Ilaydja Ògannizé On Tès Asou Mòn Kamèl

An chay an sé wa-a ki kondwi an Wéyòm Izwayèl té méchan. Mé anpanmi yo tout, sé Wa Éhab ki té pli méchan. Madanm Éhab té méchan osi. Non’y sété Jèzibèl. Éhab épi Jèzibèl fè an chay moun adowé fo dyé-a yo té ka kwiyé Bal. Èvèk yo tjwé an chay an sé pwofèt-la osi. Kisa ou kwè Jéhova fè pou sa? Ében, Jéhova voyé pwofèt Ilaydja pou bay Éhab an konmisyon.

Ilaydja di Éhab, pou lapéti sé mové bagay-la li Éhab té ka fè-a, pyès lapli pa té kay tonbé an péyi Izwayèl. Èk pou pli pasé twa «3» lanné, pyès lapli pa tonbé. Akòz di sa, la té ni gwo lafen an péyi-a, paskè jaden sé moun-lan pa té ka pwodwi. Pli ta, Jéhova voyé Ilaydja oti Éhab ankò. Kou sala Éhab di Ilaydja: ‘Ou sé on kankannèz! Sé ou ki annékòz malè sala pou tonbé asou nou.’ Mé Ilaydja di’y: ‘Sé pa mwen ki fè lapli pa ka tonbé. Sé ou ki fè sa, paskè ou ka adowé Bal. Annou fè on tès. Sanblé nasyon-an èk sé pwofèt Bal-la asou tèt Mòn Kamèl.’

Konsa sé moun-lan asanmblé ansanm asou montany-lan. Ilaydja di yo: ‘Zòt ni pou fè lidé zòt. Si sé Jéhova ki Dyé vwé-a, sèvi’y. Si sé Bal, sèvi’y. Mé, mi sé sa nou kay fè. La ni kat san senkant «450» pwofèt Bal an plas-la. Kité yo pwépawé on sakwifis, èk kité yo kwiyé asou dyé yo. Mwen menm kay pwépawé on sakwifis, èk mwen kay kwiyé asou Dyé Jéhova. Dyé-a ki fè difé sòti an syèl pou wéponn lapwiyè-a, sé li ki Dyé vwé-a.’ Tout sé moun-lan dakò.

Konsa, sé pwofèt Bal-la pwépawé sakwifis yo, èk yo pasé tout lajounen lonng ka kwiyé dyé yo. Yo té ka di: ‘Bal, wéponn nou!’ Mé Bal pa té ka wéponn yo. Ilaydja pwan yo fè wizib. I di yo: ‘Kwiyé Bal pli fò. Pitèt sonmèy pwan’y èk i bizwen on moun pou lévé’y.’ Lannwit wivé, èk sé pwofèt Bal-la té la ka kwiyé’y toujou. Mé, yo pa twapé pyès wépons.

Lè sala, Ilaydja fè on lotèl épi douz «12» wòch, èk i fè on kannal oliwon lotèl-la. Apwé sa, i mété bwa asou lotèl-la, èk i mété sakwifis li asou bwa-a. Lè’y fini i fè yo vidé an chay dlo asou’y. Tout bagay té mouyé an twanp, èk kannal-la ki té oliwon lotèl-la té plen dlo. Lè yo fini, Ilaydja pwédyé. I di: ‘Dyé Jéhova, tanpwi souplé wéponn lapwiyè mwen, èk fè pèp sala wè, sé ou ki Dyé vwé-a.’ La menm, Jéhova fè difé sòti an syèl-la, èk difé-a konsonmé sakwifis-la, bwa-a, sé wòch-la, épi lapousyè-a. Jis dlo-a ki té an kannal-la ki sèk. Lè pèp Izwayèl wè sa, yo hélé: ‘Sé Jéhova ki Dyé vwé-a!’ Ilaydja di yo: ‘Tjébé sé pwofèt Bal-la, èk tjwé yo tout! Pa kité pyès di yo chapé!’ Jou sala, yo tjwé tout sé pwofèt Bal-la ki té la. Kat san senkant «450» di yo.

Apwé sa, on ti nwaj pawèt asou lanmè-a, èk Ilaydja di Éhab: ‘On mové tan ka vini. Pwépawé kawòs ou, èk alé lakay ou.’ Lè sala, syèl-la vini nwè, van koumansé vanté fò, èk an chay lapli koumansé tonbé. Éhab pousé kawòs li épi tout vitès li. Mé, épi èd Jéhova, Ilaydja kouwi pli vit pasé kawòs-la. Bon, ès ou kwè tout pwoblenm Ilaydja té fini a lè sala? Nou kay twapé wépons-lan pou kwèsyon sala an lòt lison-an.