SIJÉ POU LÉTID 34
Kontiné “Swiv Lavéwité-a”
Kontiné “swiv lavéwité-a.”—3 JAN 4.
CHANSON 111 Wézon Nou Ni Pou Nou Wéjwi
SA NOU KAY DISKITÉ AN ATIK SALAa
1. Lè nou palé épi yonn a lòt konsèné mannyè-a nou vini konnèt “lavéwité-a,” ki mannyè sa ka édé nou?
“KI MANNYÈ ou vini konnèt lavéwité-a?” San dout, ou ja wéponn kwèsyon sala plizyè fwa. Paski sa sé yonn an sé kwèsyon-an nou ka mandé lè nou ka éséyé pou konnèt yonn a lòt pli mèyè. Nou kontan tann mannyè sé fwè èk sè nou-an vini konnèt épi enmen Jéhova. Èk nou menm kontan di yo mannyè lavéwité-a enpòtan pou nou. (Ronm 1:11) Lè nou tjenn sé konvézasyon sala épi yonn a lòt, sa ka édé nou chonjé, lavéwité-a ni an chay valè. Osi, sa ka édé nou pou vini pli détèminé pou kontiné “swiv lavéwité-a.” Sa vlé di, pou kontiné viv adan an mannyè ki kay fè nou twapé bennédiksyon Jéhova épi favèʼy.—3 Jan 4.
2. Kisa nou kay konsidiwé an atik sala?
2 An atik sala, nou kay diskité déotwa wézon pouki nou enmen lavéwité-a. Apwé sa, nou kay diskité mannyè nou sa kontiné moutwé nou enmen bèl kado sala. San dout, sa nou kay diskité an atik sala kay édé nou pou ni pli apwésiasyon pou Jéhova, paski i mennen nou an lavéwité-a. (Jan 6:44) Osi i kay fòtifyé dézi nou pou enstwi moun lavéwité-a ki an Bib-la.
SÉ WÉZON-AN POUKI NOU ENMEN “LAVÉWITÉ-A”
3. Kisa ki pli gwo wézon-an nou ni pou enmen lavéwité-a?
3 Nou enmen lavéwité-a pou plizyè diféwan wézon. Mé pli gwo wézon-an nou enmen lavéwité-a sé sa: Nou enmen Dyé Jéhova, èk sé li ki Sous lavéwité-a. Gwanmèsi Bib-la, nou vini konnèt Jéhova sé Dyé Toupisan-an ki fè syèl-la épi latè-a. Mé nou osi vini konnèt li kon Papa nou an syèl ki enmen nou an chay, èk ki ka gadé apwé nou byen. (1 Pita 5:7) Nou konnèt Dyé nou ‘plen mizéwikòd èk konpasyon, i pa ka faché vit èk i plen lanmityé fidèl èk lavéwité.ʼ (Ègz. 34:6) Nou osi konnèt I enmen jistis. (Izay. 61:8) Lèʼy wè nou ka soufè, sa ka fè tjèʼy mal, èk i vwéman vlé, wi, i pawé pou mennen an bout pou tout soufwans nou. Èk i kay fè sa a bon lè-a. (Jér. 29:11) Mi an bèl èspwa nou ni! Vwéman nou ni bon wézon pouki nou enmen Jéhova si tèlman kon sa!
Lavéwité-a Ki An Bib-la Menm Kon . . . Tjò Fè-a Ki Ka Tjenn Batiman-an An Plas
Menm kon tjò fè-a yo ka ladjé désann an lanmè-a ka tjenbé an batiman an plas, bèl èspwa-a nou ni pou tan ki ka vini ka fòtifyé nou, èk i ka tjenn nou kam èk dous lè nou ni pwoblenm èben lè nou ka èspéyansé difikilté. Lavéwité-a ki an Bib-la ka osi bwennen nou pou patajéʼy épi lézòt pou nou sa ba yo bèl èspwa sala tou. (Gadé paragraf 4-7)
4-5. Pouki zapòt Pòl konpawé èspwa nou épi tjò fè-a yo ka ladjé désann ofon lanmè-a pou tjenbé batiman-an an plas?
4 Pou ki lòt wézon nou kontan lavéwité-a? An lòt wézon nou kontan lavéwité-a sé sa: Lavéwité-a ka ban nou an chay bennéfis. Annou konsidiwé yon ègzanp. An bèl èspwa pou tan ki ka vini, sé yonn an sé lavéwité-a ki an Bib-la. Pou édé nou konpwann valè-a èspwa sala ni, zapòt Pòl di: “Sa nou ka èspéyé èk konfyans-lan ka tjenbé lam nou fò, pou anyen pa sa chayé nou, menm kon tjò fè-a batiman-an ka ladjé désann ofon lanmè-a ka tjenbé batiman-an.” (Hib. 6:19) Konsa, menm kon tjò fè-a batiman-an ka ladjé désann ofon lanmè-a ka tjenbé batiman-an an plas, èspwa-a nou ni-an kay fòtifyé nou, èk i kay tjenn nou kam èk dous lè nou ni pwoblenm èben lè nou ka èspéyansé difikilté.
5 Lè zapòt Pòl té ka palé konsèné èspwa-a ki menm kon tjò fè-a ki ka tjenbé batiman-an an plas-la, i tè ka diskité bèl èspwa-a sé moun-lan ki annonté ni pou alé an syèl. Mé sa zapòt Pòl té di osi ni pou fè épi èspwa-a nou ni pou viv pou tout tan an pawadi-a. (Jan 3:16) San dout, bèl èspwa sala ka ban nou lakontantman, èk i ka ban lavi nou an chay valè.
6-7. Ki bennéfis Yvonne twapé lèʼy apwann lavéwité-a konsèné sa ki kay fèt an tan pou vini?
6 Annou konsidiwé èspéwéyans yon sè yo ka kwiyé Yvonne. I pa té lévé an lavéwité-a, èk lèʼy té an ti manmay i té pè lanmò. I di i ka chonjé i té li kéchòy andan an liv ki té ka di: “Yon jou, la pa kay ni denmen,” èk i pa janmen obliyé sa. I di: “Sa mwen té li-a té ka anpéché mwen dòmi lé swè paski mwen té ka katjilé konsèné sa ki té kay fèt an tan pou vini. Mwen té ka di an lidé mwen, ‘Mwen sèten sé pa sèlman i ni an lavi, la oblijé ni pli an lavi. Pouki mwen ka viv?ʼ Mwen pa té vlé mò!”
7 Pli ta, lè Yvonne té an jennès li, i jwenn Tèmwen Jéhova. I di: “Mwen koumansé kwè mwen té sa ni èspwa-a pou viv pou tout tan an pawadi-a asou latè-a.” Ki mannyè lavéwité sala té édé Yvonne? I di: “Apwézan mwen sa dòmi byen lannwit paski mʼa ka twakasé lidé mwen ka katjilé konsèné tan ki ka vini, ében lanmò.” Imajiné mannyè Yvonne ka apwésyé lavéwité-a! Èk i kontan fè lòt moun konnèt bèl èspwa-a ki an Bib-la pou tan ki ka vini.—1 Tim. 4:16.
Lavéwité-a Ki An Bib-la Menm Kon . . . An Jè Lajan
Nou sav la pa ni anyen an latè sala ki sa konpawé épi lajwa-a nou ni an sèvis Jéhova apwézan, èk bèl èspwa-a nou ni pou viv pou tout tan anba kondwit Wéyonm Bondyé touswit. I vwéman vo éfò-a. (Gadé paragraf 8-11)
8-9. (a) An yonn an sé pawabòl-la Jézi té bay, ki mannyè yon nonm té moutwé jè lajan-an té ni an chay valè pou li? (b) Ès lavéwité-a ni an chay valé pou ou?
8 Bon nouvèl-la konsèné Wéyonm Bondyé sé yonn an sé lavéwité-a ki an Bib-la. Jézi konpawé lavéwité-a konsèné Wéyonm Bondyé épi an jè lajan ki té séwé adan an tjò tè. An Mafyou 13:44, Jézi di: “Mannyè Bondyé ka kondwi sé menm kon lè an nonm jwenn an jè lajan adan on tjò tè. Lè i jwenn jè lajan sala, i viwé kouvèʼy, épi i té kontan tèlman, i alé vann tout sa i ni épi i achté tè sala.” Noté, nonm-lan pa té ka gadé pou jè lajan sala. Mé lèʼy jwenn li, i fè gwo sakwifis pou achtéʼy. Anfen, i vann tout saʼy té ni. Pouki? Sé paski i té konnèt valè-a jè lajan sala té ni. Pou li, jè lajan-an té ni otan pli valè pasé tout lòt bagay i té ni.
9 Ès sé konsa nou ka gadé lavéwité-a? Mé wi! Nou sav la pa ni anyen an latè sala ki sa konpawé épi lajwa-a nou ni an sèvis Jéhova apwézan, èk bèl èspwa-a nou ni pou viv pou tout tan anba kondwit Wéyonm Bondyé touswit. Osi, pwivilaj-la nou ni pou enjwi an bon wilasyon épi Jéhova vo népòt sakwifis ki nésésè. Vwéman, la pa ni anyen ki ka ban nou pli tjè kontan pasé lè nou ka “toujou plè Bondyé.”—Kòl. 1:10.
10-11. Kisa ki té pousé Michael pou fè gwo chanjman an laviʼy?
10 Pou twapé favè Jéhova an chay di nou té ni pou fè gwo sakwifis. Pou ègzanp, adan di nou té ni pou kité gwo pozisyon an latè-a. La ni fwè èk sè ki té ni òpòtunité-a pou vini wich mé yo doubout kouwi dèyè wichès. Épi la ni fwè èk sè ki té ni pou fè gwo chanjman an mannyè-a yo té ka viv lavi yo, lè yo apwann konsèné Jéhova. Annou konsidiwé ègzanp Michael. I pa té lévé an lavéwité-a, èk lèʼy té an jenn nonm i té apwann karati. Michael di: “Sa ki té enpòtan pou mwen sété pou fè gwo éfò pou kò mwen toujou an fòm. Délè mwen té ka santi, pyèsonn pa té sa bat mwen.” Mé lè Michael koumansé étidyé Bib-la épi Tèmwen Jéhova, i apwann mannyè Jéhova ka santi konsèné vyolans. (Sam 11:5) Michael di: “Fwè-a èk sè-a ki té ka étidyé Bib-la épi mwen pa janmen di mwen pou doubout karati. Sèl sa yo fè sé kontiné enstwi mwen lavéwité-a ki an Bib-la.”
11 Mé, pli Michael apwann konsèné Jéhova, sé pli i té enmenʼy. Sa ki té touché tjè Michael pli, sété lè i wè konpasyon-an Jéhova ni pou sèvant li. Apwé an tan, Michael wéyalizé i té ni pou fè an disizyon ki té kay chanjé laviʼy. I di: “Mwen té sav i pa té kay ézé pou mwen doubout karati, mé mwen té osi sav, sa té kay plè Jéhova. Èk mwen té asiwé i té vo népòt sakwifis mwen té ni pou fè pou mwen sa sèvi Jéhova.” Wi, Michael mété an chay valè asou lavéwité-a i apwann, èk sa pouséʼy pou fè gwo chanjman an laviʼy.—Jémz 1:25.
Lavéwité-a Ki An Bib-la Menm Kon . . . An Lanp
On lanp ki ka kléwé byen fò ka édé nou twouvé chimen-an, lè nou an nwèsè. An menm mannyè-a, Pawòl Bondyé ka édé nou twouvé chimen-an ki ka ban nou lavi, adan on latè ki plen nwèsè anba kondwit Satan. (Gadé paragraf 12-13)
12-13. Ki mannyè Bib-la té édé Mayli?
12 Bib-la ka moutwé nou valè-a lavéwité-a ni, lèʼy konpawé lavéwité-a épi an lanp ki ka kléwé an nwèsè. (Sam 119:105; Èfés. 5:8) Mayli sé an sè ki sòti péyi Azerbaijan. Lèʼy té an manmay, pawanʼy té an diféwan wilizyon. Papaʼy sété an Muslim, èk manmanʼy sété an Jwif. Mayli di: “Magwé mwen té sav la té ni an Dyé, mwen té ni an chay kwèsyon. Mwen té ka katjilé, ‘Pouki Bondyé fè lézòm? Èk pouki an moun ni pou soufè pou tout laviʼy épi apwé i mò, Bondyé té kay toumantéʼy an lanfè pou tout tan?ʼ Népòt bagay ki fèt, an chay moun ka di sé divwa Bondyé. Konsa mwen té ka katjilé, ‘Ès Bondyé ka kontwolé lézòm èk apwé i ka enjwi gadé yo soufè?ʼ”
13 Mayli kontiné pou gadé pou wépons pou sé kwèsyon-an i té ni-an. Apwé an tan i koumansé étidyé Bib-la épi i vini an Tèmwen Jéhova. I di: “Sa Bib-la ka di ka fè sans èk i si tèlman klè. Sa édé mwen pou ni tjè kontan.” Osi, i di: “Mwen wè mwen té sa ni konfyans an Bib-la, èk sa ban mwen lapé an tjè mwen épi an lidé mwen.” Menm kon Mayli, nou ka glowifyé Jéhova paski i “kwiyé [nou] sòti an nwèsè” épi mété nou “adan gwan klètéʼy-la.”—1 Pita 2:9.
14. Ki mannyè nou sa fòtifyé lanmityé nou pou lavéwité-a? (Gadé bwèt-la “Lòt Bagay Nou Sa Konpawé Lavéwité-a Épi.”)
14 An atik sala, nou annèk konsidiwé déotwa ègzanp ki ka moutwé valè-a lavéwité-a ni. San dout, ou sa katjilé konsèné an chay lòt ègzanp. Konsa lè ou ka fè létid pèsonnèl ou, ès ou sa gadé pou lòt wézon pouki nou sipozé kontan lavéwité-a? Pli ou enmen lavéwité-a, sé pli ou kay gadé pou mannyè pou moutwé ou enmenʼy.
MANNYÈ NOU KA MOUTWÉ NOU ENMEN LAVÉWITÉ-A
15. Kisa ki yon mannyè nou sa moutwé nou enmen lavéwité-a?
15 Nou ka moutwé nou enmen lavéwité-a, lè nou ka toujou fè tan pou étidyé Bib-la épi sé piblikasyon nou-an wéglé. Mé népòt kantité tan nou an lavéwité-a, la kay toujou ni bagay pou nou apwann. Pwèmyé Gad-la yo té fè an Annglé té di: “Lavéwité-a menm kon an ti flè ki an savann sèk-la. Tout oliwonʼy ni mansonj ki pawé pou touféʼy menm kon vyé zèb. Si ou vlé twapé lavéwité-a, ou ni pou toujou fè éfò pou gadé pouʼy. . . . Sé pa pouʼw satisfè épi yon ti flè lavéwité. . . . Kontiné gadé pou pli lavéwité an Bib-la.” Wi, nou ni pou fè an chay éfò pou étidyé Bib-la, mé i vo tout éfò nou ka fè pou étidyé Pawòl Bondyé.
16. Ki mannyè ou ka fè létid pèsonnèl ou? (Pwovèb 2:4-6)
16 Sé pa nou tout ki enmen étidyé, li, ében kouté Pawòl Bondyé. Mé Jéhova ka envité nou pou ‘kontiné chachéʼ èk kontiné gadé pou nou sa konpwann lavéwité-a ki an Bib-la pli mèyè. (Li Pwovèb 2:4-6.) Lè nou fè an chay éfò pou konpwann lavéwité-a ki an Bib-la, asiwé nou kay twapé bennéfis. La ni yon fwè, nonʼy sé Corey, i di lèʼy ka fè létid pèsonnèl li, i ka fiksé asou yon vèwsé èk apwé, i ka fiksé asou on lòt vèwsé. I di: “Mwen ka li chak ti nòt pou vèwsé-a èk mwen ka fè lòt wichach. . . . Lè mwen étidyé Bib mwen mannyè sala, mwen ka apwann an chay bagay!” Ki nou sèvi mannyè sala, ki nou sèvi an lòt mannyè pou étidyé Bib-la, nou ka moutwé apwésiasyon nou pou lavéwité-a lè nou pwan tan épi fè éfò pou étidyé Pawòl Bondyé.—Sam 1:1-3.
17. Kisa i vlé di pou viv lavéwité-a? (Jémz 1:25)
17 Nou sav i pa asé pou nou annèk étidyé lavéwité-a. Pou nou vwéman twapé bennéfis, nou ni pou viv lavéwité-a. Sa vlé di, nou ni pou mété sa nou apwann an pwatik an lavi nou touléjou. Sé lè nou fè sa, lavéwité-a ka ban tjè kontan. (Li Jémz 1:25.) Mé ki mannyè nou sa fè asiwé nou ka viv lavéwité-a? Yon fwè di, i bon pou nou ègzanminé lavi nou, pou wè si nou ka vwéman apliké sa nou ka apwann an Bib-la, èk pou wè koté nou bizwen fè pli mèyè. Kon zapòt Pòl té di, nou ni pou “kontiné maché menm mannyè-a nou té koumansé maché-a.”—Filip. 3:16.
18. Pouki nou ni pou fè tout sa nou sa pé pou kontiné “swiv lavéwité-a”?
18 Katjilé asou sé bennéfis-la nou ka twapé lè nou fè tout sa nou pé pou kontiné “swiv lavéwité-a”! Lè nou kontiné swiv lavéwité-a nou ka ni an pli mèyè lavi, épi nou ka ba Jéhova èk sé fwè èk sè nou-an, tjè kontan. (Pwov. 27:11; 3 Jan 4) Vwéman, nou pa ni on pli mèyè wézon pasé sa, pou enmen lavéwité-a épi pou viv lavéwité-a.
CHANSON 144 Fiksé Zyéʼw Asou Pwi-a!
a Souvan, nou ka kwiyé sa nou ka kwè adan èk mòd lavi nou, “lavéwité-a.” Mé ki nou an lavéwité tou fwé, ki nou lévé an lavéwité-a, nou tout sa twapé an chay bennéfis lè nou konsidiwé pouki nou enmen lavéwité-a. Lè nou fè sa, i kay édé nou pou fòtifyé détèminasyon nou pou twapé favè Jéhova.