Pou ki Wézon Ou Sipozé Kontiné Étidyé Bib-la?

1. Ki mannyè ou kay jwenn bennéfis si ou kontiné étidyé Bib-la?

San dout, ti ègzanminasyon sala asou lésisyon ki an Bib-la ja fòtifyé lanmityé’w pou Jéhova. Sé pou ou kontiné twavay pou fè lanmityé sala vini pli fò. (1 Pita 2:2) Ou sa jwenn lavi étonnèl si ou kontiné vansé pli pwé Bondyé kon’w ka étidyé Pawòl li.​—Li Jan 17:3; Joud 21.

Pli ou vini konnèt Bondyé, sé pli lafwa’w kay vini fò. Lafwa kay édé’w plè Bondyé. (Hibrou 11:1, 6) I kay pousé’w pou wépanti èk pou fè chanjman ki kay mennen’w bennéfis an lavi.​—Li Twavay 3:19.

2. Ki mannyè nòlaj ou konsèné Bondyé kay mennen bennéfis bay lòt moun?

Natiwèlman, ou kay vlé patajé sa’w ja apwann épi lòt moun paski nou tout kontan pou bay bon nouvèl. Kon ou kontiné étidyé Bib-la, ou kay apwann mannyè pou sèvi’y pou èspliké lafwa’w an Jéhova èk an bon nouvèl-la.​—Li Ronm 10:​13-15.

Majòwité moun ka koumansé patajé bon nouvèl-la épi jan yo èk fanmi yo avan. Palé épi pwokosyon. Pito pou ou di yo wilizyon yo pa bon, di yo konsèné pwonmèt Bondyé. Osi, chonjé ki, byen souvan bon kondwit ou sa ni pli fòs pasé pawòl ou.​—Li 2 Timòfi 2:24, 25.

3. Ki kalité wilasyon ou sa ni épi Bondyé?

Lè ou étidyé Pawòl Bondyé sa kay édé’w ni an pli bon wilasyon épi Bondyé. Apwé an lè, ou kay antwé adan an wilasyon ki byen spésyal épi Jéhova. Ou sa vwéman vini an manm fanmi’y.​—Li 2 Kòrint 6:18.

4. Ki mannyè ou sa kontiné fè pwogwé?

Ou sa fè pwogwé an wiliasyon’w épi Bondyé lè ou kontiné étidyé Pawòl li. (Hibrou 5:13, 14) Mandé yon Témwen Jéhova pou sèvi liv-la, What Does the Bible Really Teach? pou étidyé Bib-la épi’w. Pli ou apwann an Pawòl Bondyé, sé pli ou kay ni siksé an lavi’w.​—Li Sam 1:1-3; 73:27, 28.

Sé Jéhova, Dyé-a ki ni lakontantman, ki bay bon nouvèl-la. Ou sa vansé pli pwé’y lè ou vansé pli pwé pèp li. (Hibrou 10:24, 25) Si ou kontiné fè éfò pou plè Jéhova, ou kay jwenn lavi-a ki wéyèl-la—lavi étonnèl. Vwéman, pou vansé pwé Bondyé sé pli mèyè bagay-la ou sa fè.​—Li 1 Timòfi 1:11; 6:19.