.’ Apwé sa i té tèlman las, sonmèy pwan’y anba on pyé bwa.

Mé on nanj lévé’y tou dousman, épi nanj-lan di’y: ‘Lévé pou’w manjé.’ Lè Ilaydja ouvè zyé’y, i wè on pen won ka chofé asou déotwa wòch, bò tèt li. Èk la té ni on kawaf dlo osi. Konsa i manjé, i bwè, épi sònmèy pòté’y alé ankò. Pli ta, nanj-lan viwé lévé’y, èk nanj-lan di’y: ‘Manjé, pas ou kay bizwen fos, pou’w fè voyay-la.’ Konsa Ilaydja manjé ankò. Apwé sa, i voyajé pou kawant «40» jou èk kawant «40» nwit, jistan i wivé Mon Horèb. Lè’y wivé la, i antwé andidan on kav pou’y dòmi. Mé Jehova koumansé palé ba li. Jéhova di’y: ‘Kisa ou ka fè isi-a Ilaydja?’ I di Jéhova: ‘Jan Izwayèl pa ka fè sé bagay-la yo pwonmèt pou fè-a. Yo kwazé sé lotèl ou-a, èk yo tjwé sé pwofèt ou-a. Sé mwen yonn ki wèsté, èk atjèwlman yo vlé tjwé mwen.’

Jéhova di’y: ‘Alé doubout asou montany-lan.’ Lè sala, on gwo van koumansé vanté douvan kav-la. Apwé van-an, on twanblanntè fèt. Apwé twanblanntè-a, la té ni on difé. Èk apwé difé-a, Ilaydja tann on vwa ki té kam èk dous. Lè’y tann vwa-a i pwan had li èk i voplé fidji’y, èvèk i alé doubout dèwò kav-la. Lè sala, Jéhova mandé’y pouki i té ka kouwi alé. I di Jéhova: ‘Sèl pwofèt ki wèsté sé mwen.’ Mé Jéhova di’y: ‘La ni sèt mil «7000» moun an Izwayèl ki ka adowé mwen toujou. Konsa ou pa pa kò’w. Alé chwazi Ilaycha pou’y sa wann sèvis kon pwofèt apwé’w.’ La menm, Ilaydja alé fè sa Jéhova té di’y pou fè-a. Si’w obéyi Jéhova, ès ou kwé i kay édé’w menm kon i té édé pwofèt Ilaydja? Absoliman! Bon, annou wè kisa ki té fèt diwan tan-an lapli pa té ka tonbé an Izwayèl.