Batiman Nowa

Apwé tjèk tan, la vin ni an pil moun asou latè. Majòwité di yo té mové. Jis adan nanj an syèl té vin mové. Anfen, yo kité syèl ko yo té ka wété èk yo désann asou latè kon moun. Ès ou sav poutji yo fè sa? Ében, yo fè sa pou yo sa mayé fanm asou latè.

Sé mové nanj sala fè ich épi sé fanm-lan. Sé gason yo-a té byen fò èk yo té ka pwan lavantay asou lézòt. Yo té ka fè moun soufè an chay. Mé Jéhova pa té kay kité movèzté sala kontiné. Kon sa, i désidé pou détwi mové moun adan on délij ében gwo dlo.

Kanmenm la té ni an nonm ki té diféwan. I té enmen Jéhova. Non’y sété Nowa. I té mayé èk i té ni twa «3» gason. Non sé gason’y-lan sété Shenm, Hanm, èk Jafèf, èk yo chak té ni madanm yo. Pou Nowa èk fanmi’y pa mò an délij-la, Jéhova té di Nowa pou bati an gwo batiman ében sa yo kwiyé yon ark an anglé. Jéhova té osi di’y pou mennen an chay zannimo andidan batiman-an pou yo pa mò.

Nowa té koumansé fè batiman-an la menm. Li èk fanmi’y té pwan apochan senkant «50» lanné pou fè’y. Yo bati’y menm kon Jéhova té di yo. Diwan menm tan sala, Nowa té ka osi di moun la kay ni an délij. Malèwèzman, pyèsonn pa té kouté’y.

Alafen, jou-a wivé pou yo antwé an batiman-an. Ann’ wè sa ki té fèt apwé.