LISON 7
Gwo Bidim Kay Bébèl-la
Apwé Délij-la, twa «3» gason Nowa èk madanm yo té fè an chay ich. Kon fanmi yo té ni pli moun apwézan, yo koumansé wété diféwan koté an latè-a. Èk sé sa menm Jéhova té di yo pou fè.
Malèwèzman, adan sé fanmi-an pa té obéyi Jéhova. Yo té di: ‘Annou fè an vil pou nou wété. Osi, nou kay fè an gwo bidim kay ki si tèlman ho, tèt li kay wivé jik an syèl. Lè sala tout moun kay konnèt nou.’
Jéhova pa té dakò épi sa sé moun sala té ka fè-a. Kon sa i doubout yo. Ès ou sav sa Bondyé té fè pou doubout yo? Ében sibitman, i fè yo koumansé palé diféwan langaj. Paskè yonn pa té sa konpwann lòt, yo té ni pou doubout twavay-la yo té ka fè-a. Alò, yo vin kwiyé vil-la yo té ka fè-a, Bébèl. Non sala vlé di “Konfizyon.” Apwé, moun koumansé kité plas-la pou ay wété toupatou an latè-a. Kanmenm, yo kontiné fè movèzté tout koté yo alé wété. Mé ès ou kwè la té ni moun ki té enmen Jéhova toujou? Nou kay wéponn kwèsyon sala an lòt lison-an.
“Bondyé kont sé moun-an ki ka kwè yo-a, mé i ka voyé lagwas li asou sé moun-an ki ka abésé kò yo-a.”—Jémz 4:6